1-2. Se se diragaletseng lekawana le go buiwang ka lone mo serapeng sa ntlha, se tshwana jang le se se re diragalelang?

 AKANYA ka lekawana lengwe le le godisitsweng ke batsadi ba ba humileng. Ka tshoganyetso fela, batsadi ba gagwe ba tlhagelwa ke kotsi ba bo ba tlhokafala. Tiragalo eno e mo garola pelo! Mme go ise go ye kae, o lemoga gore batsadi ba gagwe ga ba a dirisa madi a bone sentle e bile ba dirile dikoloto tse di seng kana ka sepe. Ka jalo, ga go na boswa bope jo a bo tlogeletsweng. Go na le moo, o tshwanelwa ke go duela dikoloto tse batsadi ba gagwe ba di dirileng e bile batho ba ba ba kolotang ba batla gore a dire jalo ka bonako. Ka maswabi, ga a kitla a kgona go duela dikoloto tseo.

² Le rona re diragalelwa ke se se diragaletseng lekawana leno. Batsadi ba rona ba ntlha e bong Adame le Efa, ba ne ba se na boleo e bile ba nna mo lefatsheng le lentle. (Gen. 1:27; 2:7-9) Ba ne ba ka tshelela ruri mo legaeng leo la bone ba itumetse. Mme gone, go na le sengwe se se utlwisang botlhoko se se ileng sa direga. Ba ile ba leofa. Seo se ile sa dira gore Jehofa a ba ntshe mo tshimong ya Edene, e bile ba ne ba se kitla ba kgona go tswelela ba nna mo go yone. Ba ile ba tlogelela bana ba bone boswa bofe? Baebele e a re: “Boleo bo ne jwa tsena mo lefatsheng ka motho a le mongwe [Adame], mme boleo bo ne jwa tlisa loso. Ka jalo, loso lo ne  lwa anamela kwa bathong botlhe ka gonne ba leofile botlhe.” (Bar. 5:12) Boswa jo Adame a re tlogeletseng jone ke boleo, e bile bo dira gore re swe. Boleo jono bo tshwana le sekoloto se go se nang ope wa rona yo o ka kgonang go se duela.​—Pes. 49:8.

 3. Goreng maleo a rona a tshwantshiwa le “melato” kgotsa dikoloto?

³ Jesu o ile a tshwantsha maleo le “melato” kgotsa dikoloto. (Math. 6:12; Luke 11:4) Ka jalo fa re leofa, go nna jaaka e kete re kolota Jehofa. Jehofa o na le tshwanelo ya go batla tuelo ya boleo jo re bo dirileng. Fa sekoloto seo se ne se sa duelwa, se ne se tla phimolwa fela fa re swa.​—Bar. 6:7, 23.

 4. (a) Go ne go tla direga eng ka rona fa re ne re ka se bone thuso e re e tlhokang? (Pesalema 49:7-9) (b) Lefoko “boleo” le kaya eng? (Bona lebokoso le le reng “ Boleo.”)

⁴ A re ka kgona go tshelela ruri mo lefatsheng la paradaise fela jaaka Adame le Efa? Re ne re ka se kgone, fa re sa thusiwe. (Bala Pesalema 49:7-9.) Re ne re ka se nne le tsholofelo ya go tshelela ruri kgotsa go tsosiwa mo baswing. Tota e bile, re ne re tla swa re bo re sa tshele gape, fela jaaka diphologolo.​—Mor. 3:19; 2 Pet. 2:12.

 5. Jehofa o re thusitse jang go duelela boleo jo re bo gotsitseng? (Bona setshwantsho.)

⁵ O akanya gore lekawana le re tlotlileng ka lone mo serapeng sa ntlha, le ne le tla ikutlwa jang fa monna mongwe wa mohumi a ne a ka le bolelela gore o tla duela dikoloto tsotlhe tse batsadi ba lone ba le tlogetseng ka tsone? Ga go pelaelo gore le ne le tla itumela. Ka tsela e e tshwanang, Rraarona yo o lorato e bong Jehofa, o re neile mpho e e duelelang boleo jo re bo gotsitseng mo go Adame. Jesu o ile a re: “Modimo o ratile lefatshe thata mo a ileng a ntsha Morwawe yo o tshotsweng a le esi, gore mongwe le mongwe yo o dumelang mo go ene a se ka a senngwa mme a nne le botshelo jo bo sa khutleng.” (Joh. 3:16) Gape mpho eno e re thusa go nna ditsala tsa ga Jehofa.

