1-2. (a) Go ya ka Mathaio 28:18-20, tiro ya botlhokwa e Basupi ba ga Jehofa ba e dirang ke efe? (b) Re tla tlotla ka dipotso dife mo setlhogong seno?

BAAPOSETOLOI ba tshwanetse ba bo ba ne ba itumetse tota fa ba ne ba ya kwa thabeng. Fa Jesu a sena go tsosiwa, o ile a ba kopa gore ba kopane le ene koo. (Math. 28:16) E ka tswa e le yone nako e a ileng a “bonala mo bakaulengweng ba ba fetang makgolo a matlhano ka nako e le nngwe.” (1 Bakor. 15:6) Jesu o ne a ba bileditse gore a tle go ba naya tiro ya botlhokwa. O ne a ba raya a re: “Jalo tsamayang mme lo dire batho ba ditšhaba tsotlhe barutwa.”—Bala Mathaio 28:18-20.

² Barutwa bao ba ne ba nna karolo ya phuthego ya Bokeresete ya lekgolo la ntlha la dingwaga. Tiro ya botlhokwa ya phuthego eno, e ne e le go dira batho barutwa. * Gompieno go na le diphuthego di le dintsi tsa Basupi ba ga Jehofa mo lefatsheng mme le bone tiro ya bone ya botlhokwa ke go dira batho barutwa. Mo setlhogong seno re tla tlotla ka dipotso tseno: Ke eng fa go dira batho barutwa go le botlhokwa? Re ka dira batho barutwa jang? A Bakeresete botlhe ba tshwanetse go dira batho barutwa? Ke eng fa re tshwanetse go nna pelotelele fa re dira batho barutwa?

3. Go ya ka Johane 14:6 le 17:3, ke eng fa go dira barutwa go le botlhokwa?

³ Ke eng fa go dira barutwa go le botlhokwa jaana? Ka gonne batho ba ka kgona go nna ditsala tsa Modimo fa fela e le barutwa ba ga Jesu. Mo godimo ga moo, fa motho e nna morutwa wa ga Jesu, botshelo jwa gagwe bo a tokafala e bile o nna le tsholofelo ya go tshelela ruri mo nakong e e tlang. (Bala Johane 14:6; 17:3.) Jesu o re neile tiro ya botlhokwa, mme gone, ga re e dire ka borona fela. Moaposetoloi Paulo o ile a re: “Re badirimmogo le Modimo.” (1 Bakor. 3:9) Eleruri, go dira tiro eno ke tshiamelo!

4. Re ithutang mo go se se diragaletseng Ivan le Matilde?

⁴ Go dira batho barutwa go dira gore re itumele. Akanya ka se se ileng sa diragalela banyalani bangwe ba kwa Colombia e bong Ivan le Matilde. Ba ile ba rerela lekawana lengwe le le bidiwang Davier. O ne a ba raya a re: “Ke batla go fetoga, mme ke a palelwa.” Davier e ne e le ramabole, a dirisa diritibatsi, a nwa thata e bile a nna le lekgarebe lengwe le le bidiwang Erika. Ivan a re: “Re ne ra simolola go ithuta Baebele le ene. O ne a nna kgakala, ka jalo, fa re ya kwa go ene, re ne re tsamaya sekgala se seleele ka dibaesekele mo tseleng e e diretse. Erika o ile a lemoga gore Davier ga a tlhole a ntse jaaka pele, ka jalo, le ene o ne a simolola go ithuta Baebele.” Davier o ile a feleletsa a tlogetse motshameko wa mabole, bojalwa le diritibatsi. Gape o ne a nyala Erika. Matilde a re: “Fa Davier le Erika ba ne ba kolobediwa ka 2016, re ne ra gopola gore Davier o ne a tlhola a re: ‘Ke batla go fetoga, mme ke a palelwa.’ Re ne re itumetse tota.” Fa re thusa batho go nna barutwa ba ga Jesu, re itumela fela thata.

5. Selo sa ntlha se re tshwanetseng go se dira fa re dira barutwa ke eng?

⁵ Selo sa ntlha se re tshwanetseng go se dira ke go batla batho ba ba eletsang go ithuta ka Jehofa. (Math. 10:11) Re bontsha gore re Basupi ba ga Jehofa fa re bolelela mongwe le mongwe yo re kopanang le ene ka Jehofa. Fa re ikobela taelo ya ga Jesu ya gore re dire batho barutwa, re bontsha gore re Bakeresete ba boammaaruri.

6. Re tshwanetse go dira eng gore re kgone go atlega mo bodireding?

⁶ Le fa go na le batho ba ba batlang go ithuta Baebele, bontsi jwa batho ba re kopanang le bone go ka lebega ba sa e kgatlhegele. Ka jalo, re tshwanetse go baakanyetsa sentle gore ba kgone go kgatlhegela molaetsa wa Baebele. Akanya ka dilo tse di ka ba kgatlhang o bo o akanyetsa gore o tlile go simolola motlotlo jang.

