1. Monna wa Mokeresete o tshwanetse go dira eng?

 MOAPOSETOLOI Paulo o ne a raya Bakeresete ba kwa Efeso a re: ‘Nnang banna ba ba godileng go fitlha mo selekanyong se Keresete a neng a godile ka sone.’ (Baef. 4:13) Banna botlhe ba Bakeresete ba tshwanetse go dirisa kgakololo eo. Se se ka ba thusang gore ba dire jalo, ke go ikobela melao ya ga Jehofa, le go dirisa melaometheo e e mo Baebeleng mo matshelong a bone. (Luke 2:52) Goreng go le botlhokwa gore bakaulengwe ba basha e nne banna ba ba tlhomang sekao?

2-3. Goreng go le botlhokwa gore mokaulengwe yo mosha e nne Mokeresete yo o tlhomang sekao?

² Monna wa Mokeresete o na le maikarabelo a botlhokwa thata mo lelapeng le mo phuthegong. Bakaulengwe ba basha, ga go pelaelo gore lo ka tswa lo ile lwa akanya ka maikarabelo a lo ka nnang le one mo nakong e e tlang. Gongwe o batla go nna mmulatsela, motlhanka wa bodiredi kgotsa mogolwane. Gape o ka tswa o batla go nyala le go nna le bana. (Baef. 6:4; 1 Tim. 3:1) Gore o kgone go fitlhelela mekgele eno, o tshwanetse go nna Mokeresete yo o tlhomang sekao. b

³ Ke eng se se ka go thusang gore o nne Mokeresete yo o tlhomang sekao? O tshwanetse go nna le bokgoni bongwe. Mme gone, ke eng se o ka se dirang gore o kgone go ipaakanyetsa maikarabelo ape fela a o ka nnang le one mo nakong e e tlang?

4. O ka etsa bomang ba ba tlhomang sekao? (Bona le setshwantsho.)

⁴ Etsa batho ba ba tlhomang sekao. Baebele e bua ka banna  bangwe ba bakaulengwe ba basha ba ka ba etsang. Banna bao, ba ne ba rata Modimo e bile ba tlhokomela batho ba gagwe ka ditsela tse di farologaneng. Gape go na le bakaulengwe ba ba tlhomang sekao ba o ka ba etsang mo lelapeng le mo phuthegong. (Baheb. 13:7) Mongwe gape yo o ka mo etsang ke Jesu Keresete. (1 Pet. 2:21) Fa o ntse o ithuta ka dinonofo tse dintle tse banna bano ba nang le tsone, leka go ba etsa.​—Baheb. 12:1, 2.

5. Ke eng se se ka go thusang gore o nne le bokgoni jwa go akanya, mme goreng seno se le botlhokwa? (Pesalema 119:9)

⁵ Nna le “bokgoni jwa go akanya.” (Diane 3:21) Motho yo o nang le bokgoni jwa go akanya, o ipha nako ya go akanya pele a dira ditshwetso ka gonne o a itse gore lepotlapotla le ja podi. Ka jalo dira ka natla gore o nne le bokgoni jono. Goreng bo le botlhokwa? Ka gonne makawana a le mantsi, a dira ditshwetso go ya ka se a se akanyang le tsela e a ikutlwang ka yone. (Diane 7:7; 29:11) Mo godimo ga moo, thelebishene, di-movie, Internet le metswedi ya go ikgolaganya le ba bangwe, di ka ama tsela e o akanyang ka yone le e o dirang dilo ka yone. Mme gone, ke eng se se ka go thusang gore o nne le bokgoni jwa go akanya? Ithute melaometheo e e mo Baebeleng mme o ipotse gore e ka go tswela mosola jang. Go tswa foo, e dirise gore e go thuse go dira ditshwetso tse di tla itumedisang Jehofa. (Bala Pesalema 119:9.) Fa o na le bokgoni jwa go akanya, o tla kgona go nna monna yo o tlhomang sekao. (Diane 2:11, 12; Baheb. 5:14) A re bone gore bokgoni jwa go akanya bo ka go tswela mosola jang: (1) fa o dirisana le bokgaitsadi le (2) fa o dira tshwetso ya gore o tla apara eng.

