1. Ke eng fa Jehofa e le Mmopi yo mogolo wa Letsopa?

KA November 2010, nkgwana ya bogologolo ya letsopa e e tswang kwa China e ne ya rekisiwa ka didolara di ka nna dimilione di le 70 kwa Engelane. Go gakgamatsa tota gore mmopi wa letsopa leo o kgonne go tsaya letsopa fela le le tlwaelegileng le le le tlhwatlhwatlase a bo a le dira go nna selo se se sentle le se se tlhwatlhwakgolo thata jaana. Jehofa ke Mmopi wa Letsopa yo go seng ope yo o tshwanang le ene. Baebele ya re Jehofa o ile a bopa motho “ka lorole lo lo tswang mo mmung,” ke gore ka letsopa. (Genesise 2:7) Motho yoo, e bong Adame, e ne e le “morwa Modimo” e bile a bopilwe a na le dinonofo tse di tshwanang le tsa Modimo.—Luke 3:38.

2, 3. Re ka nna jang le boikutlo jo bo tshwanang le jwa Baiseraele ba ba ileng ba ikwatlhaya?

² Fa Adame a sena go tsuologela Mmopi wa gagwe, o ne a latlhegelwa ke tshiamelo ya go nna morwa Modimo. Mme ditlogolwana di le dintsi tsa gagwe di ile tsa tlhopha Jehofa gore e nne Mmusi wa tsone. (Bahebera 12:1) Ba ile ba bontsha gore ba batla gore Jehofa e nne Rre le Mmopi wa bone wa Letsopa ka  go mo ikobela. (Johane 8:44) Boikanyegi jwa bone bo re gopotsa se Baiseraele ba ba ikwatlhayang ba ileng ba se bua fa ba ne ba re: “Wena Jehofa, o Rraarona. Re letsopa, wena o Mmopi wa rona wa Letsopa; mme rotlhe re tiro ya seatla sa gago.”—Isaia 64:8.

³ Le gompieno, baobamedi ba boammaaruri ba ga Jehofa ba leka ka natla go ikokobetsa le go mo ikobela. Ba go leba e le tshiamelo go bitsa Jehofa ba re ke Rraabone e bile ba batla gore e nne Mmopi wa bone wa letsopa. A re ikemiseditse go nna letsopa le Modimo a ka kgonang go le bopa gore le nne sejana se se tlhwatlhwakgolo thata? A re leba bakaulengwe le bokgaitsadi ba rona e le dijana tse Modimo a sa ntseng a di bopa? Go re thusa go dira seo, re tlile go ithuta kafa Jehofa a tlhophang ka gone batho ba a tla ba bopang, lebaka la go ba a ba bopa le kafa a ba bopang ka gone.

4. Jehofa o tlhopha jang batho ba a batlang go ba bopa? Naya dikai.

⁴ Jehofa ga a lebe batho ka tsela e re ba lebang ka yone. O tlhatlhoba dipelo e bile o bona se tota re leng sone. (Bala 1 Samuele 16:7b.) Jehofa o ne a bontsha seo fa a ne a tlhoma phuthego ya Bokeresete. O ne a gogela batho ba ba neng ba tsewa e se ba sepe mme a ba tlisa mo go ene le mo go Morwawe. (Johane 6:44) Ka sekai, mongwe wa batho bao e ne le Mofarasai mongwe yo o bidiwang Saulo yo e neng e le “motlhapatsi le mmogisi le motho yo o se nang maitseo.” (1 Timotheo 1:13) Le fa go ntse jalo, Jehofa o ne a tlhatlhoba pelo ya ga Saulo mme a bona gore Saulo e ne e se letsopa le le se nang molemo wa sepe. (Diane 17:3) Go na le moo, o ne a ka kgona go bopiwa gore e nne “sejana se se tlhophilweng” gore a ye go rera “kwa ditšhabeng mmogo le kwa dikgosing le kwa go bomorwa Iseraele.” (Ditiro 9:15) Gape Jehofa o ne a tlhopha batho ba pele e neng e le matagwa, ba ba neng ba itshwere ka tsela e e sa siamang le magodu gore a ba bope go nna matsopa a “tiriso e e tlotlegang.” (Baroma 9:21; 1 Bakorintha 6:9-11) Fa ba ntse ba ithuta Baebele, tumelo ya bone mo go Jehofa e ile ya nonofa mme ba letla Jehofa gore a ba bope.