7. O ka tlotla jang le batho mo bodireding, mme ke eng fa go le botlhokwa gore re ba reetse le go ba bontsha gore re a ba tlotla?

⁷ Ka sekai, o ka botsa motho yo o kopanang le ene jaana: “Ke kopa go go botsa sengwe. Rotlhe re na le mathata a le mantsi. A o akanya gore dipuso di ka kgona go a fedisa?” Go tswa foo, lo ka tlotla ka Daniele 2:44. Kgotsa o ka botsa yo mongwe jaana: “O akanya gore ke eng se se ka thusang batsadi go godisa bana ba bone sentle?” Lo bo lo tlotla ka Duteronome 6:6, 7. Fa o tlhopha se o batlang go  tlotla ka sone, akanyetsa batho ba o tlileng go tlotla le bone. Akanya kafa go ithuta Baebele go tla ba thusang ka gone. Ba reetse mme o ba bontshe gore o a ba tlotla. Fa o dira jalo, go tla nna motlhofo gore o tlhaloganye se ba se dumelang e bile ba tla go reetsa.

8. Ke eng fa re tlhoka go nna re boela kwa bathong pele ba ka dumela go ithuta Baebele le rona?

⁸ O ka nna wa tlhoka go boela motho makgetlo a le mmalwa pele a ka dumela go ithuta Baebele le wena. Goreng re rialo? Ka gonne lekgetlo la ntlha fa re boela kwa go ene re ka nna ra se ka ra mo fitlhela. Gape re ka nna ra tlhoka go boela kwa go ene makgetlo a le mmalwa pele a ka gololesega go ithuta le rona. Gopola gore sejalo se gola sentle fa se nosediwa ka metlha. Ka tsela e e tshwanang, fa re nna re ithuta Baebele le ene o tla simolola go rata Jehofa le Jesu.

9-10. Ke eng fa re ka re rotlhe re tsaya karolo mo tirong ya go batla batho ba ba batlang go ithuta ka Jehofa?

⁹ Rotlhe re tsaya karolo mo tirong ya go batla batho ba ba batlang go ithuta ka Jehofa. Re ka tshwantsha seno le go batla ngwana yo o timetseng. Akanya ka se se ileng sa diragalela mosimane mongwe wa dingwaga tse tharo yo o neng a timetse. Batho ba ka nna 500 ba ne ba tswa letsholo la go mmatla. Morago ga diura di le 20 monna mongwe o ile a mo fitlhela kwa masimong. O ne a sa batle go tlotlomadiwa. O ile a re: “Kgetsi ya tsie e kgonwa ka go tshwaraganelwa.”

¹⁰ Batho ba le bantsi ba tshwana le ngwana yole yo o neng a timetse. Ga ba na tsholofelo e bile ba tlhoka go thusiwa. (Baef. 2:12) Basupi ba feta dimilione di  le robedi ba dira mmogo go batla batho bano le go ba thusa. Gone ke boammaruri gore o ka tswa o se na ope yo o ithutang Baebele le ene, mme gone o se ka wa lebala gore bakaulengwe le bokgaitsadi mo phuthegong ya lona ba ithuta Baebele le batho ba le bantsi. Fa mokaulengwe kgotsa kgaitsadi a ithuta Baebele le motho, motho yoo a bo a kolobediwa, rotlhe re a itumela.

11. Le fa o ka tswa o sa ithute Baebele le ope, o ka thusa jang batho ba bangwe go nna barutwa?

¹¹ Le fa o ka tswa o sa ithute Baebele le ope gone jaanong, o santse o ka kgona go thusa batho ba bangwe go nna barutwa. Ka sekai, fa o bona mongwe yo o sa mo itseng kwa Holong ya Bogosi, o ka tlotla le ene gore a kgone go phuthologa. Fa o dira jalo, motho yoo o tla kgona go lemoga gore re a ratana. (Joh. 13:34, 35) Fa o arabela ka bokhutshwane kwa dipokanong, o thusa batho ba ba santseng ba ithuta gore le bone ba kgone go tlhalosa se ba se dumelang. Gape o ka tsamaya le motho yo e seng kgale e le mmoledi mo tshimong o bo o mmontsha gore a ka dirisa jang Baebele fa a ruta batho. Fa o dira jalo, o tla bo o mo ruta go etsa Jesu.—Luke 10:25-28.

12. A re tlhoka bokgoni bongwe jo bo kgethegileng gore re thuse batho go nna barutwa? Tlhalosa.

¹² Ga re a tshwanela go akanya gore re tlhoka bokgoni bongwe jo bo kgethegileng gore re thuse batho go nna barutwa. Goreng re rialo? Akanya ka kgaitsadi Faustina wa kwa Bolivia. Fa a kopana le Basupi ba ga Jehofa, o ne a sa itse go bala. Gone jaanong o itse go bala. O kolobeditswe e bile o rata go ruta batho Baebele. O ithuta Baebele le batho ba le batlhano beke le beke. Le fa gone Faustina a sa kgone go bala sentle jaaka batho ba a ithutang Baebele le bone, o setse a thusitse batho ba le barataro gore ba kolobediwe.—Luke 10:21.

