Fa tiro ya go rera e ntse e oketsega, bakaulengwe le bokgaitsadi ba ne ba tlhoka dikgatiso tse di oketsegileng. Bakaulengwe ba kwa Bethele e e kwa Brooklyn ba ne ba gatisa dimakasine, mme ba ne ba sa ntse ba kopa dikhampani tse dingwe gore di ba gatisetse dibuka tsa khabara e e thata. Le fa go ntse jalo, go ne ga feta dikgwedi tse dintsi dikhampani tseo di sa kgone go gatisa dibuka tse di lekaneng gore di dirisiwe mo tirong ya go rera. Ka jalo, Mokaulengwe Rutherford o ne a botsa Mokaulengwe Robert Martin yo a neng a okametse feketiri gore a ba ka se kgone go ikgatisetsa dibuka.

Mokaulengwe Robert Martin o ne a re: “Leo e ne e le leano le le kgatlhang ka gonne seo se ne se raya gore re ne re tla tshwanelwa ke go bula feketiri gore re ikgatisetse dibuka.” Bakaulengwe ba ne ba hira dikago dingwe kwa 18 Concord Street kwa Brooklyn ba bo ba reka metšhini e e neng e tlhokega.

Ga se batho botlhe ba ba neng ba itumelela gore bakaulengwe ba ne ba tlile go ikgatisetsa dibuka. Mookamedi wa khampani e e neng e re gatisetsa dibuka o ne a etela feketiri ya rona e ntšha. O ne a re: “Lo na le metšhini ya maemo a a kwa godimo ya go gatisa, mme ga go na ope wa lona yo o kgonang go e dirisa. Mo dikgweding di le thataro fela, lo tla bo lo sentse metšhini eno ya lona yotlhe.”

Mokaulengwe Martin o ne a re, “Se a neng a se bua se ne se lebega se utlwala, mme gone re ne re itse gore Jehofa o ne a tla re thusa; tota e bile o ne a dira jalo.” Mokaulengwe Martin o ne a nepile. Go ise go ye kae, metšhini e mesha e ne e gatisa dibuka di le 2 000 letsatsi le letsatsi.

Kwantle ga go ikgatisetsa dibuka, batho ba ga Jehofa ba ne ba simolola mokgwa o mosha wa go anamisa dikgang tse di molemo, e leng go rera mo radiong. Ka Sontaga thapama, ka di26 tsa February, 1922, Mokaulengwe Rutherford o ne a bua lekgetlo la ntlha mo radiong. O ne a neela puo ya setlhogo  se se reng, “Dimilione Tse di Tshelang Gone Jaanong ga di Kitla di Swa” mo seteisheneng sa radio sa KOG kwa Los Angeles, California, U.S.A.

Batho ba ka nna 25 000 ba ne ba utlwa puo eo. Bangwe ba bone ba ne ba romelela Mokaulengwe Rutherford makwalo gore ba mo leboge. Lengwe la makwalo ao le ne le tswa kwa go Willard Ashford, yo o neng a nna kwa Santa Ana, California. O ne a akgola Mokaulengwe Rutherford ka gonne a neetse puo e e “kgatlhang e bile e le monate.” Gape o ne a re: “Mo lelapeng la rona, go ne go na le batho ba bararo ba ba lwalang ba ba neng ba sa kgone go tswa mo ntlong. Ka jalo, re ne re ka se ka ra kgona go reetsa puo ya gago tota le fa o ka tswa o ne o e neela gaufi le kwa re nnang gone.”

Go ne go tla neelwa dipuo tse dingwe mo dibekeng tse di neng di tla latela di gasiwa mo radiong. Fa ngwaga o fela, makasine wa Tora ya Tebelo o ne wa re “batho ba ka nna 300 000 ba ne ba amogetse molaetsa ka waelese [radio].”

