1. Ke eng fa re ka re dilo tsotlhe ke tsa ga Jehofa? (Bona setshwantsho se se simololang setlhogo.)

DILO tsotlhe ke tsa ga Jehofa! “Magodimo a magodimo, lefatshe le tsotlhe tse di mo go lone” ke tsa gagwe. (Dute. 10:14; Tshen. 4:11) Ka jalo, batho botlhe ke ba ga Jehofa ka gonne ke ene a ba bopileng. (Pes. 100:3) Le fa go ntse jalo, go tloga bogologolo, Modimo o ile a tlhopha batho ba ba rileng gore e nne batho ba gagwe ba ba kgethegileng.

2. Go ya ka Baebele, Jehofa o ile a tlhopha bomang gore e nne batho ba gagwe ba ba kgethegileng?

² Ka sekai, Pesalema 135 ya re baobamedi ba ba ikanyegang ba ga Jehofa ba kwa Iseraele wa bogologolo e ne e le “thuo ya gagwe e e kgethegileng.” (Pes. 135:4) Gape buka ya Hosea e tlhalosa gore batho bangwe ba e seng Baiseraele e ne e tla nna batho ba ga Jehofa. (Hos. 2:23) Boporofeti joo bo ne jwa diragadiwa fa Jehofa a ne a tlhopha batho ba e seng Bajuda gore ba ye go busa le Keresete kwa legodimong. (Dit. 10:45; Bar. 9:23-26) ‘Setšhaba seno se se boitshepo’ ke “batho [ba ga Jehofa] ba ba ruilweng ka tsela e e kgethegileng” ka gonne ba tloditswe ka moya o o boitshepo e bile ba tlhophilwe gore ba ye go tshela kwa legodimong. (1 Pet. 2:9, 10) Gotweng ka Bakeresete ba ba ikanyegang ba ba nang le tsholofelo ya go tshela mo  lefatsheng? Le bone Jehofa o ba bitsa ‘batho ba gagwe ba ba tlhophilweng.’—Isa. 65:22.

3. (a) Ke bomang ba ba nang le kamano e e kgethegileng le Jehofa gompieno? (b) Re tla sekaseka eng mo setlhogong seno?

³ Gompieno “letsomanyane” le le nang le tsholofelo ya go tshela kwa legodimong le ba “dinku tse dingwe” ba ba nang le tsholofelo ya go tshela mo lefatsheng ba bopa “letsomane le le lengwe” le Jehofa a le tsayang e le la gagwe. (Luke 12:32; Joh. 10:16) Re tshwanetse go leboga Jehofa ka gonne a re neile tshono ya go nna le kamano e e molemo le ene. Mo setlhogong seno, re tlile go sekaseka ditsela di le mmalwa tse re ka bontshang Jehofa ka tsone gore re lebogela tshiamelo eno.

4. Re ka bontsha Jehofa jang gore re lebogela go bo a re neile tshiamelo ya go nna le kamano e e molemo le ene, mme Jesu o ile a dira eng se se tshwanang?

⁴ Re bontsha Jehofa gore re lebogela se a re diretseng sone ka go ineela mo go ene ka pelo yotlhe. Fa re kolobediwa, re bontsha ba bangwe gore re batho ba ga Jehofa le gore re iketleeleditse go mo ikobela. (Baheb. 12:9) Jesu o ne a dira se se tshwanang fa a ne a kolobediwa, o ne a raya Jehofa a re: “Ke itumeletse go dira thato ya gago, wena Modimo wa me.” (Pes. 40:7, 8) Le fa gone Jesu a ne a tsholetswe mo setšhabeng sa batho ba ba ineetseng mo go Jehofa, o ne a iketleeleditse go dira thato ya Gagwe.

5, 6. (a) Jehofa o ile a ikutlwa jang fa Jesu a ne a kolobediwa? (b) Ke setshwantsho sefe se se bontshang gore Jehofa o ikutlwa jang fa re ineela mo go ene?