13. Le fa go ka tswa go na le ditiro tsa botlhokwa tse re di dirang, go ithuta Baebele le batho go ka re tswela mosola jang?

¹³ Bakeresete ba le bantsi ba na le ditiro tsa botlhokwa tse ba di dirang. Le fa go ntse jalo ba ipha nako ya go ithuta Baebele le batho mme seno se dira gore ba itumele. Akanya ka Melanie wa kwa Alaska. O ne a godisa mosetsana wa gagwe wa dingwaga di le robedi. Gape o ne a bereka e bile a oka rraagwe yo o neng a tshwerwe ke kankere. Melanie e ne e le ene fela Mosupi kwa a nna teng. O ne a eletsa go ithuta Baebele le mongwe mme go ne go le tsididi tota mo lefelong la bone, ka jalo, go ne go se motlhofo go ya bodireding. O ne a tlhola a kopa  Jehofa gore a mo thuse. O ile a kopana le Sara a bo a mmolelela leina la Modimo. Sara o ne a itumeletse go itse gore Modimo o na le leina mme moragonya o ne a dumela go ithuta Baebele. Melanie a re: “Gantsi ka Labotlhano ke a bo ke lapile. Le fa go ntse jalo, nna le ngwanake re ne re ya go bala le Sara. Ka metlha re ne re boa re itumetse. Re ne re tlhola re dira dipatlisiso ka dilo tse Sara a neng a di botsa mme re ne ra itumelela go bona Sara e nna tsala ya ga Jehofa.” Le fa go ne go le thata, Sara o ne a kgona go tlogela kereke a bo a kolobediwa.

14. (a) Go rera go tshwana jang le go tshwara ditlhapi? (b) O ithuta eng mo go 2 Timotheo 4:1 le 2?

¹⁴ Le fa batho ba o kopanang le bone ba sa kgatlhegele go ithuta Baebele, o se ka wa itlhoboga. Jesu o ile a tshwantsha tiro ya go rera le go tshwara ditlhapi. Go ka feta diura di le dintsi batho ba ba tshwarang ditlhapi ba sa tshware sepe. Gantsi ba bereka masigo kgotsa phakela thata e bile ka dinako tse dingwe ba ya kwa mafelong a a kgakala. (Luke 5:5) Ka tsela e e tshwanang, Bakeresete bangwe ba fetsa nako e ntsi ba ruta batho ka Jehofa. Ba ya kwa mafelong a a farologaneng e bile ba ya kwa go bone ka nako e ba itseng gore ba tla ba fitlhela ka yone. Bakeresete bano ba feleletsa ba kopane le batho ba ba batlang go ithuta. A le wena o ka tsaya matsapa go ya go rerela batho kwa mafelong a a farologaneng ka nako e o itseng gore o tla ba fitlhela ka yone?—Bala 2 Timotheo 4:1, 2.

15. Ke eng fa re tlhoka go nna pelotelele fa re ithuta Baebele le batho?

 ¹⁵ Ke eng fa re tlhoka go nna pelotelele fa re ithuta Baebele le batho? Lebaka lengwe ke gore re tshwanetse go ba thusa gore ba itse melao ya ga Jehofa e bile ba e rate. Gape re tshwanetse go ba thusa gore ba itse Jehofa le go mo rata. Mo godimo ga moo, re tshwanetse go ba ruta gore Jesu o batla gore ba dire eng le gore o batla gore ba tshele jang. Re tshwanetse go ba thusa fa ba ntse ba leka go dirisa se ba se ithutang mo Baebeleng. Se lebale gore batho bangwe ba kgona go tlogela mekgwa e e sa siamang ka bonako fela mme ba bangwe bone ba tsaya lobaka.

16. O ithuta eng mo go se se diragaletseng Raúl?

¹⁶ Se se diragaletseng mokaulengwe mongwe kwa Peru se bontsha gore eleruri re tlhoka go nna pelotelele. A re: “Ke ne ke ithuta le monna mongwe yo o bidiwang Raúl mme re ile ra fetsa dibuka di le pedi. Mme gone, o ne a santse a na le mathata mo lelapeng, a rogana e bile bana ba gagwe ba ne ba sa mo tlotle. Le fa go ntse jalo, o ne a tla dipokanong ka metlha, ka jalo, ke ne ka tswelela ke mo etela e bile ke leka go mo thusa le lelapa la gagwe. Morago ga dingwaga di le tharo, o ile a kolobediwa.”

17. Re tla tlotla ka eng mo setlhogong se se latelang?

¹⁷ Jesu o ne a re re ‘tsamaye mme re dire batho ba ditšhaba tsotlhe barutwa.’ Fa re dira tiro eno, re kopana le batho ba ba farologaneng, go akaretsa le ba ba sa tseneng kereke kgotsa ba ba sa dumeleng mo Modimong. Mo setlhogong se se latelang, re tla bona gore re ka ba rerela jang.