Makwalo le dikakgelo tse batho ba neng ba di romela, di ne tsa dira gore Baithuti ba Baebele ba age seteishene sa radio kwa Staten Island, e leng lefelo le le neng le se kgakala le Bethele ya kwa Brooklyn. Mo dingwageng tse di latelang, Baithuti ba Baebele ba ne ba tla dirisa seteishene sa radio sa WBBR go anamisa molaetsa wa Bogosi.

Makasine wa Tora ya Tebelo wa June 15, 1922, o ne wa itsise ka kopano e e neng e tla tshwarelwa kwa Cedar Point, Ohio, go simologa ka di5 go fitlha ka di13 tsa September 1922. Baithuti ba Baebele ba ne ba itumetse thata fa ba fitlha kwa Cedar Point.

Mo puong ya gagwe ya ntlha, Mokaulengwe Rutherford o ne a bolelela batho ba ba neng ba mo reeditse jaana: “Ke tlhatswegile pelo gore Morena o tla . . . segofatsa kopano eno le gore o tla tlhomamisa gore go neelwa bosupi ka tsela e bo iseng bo ke bo neelwe ka yone mo lefatsheng.” Mo kopanong eo, gangwe le gape dibui di ne di rotloetsa bakaulengwe le bokgaitsadi gore ba ye go rera.

Go tswa foo, ka Labotlhano ka di8 tsa September, batho ba ka nna 8 000 ba ba neng ba le mo holong, ba ne ba lebile pele go reetsa puo ya ga Mokaulengwe Rutherford. Ba ne ba solofetse gore o ne a tlile go tlhalosa ditlhaka tse di reng “ADV,” tse di neng di kwadilwe mo ditaletsong tsa bone. Ga go pelaelo gore fa bangwe ba bone ba nna fa fatshe, ba ne ba lemoga seile e kgolo e e mennweng e e  neng e le kwa godimo ga serala. Arthur Claus, yo a neng a tlile kopanong a tswa kwa Tulsa, Oklahoma, U.S.A., o ne a bona manno mo lefelong le a neng a ka kgona go utlwa dipuo sentle. Ka nako eo, go ne go le thata tota gore motho a utlwe sentle ka gonne go ne go se na dimaekerofounu le dibuelagodimo tse di godisang mantswe.

E le go dira gore go se ka ga nna le dikgoreletsi, modulasetulo o ne a dira kitsiso ya gore ga go na ope yo o tla letlelelwang go tsena mo holong fa Mokaulengwe Rutherford a setse a simolotse go neela puo. Ka 9:30 mo mosong, Mokaulengwe Rutherford o ne a simolola puo ya gagwe ka go nopola mafoko a ga Jesu a a mo go Mathaio 4:17 a a reng: “Bogosi jwa legodimo bo atametse.” (King James Version) Fa a ne a bua ka tsela e batho ba tla utlwang ka Bogosi jono ka yone, o ne a re: “Jesu o ne a itsise gore ka nako ya go nna gone ga gagwe o ne a tla etelela pele tiro ya batho ba gagwe ya go roba e mo go yone a neng a tla phuthela kwa go ene batho ba ba ratang boammaaruri e bile ba ikanyega.”

Mokaulengwe Claus yo a neng a ntse mo holong e sebui se neng se le mo go yone, a re: “Re ne re reeditse lefoko lengwe le lengwe le a neng a le bua ka kelotlhoko.” Le fa go ntse jalo, ka tshoganyetso fela Mokaulengwe Claus o ne a lwala mme a tshwanelwa ke go tswa mo holong. Mokaulengwe Arthur o ne a tswa mo holong tota le fa a ne a sa batle go tswa ka gonne o ne a itse gore a ka se letliwe go boela mo holong fa Mokaulengwe Rutherford a tsweletse ka puo.

