Mo ngwageng o o latelang, lelapa la Bethele le ne la itsisiwe gore lekala la Afrika Borwa le tlhoka baithaopi ka gonne le ne le tlile go amogela motšhine o mosha wa go gatisa. Ke ne ka ikwadisetsa go ya koo, mme ke ne ke itumetse tota fa ke Tlhophiwa. Bakaulengwe ba bangwe ba bararo ba ba neng ba le kwa Bethele ya Canada ba ba neng ba tlhophiwa e ne le Dennis Leech, Bill McLellan le Ken Nordin. Re ne ra bolelelwa gore re tlile go nna kwa Afrika Borwa lobaka lo loleele!

Ke ne ka founela Mama ke bo ke mo raya ke re: “Mama, ke go tshwaretse dikgang. Ke ya Afrika Borwa!” Mama e ne e le motho yo o itidimaletseng mme gone o ne a na le tumelo e bile a atamalane thata le Jehofa. Ga a ka a bua dilo tse dintsi mme ke ne ke itse gore o nkema nôkeng. Ene le Papa ba ne ba se kgatlhanong le tshwetso e ke neng ke e dirile le fa gone ba ne ba utlwisitswe botlhoko ke gore ke tla bo ke le kgakala le bone.

Nna le bakaulengwe ba bararo ba ba neng ba tlhophilwe, re ne ra ya kwa Bethele ya Brooklyn gore re ye go rutiwa go dirisa motšhine o o rileng wa go gatisa ka dikgwedi di le tharo. Go tswa foo, re ne ra palama sekepe ra ya Cape Town kwa Afrika Borwa. Ke ne ke sa tswa go tshwara dingwaga di le 20 ka nako eo. Go ne go le maitseboa fa re ne re palama terena e e tswang kwa Cape Town e ya kwa Johannesburg. Re ne ra ema la ntlha mo motseng o monnye wa Karoo, o o jaaka sekaka. Go ne go le lerole e bile go le mogote. Re ne ra okomela ka fensetere, mme ra ipotsa gore lefelo leno le ntse jang le gore tota re itsentse mo go eng. Moragonyana fa re boela mo lefelong leno gape re ne ra lemoga gore le lentle le gore le na le kagiso.

Ka dingwaga di le mmalwa, kabelo ya me e ne e le go dirisa motšhine o o raraaneng wa Linotype. Ke ne ke rulaganya ditlhaka tsa tshipi tse di neng di dirisiwa go gatisa makasine wa Tora ya Tebelo le wa Tsogang! Ofisi ya lekala e ne e gatisa dimakasine ka dipuo tse di buiwang kwa Afrika Borwa le kwa dinageng tse dingwe tse dintsi tsa Afrika. Re ne re itumeletse gore motšhine o mosha wa go gatisa o re neng re o tletse, o ne o dirisiwa thata.

Moragonyana ke ne ka bereka mo Ofising ya Feketeri, e e neng e tlhokometse ditiro tse di dirwang mo bogatisetsong, mo lefapheng le le romelang dibuka le mo thanolong. Ke ne ke nna ke tshwaregile, mme gone ke ne ke kgotsofetse.

Ka 1968, ke ne ka nyala kgaitsadi wa mmulatsela e bong Laura Bowen, yo a neng a nna gaufi le Bethele. Tiro e nngwe gape e a neng a e dira e ne e le go thaepa mo Lefapheng la Thanolo. Ka nako eo, go ne go se na dithulaganyo dipe tsa gore batho ba ba sa tswang go nyalana ba nne kwa Bethele, ka jalo re ne ra kopiwa gore re nne babulatsela ba ba kgethegileng. Ke ne ke tshwenyegile. Ke ne ke feditse dingwaga di le lesome ke le kwa Bethele ke newa dijo le bonno, jaanong re ne re tla tshela jang ka madi a mannye a a neng a newa babulatsela ba ba kgethegileng? Mongwe le mongwe wa rona o ne a tla newa diranta di le 25 fa a fitlheletse diura, maeto a go boela le dikgatiso tse di neng di tlhokega. Ka one madi ao, re ne re tshwanelwa ke go duela rente, sepalangwa, kalafi le go reka dijo le dilo tse dingwe tse re neng re di tlhoka.

