1. O ikutlwa jang ka boammaaruri?

 RE RATA boammaaruri jo bo mo Lefokong la Modimo. Se re se dumelang se ikaegile ka jone. (Bar. 10:17) Re tlhatswegile pelo gore phuthego ya ga Jehofa ke “pilara le motheo wa boammaaruri.” (1 Tim. 3:15) Gape re itumelela go ikobela ba ba re “etelelang pele” mo phuthegong ka gonne ba re tlhalosetsa boammaaruri jo bo tswang mo Baebeleng e bile ba re kaela gore re dire thato ya Modimo.​—Baheb. 13:17.

2. Go ya ka Jakobe 5:19, go ka direga eng fa re sena go itse boammaaruri?

² Le fa go ntse jalo, fa re sena go itse boammaaruri le gore re tshwanetse go ikobela kaelo e re e newang mo phuthegong ya ga Jehofa, re tlhoka go dira ka natla gore re se ka ra faposiwa mo boammaaruring. (Bala Jakobe 5:19.) Satane o batla go dira gore re se ka ra tlhola re tshepa Baebele le kaelo e re e newang mo phuthegong ya Modimo.​—Baef. 4:14.

3. Ke eng fa re tshwanetse go ikobela boammaaruri? (Baefeso 6:13, 14)

³ Bala Baefeso 6:13, 14. Go ise go ye kae, Satane o tlile go tsietsa ditšhaba tsotlhe gore di nne kgatlhanong le Jehofa a dirisa maaka. (Tshen. 16:13, 14) Gape re a itse gore Satane o tla dira sotlhe se a ka se kgonang go tsietsa batho ba Modimo. (Tshen. 12:9) Ke gone ka moo go leng botlhokwa gore re ithute go lemoga pharologanyo fa gare ga boammaaruri le maaka, mme re ikobele boammaaruri. (Bar. 6:17; 1 Pet. 1:22) Go dira jalo go botlhokwa ka gonne go tla re thusa gore re falole pitlagano e kgolo.

4. Re tla tlotla ka eng mo setlhogong seno?

 ⁴ Mo setlhogong seno, re tla tlotla ka dinonofo di le pedi tse di tla re thusang go lemoga boammaaruri jo bo tswang mo Baebeleng le go ikobela kaelo e re e newang ke phuthego ya ga Jehofa. Go tswa foo, re tla tlotla ka dilo di le tharo tse re tshwanetseng go di dira gore re tswelele re ngangatletse boammaaruri.

DINONOFO TSE DI RE THUSANG GO LEMOGA BOAMMAARURI

5. Go boifa Jehofa go ka re thusa jang go lemoga boammaaruri?

⁵ Go boifa Jehofa. Fa re boifa Jehofa, re tla mo rata thata jaana mo re ka se kang ra batla go dira sepe fela se se sa mo itumediseng. Re ikemiseditse go ithuta go farologanya se se siameng le se se sa siamang le go farologanya boammaaruri le maaka gore Jehofa a re amogele. (Diane 2:3-6; Baheb. 5:14) Re tshwanetse go rata Jehofa thata go feta tsela e re boifang batho ka yone, ka gonne gantsi dilo tse batho ba di ratang ga di itumedise Jehofa.

6. Go boifa batho go ile ga dira gore ditlhola tse di lesome di bue eng se se seng boammaaruri?

⁶ Fa re boifa batho go feta Jehofa, re ka nna ra simolola go dumela sengwe se se leng kgatlhanong le boammaaruri. Ka sekai, akanya ka se se ileng sa diragalela dikgosana di le 12 tse di neng di ile go tlhola lefatshe le Jehofa a neng a le solofeditse Baiseraele. Ditlhola tse di lesome, di ne di boifa Bakanana thata go feta tsela e di neng di rata Jehofa ka yone. Ka jalo, ba ne ba raya Baiseraele mmogo le bone ba re: “Re ka se kgone go tlhatloga re ya go tlhasela batho bao ka gonne ba nonofile go re feta.” (Dipa. 13:27-31) Gone ke boammaaruri gore go ne go ka lebega e kete Bakanana ba nonofile go feta Baiseraele. Le fa go ntse jalo, ope fela yo o neng a ka re Baiseraele ba ne ba se kitla ba ba fenya, o ne a tla bo a sa akanye gore Jehofa o tla ba thusa. Ka jalo, ditlhola tseo di ne di tshwanetse go akanya ka se Jehofa a neng a batla go se direla Baiseraele. Gape ba ne ba tshwanetse go  akanyetsa kwa teng ka se Jehofa a neng a ba diretse sone mo nakong e e fetileng. Seo se ne se tla ba thusa go lemoga gore Bakanana ba ne ba se na maatla a a fetang a ga Jehofa. Mme se se itumedisang ke gore Joshua le Kalebe ga ba a ka ba dira jaaka ditlhola tseo ka gonne ba ne ba batla gore Jehofa a ba amogele. Ba ile ba raya batho ba re: “Fa e le gore Jehofa o a re itumelela, ruri o tla re tsenya mo lefatsheng leo a bo a le re naya.”​—Dipa. 14:6-9.

