1. Ke eng se re se tlhokang gore re itumele?

 BOITUMELO jwa mmatota ga se maikutlo fela a motho a nnang le one ka dinako dingwe. Motho a ka kgona go itumela botshelo jwa gagwe jotlhe. Seo se ka direga jang? Mo Therong ya gagwe ya Kwa Thabeng, Jesu o ne a tlhalosa gore re ka kgona go itumela, fa a ne a re: “Go itumela batho ba ba lemogang gore ba tlhoka go ithuta ka Modimo.” (Math. 5:3) Jesu o ne a itse gore batho ba bopilwe ba na le keletso e e maatla ya go itse le go obamela Mmopi wa bone, e bong Jehofa Modimo. Seo ke se re se tlhokang. Mme e re ka Jehofa e le “Modimo yo o itumetseng,” ba ba mo obamelang le bone ba ka itumela.—1 Tim. 1:11.

2-3. (a) Jesu a re ke bomang gape ba ba ka itumelang? (b) Re tlile go tlotla ka eng mo setlhogong seno, mme goreng go le botlhokwa gore re dire jalo?

² A re ka itumela fela fa re se na mathata? Nnyaa. Jesu o ne a bua sengwe se se gakgamatsang. O ne a re tota le “batho ba ba hutsafetseng” ka gonne ba ikutlwa molato thata ka ntlha ya maleo a ba a dirileng kgotsa diphoso tse ba di dirileng, ba ka kgona go itumela. Gape Jesu o ne a re “batho ba ba bogisediwang go bo ba dira se se siameng,” kgotsa ba ba bogang ka go bo batho ba ba “kgoba” ka gonne e le barutwa ba gagwe, ba ka itumela. (Math. 5:4, 10, 11) Mme gone, a go a kgonega gore motho a itumele a le mo maemong ao?

³ Jesu o ne a re ruta gore go sa nne le mathata ga go dire gore motho a itumele, go na le moo go ithuta ka Modimo le go  atamalana le ene ke gone mo go dirang gore a itumele. (Jak. 4:8) Re ka dira seo jang? Mo setlhogong seno, re tlile go tlotla ka dilo tse tharo tse di ka re thusang gore re itumele ka tsela ya mmatota.

4. Selo sa ntlha se re ka se dirang gore re itumele ka tsela ya mmatota ke sefe? (Pesalema 1:1-3)

⁴ SA NTLHA: Gore re itumele ka tsela ya mmatota, re tshwanetse go bala le go ithuta Baebele. Batho le diphologolo ba tlhoka dijo gore ba tshele. Le fa go ntse jalo, batho ke bone fela ba ba ka kgonang go bala le go ithuta Baebele. E bile ba tshwanetse go dira jalo. Ke gone ka moo Jesu a neng a re: “Motho ga a tshwanela go tshela ka senkgwe fela, mme o tshwanetse go tshela ka lefoko lengwe le lengwe le le tswang mo molomong wa ga Jehofa.” (Math. 4:4) Ka jalo, ga re a tshwanela go letla letsatsi le feta re sa bala Lefoko la Modimo le le botlhokwa e leng Baebele. Mopesalema o ne a re: ‘Go itumela motho yo o itumedisiwang ke molao wa ga Jehofa e bile a o balela kwa tlase motshegare le bosigo.’—Bala Pesalema 1:1-3.

5-6. (a) Re ithuta eng mo Baebeleng? (b) Go bala Baebele go re thusa ka ditsela dife?

⁵ E re ka Jehofa a re rata, o dirisa Baebele go re bolelela se re ka se dirang gore re itumelele botshelo. Mo go yone, re ithuta maikaelelo a gagwe ka botshelo jwa rona. Re ithuta gore re ka atamalana le ene jang le gore re tshwanetse go dira eng gore a itshwarele maleo a rona. E bile re ithuta ka tsholofelo e e itumedisang e a re solofetsang yone ka bokamoso. (Jer. 29:11) Boammaaruri jo re bo  ithutang mo Baebeleng bo dira gore re itumele fela thata!

⁶ Re a itse gore Baebele e na le kgakololo e e mosola e e ka re thusang mo botshelong. Fa re dirisa kgakololo eo, re ka itumela. Fa mathata a botshelo a go kgoba marapo, iphe nako e e oketsegileng ya go bala Lefoko la ga Jehofa le go akanyetsa kwa teng ka lone. Jesu o ne a re: “Go itumela ba ba utlwang lefoko la Modimo e bile ba le ikobela!”—Luke 11:28.