Re ne re neilwe kabelo ya go nna babulatsela gaufi le Durban, e e mo Lewatleng la India. Batho ba bantsi ba ba neng ba nna koo e ne e le Baindia, ba bontsi jwa bone e neng e le ditlogolwana tsa batho ba ba neng ba bereka kwa femeng ya sukiri ka bo1800. Le fa gone ka nako eo ba ne ba dira ditiro tse dingwe, ba ne ba sa ntse ba ngaparetse setso sa bone le dijo tsa bone tse gantsi di neng di baba mme di le monate. E bile ba ne ba bua Seesemane e leng sengwe se se neng se dira gore go nne motlhofo go ba rerela.

Go ne go lebeletswe gore babulatsela ba ba kgethegileng ba fetse diura di le 150 kgwedi le kgwedi mo tshimong, ka jalo nna le Laura re ne ra rulaganya go bereka diura di le thataro ka letsatsi la ntlha. Go ne go le mogote e bile go le bongola. Re ne re se na dipoelo le dithuto tsa Baebele, ka jalo re ne re tshwanetse go bereka tshimo diura di le thataro. Fa re ntse re tsweletse, ke ne ka leba nako mme ka fitlhela re berekile metsotso e le 40 fela. Ke ne ka ipotsa gore a tota re tla kgona go nna babulatsela ba ba kgethegileng?

Go ise go ye kae, re ne ra kgona go ithulaganya sentle. Letsatsi le letsatsi re ne re tsaya borotho re bo re tsenya sopo kgotsa kofi mo folasekeng. Fa re ne re tlhoka go ikhutsa go sekae re ne re phaka Volkswagen ya rona e nnye ka fa tlase ga setlhare, mme ka dinako tse dingwe re ne re dikologiwa ke bana ba bantle ba Baindia ba ba neng ba re gakgamalela ka gonne re sa tshwane le bone. Mo malatsing a le mmalwa, re ne ra lemoga gore fa re sena go bereka diura di le pedi kgotsa di le tharo, letsatsi le tsamaela ka bonako.

Ruri re ne re itumelela go rerela batho ba ba ratang go amogela baeng ba ba nnang mo tshimong eo! Baindia ke batho ba ba tlotlang ba bangwe, ba pelontle e bile ba rata Modimo. Bahindu ba le bantsi ba ne ba amogela molaetsa o re neng re ba tliseditse one. Ba ne ba rata go ithuta ka Jehofa, Jesu, Baebele, bokamoso mo lefatsheng le lesha la kagiso le tsholofelo ka baswi. Morago ga ngwaga, re ne re na le dithuto tsa Baebele di le 20. Letsatsi le letsatsi re ne re lalediwa go tla go ja dijo le lengwe la malapa a re neng re ithuta le one. Re ne re itumetse tota.

Go ise go ye kae, re ne ra newa kabelo e nngwe, e leng tiro ya potologo gaufi le lotshitshi lwa Lewatle la India. Beke le beke re ne re amogelwa mo lelapeng lengwe la phuthego e re neng re e etetse, mme re ne re bereka le baboledi ba phuthego eo re bo re ba kgothatsa. Re ne re nna karolo ya lelapa la bone e bile re ne re itumelela go fetsa nako le bana ba bone le diruiwa tsa bone. Fa go sena go feta dingwaga tse pedi tse di monate, ofisi ya lekala e ne ya re founela. Mokaulengwe yo o neng a re founetse o ne a re: “Re ka rata gore lo boele mo Bethele.” Ke ne ka mo raya ka re: “Tota re itumetse mo re leng.” Mme gone, re ne re ikemiseditse go ya gongwe le gongwe kwa re kopiwang gore re ye gone.

Fa ke tsena kwa Bethele, ke ne ka bereka mo Lefapheng la Tirelo. Mme fa ke le koo, ke ne ka nna le tshiamelo ya go bereka le bakaulengwe ba bantsi ba ba botlhale e bile ba na le maitemogelo. Ka nako eo, fa molebedi wa potologo a sena go etela phuthego o ne a kwala pego ya phuthego eo a bo a e romelela ofisi ya lekala. Go tswa foo, Lefapha la Tirelo le ne le tla romelela phuthego eo lekwalo. Lekwalo leo le ne le tla kgothatsa phuthego kgotsa la e naya kaelo epe fela e e tlhokegang. Eo e ne e le tiro e ntsi ka gonne bakwaledi ba rona ba ne ba ranola pego eo ya molebedi wa potologo go tswa mo puong ya Sexhosa, Sezulu le mo dipuong tse dingwe ba e ranolela mo Seesemaneng. Go tswa foo, ba ne  ba ranola karabo e e tswang mo ofising ya lekala e e neng e kwadilwe ka Seesemane ba e ranolela mo dipuong tsa diphuthego tseo. Ke ne ke lebogela tiro ya bonatla e baranodi ba neng ba e dira le tsela e ba neng ba nthusa ka yone go lemoga mathata a bakaulengwe le bokgaitsadi ba Maafrika ba neng ba lebane le one.