5, 6. Go ikanya ga rona Jehofa jaaka Mmopi wa Letsopa go tla ama jang tsela e re lebang ka yone (a) batho ba re kopanang le bone mo bodireding? (b) bakaulengwe le bokgaitsadi ba rona?

⁵ Re a itse gore Jehofa o na le bokgoni jwa go tlhopha batho ba a batlang gore ba mo atamele. Ke ka moo re sa tshwanelang go atlhola batho ba mo phuthegong kgotsa ba mo tshimong ya rona. Ka sekai, ga re a tshwanela go akanya gore motho mongwe a ka se nne Mosupi wa ga Jehofa. Ela tlhoko tsela e monna mongwe yo o bidiwang Michael a neng a tsiboga ka yone fa Basupi ba ga Jehofa ba ne ba mo etetse. A re: “Ke ne ke ba itlhokomolosa, go nna jaaka e kete ga ba yo fa pele ga me. Ke ne ke se na maitseo tota! Moragonyana, ke ne ka kopana le lelapa le ke neng ke le rata ka ntlha ya  tsela e le neng le itshwere ka yone. Mme letsatsi lengwe ke ne ka gamarega tota fa ke utlwa gore ke Basupi ba ga Jehofa! Tsela e ba neng ba itshwere ka yone e ile ya dira gore ke ipotse lebaka la go bo ke ne ke sa ba rate. Ka bonako fela ke ile ka lemoga gore ke ne ke sa itse sepe, ke latela magatwe go na le go itse boammaaruri.” Michael o ile a batla go itse mo go oketsegileng mme a dumela go ithuta Baebele. Moragonyana o ne a kolobediwa le go tsenela tirelo ya nako e e tletseng.

⁶ Fa re lemoga gore Jehofa ke ene Mmopi wa rona wa letsopa, re tla fetola tsela e re ikutlwang ka yone ka Bakeresetemmogo le rona. Re tla lemoga gore Modimo o sa ntse a ba bopa. O bona se tota ba leng sone e bile o a itse gore bosaitekanelang jwa bone ke jwa nakwana fela. Gape o a itse gore mongwe le mongwe wa bone o tla feleletsa e le letsopa le le ntseng jang. (Pesalema 130:3) Re tla kgona go etsa Jehofa fa le rona re leba batho ka tsela e a ba lebang ka yone. Gape re ka dirisana le Mmopi wa Letsopa go thusa bakaulengwe le bokgaitsadi ba rona gore ba gatele pele. (1 Bathesalonika 5:14, 15) Bagolwane ba tshwanetse go tlhoma sekao se se molemo mo ntlheng eno.—Baefeso 4:8, 11-13.

7. Ke eng fa o anaanela thapiso ya ga Jehofa?

⁷ Batho bangwe ba ka nna ba re: ‘Ke ne ke sa anaanele ka botlalo thapiso ya batsadi ba me go fitlha nna ka bonna ke nna motsadi.’ Fa re ntse re gola, re simolola go anaanela thapiso kgotsa kotlhao ka gonne e re lemotsha gore re a ratwa. (Bala Bahebera 12:5, 6, 11.) Boammaaruri ke gore, re bana ba ga Jehofa e bile o a re rata, ke ka moo a leng pelotelele le rona fa a re thapisa le fa a re bopa. O batla gore re nne botlhale, re itumele le go mo rata e re ka e le Rraarona. (Diane 23:15) Ga a batle go re bona re boga e bile ga a batle gore re swe re le baleofi ba ba ganang go ikwatlhaya.—Baefeso 2:2, 3.