7. Ke eng se se tla go thusang gore o solegelwe molemo ke nako e o e fetsang o bala Lefoko la Modimo?

⁷ Fa o bala Lefoko ka Modimo, iphe nako ya go itumelela se o se balang. Ka sekai, a re re mongwe o go apeela dijo tse o di ratang. Le fa go ntse jalo, o di ja o itlhaganetse o sa iphe nako ya go di itumelela ka gonne o se na nako e e lekaneng ya go ja kgotsa o iteilwe tsebe ke go akanya ka dilo dingwe. Mme fa di sena go fela, o lemoga gore o jetse ka bonako e bile o eletsa e kete o ka bo o ile wa ja ka iketlo gore o di itumelele. Go ka direga se se tshwanang fa re bala Baebele. Ka dinako dingwe re ka balela ka bonako mo re sa ipheng nako ya go tlhaloganya le go itumelela se re se balang. Iphe nako ya go itumelela go bala Lefoko la Modimo, bona se se diregang ka leitlho la mogopolo, leka go akanya ka mantswe a batho ba go buiwang ka bone le ka se o se balang. Fa o dira jalo, o tla itumela thata.

8. “Motlhanka yo o boikanyego le yo o botlhale” o dira maikarabelo a gagwe jang? (Bona le ntlha e e kwa tlase.)

⁸ Jesu o tlhomile “motlhanka yo o boikanyego le yo o botlhale” gore a re neye dijo ka nako e e tshwanetseng, e leng dijo tse di dirang gore re atamalane le Jehofa e bile re di newa di le dintsi. * (Math. 24:45) Mo dijong tse motlhanka yo o boikanyego a re nayang tsone, Baebele ke sone selo sa konokono se a se dirisang. (1 Bathes. 2:13) Ka jalo, dijo tseo di re thusa go itse tsela e Jehofa a akanyang ka yone jaaka a e tlhalosa mo Baebeleng. Ke gone ka moo re balang makasine wa Tora ya Tebelo le wa Tsogang! le ditlhogo tse di tlhagang mo jw.org. Re baakanyetsa dipokano tsa mo gare ga beke le tsa mafelobeke. E bile re leba thulaganyo ya kgwedi le kgwedi ya JW Broadcasting^® fa e le teng. Fa re nna re bala e bile re ithuta Lefoko la Modimo, re tla kgona go dira selo sa bobedi se se tla re thusang gore re bone boitumelo jwa mmatota.

9. Selo sa bobedi se se ka dirang gore re bone boitumelo jwa mmatota ke sefe?

⁹ SA BOBEDI: Gore re kgone go itumela ka tsela ya mmatota, re tshwanetse go ikobela melao ya ga Jehofa. Mopesalema o ne a re: “Go itumela mongwe le mongwe yo o boifang Jehofa, yo o tsamayang mo ditseleng tsa Gagwe.” (Pes. 128:1) Go boifa Jehofa go kaya go mo tlotla thata, mo e leng gore re tila go dira sepe fela se se ka mo utlwisang botlhoko. (Diane 16:6) Ka jalo, re dira sotlhe se re ka se kgonang gore re ikobele melao ya ga Jehofa ya se se siameng le se se sa siamang jaaka a e tlhalosa mo Baebeleng. (2 Bakor. 7:1) Re tla itumela tota fa re dira dilo tse Jehofa a di ratang mme re tila tse a di tlhoileng.—Pes. 37:27; 97:10; Bar. 12:9.

10. Go ya ka Baroma 12:2, re na le maikarabelo afe?

¹⁰ Bala Baroma 12:2. Motho a ka tswa a itse gore Jehofa o na le tshwanelo ya go re beela melao ya se se siameng le se se sa siamang, le fa go ntse jalo o tshwanetse go dira tshwetso ya go ikobela melao eo ya Modimo. Ka sekai, motho a ka tswa a itse gore puso e na le tshwanelo ya go baya melao ya lobelo le motho a tshwanetseng go kgweetsa ka lone mo tseleng.  Le fa go ntse jalo, a ka nna a se ka a batla go ikobela melao eo. Ka jalo, a ka nna a kgweetsa ka lobelo lo lo fetang lo lo beilweng. Tsela e re tshelang ka yone e bontsha gore re dumela gore go ikobela melao ya ga Jehofa go tswela mosola. (Diane 12:28) Ke gone ka moo Dafide a ileng a bua jaana ka Jehofa: “O dira gore ke itse tselana ya botshelo. Fa pele ga gago go na le boitumelo jo bontsi; ka fa seatleng sa gago sa moja go na le boitumelo ka bosakhutleng.”—Pes. 16:11.