Ka nako eo, baagi ba Afrika Borwa ba ne ba busiwa ke puso e e neng e tlhaola batho go ya ka ditso tsa bone. Batho ba setso se se rileng ba ne ba nna mo lefelong le le rileng, ka jalo ba ne ba sa kopane le batho ba ditso tse dingwe. Bakaulengwe ba rona ba Maafrika ba ne ba bua dipuo tsa lefelo la bone, ba rera ka dipuo tseo e bile ba ya kwa diphuthegong tsa dipuo tseo.

Ke ne ke sa itse bakaulengwe ba bantsi ba Maafrika ka gonne diphuthego tse ke neng ke abelwa kwa go tsone e ne e le tsa Seesemane. Jaanong eo e ne e le nako ya gore ke ithute dingwao le ditso tsa Maafrika. Ke ne ka kgona go lemoga mathata a bakaulengwe ba neng ba lebana le one, a a amanang le dingwao tsa lefelo le tsa bodumedi. Ba ne ba le pelokgale tota! Le fa gone ba ne ba ganediwa botlhoko ke ba malapa a bone kgotsa ke batho mo motseng, ba ne ba gana go dira dingwao tse di sa dumalaneng le Dikwalo kgotsa dilo tse di amanang le go obamela badimo. Batho ba ba neng ba nna mo metseng ba ne ba humanegile tota. Batho ba le bantsi ba ne ba sa rutega, mme gone ba ne ba tlotla Baebele.

Ke ile ka nna le tshiamelo ya go bereka ka dikgetsi dingwe tse di amanang le kgololesego ya bodumedi le go sa tseye letlhakore. Go ne go kgothatsa go bona kafa bana ba Basupi ba neng ba ikanyega ka gone e bile ba le pelokgale le fa ba ne ba kobiwa kwa dikolong ka gonne ba gana go rapela le go opela difela.

Bakaulengwe ba ne ba lebana le bothata jo bongwe mo nageng e nnye ya Afrika e ka nako eo e neng e bidiwa Swaziland. Fa Kgosi Sobhuza II a sena go tlhokafala, go ne go lebeletswe gore baagi botlhe ba naga eo ba dire dingwao dingwe tsa go hutsafalela moswi. Banna ba ne ba tshwanetse go beola meriri ya bone, basadi bone ba ne ba tshwanetse go fokotsa meriri ya bone gore e nne mekhutshwane. Bakaulengwe le bokgaitsadi ba le bantsi ba ne ba bogisiwa ka gonne ba ne ba gana go dira ngwao eo e e neng e amana le go obamela batho ba ba tlhokafetseng. Tsela e ba neng ba ikanyega mo go Jehofa ka yone e ne e dira gore re itumele tota! Re ne ra ithuta go le gontsi mo tseleng e bakaulengwe ba rona ba neng ba ikanyega ka yone e bile ba le pelotelele mme seo se ne sa nonotsha tumelo ya rona.

Ka 1981, ke ne ka kopiwa gore ke tle go thusa go tlhama mokgwa o mosha o o neng o dirisa khomputara go gatisa. Ka jalo, ke ne ka boela kwa Bogatisetsong. Ruri tseo e ne e le dinako tse di kgatlhang! Mekgwa ya go gatisa e ne e tlhabologile thata. Monna mongwe yo o rekisang metšhine ya go gatisa o ne a naya ofisi ya lekala motšhine wa phototypesetter gore e o lekeletse mme e sa ikgolege ka sepe. Seo se ne sa dira gore metšhine e le robongwe ya Linotype e emisediwe ka metšhine e le metlhano e mesha ya phototypesetter. Go ne ga tsenngwa motšhine o mongwe o mosha wa rotary offset o o dirisang khomputara go gatisa. Go ne go gatisiwa dikgatiso tse dintsi go feta pele!

Go dirisa khomputara go ne ga re thusa go tla ka mekgwa e mesha ya go rulaganya tsela e mokwalo o tlhagang ka yone mo pampiring re dirisa MEPS, e e emelang Multilanguage Electronic Publishing System. Ruri thekenoloji e ne e gatetse pele thata fa e sa le ka nako e rona bakaulengwe ba banê re neng re tswa kwa Canada re tla mo Afrika Borwa! (Isa. 60:17) Ka nako eo, rotlhe re ne re nyetse bokgaitsadi ba babulatsela ba ba ratang Jehofa. Nna le Bill re ne re sa ntse re direla kwa Bethele. Ken le Dennis ba ne ba na le malapa mme ba nna gaufi le Bethele.