7. Ke eng se se ka re thusang go boifa Jehofa? (Bona le setshwantsho.)

⁷ Go boifa Jehofa go tla re thusa gore nako le nako fa re dira ditshwetso re ipotse gore ke eng se se mo itumedisang. (Pes. 16:8) Fa o bala pego nngwe ya Baebele, ipotse jaana: “Fa nkabo ke le mo boemong joo, ke ne ke tla dira tshwetso efe?” Ka sekai, leka go akanya o le Moiseraele mme ditlhola tse di lesome di lo bolelela gore Bakanana ba tlile go lo fenya. A o ne o tla dumela se ba se buang o bo o boifa batho, kgotsa a tsela e o ratang Jehofa ka yone e bile o batla go mo itumedisa, e ne e tla dira gore o dumele gore o tla lo thusa? Ka maswabi, Baiseraele ba le bantsi ga ba a ka ba dumela se Joshua le Kalebe ba neng ba se bua. Seo se ile sa dira gore ba se ka ba tsena mo Lefatsheng le le Solofeditsweng.​—Dipa. 14:10, 22, 23.

8. Ke nonofo efe e re tshwanetseng go nna le yone, mme ka ntlha ya eng?

⁸ Boikokobetso. Jehofa o senolela batho ba ba ikokobeditseng boammaaruri. (Math. 11:25) Re ile ra rutiwa boammaaruri ka gonne re le boikokobetso. (Dit. 8:30, 31) Le fa go ntse jalo, re tshwanetse go nna kelotlhoko gore re se ka ra ikgogomosa. Boikgogomoso bo ka dira gore re tseye gore se re se akanyang se botlhokwa go feta melaometheo e e mo Baebeleng le kaelo e phuthego ya ga Jehofa e re nayang yone.

9. Ke eng se se ka go thusang gore o tswelele o ikokobeditse?

⁹ Gore re tswelele re le boikokobetso, re tshwanetse go nna re gopotse gore re bannye thata fa re bapisiwa le Jehofa. (Pes. 8:3, 4) Gape re tshwanetse go kopa Jehofa gore a re thuse gore re tswelele re le boikokobetso le gore re ikemisetse go dira se a batlang gore re se dire. Jehofa o tla re thusa gore re tseye kaelo e e tswang mo Lefokong la gagwe le e e tswang mo phuthegong ya gagwe e le botlhokwa thata go feta se re se akanyang. Fa o bala Baebele, batla dintlha tse di bontshang gore Jehofa o rata batho ba ba ikokobeditseng, mme o tlhoile ba ba ikgogomosang, ba ba itseelang kwa godimo le ba ba mabela. Gape fa o na le ditshiamelo dingwe, dira sotlhe se o ka se kgonang gore o tswelele o ikokobeditse.

KE ENG SE SE KA RE THUSANG GO NGANGATLELA BOAMMAARURI?

