1, 2. Ke eng fa Modimo a ne a leba Daniele e le “monna yo o rategang thata,” mme re ka nna jang boikobo jaaka Daniele?

FA Bajuda ba ne ba le kwa Babelona, ba ne ba nna mo motseng o o tletseng ka medingwana le batho ba ba obamelang meya e e boikepo. Le fa go ntse jalo, Bajuda ba ba ikanyegang ba ba jaaka Daniele le ditsala tsa gagwe tse tharo, ga ba a ka ba itetla go bopiwa ke batho ba Babelona. (Daniele 1:6, 8, 12; 3:16-18) Daniele le ditsala tsa gagwe ba ne ba tsaya Jehofa e le Mmopi wa bone wa letsopa e bile ba ne ba tswelela ba obamela ene fela. Le fa Daniele a tshedile lobaka lo loleele le batho ba ba sa siamang, moengele wa Modimo o ne a re Daniele e ne e le “monna yo o rategang thata.”—Daniele 10:11, 19.

² Mo metlheng ya go kwalwa ga Baebele, mmopi wa letsopa o ne a le bopa gore le nne ka tsela epe fela e a e batlang. Le gompieno baobamedi ba boammaaruri ba a itse gore Jehofa ke Mmusi wa lobopo lotlhe le gore o na le taolo ya go bopa ditšhaba. (Bala Jeremia 18:6.) Gape Modimo o na le taolo ya go bopa mongwe le mongwe wa rona. Le fa go ntse jalo, Jehofa ga a pateletse ope gore a fetoge. Go na le moo, o batla gore e  nne rona re mo letlang gore a re bope. Mo setlhogong seno, re tla ithuta kafa re ka nnang letsopa le Modimo a kgonang go le bopa. Re tla sekaseka dipotso tseno tse tharo: (1) Re ka tila jang go nna le mekgwa e e ka nnang ya dira gore re nne letsopa le le thata mme re gane kgakololo ya Modimo? (2) Re ka nna jang le dinonofo tse di re thusang go nna re ikobela Modimo le go nna letsopa le a kgonang go le bopa? (3) Batsadi ba Bakeresete ba ka dirisana jang le Modimo fa ba bopa bana ba bone?

3. Ke mekgwa efe e e ka thatafatsang dipelo tsa rona? Naya sekai.

³ Diane 4:23 ya re: “Go feta tsotlhe tse dingwe tse di tshwanetseng go disiwa, dibela pelo ya gago, gonne metswedi ya botshelo e tswa mo go yone.” Fa re batla gore dipelo tsa rona di se ka tsa nna thata, re tshwanetse go tila mekgwa e e jaaka boikgogomoso, go dira boleo le go tlhoka tumelo. Fa re se kelotlhoko, mekgwa eno e ka nna ya dira gore re se ka ra ikobela Modimo le gore re mo tsuologele. (Daniele 5:1, 20; Bahebera 3:13, 18, 19) Seo se ile sa diragalela Kgosi Usia wa kwa Juda. (Bala 2 Ditiragalo 26:3-5, 16-21.) Kwa tshimologong, Modimo o ne a naya Usia maatla ka gonne Usia a ne a le boikokobetso e bile a na le kamano e e molemo le Modimo. Le fa go ntse jalo, “fela fa a sena go nonofa, pelo ya gagwe ya nna mabela.” O ne a ikgogomosa jaana mo a neng a leka go fisa maswalo kwa tempeleng, tota le fa tiro eo e ne e tshwanetse go dirwa ke baperesiti fela. Fa baperesiti ba bolelela Usia gore se a se dirang se phoso, o ne a galefa! Jehofa o ne a otlhaya kgosi eo e e ikgogomosang mme e ne ya nna molepero go fitlha e swa.—Diane 16:18.

4, 5. Ke eng se se ka diregang fa re ikgogomosa? Naya sekai.