8, 9. Jehofa o re ruta jang gompieno, mme thuto eno e tla tswelela pele jang mo nakong e e tlang?

⁸ Pele ga re ithuta ka Jehofa, gongwe re ne re na le dinonofo di le dintsi tse di sa eletsegeng. Le fa go ntse jalo, Jehofa o ile a re bopa le go re thusa go fetoga mme seo se dirile gore re nne le dinonofo dingwe tse dintle. (Isaia 11:6-8; Bakolosa 3:9, 10) Re tshela mo paradaiseng ya semoya. Paradaise eno ke tikologo e e kgethegileng e Jehofa a e tlhomileng mo metlheng ya rona gore a kgone go re bopa. Fa re le mo go yone, re ikutlwa re babalesegile tota le fa batho ba re tshelang le bone ba le boikepo. Gone jaanong batho ba ba goletseng mo malapeng a a se nang lorato ba ikutlwa ba ratwa ke Bakeresetemmogo le bone ba ba mo paradaiseng ya semoya. (Johane 13:35) Re ithutile go rata batho ba bangwe. Mme sa botlhokwa le go feta, re itse Jehofa e bile re lemoga gore o a re rata.—Jakobe 4:8.

⁹ Mo lefatsheng le lesha, paradaise ya semoya e tla re solegela molemo ka botlalo.  Re tla itumelela botshelo mo paradaiseng ya mmatota e mo go yone Bogosi Jwa Modimo bo tla bong bo busa. Ka nako eo, Jehofa o tla tswelela a re bopa le go re ruta dilo tse dintsi thata. (Isaia 11:9) Gape Jehofa o tla dira gore ditlhaloganyo le mebele ya rona e itekanele. Seno se tla dira gore go nne motlhofo go tlhaloganya le go ikobela ditaelo tsa gagwe ka botlalo. Ka jalo, a re tsweleleng pele re letla Jehofa gore a re bope e bile a re mmontsheng gore re anaanela go bo a re bontshitse gore o a re rata.—Diane 3:11, 12.

10. Jesu o ile a bontsha jang gore o latela sekao sa bopelotelele le sa botswerere jwa Mmopi yo Mogolo wa Letsopa?

¹⁰ Fela jaaka motho yo o nang le botswerere jwa go dira ka letsopa a itse mofuta wa letsopa le a berekang ka lone, Jehofa le ene o re itse sentle. O itse makoa a rona, dilo tse re sa kgoneng go di dira, kgatelopele e re e dirileng mme o akanyetsa dilo tseno fa a re bopa. (Bala Pesalema 103:10-14.) Re kgona go bona seno mo tseleng e Jesu a neng a tsiboga ka yone fa a bona makoa a baaposetoloi ba gagwe. Ka dinako tse dingwe, baaposetoloi ba ne ba ngangisana ka gore ke mang yo mogolo mo go bone. Fa o ne o le teng ka nako eo, o ne o tla ikutlwa jang ka baaposetoloi bao? O ne o ka nna wa akanya gore ga ba tshwane le letsopa le le kgonang go bopega. Le fa go ntse jalo, Jesu o ne a itse gore ba ne ba ka nna letsopa le le bopegang fa ba ka reetsa kgakololo e a neng a ba naya yone ka lorato le ka bopelotelele le fa ba etsa sekao sa gagwe sa go nna boikokobetso. (Mareko 9:33-37; 10:37, 41-45; Luke 22:24-27) Fa Jesu a sena go tsosiwa mo baswing, baaposetoloi bano ba ne ba amogela moya o o boitshepo e bile ba ne ba sa tlhole ba tshwenyega ka gore ke mang yo mogolo mo gare ga bone. Go na le moo, ba ne ba tlhomile mogopolo mo tirong e Jesu a ba neileng yone.—Ditiro 5:42.