10. Jehofa o dirisitse bomang go kaela batho ba gagwe?

¹⁰ Tswelela o ikobela kaelo e phuthego ya Modimo e re nayang yone. Jehofa o ne a dirisa Moshe, go tswa foo a dirisa Joshua gore a kaele batho ba gagwe. (Josh. 1:16, 17) Jehofa o ne a segofatsa Baiseraele fa ba ne ba ikobela banna bao ba a neng a ba tlhophile. Dingwaga di le dintsi moragonyana, phuthego ya Bokeresete e ne ya tlhomiwa, ka jalo Jehofa o ne a dirisa baaposetoloi ba le 12 gore ba kaele Bakeresete. (Dit. 8:14, 15) Fa nako e ntse e tsamaya, setlhopha seo sa baaposetoloi se ile sa akaretsa bagolwane ba kwa Jerusalema. Fa Bakeresete ba ne ba reetsa kaelo e ba neng ba ba naya yone, “diphuthego di ne tsa tswelela di nonotshiwa mo tumelong e bile palo ya bakaulengwe e ne e oketsega letsatsi le letsatsi.” (Dit. 16:4, 5) Le rona gompieno, Jehofa o a re segofatsa fa re ikobela kaelo e a re nayang yone a dirisa phuthego ya gagwe. Mme gone, Jehofa o ikutlwa jang fa re sa ikobele ba ba re eteletseng pele?  Gore re arabe potso eo, a re tlotleng ka se se neng sa diragalela Baiseraele fa ba ne ba ya kwa Lefatsheng le le Solofeditsweng.

11. Go ne ga direga eng ka Baiseraele ba ba neng ba sa tlotle Moshe? (Bona le setshwantsho.)

¹¹ Fa Baiseraele ba ne ba ya kwa Lefatsheng le le Solofeditsweng, banna bangwe ba ba tlotlegang mo Iseraele ba ne ba nyatsa Moshe le tiro e a neng a e dira. Ba ne ba re: “Phuthego yotlhe e boitshepo, botlhe fela, e bile Jehofa o na le bone.” (Dipa. 16:1-3) Gone ke boammaaruri gore “phuthego yotlhe” e ne e le boitshepo mo go Jehofa. Mme gone, Jehofa o ne a tlhophile Moshe gore a etelele batho ba Gagwe pele. (Dipa. 16:28) Ka jalo fa Baiseraele ba ne ba tshwayatshwaya Moshe diphoso, tota ba ne ba tshwayatshwaya Jehofa diphoso. Ba ne ba sa tlhoma mogopolo mo go se Jehofa a neng a se batla, go na le moo ba ne ba batla maemo le gore batho ba ba tlotlomatse. Ka jalo, Jehofa o ile a fedisa ba ba neng ba di goga kwa pele mo botlhanoging joo mmogo le ba bangwe ba bantsi ba ba neng ba dumalana le bone. (Dipa. 16:30-35, 41, 49) Re ka tlhatswega pelo gore Jehofa ga a amogele ba ba sa tlotleng kaelo e a re nayang yone a dirisa phuthego ya gagwe.

12. Goreng re ka tshepa phuthego ya ga Jehofa?

¹² Re na le mabaka a a utlwalang a go tshepa phuthego ya ga Jehofa. Fa thuto nngwe kgotsa tsela nngwe e re obamelang Jehofa ka yone e tlhoka go tokafadiwa, ba ba etelelang pele ga ba okaoke go dira diphetogo. (Diane 4:18) Ba dira jalo ka gonne selo sa botlhokwa mo go bone ke go itumedisa Jehofa. Gape fa ba dira ditshwetso, ba ikaega ka Baebele e batlhanka botlhe ba ga Jehofa ba tshwanetseng go e ikobela.

13. “Sekao sa mafoko a a molemo” ke eng, mme re tshwanetse go dira eng ka sone?

¹³ “Nna o ngangatletse sekao sa mafoko a a molemo.” (2 Tim. 1:13) “Sekao sa mafoko a a molemo” ke dithuto tse di mo Baebeleng. (Joh. 17:17) Dithuto tseo ke sengwe le sengwe se re se dumelang. Phuthego ya ga Jehofa e  netefatsa gore se re se dumelang, se theilwe mo sekaong sa mafoko a a molemo. Ka jalo, fa re ngangatlela dithuto tseo, Jehofa o tla re segofatsa.