11-12. (a) Fa re tshwenyegile kgotsa re kgobegile marapo, re tshwanetse go nna kelotlhoko ka eng? (b) Mafoko a Bafilipi 4:8 a ka re thusa jang fa re tlhopha boitlosobodutu?

¹¹ Fa re tshwenyegile kgotsa re kgobegile marapo, re ka nna ra ikutlwa re tlhoka sengwe se se ka re thusang gore re tswe mo mathateng a re leng mo go one. Seo se a utlwala, mme re tshwanetse go nna kelotlhoko gore re se ka ra dira sengwe se Jehofa a se tlhoileng.—Baef. 5:10-12, 15-17.

¹² Mo lekwalong le moaposetoloi Paulo a neng a le kwalela Bafilipi, o ne a rotloetsa Bakeresete gore ba tswelele ba akanya ka dilo “tse di siameng, tse di phepa, tse di rategang, [le] tse di buiwang bontle.” (Bala Bafilipi 4:8.) Le fa gone moaposetoloi Paulo a ne a sa bue ka boitlosobodutu, se a neng a se kwala se ka re thusa fa re tlhopha boitlosobodutu. Leka seno: Mo go tlhagang lefoko “dilo” mo temaneng eo, tsenya mafoko “dipina,” “di-movie,” “dibuka” kgotsa “di-video game.” Seo se ka go thusa go lemoga gore ke dilo dife tse Modimo a di amogelang le tse a sa di amogeleng. Re batla go ikobela melao ya ga Jehofa ya maemo a a kwa godimo. (Pes. 119:1-3) Go tswa foo, segakolodi se se phepa se tla re thusa gore re kgone go dira dilo tse di tla re thusang go bona boitumelo jwa mmatota.—Dit. 23:1.

13. Selo sa boraro se se ka dirang gore re bone boitumelo jwa mmatota ke sefe? (Johane 4:23, 24)

¹³ SA BORARO: Dira gore kobamelo ya ga Jehofa e tle pele mo botshelong jwa gago. Jehofa o re bopile, ka jalo re tshwanetse go mo obamela. (Tshen. 4:11; 14:6, 7) Go obamela Jehofa ka tsela e a e batlang, e leng “ka moya le ka boammaaruri” e tshwanetse go nna selo sa botlhokwa thata mo botshelong jwa rona. (Bala Johane 4:23, 24.) Re batla gore moya o o boitshepo wa Modimo o kaele kobamelo ya rona gore e dumalane le boammaaruri jo bo mo Lefokong la gagwe. Kobamelo ya rona e tshwanetse go tla pele tota le fa re nna mo nageng e tiro ya rona e thibetsweng mo go yone. Gone jaanong bakaulengwe le bokgaitsadi ba feta 100 ba kwa kgolegelong fela ka gonne e le Basupi ba ga Jehofa. * Le fa go ntse jalo, ba itumelela go dira sotlhe se ba ka se kgonang go rapela, go ithuta le go bolelela batho ba bangwe ka Modimo le ka Bogosi jwa gagwe. Fa batho ba re latofatsa kgotsa ba re bogisa, re itumelela gore Jehofa o re thusa go itshoka le gore o tla re segofatsa.—Jak. 1:12; 1 Pet. 4:14.

