1. Jesu o ne a reng ka bokhutlo, mme o ne a tlhagisa barutwa ba gagwe gore ba dire eng?

 MALATSI a le mmalwa pele Jesu a swa, barutwa ba gagwe ba le banê ba ile ba mmotsa jaana: “Sesupo sa . . . malatsi a bofelo e tla nna eng?” (Math. 24:3) Barutwa bao ba ka tswa ba ne ba ipotsa gore ba tla itse jang gore Jerusalema le tempele di tlile go senngwa leng. Fa Jesu a ne a ba araba, ga a ka bua fela ka go senngwa ga Jerusalema le tempele, gape o ile a ba bolelela ka “malatsi a bofelo” a re tshelang mo go one. Jesu o ile a bua jaana ka bokhutlo: “Ga go na ope yo o itseng letsatsi leo kgotsa ura eo. Tota le baengele ba ba kwa legodimong le Morwa Modimo ga ba itse, go itse Rara fela.” Gape o ile a laela barutwa ba gagwe botlhe gore ba ‘nne ba tsogile’ le gore ba ‘nne ba disitse.’—Mar. 13:32-37.

2. Goreng Bakeresete ba bogologolo ba ne ba tshwanetse go nna ba disitse?

² Bakeresete ba bogologolo ba Bajuda ba ne ba tshwanetse go nna ba disitse gore ba kgone go falola fa motse wa Jerusalema o senngwa. Jesu o ne a bolelela barutwa ba gagwe gore ba tla bona ka eng gore nako eo e setse e le gaufi. O ne a re: “Fa lo bona Jerusalema e dikologilwe ke masole, itseng gore e gaufi le go senngwa.” Fa nako eo e goroga, ba ne ba tshwanetse go reetsa tlhagiso ya ga Jesu ba bo ba simolola go “tshabela kwa dithabeng.” (Luke 21:20, 21) Ba ba ileng ba reetsa tlhagiso ya ga Jesu ga ba a ka ba bolawa fa Baroma ba ne ba senya motse wa Jerusalema.

3. Re tlile go tlotla ka eng mo setlhogong seno?

 ³ Go setse go le gaufi thata gore lefatshe leno le le bosula le senngwe. Ka jalo, le rona re tshwanetse go nna re disitse. Mo setlhogong seno, re tlile go tlotla ka gore goreng re sa tshwanela go leka go fopholetsa gore go tlile go direga eng, gore re ka ikela tlhoko jang le gore re ka dirisa jang nako ya rona sentle.

4. Goreng re batla go itse gore dilo tse di diregang mo lefatsheng di diragatsa jang boporofeti jo bo mo Baebeleng?

⁴ Re na le mabaka a a utlwalang a go batla go bona gore dilo tse di diregang mo lefatsheng di tla diragatsa jang boporofeti jwa Baebele. Ka sekai, Jesu o ile a tlhalosa dilo tse di neng di tla direga tse di tla re thusang go bona gore lefatshe leno la ga Satane le gaufi le go fedisiwa. (Math. 24:3-14) Moaposetoloi Petere o ne a re re ele tlhoko tsela e boporofeti bo diragadiwang ka yone ka gonne fa re dira jalo, tumelo ya rona e tla tswelela e nonofile. (2 Pet. 1:19-21) Mafoko a a simololang a buka ya Tshenolo a re: “Tshenolo ya ga Jesu Keresete, e Modimo a neng a mo e naya, gore a bontshe batlhanka ba gagwe dilo tse di tla tlogang di diragala.” (Tshen. 1:1) Ka jalo, re batla go itse gore ke eng se se diregang mo lefatsheng le gore dilo tse di diregang di diragatsa jang boporofeti jo bo mo Baebeleng. Mo godimo ga moo, re ka tswa re batla go tlotla le batho ba bangwe ka dilo tse di diregang.

5. Ke eng se re sa tshwanelang go se dira, mme re tshwanetse go dira eng? (Bona le ditshwantsho.)

⁵ Mme gone, fa re tlotla ka boporofeti jwa Baebele, ga re a tshwanela go leka go fopholetsa gore go tlile go direga eng. Goreng? Ka gonne re batla gore go tswelele go na le kutlwano mo phuthegong. Ka sekai, re ka nna ra utlwa balaodi bangwe ba re ba ka kgona go rarabolola bothata bongwe jo bo rileng le gore ba ka dira gore go nne le kagiso le polokesego. Go na le go fopholetsa gore seo e tshwanetse ya bo e le go diragadiwa ga boporofeti jo bo mo go 1 Bathesalonika 5:3, re tshwanetse go itse gore dikgatisong tsa rona tsa bosheng di a reng ka kgang eo. Fa se re tlotlang ka sone se tswa mo dikgatisong tsa rona, go tla tswelela go na le kutlwano mo phuthegong e bile rotlhe re tla ‘akanya ka tsela e e tshwanang.’—1 Bakor. 1:10; 4:6.