⁴ Fa re ikgogomosa, re ka nna ra simolola go akanya gore re botoka go gaisa batho ba bangwe mme ra feleletsa re gana kgakololo ya Baebele e ba re nayang yone. (Diane 29:1; Baroma 12:3) Seo se ile sa diragalela mogolwane mongwe yo o bidiwang Jim. O ne a sa dumalane le bagolwane ba bangwe ka kgang nngwe. Jim a re: “Ke ne ka bolelela bakaulengwe gore ga ba na lorato mme ka tsamaya pokano e ise e fele.” Morago ga dikgwedi di le thataro, o ne a fudugela kwa phuthegong e nngwe mme a se ka a tlhomiwa gape go nna mogolwane. Jim o ne a swabile nko go feta molomo. E re ka a ne a tlhomamisegile gore o ne a sa dira sepe se se phoso, o ne a tlogela go direla Jehofa ka dingwaga di le lesome. A re o ne a le boikgogomoso e bile o ile a simolola go pega Jehofa molato ka ntlha ya se se diragetseng. Go ne ga feta dingwaga bakaulengwe ba mo etela ba leka go mo thusa mme Jim a sa batle go utlwa sepe.

⁵ Jim a re: “Ke ne ke tlhomile mogopolo thata mo go se ke neng ke tsaya gore ba ne ba le phoso mo go sone.” Sekao sa gagwe se re thusa go bona gore boikgogomoso bo ka dira gore re buelele boitshwaro jwa rona jo bo sa siamang. Fa seo se direga, ga re tlhole re le letsopa le Modimo a kgonang go le bopa. (Jeremia 17:9) A o kile wa kgopisiwa ke mokaulengwe kgotsa kgaitsadi mongwe? A o kile wa utlwa botlhoko ka ntlha ya go latlhegelwa ke tshiamelo nngwe? O ile wa tsiboga jang? A o ile wa nna boikgogomoso kgotsa a o ile wa lemoga gore go tshedisana ka kagiso le Bakeresete ba bangwe le go tswelela o ikanyega mo go Jehofa ke gone go leng botlhokwa thata go gaisa sepe fela?—Bala Pesalema 119:165; Bakolosa 3:13.

6. Ke eng se se ka diregang fa re tswelela re dira boleo?

 ⁶ Fa motho a tswelela a dira boleo e bile a fitlha se a se dirang, go ka nna thata gore a amogele kgakololo ya Modimo. Fa a dira jalo, o feleletsa a tlwaela go dira boleo. Mokaulengwe mongwe a re fa nako e ntse e ya, boitshwaro jwa gagwe jo bo sa siamang bo ne bo sa tlhole bo mo tshwenya le e seng. (Moreri 8:11) Mokaulengwe yo ka nako nngwe a neng a lebelela ditshwantsho tsa thobalano a re: “Ke ne ka iphitlhela ke tshwayatshwaya bagolwane diphoso.” Seo se ile sa senya kamano ya gagwe le Jehofa. Fa boleo jwa gagwe bo nna mo pepeneneng, bagolwane ba ile ba mo thusa. Ke boammaaruri gore rotlhe re a leofa. Mme fa mongwe a re gakolola re bo re mo tshwayatshwaya diphoso kgotsa re dira diipato re bo re sa kope Modimo gore a re itshwarele le go re thusa, pelo ya rona e ka nna ya feleletsa e le thata.

7, 8. (a) Se se diragaletseng Baiseraele se bontsha jang diphelelo tse di botlhoko tsa go tlhoka tumelo? (b) Re ithuta eng mo sekaong sa bone?

⁷ Fa Jehofa a ne a golola Baiseraele kwa Egepeto, ba ne ba bona dikgakgamatso tse dintsi tse a ileng a di dira. Le fa go ntse jalo, fa ba ntse ba atamela Lefatshe le le Solofeditsweng, dipelo tsa bone di ne tsa nna thata. Ka ntlha yang? Ba ne ba se na tumelo. Go na le gore ba ikanye Jehofa, ba ile ba boifa mme ba ngongorega ka Moshe. Ba ile ba bo ba batla go boela kwa Egepeto kwa e neng e le makgoba teng! Jehofa o ne a utlwile botlhoko thata mo a neng a re: “Batho bano ba tla ntshwara ka go tlhoka tlotlo ka lobaka lo lo kae?” (Dipalo 14:1-4, 11; Pesalema 78:40, 41) Baiseraele bao ba ne ba swela mo nageng ka gonne ba ile ba thatafatsa dipelo tsa bone le go tlhoka tumelo.