6. Mokaulengwe yo mosha yo o nang le bokgoni jwa go akanya a ka bontsha jang gore o tlotla bokgaitsadi?

⁶ Bokgoni jwa go akanya bo tla go thusa gore o tlotle basadi. Ka sekai, mokaulengwe yo mosha a ka nna a kgatlhegela kgaitsadi mongwe. Le fa go ntse jalo, fa a na le bokgoni jwa go akanya, ga a ka ke a dira sepe fela se se ka dirang gore kgaitsadi a akanye gore o batla go ratana le ene mme ene a sa ikemisetsa go mo nyala. (1 Tim. 5:1, 2) Fa a ratana le kgaitsadi  mongwe, o tla bontsha gore o a mo tlotla ka go tlhomamisa gore ka metlha go nna le motho yo mongwe fa ba le mmogo.​—1 Bakor. 6:18.

7. Mokaulengwe yo mosha a ka bontsha jang gore o na le bokgoni jwa go akanya fa a tlhopha diaparo?

⁷ Gape tsela e mokaulengwe yo mosha a aparang ka yone e ka bontsha gore o na le bokgoni jwa go akanya. Batho ba bantsi ba ba dirang diaparo ga ba tlotle Jehofa, e bile ga ba itshware sentle. Ka jalo ba dira diaparo tse di gagamatsang kgotsa tse di dirang gore banna ba lebege jaaka basadi. Fa mokaulengwe yo mosha yo o nang le bokgoni jwa go akanya a tlhopha diaparo, o ipotsa gore ke eng se se tla itumedisang Jehofa e bile o etsa batho ba ba tlhomang sekao mo phuthegong. A ka ipotsa go re: ‘A tsela e ke aparang ka yone e bontsha gore ke tlotla ba bangwe? A batho ba bangwe ba kgona go lemoga gore ke direla Modimo?’ (1 Bakor. 10:31-33; Tito 2:6) Bakaulengwe le bokgaitsadi ba tla tlotla mokaulengwe yo mosha yo o nang le bokgoni jwa go akanya e bile Jehofa o tla mo rata.

8. Mokaulengwe yo mosha a ka dira eng gore batho ba mo tshepe?

⁸ Dira maikarabelo a o a neilweng. Fa mokaulengwe yo mosha a dira maikarabelo a a a neilweng, ba bangwe ba tla mo tshepa. (Luke 16:10) O ka etsa sekao sa ga Jesu. O ne a sa goge dinao, go na le moo o ne a dira se Jehofa a neng a re a se dire le fa go ne go le thata. O ne a rata batho, segolobogolo barutwa ba gagwe, e bile o ile a ba swela. (Joh. 13:1) Le wena o ka dira ka natla fa o na le kabelo nngwe. Fa o sa itse gore o ka e dira jang, kopa thuso. O se ka wa nna setshwakga. (Bar. 12:11) Fa o nna o gopotse gore o “direla Jehofa, e seng batho,” o tla ntsha ga tshwene. (Bakol. 3:23) Ke nnete gore o tla dira diphoso, ka jalo ikokobetse mme o di amogele.​—Diane 11:2.

9. Goreng mokaulengwe yo mosha a tshwanetse go nna le bokgoni bongwe jo bo rileng?

⁹ O tshwanetse go nna le bokgoni bongwe jo bo rileng gore o kgone go nna mokaulengwe yo o tlhomang sekao. Bokgoni joo bo tla go thusa gore o kgone go dira maikarabelo mangwe mo phuthegong, o nne le lotseno gore o itlhokomele le ba lelapa la gago le gore o dirisane sentle le batho ba bangwe. Mma re bone gore o ka ithuta bokgoni bofe.

10-11. Go itse go bala le go kwala, go tla thusa mokaulengwe yo mosha jang le ba bangwe mo phuthegong? (Pesalema 1:1-3) (Bona le setshwantsho.)

¹⁰ Ithute go bala le go kwala. Baebele e a re motho yo o balang Lefoko la Modimo letsatsi le letsatsi e bile a akanyetsa kwa teng ka lone, o tla itumela e bile o tla atlega. (Bala Pesalema 1:1-3.) Fa monna a bala Baebele letsatsi le letsatsi, o tla itse gore ke eng se se itumedisang Jehofa, mme seo se tla mo thusa gore a dirise se a se ithutang. (Diane 1:3, 4) Go tlhokega  banna ba ba ntseng jalo mo phuthegong. Goreng re rialo?