Ditiro tse di dirwang mo ofising ya lekala di ne di oketsega. Dikgatiso tsa Baebele di ne di ranolwa e bile di gatisiwa ka dipuo tse di neng di oketsega mme di romelwa kwa makaleng a mangwe. Ka jalo, Bethele e ne e tlhoka moago o mongwe. Bakaulengwe ba ile ba aga kwa lefelong le lentle kwa bophirima jwa Johannesburg mme moago oo o ne wa neelwa ka 1987. Ke ne ka itumelela go nna le seabe mo kagong eo le go direla mo Komiting ya Lekala ya Afrika Borwa ka dingwaga di le dintsi.

Ka 2001, re ne ra gakgamala fa ke ne ke kopiwa gore ke ye go nna leloko la Komiti ya Ofisi ya Lekala ya United States, e e neng e sa tswa go tlhomiwa. Le fa gone re ne re utlwisitswe botlhoko ke gore re tlogela tiro ya rona le ditsala tsa rona mo Afrika Borwa, re ne re itumeletse gore re ne re tlile go simolola botshelo jo bosha re le karolo ya lelapa la Bethele la kwa United States.

Le fa go ntse jalo, re ne re tshwenyegile thata ka gonne re ne re tlile go nna kgakala le mmaagwe Laura yo o neng a tsofetse. Re ne re ka se ka ra kgona go mo thusa go le kalo fa re le kwa New York, mme gone bomonnawe Laura ba ne ba ithaopela go mo thusa ka dilo tse a di tlhokang mo maikutlong, ka madi le ka dilo tse dingwe. Ba ne ba re: “Rona ga re kgone go tsenela tirelo ya nako e e tletseng mme fa re ka thusa Mama ka dilo tse a di tlhokang, seo se tla lo thusa gore lo kgone go tswelela ka kabelo ya lona.” Ruri re leboga se ba re diretseng sone!

Nkgonne le mosadi wa gagwe ba ba neng ba nna kwa Toronto, Canada, le bone ba ne ba tlhokometse Mama yo e neng e le motlholagadi. Ka nako eo, o ne a setse a na le dingwaga di feta 20 a nna le bone. Ruri re leboga tsela e ba neng ba mo rata ka yone e bile ba mo tlhokomela go fitlha a tlhokafala pele re goroga kwa New York. Ke tshegofatso tota go nna le maloko a lelapa a a ikemiseditseng go fetola matshelo a bone gore a tlhokomele batsadi ba ba tsofetseng, e leng tiro e ka dinako dingwe e nang le dikgwetlho!

Ke feditse dingwaga di le dintsi ke bereka mo lefapheng la dikgatiso kwa United States, e leng tiro e gone jaanong e tlhabolotsweng e bile e dirilwe motlhofo. Bosheng jaana, ke ntse ke bereka mo Lefapheng la Tsa Theko. Ruri ke itumelela gore mo dingwageng di le 20 tse di fetileng, ke nnile karolo ya lekala leno le legolo le jaanong le nang le maloko a lelapa la Bethele a ka nna 5 000 le baithaopi ba ba tlang go thusa mo Bethele ba ka nna 2 000!

Mo dingwageng di le masome a marataro tse di fetileng, ke ne nka se ka ka itse gore ke ne ke tla felela ke le fano. Laura o ntse a nkeme nôkeng ka pelo yotlhe mo dingwageng tseno tsotlhe. Ruri ke itumeletse botshelo! Re leboga ditshiamelo tse di farologaneng tse re nnileng le tsone le go bereka le batho ba le bantsi ba ba molemo go akaretsa ba ba mo diofising tsa makala tse re neng re di etela mo dikarolong tse dintsi tsa lefatshe. Mme e re ka jaanong ke na le dingwaga di feta 80, ke fokoleditswe tiro ka gonne go na le bakaulengwe ba le bantsi ba basha ba ba thapiseditsweng go e dira.

Mopesalema o ne a kwala jaana: “Go itumela setšhaba se Modimo wa sone e leng Jehofa.” (Pes. 33:12) Ruri mafoko ao a boammaaruri! Ke itumelela go bo ke ile ka kgona go direla Jehofa mmogo le batho ba gagwe ba ba itumetseng.