⁵ Jehofa o ile a ikutlwa jang fa Jesu a kolobediwa? Baebele ya re: “Fa Jesu a sena go kolobediwa ka yone nako eo a tlhatloga a tswa mo metsing; mme, bona! magodimo a bulega, mme a bona moya wa Modimo o tla mo go ene o fologa jaaka lephoi. Bona! Gape, ga nna lentswe le tswa kwa magodimong le le neng le re: ‘Yono ke Morwaake, moratwa, yo ke mo amogetseng.’” (Math. 3:16, 17) Le fa gone Jesu e ne e le Morwa Modimo, Jehofa o ne a itumelela go bona gore o iketleeleditse go dira thato ya gagwe ka pelo yotlhe. Ka tsela e e tshwanang, Jehofa o a itumela fa re ineela mo go ene e bile o tla re segofatsa.—Pes. 149:4.

⁶ Ka sekai, a re re monna mongwe o jadile malomo a mantle mo tshingwaneng ya gagwe. Letsatsi lengwe morwadie yo monnye o kgetla lengwe la malomo ao a bo a mo naya lone e le mpho. A tota lelomo leo ga se la monna yono? A ka mo naya jang sengwe se e setseng e le sa gagwe? Rre yo o lorato a ka se ka a akanya ka dipotso tseno. Go na le moo, o tla itumelela mpho eo ka gonne e mmontsha gore morwadie o a mo rata. O tla itumelela lelomo leo go feta malomo a mangwe otlhe a a mo tshingwaneng ya gagwe. Ka tsela e e tshwanang, Jehofa o a itumela fa re ineela mo go ene ka go rata.—Ekes. 34:14.

7. Malaki o ile a re thusa jang go tlhaloganya gore Jehofa o ikutlwa jang ka batho ba ba mo direlang ka go rata?

⁷ Bala Malaki 3:16. Fa e le gore ga o ise o ineele mo go Jehofa le go kolobediwa, akanya ka gore ke eng fa go le botlhokwa go dira jalo. Gone ke boammaaruri gore fa o ne o tsholwa, o ne o le wa ga Jehofa fela jaaka batho ba bangwe botlhe. Le fa go ntse jalo, akanya fela gore Jehofa o tla itumela thata jang fa o amogela gore ke ene Mmusi wa gago o bo o ineela mo go ene le go dira thato ya gagwe. (Dia. 23:15) Jehofa o amogela batho ba ba mo direlang ka go rata e bile o kwala maina a bone mo ‘bukeng ya gagwe ya kgakologelo.’

8, 9. Jehofa o batla gore batho ba maina a bone a kwadilweng mo ‘bukeng ya gagwe ya kgakologelo’ ba dire eng?

 ⁸ Fa re batla gore maina a rona a tswelele a le mo ‘bukeng ya ga Jehofa ya kgakologelo,’ go na le dilo dingwe tse re tshwanetseng go di dira. Malaki o ne a re re tshwanetse go ‘boifa Jehofa le go akanya ka leina la gagwe.’ Fa re ka obamela mongwe kgotsa sengwe se sele, Jehofa o tla phimola maina a rona mo bukeng ya gagwe ya botshelo.—Ekes. 32:33; Pes. 69:28.

⁹ Ka jalo, go ineela mo go Jehofa ga go akaretse fela go mo solofetsa gore re tla dira thato ya gagwe le go kolobediwa. Tseno ke dilo tse re di dirang gangwe fela, mme go nna mo letlhakoreng la ga Jehofa, go tlhoka gore re tswelele re mo ikobela gone jaanong le go ya go ile.—1 Pet. 4:1, 2.

10. Go tshwanetse ga nna le pharologanyo efe fa gare ga batho ba ba direlang Jehofa le ba ba sa mo direleng?

¹⁰ Mo setlhogong se se fetileng, re ithutile ka pego ya Baebele ya ga Kaine, Solomone le Baiseraele. Ba ne ba iphaka gore ke baobamedi ba ga Jehofa, le fa go ntse jalo, ba ne ba sa ikanyege mo go ene. Dikai tseno di re ruta gore batho ba ba ineetseng mo go Jehofa ba tshwanetse go tlhoa se se bosula le go rata se se molemo. (Bar. 12:9) Fa Malaki a sena go bua ka “buka ya kgakologelo,” o ne a re Jehofa o itse “pharologanyo fa gare ga yo o siameng le yo o boikepo, fa gare ga yo o direlang Modimo le yo o sa mo direlang.”—Mal. 3:18.