6. Re ithuta eng mo go 2 Petere 3:11-13?

⁶ Bala 2 Petere 3:11-13. Moaposetoloi Petere o re thusa go bona lebaka la go bo re tshwanetse go sekaseka boporofeti jo bo mo Baebeleng. O ne a re re tswelele re akantse thata ka letsatsi la ga Jehofa. Ga re dire seo ka gonne re batla go itse ‘letsatsi kgotsa ura’ e Jehofa a tla tlisang ntwa ya Aramagedona ka yone. Go na le moo, re dira jalo ka gonne re batla go dirisa nako e e setseng go ‘dira ditiro tse di boitshepo le go itshwara ka tsela e e bontshang gore re ineetse mo Modimong.’ (Math. 24:36; Luke 12:40) Seno se raya gore re tshwanetse go itshwara sentle, le go netefatsa gore sengwe le sengwe se re se dirang, re se dira ka gonne re rata Jehofa. Gore re kgone go dira jalo, re tshwanetse go ikela tlhoko.

7. Re ka bontsha jang gore re ikela tlhoko? (Luke 21:34)

⁷ Jesu o ne a bolelela barutwa ba gagwe gore ba ele tlhoko se se diregang mo lefatsheng le gore ba ikele tlhoko. Mafoko a a mo go Luke 21:34 a gatelela ntlha eo. (E bale.) Jesu o ne a re: “Ikeleng tlhoko.” Motho yo o ikelang tlhoko o lemoga dilo tse di ka senyang botsala jwa gagwe le Jehofa mme o leka ka natla gore a se ka a di dira. Fa a dira jalo, Modimo  o tla tswelela a mo rata.—Diane 22:3; Jude 20, 21.

8. Moaposetoloi Paulo o ile a raya Bakeresete a reng?

⁸ Moaposetoloi Paulo o ile a bolelela Bakeresete gore ba ikele tlhoko. Ka sekai, o ne a raya Bakeresete ba kwa Efeso a re: “Elang tlhoko thata tsela e lo itshwarang ka yone, gore lo se ka lwa itshwara jaaka batho ba ba seng botlhale mme lo itshware jaaka ba ba botlhale.” (Baef. 5:15, 16) Satane o nna a leka go senya botsala jwa rona le Jehofa, ka jalo, Baebele e re gakolola gore re nne re “tlhomamise gore ke eng se Jehofa a batlang gore [re] se dire” gore re kgone go itshireletsa fa Satane a re tlhasela.—Baef. 5:17.

9. Ke eng se se ka re thusang go itse se Jehofa a batlang gore re se dire?

⁹ Baebele ga e re bolelele sengwe le sengwe se se ka senyang botsala jwa rona le Jehofa. Gantsi re tshwanetse go itirela ditshwetso mo dilong tse go sa buiweng ka tlhamalalo ka tsone mo Baebeleng. Gore re kgone go dira ditshwetso tse di siameng, re tshwanetse go itse “se Jehofa a batlang gore [re] se dire.” Go bala Baebele ka metlha le go akanyetsa kwa teng ka se re se ithutang go tla re thusa gore re kgone go dira jalo. Fa re tlhaloganya se Jehofa a batlang gore re se dire, e bile re leka go “akanya jaaka Keresete,” re tla kgona go itshwara jaaka batho ba ba botlhale le fa go se na melao e e re bolelelang gore re dire eng. (1 Bakor. 2:14-16) Ka dinako dingwe go motlhofo go lemoga se re sa tshwanelang go se dira, mme ka dinako tse dingwe ga go motlhofo.

10. Ke dilo dife tse re sa tshwanelang go di dira?

¹⁰ Dilo dingwe tse re sa tshwanelang go di dira ke go tshameka ka maikutlo a ba bangwe a lorato, go nwa thata, go ja thata, go tlhaba ba bangwe ka mafoko, go lebelela boitlosobodutu jo bo tletseng ntwa, go leba ditshwantsho tsa tlhakanelodikobo b le dilo tse dingwe tse di tshwanang le tseno. (Pes. 101:3) Mmaba wa rona yo mogolo e bong Diabolo o nna a batla se a ka se dirang go senya botsala jwa rona le Jehofa. (1 Pet. 5:8) Fa re se kelotlhoko, Satane a ka nna a dira gore re simolole go fufegela batho ba bangwe, re se ka ra ikanyega, re nne pelotshetlha, re tlhoe ba bangwe, re nne mabela e bile re se ka ra itshwarela ba bangwe. (Bagal. 5:19-21) Go ka lebega mekgwa eno e se kotsi, mme fa re sa leke go e lwantsha, e ka nna maswe le go feta e bo e re tsenya mo mathateng.—Jak. 1:14, 15.

