SETLHOGO SE SE ITHUTIWANG 7
PINA 15 Bakang Leitibolo la ga Jehofa!
Tsela e Jehofa a Itshwarelang ka Yone e go Tswela Mosola Jang?
“Wena o itshwarela ka tsela ya mmatota.”—PES. 130:4.
SE GO BUIWANG KA SONE
Mo setlhogong seno, re tla tlotla ka dikai dingwe tse di mo Baebeleng tse di re thusang go bona gore Jehofa o itshwarela ka tsela ya mmatota. Gape setlhogo seno se tla re thusa go lebogela tsela e Jehofa a re itshwarelang ka yone.
1. Goreng go se motlhofo go itse gore motho o raya jang fa a re o go itshwaretse?
GA GO pelaelo gore o wela makgwafo fa mongwe a go raya a re o go itshwaretse, segolobogolo fa o itse gore o buile sengwe kgotsa o dirile sengwe se se mo utlwisitseng botlhoko. Mme gone, fa motho a go raya a re o go itshwaretse, o a bo a raya jang? A o raya gore lo sa ntse lo le ditsala? Kgotsa a o raya gore ga a batle go bua ka kgang eo le gore botsala jwa lona bo fedile? Boammaaruri ke gore motho a ka kaya dilo tse di farologaneng fa a re o go itshwaretse.
2. Dikwalo di tlhalosa jang tsela e Jehofa a itshwarelang ka yone? (Bona le ntlha e e kwa tlase.)
2 Tsela e Jehofa a itshwarelang ka yone e farologane le e batho ba itshwarelang ka yone. Ga go na ope yo o kgonang go itshwarela jaaka Jehofa. Mokwadi mongwe wa buka ya Pesalema o ile a re: “Wena o itshwarela ka tsela ya mmatota, gore o tle o tlotlomadiwe.” a (Pes. 130:4) Fa Jehofa a itshwarela, o itshwarela ka “tsela ya mmatota.” Re bona ka ene gore tota go itshwarela go kaya eng. Ditemana dingwe mo Dikwalong Tsa Sehebera di dirisa lefoko lengwe go tlhalosa tsela e Jehofa a itshwarelang ka yone, mme ga di dirise lefoko leo go tlhalosa tsela e batho ba itshwarelang ka yone.
3. Tsela e Jehofa a re itshwarelang ka yone e farologana jang le e re itshwarelang ka yone? (Isaia 55:6, 7)
3 Fa Jehofa a itshwarela motho yo o dirileng boleo, o phimola boleo joo gotlhelele. Seo se raya gore motho yoo a ka nna tsala ya ga Jehofa gape. Ruri re lebogela go bo Jehofa a re itshwarela ka makgetlo a le mantsi!—Bala Isaia 55:6, 7.
4. Jehofa o re thusa jang go tlhaloganya gore go itshwarela ka tsela ya mmatota go kaya eng?
4 Fa e le gore tsela e Jehofa a itshwarelang ka yone e farologane le e re itshwarelang ka yone, ke eng se se ka re thusang go tlhaloganya gore go itshwarela ka tsela ya mmatota go kaya eng? Jehofa o dirisa dikai go re thusa go tlhaloganya gore o itshwarela jang. Mo setlhogong seno, re tla tlotla ka dingwe tsa dikai tseo. Gape di tla re bontsha gore fa re ikwatlhaya, Jehofa o phimola maleo a rona e bile re kgona go nna ditsala tsa gagwe gape. Go tlotla ka dikai tseno, go tla re thusa gore re rate Jehofa le go feta e bile re tla lebogela tsela e a re itshwarelang ka yone.
JEHOFA O TLOSA BOLEO
5. Go direga eng fa Jehofa a re itshwarela maleo?
5 Mo Baebeleng, gantsi maleo a tshwantshiwa le merwalo e e bokete. Fa Kgosi Dafide a ne a tlhalosa maleo a gagwe, o ile a re: “Maleo a me a tlhatlhagane, a feta le tlhogo ya me; a mantsi thata mo ke sa kgoneng go a rwala, a tshwana le morwalo o o boima.” (Pes. 38:4) Mme gone, fa batho ba ikwatlhaya, Jehofa o ba itshwarela maleo a ba a dirileng. (Pes. 25:18; 32:5) Lefoko la Sehebera le le ranotsweng e le “go itshwarela,” le kaya go “tsholetsa sengwe.” Ka jalo, go ntse jaaka e kete Jehofa o re imolola morwalo o o bokete o re o rweleng mo magetleng.
