Mo lekwalong le moaposetoloi Paulo a neng a le kwalela Timotheo yo le ene e neng e le mogolwane o ne a re: “Ke go laya ka tlhoafalo fa pele ga Modimo le Keresete Jesu le baengele ba ba tlhophilweng gore o ikobele ditaelo tseno o sa tlhaole e bile o sa tseye letlhakore.”​—1 Tim. 5:21.

Sa ntlha, baengele ba go buiwang ka bone ga se batlodiwa ba ba 144 000. Fa Paulo a ne a kwalela Timotheo, Bakeresete ba ba tloditsweng ba ne ba ise ba simolole go tsosediwa kwa legodimong. Ka jalo, “baengele ba ba tlhophilweng” e ka se nne baaposetoloi le batlodiwa ka gonne ka nako eo ba ne ba ise ba nne baengele.​—1 Bakor. 15:50-54; 1 Bathes. 4:13-17; 1 Joh. 3:2.

Sa bobedi, “baengele ba ba tlhophilweng” e ka se nne baengele ba ba sa ikobelang Jehofa ka nako ya Morwalela. Baengele bao ba ile ba nna mo letlhakoreng la ga Satane e bo e nna madimona, e bile e ne e le baba ba ga Jesu. (Gen. 6:2; Luke 8:30, 31; 2 Pet. 2:4) Mo nakong e e tlang, Jesu o tla latlhela baengele bano mo khuting e e kwa tengteng ka dingwaga di le 1 000. Morago ga moo, ba tla senngwa mmogo le Satane.​—Jude 6; Tshen. 20:1-3, 10.

Ka jalo, “baengele ba ba tlhophilweng” ba Paulo a buang ka bone e tshwanetse ya bo e le baengele ba ba ikanyegang ba ba dirang mmogo le “Modimo le Keresete Jesu,” ba le bone ba umakiwang mo temaneng eno.

Go na le baengele ba le bantsintsi ba ba ikanyegang. (Baheb. 12:22, 23) Go lebega Jehofa a ba neile ditiro tse di sa tshwaneng. (Tshen. 14:17, 18) Ka sekai, Jehofa o ile a laela moengele a le mongwe gore a bolaye masole a Baasiria a le 185 000. (2 Dikg. 19:35) Mme gone, baengele ba le bantsi ba ka tswa ba neilwe tiro ya go “tlosa dilo tsotlhe tse di dirang gore batho ba leofe le batho ba ba dirang dilo tse di bosula mo Bogosing jwa [ga Jesu].” (Math. 13:39-41) Ba bangwe ba ka tswa ba neilwe tiro ya go ‘phuthela ba ba tlhophilweng’ kwa legodimong. (Math. 24:31) Ba bangwe bone ba laetswe go re ‘disa mo ditseleng tsotlhe tsa rona.’​—Pes. 91:11; Math. 18:10; bapisa le Mathaio 4:11; Luke 22:43.

“Baengele ba ba tlhophilweng” ba go buiwang ka bone mo go 1 Timotheo 5:21, ba ka tswa ba ne ba neilwe kabelo ya go thusa mo dilong tse di amanang le phuthego. Mo lekwalong leno, Paulo o ne a naya bagolwane kgakololo ya gore ba ka diragatsa jang maikarabelo a bone le gore ba ba mo phuthegong ba tshwanetse go ba tlotla. Gape Paulo o ne a re bagolwane ga ba a tshwanela go ‘tlhaola ba bangwe kgotsa go tsaya letlhakore.’ Mo godimo ga moo, ga ba a tshwanela go dira ditshwetso ba sa di akanyetsa sentle. Lebaka la go bo bagolwane ba ikobela kaelo e Paulo a neng a ba naya yone, ke gore ba direla bakaulengwe le bokgaitsadi “fa pele ga Modimo le Keresete Jesu le baengele ba ba tlhophilweng.” Ka jalo, go a bonala gore baengele bangwe ba neilwe dikabelo dingwe tse di amanang le phuthego tse di jaaka, go sireletsa batlhanka ba Modimo, go thusa mo tirong ya go rera le go bolelela Jehofa ka se ba se boneng.​—Math. 18:10; Tshen. 14:6.