¹¹ Bakaulengwe le bokgaitsadi ba tlhoka bakaulengwe ba ba kgonang go ba ruta le go ba gakolola ba dirisa Baebele. (Tito 1:9) Fa o itse go bala le go kwala, o tla kgona go baakanyetsa dipuo le dikakgelo tse di tla tswelang ba bangwe mosola le tse di tla nonotshang tumelo ya bone. Gape o tla kgona go kwala dintlha fa o ithuta kgotsa o reeditse dipuo kwa dipokanong le kwa dikopanong. Dintlha tseo di tla nonotsha tumelo ya gago, e bile di tla go thusa gore o kgothatse ba bangwe.

12. Ke eng se se tla go thusang gore o kgone go reetsa le go itlhalosa?

¹² Ithute go reetsa le go itlhalosa. Gore o kgone go nna Mokeresete yo o tlhomang sekao, o tshwanetse go dira jalo. Seno se raya gore o tshwanetse go reetsa le go tlhaloganya gore batho ba bangwe ba ikutlwa jang. (Diane 20:5) Go le gantsi o kgona go lemoga gore motho o ikutlwa jang ka tsela e a buang ka yone le e a lebegang ka yone mo sefatlhegong. Mme gone o ka se kgone go dira jalo fa o sa fetse nako le batho mme o nna o bua fela le bone mo didirisiweng tsa ileketeroniki. Ka jalo, go botlhokwa gore o fetse nako le batho o tlotla le bone.​—2 Joh. 12.

13. Ke eng gape se mokaulengwe yo mosha a tshwanetseng go se ithuta? (1 Timotheo 5:8) (Bona le setshwantsho.)

¹³ Ithute bokgoni bongwe jo bo tla go thusang go nna le lotseno. Monna wa Mokeresete yo o tlhomang sekao, o a itlhokomela e bile o tlhokomela le ba lelapa la gagwe. (Bala 1 Timotheo 5:8.) Mo dinageng dingwe, bakaulengwe ba basha ba ithuta bokgoni mo go borraabone kgotsa mo go bangwe ba losika. Mme mo go tse dingwe ba bo ithuta kwa sekolong. Le fa maemo a gago e ka tswa e le afe, ithute bokgoni bongwe jo bo ka go thusang gore o bone tiro. (Dit. 18:2, 3; 20:34; Baef. 4:28) Dira ka natla, mme fa o simolotse tiro, tlhomamisa gore o a e fetsa. Fa batho ba bangwe ba lemoga seo ba tla go tlotla. Gape seo se tla go thusa gore o kgone go bona tiro. Dintlha tse re setseng re tlotlile ka tsone mo setlhogong seno, di tla go thusa gore o kgone go dira maikarabelo a o ka nnang le one mo nakong e e tlang. A re tlotle ka mangwe a maikarabelo ao.

14. Ke eng se se ka thusang mokaulengwe yo mosha gore a tsenele tirelo ya nako e e tletseng?

¹⁴ O ka nna wa tsenela tirelo ya nako e e tletseng. Bakaulengwe ba bantsi ba ba tlhomang  sekao ba ile ba tsenela tirelo ya nako e e tletseng ba sa le basha. Go nna mmulatsela go ka thusa mokaulengwe yo mosha gore a ithute go dirisana le batho ba ba nang le botho jo bo sa tshwaneng. Gape go ka mo thusa gore a itse go dirisa madi sentle le gore a se ka a itsenya mo dikolotong. (Bafil. 4:11-13) Batho ba le bantsi ba simolola pele ka go nna babulatsela ba ba thusang mme moragonyana e bo e nna babulatsela ba ka metlha. Bakaulengwe ba basha le bone ba ka dira jalo. Fa o le mmulatsela, o ka kgona go dira dilo di le dintsi mo tirelong ya ga Jehofa. Ka sekai, o ka thusa mo tirong ya go aga kgotsa wa direla kwa Bethele.

15-16. Ke eng se se ka thusang mokaulengwe yo mosha gore e nne motlhanka wa bodiredi kgotsa mogolwane?

¹⁵ O ka nna motlhanka wa bodiredi kgotsa mogolwane. Bakaulengwe botlhe ba tshwanetse go dira dilo tse di tla ba thusang gore ba tshwanelege go nna bagolwane. Baebele e a re fa ba dira jalo ba “eletsa go dira tiro e e molemo.” (1 Tim. 3:1) Pele mokaulengwe e nna mogolwane, o tshwanetse go nna motlhanka wa bodiredi. Batlhanka ba bodiredi ba thusa bagolwane go tlhokomela bakaulengwe le bokgaitsadi, e bile bagolwane le batlhanka ba bodiredi ba dira ka natla mo tirong ya go rera. Mokaulengwe yo mosha e ka nna motlhanka wa bodiredi tota le fa a ise a tshware dingwaga di le 20. Mme motlhanka wa bodiredi yo o tlhomang sekao yo o setseng a tshwereng dingwaga di le 20, a ka tlhomiwa go nna mogolwane.