Morago ga metsotso e sekae, o ne a simolola go ikutlwa botoka. A re fa a boa a lebile kwa holong, o ne a utlwa batho ba opela diatla kwa godimo. Seo se ne sa dira gore a itumele thata. O ne a ipolelela gore o tlile go reetsa karolo e e setseng ya puo eo e e monate le fa a ne a ka tshwanelwa ke go palamela kwa marulelong gore a kgone go e utlwa. Mokaulengwe Claus yo ka nako eo a neng a na le dingwaga di le 23, o ne a kgona go palamela kwa marulelong. E re ka marulelo a a bonaletsang a a jaaka difensetere a ne a butswe, o ne a kgona go utlwa puo eo sentle fa a ntse a atamela.

 Mokaulengwe Arthur e ne e se ene fela kwa marulelong. Bangwe ba ditsala tsa gagwe le bone ba ne ba le koo. Mongwe wa bone, e bong Frank Johnson o ne a ya kwa go ene a bo a mmotsa jaana, “A o na le thipa?”

Arthur o ne a mo raya a re, “Ee, ke na le yone.”

Frank o ne a re, “Re ntse re rapelela gore re bone mongwe yo o nang le thipa. A o bona seile e e mennweng ele? E gokeletswe mo dipekereng tseno. Ka jalo, reetsa ka kelotlhoko fa Moatlhodi * a bua. Fa a re ‘itsiseng, itsiseng’ o kgaole dithapo tseno tse nnê.”

Fa Arthur a ntse a tshwere thipa ka seatla, ene le ditsala tsa gagwe ba ne ba letela go utlwa mafoko a ga Mokaulengwe Rutherford. Go ise go ye kae, ke fa Mokaulengwe Rutherford a bua karolo ya botlhokwa ya puo ya gagwe. O ne a itumetse, a le matlhagatlhaga gongwe e bile a bua ka lentswe le le kwa godimo a re: “Nnang basupi ba ba ikanyegang le ba boammaaruri ba Morena. Tswelelang pele mo tlhabanong go fitlha motlhalanyana ope fela wa Babelona o nyeletse gotlhelele. Bolelang molaetsa ono gongwe le gongwe. Lefatshe le tshwanetse go itse gore Jehofa ke Modimo le gore Jesu Keresete ke Kgosi ya dikgosi le Morena wa barena. Leno ke letsatsi le le gaisang malatsi otlhe. Bonang, Kgosi e a busa! Lona lo baemedi ba yone ba ba e itsiseng. Ka gone, itsiseng, itsiseng, itsiseng, Kgosi le bogosi jwa yone!”

Mokaulengwe Arthur o tlhalosa gore ene le bakaulengwe ba bangwe ba ne ba kgaola dithapo tsa seile, mme seile eo e ne ya phuthologela kwa tlase ka iketlo. Ditlhaka tse di reng “ADV” e ne e le khutshwafatso ya lefoko la Seesemane e leng “advertise” le le kayang go ‘rera’ kgotsa go ‘neela bosupi.’

Kwa kopanong e e neng e tshwaretswe kwa Cedar Point bakaulengwe ba ne ba thusiwa go tlhoma mogopolo mo tirong ya botlhokwa ya go rera ka Bogosi, ka jalo botlhe ba ba neng ba rata go ithaopa ba ne ba itumelela go nna le seabe mo tirong eo. Morekisi mongwe wa dibuka (yo gone jaanong a bidiwang mmulatsela) wa kwa Oklahoma, U.S.A., o ne a kwala jaana: “Re ne re rera kwa mafelong a kwa go one batho ba le bantsi ba berekang kwa meepong ya malatlha e bile ba humanegile.” O ne a re gantsi fa batho ba ne ba utlwa molaetsa o o mo makasineng wa The Golden Age “ba ne ba thubega ka selelo.” A re, “Go itumedisa tota go ba gomotsa.”

Baithuti bano ba Baebele ba ne ba itse kafa mafoko ano a ga Jesu a a mo go Luke 10:2 a leng botlhokwa ka gone: “Thobo e kgolo, mme badiri ba mmalwa.” Fa ngwaga o fela, ba ne ba rotloetsega le go feta gore ba itsise molaetsa wa Bogosi gaufi le kgakala.