14. Go ne ga direga eng ka Bakeresete bangwe ba ba ileng ba tlogela go ngangatlela “sekao sa mafoko a a molemo”?

¹⁴ Go ka direga eng fa re ka tlogela go ngangatlela “sekao sa mafoko a a molemo”? Akanya ka se se ileng sa direga mo nakong e e fetileng. Bakeresete bangwe ba bogologolo ba ne ba anamisa maaka a gore letsatsi la ga Jehofa le gorogile. Go ka tswa go ne go na le lekwalo le ba neng ba tsaya gore le kwadilwe ke moaposetoloi Paulo le le gatelelang kgang eo. Ka jalo, Bakeresete bangwe ba kwa Thesalonika ba ile ba dumela maaka ao ba bo ba a bolelela batho ba bangwe ba sa batlisisa gore a ke boammaaruri. Mme gone, boammaaruri ke gore fa ba ne ba ka gopola dilo tse Paulo a neng a ba rutile tsone fa a ne a na le bone, ba ne ba ka se tsiediwe. (2 Bathes. 2:1-5) Paulo o ile a gakolola bakaulengwe le bokgaitsadi bao gore ba se ka ba dumela sengwe le sengwe se ba se utlwang. Mafoko a bofelo a a neng a ba kwalela one mo lekwalong la bobedi la Bathesalonika, a ne a tla ba thusa le mo nakong e e tlang. O ne a re: “Jaanong nna Paulo, ke lo romelela ditumediso ka seatla sa me, e leng sesupo mo lekwalong lengwe le lengwe; eno ke tsela e ke kwalang ka yone.”​—2 Bathes. 3:17.

15. Ke eng se se ka re thusang gore re se ka ra tsiediwa ke maaka a a utlwalang e kete ke boammaaruri? Naya sekai. (Bona le ditshwantsho.)

¹⁵ Re ka ithuta eng mo mafokong a Paulo a neng a a bolelela Bathesalonika? Fa re utlwa sengwe se se sa dumalaneng le se re se ithutileng mo Baebeleng, kgotsa re utlwa magatwe a a tsitsibanyang mmele, re tshwanetse go nna le temogo. Ka nako ya puso ya Soviet Union, batho ba ba sa re rateng ba ne ba naya bakaulengwe lekwalo le go neng go lebega e kete le tswa kwa ntlokgolo ya lefatshe lotlhe. Lekwalo leo le ile la kgothaletsa bakaulengwe bangwe gore ba itirele setlhotswana. Le fa go ne go lebega e kete lekwalo leo le tswa kwa ntlokgolo ya lefatshe lotlhe, bakaulengwe ba ba ikanyegang ga ba a ka ba dumela kgang eo ka gonne ba ne ba lemoga  gore lekwalo leo le ne le sa dumalane le se ba se rutilweng. Le gompieno, batho ba ba sa rateng boammaaruri, ka dinako dingwe ba dirisa Internet le metswedi ya go ikgolaganya le batho ba bangwe go re tlhakanya tlhogo le go re kgaoganya. Go na le gore re ‘letle batho gore ba fetole tsela e e siameng e re akanyang ka yone,’ re tshwanetse go sekaseka gore a se re se utlwang kgotsa se re se balang se dumalana le boammaaruri jo re bo rutilweng.​—2 Bathes. 2:2; 1 Joh. 4:1.

16. Go ya ka Baroma 16:17 le 18, re tshwanetse go dira eng fa batho ba anamisa tshedimosetso e e seng boammaaruri?

¹⁶ Tswelela o atamalane le ba ba ikanyegang mo go Jehofa. Modimo o batla gore re mo direle re le seoposengwe le bakaulengwe le bokgaitsadi. Re tla tswelela re atamalane le bone fa re ngaparela boammaaruri. Batho ba ba anamisang tshedimosetso epe fela e e sa tsamaisaneng le boammaaruri, ba dira gore re nne le dikgaogano mo phuthegong. Ka jalo, Jehofa a re re se ka ra “itsalanya le bone.” Fa re itsalanya le bone, re ka nna ra simolola go dumela dilo tse di seng boammaaruri, mme ra feleletsa re sa ikanyege mo go Jehofa.​—Bala Baroma 16:17, 18.

17. Go lemoga boammaaruri le go bo ngangatlela go re tswela mosola jang?

¹⁷ Fa re lemoga boammaaruri e bile re bo ngangatlela, re tla tswelela re atamalane le Jehofa e bile tumelo ya rona e tla nonofa. (Baef. 4:15, 16) Ga re kitla re tsiediwa ke maaka a ga Satane e bile Jehofa o tla re sireletsa, tota le ka nako ya pitlagano e kgolo. Ka jalo nna o ngangatletse boammaaruri, mme ‘Modimo wa kagiso o tla nna le wena.’​—Bafil. 4:8, 9.