11. Ke kotsi efe e go seng motlhofo go e lemoga e re tshwanetseng go ikela tlhoko mo go yone, mme ka ntlha ya eng?

¹¹ Kotsi nngwe e go seng motlhofo go e lemoga ke go nna ditsala le batho ba ba sa siamang. A re re o bereka le mongwe yo e seng Mosupi wa ga Jehofa. O batla gore motho yono a lemoge gore Basupi ke batho ba ba siameng, ka jalo, o nna botsalano e bile o mo thusa ka dilo tse a di tlhokang. Ka dinako dingwe o nna le ene ka nako ya dijo tsa motshegare. Fa nako e ntse e ya, o simolola go nna le ene ka metlha ka nako ya dijo. Fa lo ntse lo tlotla, motho yono o bua dilo tse di sa siamang mme ga o tshwaele. Fa nako e ntse e ya, o tlwaela metlotlo eo e bile ga o tlhole o bona sepe se se phoso ka yone. Letsatsi lengwe, o go kopa gore lo ye go iphokisa phefo morago ga tiro o bo o dumela. Go ise go ye kae, o simolola go dumalana le bontsi jwa dilo tse a di buang. A ga o akanye gore fa nako e ntse e ya, le wena o tla simolola go dira dilo tse a di dirang? Gone ke nnete gore re tshwanetse go nna botsalano e bile re tshwanetse go tlotla mongwe le mongwe. Le fa go ntse jalo, re  tshwanetse go gopola gore re tla tshwana le batho ba re fetsang nako le bone. (1 Bakor. 15:33) Fa re reetsa kgakololo ya ga Jesu ya gore re ikele tlhoko, re ka se nne ditsala le batho ba ba sa ikobeleng melao ya ga Jehofa. (2 Bakor. 6:15) Re tla kgona go lemoga dilo tse di ka re tsenyang mo mathateng, re bo re tsamaela kgakala le tsone.

12. Barutwa ba ga Jesu ba ne ba tshwanetse go dira eng fa ba emetse gore bokhutlo bo tle?

¹² Jesu o ne a sa batle gore barutwa ba gagwe ba nne fela ba sa dire sepe fa ba emetse gore bokhutlo bo tle. O ne a ba naya tiro e ba tshwanetseng go e dira. O ne a laela gore ba rere dikgang tse di molemo “mo Jerusalema, mo Judea yotlhe le Samarea, le go ya kwa dikarolong tse di kwa kgakalakgakala tsa lefatshe.” (Dit. 1:6-8) Eno e ne se kgetsi e e potlana. Fa ba ne ba dira sotlhe se ba ka se kgonang go rerela ba bangwe, ba ne ba tla bo ba dirisa nako ya bone sentle.

13. Goreng re tshwanetse go dirisa nako ya rona sentle? (Bakolosa 4:5)

¹³ Bala Bakolosa 4:5. Gore re kgone go ikela tlhoko, re tshwanetse go itlhatlhoba go bona gore re dirisa nako ya rona jang. Re ka nna ra “diragalelwa ke dilo tse [re] sa di lebelelang.” (Mor. 9:11) Mo godimo ga moo, re ka nna ra swa nako nngwe le nngwe fela.

14-15. Re ka dirisa jang nako ya rona sentle? (Bahebera 6:11, 12) (Bona le setshwantsho.)

 ¹⁴ Fa re dira se Jehofa a se batlang e bile re nonotsha botsala jwa rona le ene, re tla bo re dirisa nako ya rona sentle. (Joh. 14:21) Re tshwanetse go ‘ema re tlhomame, re sa tshikhinyege, ka metlha re na le mo gontsi go go dira mo tirong ya Morena.’ (1 Bakor. 15:58) Fa re dira jalo, re tla bo re itse gore re dirile sotlhe se re ka se kgonang go direla Jehofa fa go ka direga gore re swe kgotsa fa lefatshe leno le le bosula le fedisiwa.—Math. 24:13; Bar. 14:8.

¹⁵ Jesu o sa ntse a kaela barutwa ba gagwe fa ba ntse ba rera ka Bogosi Jwa Modimo mo lefatsheng lotlhe. O dirile se a neng a solofeditse gore o tla se dira. Jesu o dirisa dipokano le dikgatiso tsa rona go re ruta gore re ka rera jang dikgang tse di molemo. Gape o re naya sengwe le sengwe se re se tlhokang gore re kgone go dira tiro eno. (Math. 28:18-20) Fa re dira sotlhe se re ka se kgonang go rerela ba bangwe le go ba ruta, e bile re nna re disitse fa re ntse re letetse Jehofa gore a fedise lefatshe leno, re a bo re dira se Jesu a se batlang. Go dirisa kgakololo e e mo go Bahebera 6:11, 12 go tla re thusa gore re tswelele re na le tsholofelo “go fitlha fela kwa bokhutlong.”—E bale.

16. Re tshwanetse go dira eng?

¹⁶ Jehofa o setse a itse gore o tlile go fedisa leng lefatshe leno le le bosula la ga Satane. Ka nako eo, Jehofa o tlile go diragatsa boporofeti jotlhe jo bo mo Baebeleng. Le fa go ntse jalo, ka dinako dingwe go ka nna ga lebega e kete bokhutlo bo a diega. Mme letsatsi la ga Jehofa ga le kitla le “tla morago ga nako!” (Hab. 2:3) A re direng sotlhe se re ka se kgonang go nna re “lebeletse Jehofa” le go “letela Modimo wa poloko ya [rona] ka bopelotelele.”—Mik. 7:7.