“Itshwarela” (Pes. 32:5)
6. Jehofa o re itshwarela jang?
6 Baebele e dirisa sekai se sengwe go re bontsha kafa Jehofa a re itshwarelang ka gone. Pesalema 103:12 e a re: “Fela jaaka botlhabatsatsi bo le kgakala le bophirimatsatsi, o beile maleo a rona kgakala le rona fela jalo.” Botlhaba le bophirima di katogane fela thata e bile ga di kitla di kopana le ka motlha. Ka tsela e e tshwanang, Jehofa o beela maleo a rona kgakala le rona go feta ka tsela e re ka akanyang ka yone. Seno se re tlhatswa pelo gore tota Jehofa o a re itshwarela!
“Fela jaaka botlhabatsatsi bo le kgakala le bophirimatsatsi” (Pes. 103:12)
7. Baebele e a re Jehofa o dira eng ka maleo a rona? (Mika 7:18, 19)
7 Le fa gone Jehofa a beela maleo a re a dirileng kgakala le rona, a seno se raya gore o sa ntse a a gopola? Nnyaa. Kgosi Hesekia o ile a bua jaana ka Jehofa: “O latlhetse maleo a me otlhe kwa morago ga gago.” Kgotsa jaaka ntlha e e kwa tlase e bua, “o ne wa tlosa maleo a me otlhe fa pele ga gago.” (Isa. 38:9, 17; ntlh.) Seno se raya gore fa re ikwatlhaya, Jehofa o beela maleo a rona kgakala le rona e bile ga a boele kwa go one gape. Gape mafoko ano a ka ranolwa jaana: “O dirile gore [maleo a ke a dirileng] a nne jaaka e kete ga ke ise ke tsamaye ke a dire.” Baebele e gatelela ntlha eno mo sekaing se sengwe se se mo go Mika 7:18, 19. (E bale.) Temana eno e tlhalosa Jehofa a latlhela maleo a rona mo tengteng ga lewatle. Bogologolo fa sengwe se ne se latlhetswe mo lewatleng, go ne go ka nna thata go se bona gape.
“O latlhetse maleo a me otlhe kwa morago ga gago” (Isa. 38:17)
“O tla latlhela maleo otlhe a bone mo tengteng ga lewatle” (Mik. 7:19)
8. Re ithutile eng?
8 Baebele e tlhalosa gore fa Jehofa a re itshwarela, o phimola maleo a rona e bile ga re tlhoke go ikutlwa molato. Go ntse fela jaaka Dafide a ile a bua. O ne a re: “Go itumela ba ba itshwaretsweng diphoso le ba maleo a bone a phimotsweng; go itumela motho yo Jehofa a se kitlang a gakologelwa boleo jwa gagwe.” (Bar. 4:7, 8) Ruri Jehofa o itshwarela ka tsela ya mmatota!
JEHOFA O PHIMOLA MALEO
9. Ke sekai sefe se Jehofa a se dirisang go re thusa go tlhaloganya tsela e a re itshwarelang ka yone?
9 Setlhabelo sa ga Jesu se dira gore Jehofa a itshwarele batho ba ba ikwatlhaelang maleo a bone. Ela tlhoko sekai se sengwe se Jehofa a se dirisang. Baebele e a re Jehofa o tlhatswa maleo a rona e bile o a a tsokotsa. Seno se dira gore motho yo o leofileng a nne phepa. (Pes. 51:7; Isa. 4:4; Jer. 33:8) Jehofa o tlhalosa gore go direga eng fa a sena go re itshwarela. A re: “Le fa gone maleo a lona a le mahibidu, a tla dirwa masweu fela jaaka kapoko; le fa gone a le mahibidu jaaka letsela le le bohibidu jo bo tseneletseng, a tla nna jaaka boboa.” (Isa. 1:18) Go thata tota go ntsha patso e khibidu mo seaparong. Mme gone, Jehofa o dirisa sekai seno go re thusa go lemoga gore a ka kgona go tlhatswa maleo a rona go fitlha a sa tlhole a bonala.
“Le fa gone maleo a lona a le mahibidu, a tla dirwa masweu fela jaaka kapoko” (Isa. 1:18)
10. Ke sekai sefe se sengwe se Jehofa a se dirisang go tlhalosa tsela e a re itshwarelang ka yone?
10 Jaaka re tlhalositse mo setlhogong se se fetileng, maleo a ka tshwantshiwa le dikoloto. (Math. 6:12; Luke 11:4) Nako le nako fa re leofela Jehofa, go nna jaaka e kete sekoloto sa rona se a oketsega. Tota e bile, se sira letsatsi! Le fa go ntse jalo fa a re itshwarela, go nna jaaka e kete o phimola sekoloto sa rona e bile ga a a lebelela gore re duelele maleo a a setseng a re itshwaretse one. Fela jaaka motho a ikutlwa a gololesegile fa sekoloto sa gagwe se sena go phimolwa, le rona re ikutlwa fela jalo fa Jehofa a re itshwarela!