 6. Re tlile go tlotla ka eng mo setlhogong seno, mme ka ntlha ya eng?

⁶ Mpho e Jehofa a re neileng yone gore a re itshwarele “maleo” e re tswela mosola jang? Baebele e araba potso eno e dirisa mafoko a a jaaka go nna ditsala tsa ga Jehofa, tetlanyo, go boelana le Modimo, thekololo, go gololwa mo boleong le go tsewa re siame. Mo setlhogong seno, re tlile go bona gore mafoko ano a kaya eng. Go akanyetsa kwa teng ka se mafoko ano a se kayang, go tla dira gore re leboge Jehofa thata go bo a re itshwaretse.

 JEHOFA O BATLA GORE RE NNE DITSALA TSA GAGWE

 7. (a) Adame le Efa ba ile ba latlhegelwa ke eng gape? (b) Ke eng se bana botlhe ba ga Adame le Efa ba se tlhokang? (Baroma 5:10, 11)

⁷ Fa Adame le Efa ba sena go leofa, ba ne ba latlhegelwa ke tsholofelo ya go tshelela ruri. Gape ba ile ba se ka ba tlhola ba nna ditsala tsa ga Jehofa. Pele ba leofa, e ne e le karolo ya lelapa la ga Jehofa. (Luke 3:38) Fa ba sena go leofa, Jehofa o ile a ba leleka mo lelapeng la gagwe. Seno se diragetse pele ga ba nna le bana. (Gen. 3:23, 24; 4:1) E re ka re le bana ba bone, re ne re tlhoka mongwe yo o ka re thusang go nna ditsala tsa ga Jehofa gape. (Bala Baroma 5:10, 11.) Ka mafoko a mangwe, re ka re re ne re tlhoka go atamalana le Modimo. Buka nngwe e tlhalosa gore mafoko a Segerika a a dirisitsweng mo temaneng eno e leng “go nna tsala ya ga Jehofa,” a ka kaya go “nna tsala ya motho yo e neng e le mmaba wa gago.” Se se itumedisang ke gore Jehofa ke ene a ileng a dira gore seo se kgonege. O dirile seo jang?

TETLANYO E DIRILE GORE RE NNE DITSALA TSA GA JEHOFA

 8. (a) Tetlanyo ke eng? (b) Go boelana le Modimo go kaya eng?

⁸ Tetlanyo ke se Jehofa a ileng a se dira gore re kgone go nna ditsala tsa gagwe gape. O ile a rulaganya gore re boe re bone se se latlhegetseng Adame. Dikwalo Tsa Segerika di dirisa mafoko a a nang le bokao jo bo tshwanang le jwa lefoko “tetlanyo” e leng go boelana le Modimo. (Bar. 3:25) Go boelana le Modimo go thusa motho gore a nne le kagiso le Modimo le gore a atamalane le ene.

 9. Ke thulaganyo efe e Jehofa a ileng a e dira gore a itshwarele Baiseraele maleo a bone?

⁹ E le gore Baiseraele ba nne ditsala tsa gagwe, Jehofa o ile a dira gore go nne le thulaganyo e e neng e tla dira gore a ba itshwarele maleo. Ngwaga le ngwaga, ba ne ba tshwanetse go keteka moletlo wa Letsatsi la go Ntsha Ditlhabelo Tsa go Itshwarelwa Maleo. Mo letsatsing leo, moperesiti yo mogolo o ne a ntshetsa Baiseraele botlhe ditlhabelo ka diphologolo. Boammaaruri ke gore ditlhabelo tsa diphologolo di ne di ka se ka tsa tlosa maleo a bone ka gonne botshelo jwa diphologolo ga bo lekane le botshelo jwa batho. Le fa go ntse jalo, fa Baiseraele ba ne ba ikwatlhaya ba bo ba ntsha ditlhabelo tse Jehofa a neng a di amogela, o ne a ikemiseditse go ba itshwarela. (Baheb. 10:1-4) Ditlhabelo tse Baiseraele ba neng ba di ntsha ka Letsatsi la go Ntsha Ditlhabelo Tsa go Itshwarelwa Maleo le ka dinako tse dingwe, di ne di ba thusa go lemoga gore ke baleofi le gore ba ne ba tlhoka sengwe se se botoka se se neng se ka dira gore ba itshwarelwe maleo gotlhelele.