14. Mokaulengwe mongwe yo mosha wa kwa Tajikistan o ne a diragalelwa ke eng, mme ka ntlha ya eng?

¹⁴ Bangwe ba bakaulengwe le bokgaitsadi ba rona ba ne ba diragalelwa ke dilo tse di utlwisang botlhoko, mme ba ne ba itumela ka tsela ya mmatota ka gonne ba dirile dilo tse tharo tse re tlotlileng ka tsone. Akanya ka se se neng sa diragalela Mokaulengwe Jovidon Bobojonov wa kwa Tajikistan yo o nang le dingwaga di le 19, yo a neng a gana go tsenela sesole. Ka  di4 tsa October, 2019 o ne a tsewa ka dikgoka kwa gaabo, a tsenngwa mo kgolegelong ka dikgwedi di le dintsi a bo a tshwarwa jaaka sekebekwa. Mo dikgannyeng tsa dinaga di le mmalwa go ne ga buiwang ka tsela e e setlhogo e a neng a tshwerwe ka yone. Go ne ga begwa gore o ne a itewa ka gonne a ne a patelediwa gore a apare yunifomo ya sesole le gore a dire maikano a gore o tla se ema nôkeng. Morago ga foo, kgotlatshekelo e ne ya bua gore o ne a se molato e bile e ne ya mo romela kwa kampeng ya pogisetso go fitlha moporesidente wa naga eo a phimola molato wa gagwe a bo a laela gore a gololwe. Mo nakong eo yotlhe, Jovidon o ne a tswelela a ikanyega e bile a itumetse. O kgonne seo jang? Ka metlha o ne a lemoga gore o tlhoka go ithuta ka Modimo.

15. Jovidon o ne a bala e bile a ithuta Baebele jang fa a ne a le kwa kgolegelong?

¹⁵ Fa Jovidon a le kwa kgolegelong o ne a bala e bile a ithuta Baebele, tota le fa a ne a se na Baebele kgotsa dikgatiso dipe fela tsa rona. O kgonne jang go dira jalo? Bakaulengwe le bokgaitsadi ba ne ba kwala temana ya letsatsi mo dipolasetiking tse ba neng ba mo tlisetsa dijo ka tsone. Ka jalo, letsatsi le letsatsi o ne a kgona go bala Baebele le go akanyetsa kwa teng ka yone. Fa a sena go gololwa kwa kgolegelong o ne a gakolola batho ba ba  iseng ba lebane le diteko tse di boima a re: “Go botlhokwa thata gore re dirise kgololesego e re nang le yone go oketsa kitso ya rona ka Jehofa ka go bala Lefoko la gagwe le dikgatiso tsa rona.”

16. Jovidon o ne a nna a akantse ka eng?

¹⁶ Mokaulengwe yono wa rona o ne a ikobela melao ya ga Jehofa. Ga a ka a nnela go akanya ka dikeletso tse di sa siamang e bile ga a ka a dira dilo tse di sa siamang, go na le moo o ne a akanya thata ka Jehofa le ka melao ya gagwe. Jovidon o ne a itumelela go akanya ka popo e ntle ya Modimo. Mo mosong mongwe le mongwe o ne a reetsa dinonyane di opela monate. Bosigo o ne a leba ngwedi le dinaledi. O ne a re: “Dimpho tseno tse di tswang kwa go Jehofa di ne di dira gore ke itumele e bile di ne di nkgothatsa.” Fa re leboga Jehofa ka ntlha ya dilo tse re di tlhokang tse a re nayang tsone le kaelo e e tswang mo Baebeleng, re a itumela e bile boitumelo joo bo re thusa gore re kgone go itshoka.

17. Mafoko a a mo go 1 Petere 1:6 le 7 a ka direga jang mo mothong yo o diragalelwang ke se se diragaletseng Jovidon?

¹⁷ Gape Jovidon o ne a dira gore kobamelo ya ga Jehofa e tle pele. O ne a itse gore go botlhokwa gore a nne a ikanyega mo Modimong wa boammaaruri. Jesu o ne a re: “O tshwanetse go obamela Jehofa, Modimo wa gago fela, e bile ke ene fela yo o tshwanetseng go mo direla.” (Luke 4:8) Balaodi ba masole le masole ba ne ba batla gore Jovidon a kgaotse go nna Mosupi wa ga Jehofa. Go na le gore a dire jalo, o ne a rapela Jehofa bosigo le motshegare a mo kopa gore a mo thuse gore a se ka a ineela mme a tswelele a ikanyega. Le fa Jovidon a ile a tshwarwa setlhogo, o ne a tswelela a ikanyega. Gone jaanong tumelo ya gagwe e nonofile ka gonne e ne ya lekiwa.—Bala 1 Petere 1:6, 7.

18. Re ka dira eng gore re tswelele re itumetse?

¹⁸ Jehofa o a itse gore re tlhoka eng gore re itumele ka tsela ya mmatota. Fa o dira dilo tse tharo tse re tlotlileng ka tsone tse di dirang gore re bone boitumelo jwa mmatota, o tla tswelela o itumetse le fa o na le mathata. Le wena o tla kgona go bua o re: “Go itumela setšhaba se Modimo wa sone e leng Jehofa!”—Pes. 144:15.