“O re itshwarele melato ya rona” (Math. 6:12)
11. Baebele e raya jang fa e re Jehofa o ‘phimola’ maleo a rona? (Ditiro 3:19)
11 Lefoko la Segerika e leng ‘phimola’ le le dirisitsweng mo go Ditiro 3:19, gape le ka ranolwa e le go “tlosa.” (E bale.) Ka jalo, Jehofa ga a phimole sekoloto kgotsa maleo a rona fela, gape o a a tlosa. Ka sekai, fa re utlwa gore motho o phimola sekoloto sa mongwe yo o mo kolotang, re akanya a tsaya pene a bo a thala mola mo godimo ga tlhwatlhwa ya madi a a a kolotiwang. Le fa go ntse jalo, re sa ntse re ka kgona go bona dinomoro tseo. Mme gone, go tlosa sengwe go farologana le go se phimola. Gore re kgone go tlhaloganya setshwantsho seno sentle, re tshwanetse go gopola gore go ne go le motlhofo go phimola enke e e neng e dirisiwa bogologolo. Motho o ne a ka tsaya sepontšhe se se metsi a bo a phimola se se kwadilweng. Ka jalo fa sekoloto se ne se ‘tlosiwa,’ sengwe le sengwe se ne se phimoga. Batho ba ne ba ka se tlhole ba kgona go bona se se neng se kwadilwe. Go ne go nna jaaka e kete ga se ise se ko se nne teng. Ruri go a itumedisa go itse gore Jehofa ga a phimole boleo fela, gape o a bo tlosa gore go nne jaaka e kete ga bo ise bo ko bo nne teng!—Pes. 51:9.
“Gore maleo a lona a phimolwe” (Dit. 3:19)
12. Re ithuta eng mo sekaing se Jehofa se dirisitseng sa leru le le kwenneng?
12 Go na le sekai se sengwe gape se se tlhalosang kafa Jehofa a itshwarelang maleo a rona ka gone. A re: “Ke tla tlosa melato ya gago jaaka e kete ke e khurumetsa ka leru, e bile ke tla tlosa maleo a gago jaaka e kete ke a khurumetsa ka leru le le kwenneng.” (Isa. 44:22) Fa Jehofa a re itshwarela, go nna jaaka e kete o dirisa leru le le kwenneng go khurumetsa maleo a rona gore a se ka a tlhola a bonala.
“Ke tla tlosa melato ya gago jaaka e kete ke e khurumetsa ka leru” (Isa. 44:22)
13. Re ikutlwa jang fa Jehofa a re itshwarela?
13 Dikai tseno di re ruta eng? Di re ruta gore fa Jehofa a re itshwaretse, ga re a tshwanela go tswelela re ikutlwa molato. Setlhabelo sa ga Jesu se dueletse maleo a rona. Tota e bile fa Jehofa a re itshwarela, go nna jaaka e kete ga re ise re ko re dire boleo. Eo ke tsela e Jehofa a re itshwarelang ka yone fa re ikwatlhaya.
JEHOFA O BATLA GORE RE NNE DITSALA TSA GAGWE
Fa Jehofa a re itshwarela, re kgona go nna ditsala tsa gagwe (Bona serapa 14)
14. Goreng re ka tshepa gore fa Jehofa a re itshwarela, o re itshwarela ka pelo yotlhe? (Bona le ditshwantsho.)
14 Fa Jehofa a re itshwarela, re ka tlhomamisega gore re ka nna ditsala tsa gagwe gape. Jehofa o itshwarela ka pelo yotlhe e bile ga re tlhoke go tswelela re ikutlwa molato. Ga re a tshwanela go akanya gore Jehofa o sa ntse a re galefetse le gore o batla ditsela tsa go re otlhaya. Ga a ka ke a dira jalo. Fa Jehofa a re o re itshwaretse, re tshwanetse go tshepa seo. O ile a bolelela moporofeti Jeremia a re: “Ke tla ba itshwarela molato wa bone, e bile ga nkitla ke tlhola ke gakologelwa boleo jwa bone.” (Jer. 31:34) Moaposetoloi Paulo o ile a nopola mafoko ao. O ile a re: “Ga nkitla ke tlhola ke gakologelwa maleo a bone.” (Bah. 8:12) Tota mafoko ano a kaya eng?