11. Ke eng fa batho ba bangwe ba tshwanetse go lemoga gore re ineetse mo go Jehofa?

¹¹ Re ka bontsha Jehofa gore re lebogela go bo a re tlhophile go nna batho ba gagwe ka go dira gore ‘botswelelopele jwa rona bo bonatshege mo bathong botlhe.’ (1 Tim. 4:15; Math. 5:16) Ipotse jaana: ‘A batho ba bangwe ba kgona go bona gore ke ikanyega mo go Jehofa? A ke itumelela go bolelela batho ba bangwe gore ke Mosupi wa ga Jehofa?’ Jehofa a ka utlwa botlhoko tota fa re ka tlhabiwa ke ditlhong go bolelela batho ba bangwe gore re batho ba gagwe.—Pes. 119:46; bala Mareko 8:38.

12, 13. Ke eng fa go le thata go lemoga gore Bakeresete bangwe ke Basupi ba ga Jehofa?

 ¹² Ka maswabi, ga go motlhofo go bona gore a Bakeresete bangwe ba direla Modimo kgotsa ga ba mo direle ka gonne ba bontsha “moya wa lefatshe.” (1 Bakor. 2:12) “Moya wa lefatshe” o dira gore batho ba tlhome mogopolo thata mo dikeletsong tsa bone. (Baef. 2:3) Ka sekai, Bakeresete bangwe ba itlhokomolosa kgakololo e re nnang re e newa malebana le go apara le go ipaakanya ka tsela e e sa siamelang Bakeresete. Ba apara diaparo tse di ba tsimpang le tse di bonaletsang, tota le fa ba ya kwa dikokoanong tsa Bokeresete. Ba bangwe ba dira ditaele tsa moriri tse di sa tshwanelang go dirwa ke Bakeresete. (1 Tim. 2:9, 10) Ka ntlha ya seo, go nna thata gore batho ba bangwe ba itse gore a Bakeresete bano ke Basupi ba ga Jehofa kgotsa nnyaa.—Jak. 4:4.

¹³ Basupi bangwe ba sa ntse ba bontsha mekgwa mengwe ya lefatshe. Tsela e ba binang ka yone le e ba itshwarang ka yone fa ba le kwa meletlong le kwa diphating ga e tshwanele Bakeresete. Ba tsenya dinepe tsa bone e bile ba kwala dilo mo Internet tse di sa tshwaneleng batho ba ba ineetseng mo go Jehofa. Le fa gone ba sa kgalemelwa mo phuthegong ka gonne ba dirile boleo bongwe jo bo masisi, ba ka tlhotlheletsa Bakeresete ba bangwe ka tsela e e sa siamang.—Bala 1 Petere 2:11, 12.

14. Ke eng se re tshwanetseng go se dira gore re sireletse kamano ya rona le Jehofa?

¹⁴ Dilo tsa lefatshe di dira gore re tlhome mogopolo thata mo ‘keletsong ya nama le mo keletsong ya matlho le go bontsha ka mabela se motho a nang le sone mo botshelong.’ (1 Joh. 2:16) Le fa go ntse jalo, e re ka re le batho ba ga Jehofa, re gakololwa gore re “gane boikepo le dikeletso tsa selefatshe mme re tshele ka go itekanela sentle ga mogopolo le tshiamo le boineelo jwa bomodimo mo gare ga tsamaiso eno ya jaanong ya dilo.” (Tito 2:12) Se re se buang, tsela e re jang le e re nwang ka yone, tsela e re aparang le e re ipaakanyang ka yone le tsela e re berekang ka yone, tota sengwe le sengwe fela se re se dirang, se tshwanetse go bontsha batho ba bangwe gore  re ineetse mo go Jehofa ka pelo yotlhe.—Bala 1 Bakorintha 10:31, 32.