¹⁶ O ka dira eng gore o tshwanelege go nna motlhanka wa bodiredi kgotsa mogolwane? Baebele e a re o tshwanetse go nna le dinonofo dingwe tse di rileng. Le fa go ntse jalo, o tshwanetse go nna le tsone ka gonne o rata Jehofa, ba lelapa la gaeno le bakaulengwe le bokgaitsadi. (1 Tim. 3:1-13; Tito 1:6-9; 1 Pet. 5:2, 3) Ka jalo dira sotlhe se o ka se kgonang gore o nne le dinonofo tseo, mme o kope Jehofa gore a go thuse. c

17. Mokaulengwe yo mosha a ka ipaakanya jang fa e le gore o batla go nyala? (Bona le setshwantsho.)

¹⁷ O ka nna wa nyala. Jesu o ile a re banna bangwe ba ka nna ba tlhopha go sa nyale. (Math. 19:12) Mme fa o tlhopha go nyala, o tla nna tlhogo ya mosadi wa gago. (1 Bakor. 11:3) Jehofa o batla gore monna a rate mosadi wa gagwe, a mo tlhokomele le gore e nne tsala ya gagwe. Mo godimo ga moo, o tshwanetse go thusa mosadi wa gagwe go atamalana le Jehofa. (Baef. 5:28, 29) Mo setlhogong  seno re tlotlile ka dintlha dingwe tse di ka go thusang gore o kgone go dira maikarabelo ao. Ka sekai, re ile ra bona gore o tshwanetse go nna le bokgoni jwa go akanya, go tlotla basadi le go dira maikarabelo a o a neilweng.

18. Mokaulengwe yo mosha a ka ipaakanya jang pele a nna le bana?

¹⁸ O ka nna le bana. Fa o sena go nyala, o ka nna le bana. Go na le dilo tse dintsi tse o ka di ithutang mo go Jehofa ka go dira maikarabelo ao. (Baef. 6:4) Jehofa o ne a bolelela Morwawe gore o a mo rata le gore o a mo amogela. (Math. 3:17) Fa o nna le bana, ba bolelele gore o a ba rata o bo o ba akgolele dilo tse dintle tse ba di dirang. Borre ba ba etsang Jehofa, ba thusa bana ba bone gore e nne banna le basadi ba ba tlhomang sekao. O ka ipaakanyetsa maikarabelo ao ka go tlhokomela ba bangwe mo lelapeng le mo phuthegong, e bile o ka ba bolelela gore o a ba rata le gore ba botlhokwa. (Joh. 15:9) Go dira jalo go tla go thusa fa o nyala le fa o nna le bana. Mme gone jaanong Jehofa o tla go dirisa e bile o tla kgona go thusa ba bangwe mo phuthegong le mo lelapeng.

19-20. Ke eng se se tla thusang bakaulengwe ba basha gore e nne banna ba ba tlhomang sekao? (Bona setshwantsho se se mo khabareng.)

¹⁹ Bakaulengwe ba basha, lo tshwanetse go dira ka natla gore lo nne Bakeresete ba ba tlhomang sekao. Lo tshwanetse go nna le bokgoni jwa go akanya, go dira maikarabelo a lo a neilweng, go etsa batho ba ba tlhomang sekao, go nna le bokgoni bongwe jo bo rileng le go ipaakanyetsa maikarabelo a lo ka nnang le one mo nakong e e tlang.

²⁰ Gone ke boammaaruri gore o ka akanya gore dilo tse o tshwanetseng go di dira di dintsi thata. Mme gone o ka kgona. Nna o gopotse gore Jehofa o batla go go thusa. (Isa. 41:10, 13) Bakaulengwe le bokgaitsadi le bone ba tla go thusa, mme seo se tla dira gore o itumelele go direla Jehofa. Re a lo rata bakaulengwe ba basha, e bile re tlhatswegile pelo gore Jehofa o tla lo segofatsa fa lo ntse lo dira ka natla go nna banna ba ba tlhomang sekao.​—Diane 22:4.