11. Dafide o ile a bontsha ka ditsela dife gore o tshwana le letsopa le le bopegang, mme re ka etsa sekao sa gagwe jang?

¹¹ Gone jaanong Jehofa o re bopa a dirisa Baebele, moya o o boitshepo le phuthego ya gagwe. Baebele e ka re bopa jang? Re tshwanetse go e bala, go tlhatlhanya ka se re se balang le go kopa Jehofa gore a re thuse go dira dilo tse re di ithutang. Kgosi Dafide o ne a kwala a re: “Fa ke go gakologetswe mo bolaong jwa me, ke tlhatlhanya ka wena mo ditebelong tsa bosigo.” (Pesalema 63:6) Gape o ne a re: “Ke tla baka Jehofa, yo o nneileng kgakololo. Ruri, diphilo tsa me di ntshiamisitse mo masigong.” (Pesalema 16:7) Dafide o ne a tlhatlhanya ka kgakololo ya ga Jehofa e bile o ne a e letla gore e bope dikakanyo le maikutlo a gagwe a a kwa teng tota le fa go ne go le thata go amogela kgakololo eo. (2 Samuele 12:1-13) Dafide o re tlhometse sekao se sentle sa go nna boikokobetso le go ikoba. Ka jalo, ipotse jaana: ‘Fa ke bala Baebele, a ke tlhatlhanya ka yone le go letla kgakololo ya ga Jehofa gore e ame dikakanyo le maikutlo a me a a kwa tengteng? A ke tlhoka go tokafatsa mo ntlheng eno?’—Pesalema 1:2, 3.

12, 13. Jehofa o re bopa jang a dirisa moya o o boitshepo le phuthego ya gagwe?

¹² Moya o o boitshepo o ka re bopa ka ditsela tse di farologaneng. Ka sekai, o kgona go re thusa go etsa dinonofo tsa ga Jesu le go bontsha dikarolo tse di farologaneng tsa leungo la moya. (Bagalatia 5:22, 23) Nngwe ya dikarolo tseo ke lorato. Re rata Modimo e bile re batla go mo ikobela le  gore a re bope ka gonne re a itse gore melao ya gagwe e re solegela molemo thata. Gape moya o o boitshepo o kgona go re naya maatla a go tila go bopega jaaka batho ba lefatshe leno le le bosula. (Baefeso 2:2) Fa moaposetoloi Paulo a ne a le mosha, o ne a tlhotlhelediwa ke baeteledipele ba bodumedi ba Bajuda ba ba neng ba le boikgogomoso. Mme moya o o boitshepo o ne wa mo thusa go fetoga. Moragonyana o ne a kwala a re: “Mo dilong tsotlhe ke na le nonofo ka ntlha ya yo o nnayang maatla.” (Bafilipi 4:13) Le rona re tshwanetse go kopa moya o o boitshepo, re tlhomamisegile gore Jehofa o tla araba dithapelo tsa rona tse di tswang pelong.—Pesalema 10:17.

¹³ Gape Jehofa o dirisa bagolwane le phuthego go bopa mongwe le mongwe wa rona. Ka sekai, fa bagolwane ba lemoga gore o na le bokoa bongwe, ba leka go go thusa. Le fa go ntse jalo, ga ba go neye kgakololo e bone ba akanyang gore e siame. (Bagalatia 6:1) Go na le moo, ba ikokobetsa le go rapela Jehofa gore a ba neye botlhale le temogo. Go tswa foo, ba dira dipatlisiso mo Baebeleng le mo dikgatisong tsa Baebele go bona tshedimosetso e e ka go thusang. Fa bagolwane ba tla kwa go wena ba bo ba go gakolola, gongwe ka tsela e o aparang ka yone, gakologelwa gore kgakololo ya bone ke bosupi jwa gore Modimo o a go rata. Fa o dirisa kgakololo eo, o tla tshwana le letsopa le Jehofa a kgonang go le bopa mme o tla solegelwa molemo thata.