“Ga nkitla ke tlhola ke gakologelwa boleo jwa bone” (Jer. 31:34)
15. Baebele e raya jang fa e re Jehofa ga a kitla a gopola maleo a rona?
15 Ga se ka dinako tsotlhe Baebele e dirisang lefoko “gopola” fa e bua ka sengwe se se diragetseng mo nakong e e fetileng. Go na le moo, le ka kaya motho a dira sengwe. Senokwane se se neng se kokotetswe gaufi le Jesu se ne sa raya Jesu sa re: “Jesu, o nkgopole fa o tsena mo Bogosing jwa gago.” (Luke 23:42, 43) O ne a kopa Jesu gore a mo direle sengwe. Jesu o ile a bolelela monna yoo gore o tla mo tsosa mo baswing. Ka jalo, fa Jehofa a re ga a kitla a gopola maleo a rona, seno se raya gore o re itshwaretse le gore ga a kitla a re atlholela maleo ao.
16. Baebele e re tshwantsha le eng?
16 Fa Jehofa a re itshwarela, re ikutlwa re imologile. Baebele e dirisa sekai se sengwe go re thusa go tlhaloganya ntlha eno. E re ka re dira diphoso, re tshwantshiwa le “batlhanka ba boleo.” Mme fa Jehofa a re itshwarela, go nna jaaka e kete re batlhanka ba ba ‘golotsweng mo boleong.’ (Bar. 6:17, 18; Tshen. 1:5) Fa re itse gore Jehofa o re itshwaretse, re itumela fela jaaka motlhanka yo o golotsweng.
Lo ne lwa “gololwa mo boleong” (Bar. 6:18)
17. Goreng re ka re fa Jehofa a re itshwarela re a fola? (Isaia 53:5)
17 Bala Isaia 53:5. E re ka re dira diphoso, Baebele e re tshwantsha le batho ba ba tshwerweng ke bolwetse jo bo bolayang. Mme gone, setlhabelo sa ga Jesu se dirile gore Jehofa a kgone go re fodisa. (1 Pet. 2:24) Fa re leofa, re senya botsala jwa rona le Jehofa. Le fa go ntse jalo, Jehofa a ka re itshwarela e bile re ka nna ditsala tsa gagwe gape ka ntlha ya setlhabelo sa ga Jesu. Fela jaaka motho yo o neng a lwala a itumela fa a fola, le rona re a itumela fa re boa re nna ditsala tsa ga Jehofa e bile a re amogela gape.
“Ka ntlha ya dintho tsa gagwe, re ne ra fodisiwa” (Isa. 53:5)
TSELA E JEHOFA A RE ITSHWARELANG KA YONE E RE TSWELA MOSOLA JANG?
18. Re ithutile eng mo dikaing tse di mo Baebeleng tse di tlhalosang kafa Jehofa a re itshwarelang ka gone? (Bona le lebokoso le le reng “Kafa Jehofa a re Itshwarelang ka Gone.”)
18 Re ithutile eng mo dikaing tse di mo Baebeleng tse di tlhalosang kafa Jehofa a re itshwarelang ka gone? Fa Jehofa a re itshwarela, go nna jaaka e kete ga re ise re ke re dire boleo e bile re tlhatswegile pelo gore ga a kitla a re otlhaela boleo joo mo nakong e e tlang. Seo se dira gore re atamalane le ene. Le fa go ntse jalo, re a itse gore fa Jehofa a re itshwarela, o dira jalo ka gonne a re rata e bile a le pelotshweu, e seng ka gonne a tshwanetse go dira jalo.—Bar. 3:24.
19. (a) Ke eng se re tshwanetseng go se lebogela? (Baroma 4:8) (b) Re tla tlotla ka eng mo setlhogong se se latelang?
19 Bala Baroma 4:8. Re itumelela go bo Jehofa a re itshwarela “ka tsela ya mmatota”! (Pes. 130:4) Le fa go ntse jalo, fa re batla gore Jehofa a re itshwarele, go na le sengwe se re tshwanetseng go se dira. Ela tlhoko se Jesu a ileng a se bua. O ile a re: “Fa lo sa itshwarele batho maleo a bone, Rraalona le ene ga a kitla a itshwarela maleo a lona.” (Math. 6:14, 15) Ka jalo, re tshwanetse go etsa Jehofa mme re itshwarele ba bangwe. Mo setlhogong se se latelang re tla bona gore re ka dira seo jang.
PINA 46 Jehofa, Re a Go Leboga
a Mokwalo wa ntlhantlha wa Sehebera o dirisa mafoko a a bontshang gore Jehofa ke ene fela a itshwarelang maleo ka tsela ya mmatota. Dibaebele di le dintsi ga di tlhalose ntlha eno ya botlhokwa mo temaneng eno.