15. Ke eng fa re tshwanetse go bontsha bakaulengwe le bokgaitsadi ba rona bopelonomi le lorato?

¹⁵ Tsela e re dirisanang le baobamedimmogo le rona ka yone e bontsha gore re anaanela botsala jwa rona le Jehofa go le kana kang. Le bone ke batho ba gagwe fela jaaka rona. Fa re nna re gopotse ntlha eo, re tla tswelela re bontsha bakaulengwe le bokgaitsadi ba rona bopelonomi le lorato. (1 Bathes. 5:15) Jesu o ne a raya balatedi ba gagwe a re: “Botlhe ba tla itse gore lo barutwa ba me ka seno, fa lo ratana.”—Joh. 13:35.

16. Molao wa ga Moshe o re ruta gore Jehofa o ikutlwa jang ka batho ba gagwe?

¹⁶ Go bona gore re tshwanetse go dirisana jang mo phuthegong, akanya ka seno. Dilwana tse di mo tempeleng ya ga Jehofa di ne di le boitshepo e bile di dirisediwa kobamelo e e itshekileng fela. Molao wa ga Moshe o ne o tlhalosa gore di tshwanetse go tlhokomelwa jang, mme batho ba ba sa direng jalo, ba ne ba bolawa. (Dipa. 1:50, 51) Fa Jehofa a ile a sireletsa dilo tse di sa tsheleng tse di neng di dirisiwa mo kobamelong ya gagwe, ruri o tla sireletsa batlhanka ba gagwe ba ba ikanyegang! Jehofa o kile a bolelela batho ba gagwe jaana: “Yo o lo amang o ama thaka ya leitlho la me.”—Seka. 2:8.

17. Jehofa o bona eng?

¹⁷ Malaki o ile a re Jehofa o bona tsela e batho ba Gagwe ba dirisanang ka yone. (Mal. 3:16) Eleruri Jehofa “o itse ba e leng ba gagwe.” (2 Tim. 2:19) O itse sengwe le sengwe se re se dirang le se re se buang. (Baheb. 4:13) Fa re sa tshware baobamedimmogo le rona sentle, Jehofa o a bona. Ka tsela e e tshwanang, Jehofa o a bona fa re amogela Bakeresetemmogo le rona, re ba bontsha bopelotshweu, re ba itshwarela le go ba bontsha bopelonomi.—Baheb. 13:16; 1 Pet. 4:8, 9.

18. Re ka bontsha jang gore re lebogela tlotla ya go nna batho ba ga Jehofa?

¹⁸ Go tla bo go le molemo gore re bontshe Jehofa gore re lebogela tlotla ya go nna batho ba gagwe. Re a itse gore fa re ne re ineela mo go ene, eo e ne e le tshwetso e e molemo tota. Tota le fa re tshela mo “kokomaneng e e sokameng le e e kgopameng,” re batla gore batho ba bone gore ‘ga re na selabe e bile ga re na molato’ le gore re “[phatsima] jaaka masedi mo lefatsheng.” (Bafil. 2:15) Ka jalo, re iketleeleditse go tila sepe fela se Jehofa a se tlhoileng. (Jak. 4:7) Mo godimo ga moo, re rata bakaulengwe le bokgaitsadi ba rona e bile re a ba tlotla ka gonne le bone ke batho ba ga Jehofa.—Bar. 12:10.

19. Jehofa o segofatsa batho ba gagwe jang?

¹⁹ Baebele e re solofetsa jaana: “Jehofa ga a kitla a latlha batho ba gagwe.” (Pes. 94:14) Go sa kgathalasege gore go tla direga eng, re ka nna le tsholofelo ya gore Jehofa o tla diragatsa mafoko ano. Tota le loso lo ka se re kgaoganye le lorato lwa ga Jehofa. (Bar. 8:38, 39) “Fa re tshela, re tshelela Jehofa, mme fa re swa, re swela Jehofa. Jalo fa re tshela le fa re swa, re ba ga Jehofa.” (Bar. 14:8) Re lebile pele go bona letsatsi le Jehofa a tla tsosang batlhanka ba gagwe botlhe ba ba ikanyegang. (Math. 22:32) Le gompieno re itumelela masego a le mantsi. Baebele e bua boammaaruri fa e re: “Go itumela setšhaba se Modimo wa sone e leng Jehofa, batho ba a ba tlhophileng go nna boswa jwa gagwe.”—Pes. 33:12.