14. Le fa Mmopi wa Letsopa a na le taolo mo letsopeng, Jehofa o re bontsha jang gore o tlotla tshwanelo ya rona ya go itlhophela?

¹⁴ Fa re tlhaloganya tsela e Jehofa a re bopang ka yone, re tla kgona go nna le kamano e e molemo le bakaulengwe le bokgaitsadi ba rona. Gape re tla leba batho ba re kopanang le bone mo tshimong mmogo le ba re ithutang le bone, ka tsela e e siameng. Mo metlheng ya go kwalwa ga Baebele, mmopi wa letsopa o ne a simolola ka  go phepafatsa letsopa le go ntsha maje le dilo tse dingwe mo go lone pele a le dirisa. Mmopi yo Mogolo wa Letsopa e bong Jehofa, o thusa batho ba ba batlang go fetoga. Ga a ba pateletse gore ba fetoge, go na le moo, o ba bontsha melao ya gagwe e e siameng. Mme go tswa foo, ke bone ba itirelang tshwetso ya gore a ba tla dira diphetogo tse di tlhokegang.

15, 16. Batho ba re ithutang Baebele le bone ba bontsha jang gore ba batla gore Jehofa a ba bope? Naya sekai.

¹⁵ Ela tlhoko se se ileng sa diragalela kgaitsadi wa kwa Australia e bong Tessie. Go ne go le motlhofo gore a ithute se se mo Baebeleng. Le fa go ntse jalo, o ne a sa dire diphetogo mo botshelong e bile a sa ye dipokanong. Kgaitsadi yo o neng a ithuta le ene o ne a rapela Jehofa mme a dira tshwetso ya go emisa go ithuta le ene. Mme go ne ga direga sengwe se se gakgamatsang. Ka nako ya fa ba ithuta, Tessie o ne a bolelela kgaitsadi yoo lebaka la go bo a ntse a sa gatele pele. A re o ne a itsaya e le moitimokanyi ka gonne a rata go betšha. Mme gone jaanong o tlogetse go betšha.

¹⁶ Go ise go ye kae, Tessie o ne a simolola go ya dipokanong e bile a bontsha dinonofo tse di siameng tota le fa ditsala tsa gagwe tsa pele di ne di mo ja ditshego. Fa nako e ntse e ya, Tessie o ne a kolobediwa, a nna mmulatsela wa ka metlha tota le fa a ne a na le bana ba bannye. Go bonala sentle fela gore fa batho ba re ithutang Baebele le bone ba simolola go dira diphetogo, Modimo o a itumela e bile o atamalana le bone le go ba bopa go nna dijana tse di tlhwatlhwakgolo.

17. (a) Ke eng se se go kgatlhang ka Jehofa go bo e le Mmopi wa gago wa letsopa? (b) Ke dikarolo dife tsa go bopa tse re tla tlotlang ka tsone mo setlhogong se se latelang?

¹⁷ Go sa ntse go na le batho ba ba dirisang diatla go bopa letsopa gore le nne dijana tse dintle. Ka tsela e e tshwanang, Jehofa o pelotelele e bile o re bopa a dirisa kgakololo ya gagwe le go leba ka kelotlhoko go bona gore re tla tsiboga jang. (Bala Pesalema 32:8.) A o kgona go bona gore Jehofa o amega ka wena? A o bona kafa a leng kelotlhoko ka gone fa a go bopa? Fa go le jalo, ke dinonofo dife tse di tla go thusang go nna letsopa le Jehofa a kgonang go le bopa? Ke mekgwa efe e o tshwanetseng go e tila gore o se ka wa nna letsopa le le thata le Jehofa a sa kgoneng go le bopa? Mme batsadi ba ka dirisana jang le Jehofa go bopa bana ba bone? Setlhogo se se latelang se tla araba dipotso tseno.