10. Ke eng se Jehofa a ileng a se dira gore a itshwarele batho botlhe maleo?

¹⁰ Jehofa o ile a dira eng gore a itshwarele batho maleo? O ile a ntsha Morwawe “setlhabelo gangwe fela gore a rwale maleo a batho ba le bantsi.” (Baheb. 9:28) Jesu o ile a “ntsha botshelo jwa gagwe go rekolola ba le bantsi.” (Math. 20:28) Thekololo ke eng?

THEKOLOLO E DIRILE GORE RE NNE DITSALA TSA GA JEHOFA

11. (a) Go ya ka Baebele, thekololo ke eng? (b) Ke mang yo o neng a ka kgona go ntsha thekololo?

¹¹ Baebele e a re thekololo ke tlhwatlhwa e e ntshiwang gore batho ba nne ditsala tsa Modimo gape. E dira gore re kgone go bona se se latlhegetseng Adame. Seo se direga jang? Gopola gore Adame le Efa ba ile ba latlhegelwa ke tsholofelo ya go tshelela ruri. Ka jalo, thekololo e ne e tshwanetse go duelwa ka sengwe  se se lekanang le se se latlhegileng. (1 Tim. 2:6) E ne e tshwanetse go ntshiwa ke motho (1) yo o se nang boleo, (2) yo o neng a ka kgona go tshelela ruri mo lefatsheng, e bile (3) a ikemiseditse go re ntshetsa botshelo jwa gagwe setlhabelo. Botshelo jwa motho yoo, bo ne bo tla kgona go duelela se se re latlhegetseng.

12. Goreng Jesu a ile a kgona go ntsha thekololo?

¹² Ela tlhoko mabaka ano a mararo a go bo Jesu a ile a kgona go ntsha thekololo. (1) O ne a itekanetse, e bile “ga a ka a dira boleo bope.” (1 Pet. 2:22) (2) E re ka a ne a se na boleo, o ne a ka kgona go tshelela ruri mo lefatsheng. (3) O ne a ikemiseditse go re swela. (Baheb. 10:9, 10) Pele ga Adame a leofa, ene le Jesu ba ne ba se na boleo. (1 Bakor. 15:45) Ka jalo, fa Jesu a ne a re swela, o ne a kgona go ntsha tlhwatlhwa e e neng e tlhokega gore re bone se se latlhegetseng Adame. (Bar. 5:19) Jesu o ne a nna “Adame wa bofelo.” Ga go sa tlhole go tlhokega motho yo mongwe yo o se nang boleo gore a duelele se se latlhegetseng Adame. Jesu o ile a re swela “gangwe fela.”​—Baheb. 7:27; 10:12.

13. Tetlanyo le thekololo di farologana jang?

¹³ Tetlanyo le thekololo di farologana ka eng? Tetlanyo ke se Jehofa a se dirileng gore re kgone go nna ditsala tsa gagwe gape. Thekololo ke tlhwatlhwa e e ntshitsweng gore batho ba itshwarelwe maleo. Jesu o ile a ntsha tlhwatlhwa eo ka botshelo jwa gagwe gore maleo a rona a itshwarelwe.​—Baef. 1:7; Baheb. 9:14.

JEHOFA O RE GOLOTSE MO BOLEONG LE MO LOSONG E BILE O RE TSAYA RE SIAME

14. Ke eng se re tlileng go tlotla ka sone, mme ka ntlha ya eng?

¹⁴ Tetlanyo e re tswela mosola jang? Go araba potso eno, re tlile go tlotla ka dipolelwana di le pedi tse Baebele e di dirisang. Le fa di na le bokao jo bo batlileng bo tshwana, di tla re thusa go tlhaloganya gore tsela e Jehofa a re itshwarelang ka yone e re tswela mosola jang.

15-16. (a) Go ya ka Baebele, go “gololwa” go kaya eng? (b) Re ikutlwa jang ka se Jehofa le Jesu ba re diretseng sone?

¹⁵ Baebele e a re thekololo e e ntshitsweng e dirile gore re gololwe kgotsa re rekololwe. Moaposetoloi Petere o ile a re: “Lo a itse gore ga lo a ka lwa gololwa [Seger., “ga lo a ka lwa rekololwa”] ka dilo tse di senyegang tse di jaaka selefera kgotsa gauta, mo tseleng e lo neng lo tshela ka yone e e se nang mosola e borraalonamogolo ba lo rutileng yone. Mme lo ne lwa gololwa ka madi a a tlhwatlhwakgolo a ga Keresete, a a tshwanang le a kwanyana e e se nang bogole bope e bile e le boitshepo.”​—1 Pet. 1:18, 19; ntlh.

¹⁶ Setlhabelo sa ga Jesu se dirile gore re gololwe mo boleong le mo losong, e leng dilo tse di re baketseng mathata a a seng kana ka sepe. (Bar. 5:21) Ruri re leboga go bo Jehofa le Jesu ba re golotse mo boleong le mo losong ka botshelo jwa ga Jesu!​—1 Bakor. 15:22.

17-18. (a) Go tsewa re siame go kaya eng? (b) Go tsewa re siame go re tswela mosola jang?

¹⁷ Baebele e a re Jehofa o tsaya batlhanka ba gagwe ba siame. Seno se raya gore ga re tlhoke go ntsha tlhwatlhwa nngwe gore Jehofa a re itshwarele maleo. Mme gone, seo ga se reye gore o re letlelela go dira maleo. Ga a re tseye re siame ka gonne re dirile ka natla, e bile ga a mpampetse maleo a re a dirang. O re itshwarela maleo ka gonne re bontsha gore re na le tumelo mo thekololong e re e ntsheditsweng.​—Bar. 3:24; Bagal. 2:16.

¹⁸ Re solegelwa molemo jang ke go bo Jehofa a re tsaya re siame? Bangwe ba  tlhophilwe gore ba ye go busa le Jesu kwa legodimong e bile ba bidiwa bana ba Modimo. (Tito 3:7; 1 Joh. 3:1) Ba itshwaretswe maleo, e bile go ntse jaaka e kete ga ba ise ba dire maleo ape. Ka jalo, ba tshwanelega go nna mo Bogosing Jwa Modimo. (Bar. 8:1, 2, 30) Ba bangwe bone, ba na le tsholofelo ya go tshelela ruri mo lefatsheng. Le bone Jehofa o ba itshwaretse maleo a bone, e bile ke ditsala tsa gagwe gape. (Jak. 2:21-23) Ba boidiidi jo bogolo ba ba tla falolang Aramagedona, ba na le tsholofelo ya go tshelela ruri ba sa swe. (Joh. 11:26) Batho “ba ba siameng” le “ba ba sa siamang” ba ba tlhokafetseng, ba tlile go tsosiwa. (Dit. 24:15; Joh. 5:28, 29) Go ise go ye kae, batlhanka botlhe ba ga Jehofa ba ba mo lefatsheng, ba tlile go nna le “kgololesego e e galalelang ya bana ba Modimo.” (Bar. 8:21) Ruri re lebile pele go bona fa re tla bo re se na boleo e bile re itumelela go nna ditsala le Rraarona go ya go ile!

19. Se Jehofa le Jesu ba re diretseng sone se re thusa jang? (Bona lebokoso le le reng, “ Tsela e Jehofa a re Itshwarelang ka Yone.”)

¹⁹ Ke boammaaruri gore, re ne re se na tsholofelo jaaka lekawana le re tlotlileng ka lone kwa tshimologong. O ile a latlhegelwa ke sengwe le sengwe, mme a sala ka sekoloto se a neng a ka se kgone go se duela. Mme gone, re leboga Jehofa ka gonne o ile a re thusa. O ile a rulaganya gore maleo a rona a itshwarelwe e bile Jesu o ile a ntsha thekololo. Go dumela mo go Jesu go dira gore re gololwe mo boleong le mo losong. Gape fa Jehofa a re itshwarela maleo, go nna jaaka e kete ga re ise re ke re a dire. Sa botlhokwa le go feta ke gore, re kgona go atamalana le Rraarona yo o kwa legodimong.

20. Re tlile go tlotla ka eng mo setlhogong se se latelang?

²⁰ Go akanyetsa kwa teng ka se Jehofa le Jesu ba re diretseng sone, go tla re tlhotlheletsa gore re ba leboge. (2 Bakor. 5:15) Ntle le thuso ya bone, tota re ne re tla nna ba ga mang? Mo setlhogong se se latelang, re tlile go tlotla ka dikai di le mmalwa tse di mo Baebeleng tse di tla re bontshang gore fa Jehofa a re itshwaretse, ga re tlhoke go ikutlwa molato.