⁸ Gone jaanong re gaufi le go tsena mo lefatsheng le lesha e bile tumelo ya rona e a lekwa. Ka jalo, re tlhoka go itlhatlhoba go bona gore tumelo ya rona e nonofile go le kana kang. Re ka tlhomamisega jang gore e nonofile sentle? Re ka dira jalo ka go sekaseka mafoko a ga Jesu a a mo go Mathaio 6:33. Ipotse jaana: “A mekgele ya me le ditshwetso tsa me di bontsha gore ke dumela mafoko ano a ga Jesu? A ke tla tlhoka go ya dipokanong kgotsa bodireding ka gonne ke batla go nna le madi a a oketsegileng? Ke tla dira eng fa tiro ya me e ntlhoka gore ke bereke nako e e oketsegileng? A ke tla bopiwa ke lefatshe leno, gongwe le go le letla gore le nkgaoganye le Jehofa?

9. Ke eng fa re tshwanetse go nna re leka go bona gore a ‘re mo tumelong,’ mme re ka dira seo jang?

⁹ Fa re sa latele kgakololo ya Baebele e e malebana le go itsalanya le batho ba ba sa siamang, ba ba kgaotsweng kgotsa go itlosa bodutu ka tsela e e sa siamang, dipelo tsa rona di ka nna tsa feleletsa di le thata. O tshwanetse go dira eng fa seno se go diragalela? O tshwanetse go tlhatlhoba tumelo ya gago ka bonako! Baebele ya re: “Nnang lo leke gore a lo mo tumelong, nnang lo ipontshe se lona ka bolona lo leng sone.” (2 Bakorintha 13:5) Fa o lemoga gore go na le mo o tlhokang go tokafatsa gone, dirisa Lefoko la Modimo ka metlha go baakanya tsela e o akanyang ka yone.

10. Ke eng se se ka re thusang go nna letsopa le Jehofa a kgonang go le bopa?

¹⁰ Modimo o re neile Lefoko la gagwe, phuthego ya gagwe mmogo le bodiredi go re thusa go tswelela re le letsopa le a kgonang go le bopa. Fa re bala Baebele letsatsi le letsatsi e bile re tlhatlhanya ka se re se balang, re tla nna letsopa le Jehofa a kgonang go le bopa. Jehofa o ne a laela dikgosi tsa Iseraele gore di ikwalele buka ya Molao mme di e bale letsatsi le letsatsi. (Duteronome 17:18, 19) Baaposetoloi ba ne ba itse gore go bala Dikwalo le go tlhatlhanya ka tsone go ne go le botlhokwa thata mo bodireding jwa bone. Ba ne ba dirisa dikarolo tsa Dikwalo Tsa Sehebera ka makgetlo a le mantsi mo mekwalong ya bone mme fa ba rerela batho, ba ne ba ba kgothaletsa gore le bone ba dirise Dikwalo. (Ditiro 17:11) Le rona re a bona gore go botlhokwa go bala Lefoko la Modimo letsatsi le letsatsi le go tlhatlhanya ka se re se balang. (1 Timotheo 4:15) Fa re dira jalo, re tla nna boikokobetso e bile re tla nna letsopa le Jehofa a kgonang go le bopa.

11, 12. Jehofa o dirisa phuthego ya gagwe jang go re bopa go ya ka se mongwe le mongwe wa rona a se tlhokang? Naya sekai.

¹¹ Jehofa o itse se mongwe le mongwe wa rona a se tlhokang mme o dirisa phuthego ya gagwe go re bopa. Jim yo re buileng ka ene pelenyana, o ne a simolola go fetoga fa mogolwane mongwe a ne a mmontsha gore o amega ka ene. Jim a re: “Le ka motlha ga a ise a dire gore ke ipone ke le molato kgotsa go ntshwayatshwaya diphoso. Go na le  moo, o ne a tlhola a bua dilo tse di agang e bile a mpontsha gore o batla go nthusa.” Morago ga dikgwedi tse tharo, mogolwane yoo o ne a laletsa Jim gore a tle dipokanong. Jim a re phuthego e ile ya mo amogela sentle mme lorato lwa bone lo ile lwa mo thusa go fetola tsela e a neng a akanya ka yone. O ne a simolola go lemoga gore maikutlo a gagwe a ne a se botlhokwa thata. Bagolwane ba phuthego e Jim a neng a le mo go yone mmogo le mosadi wa gagwe ba ile ba mo kgothatsa mme ka iketlo a simolola go direla Jehofa. Gape Jim o ile a thusiwa ke go bala setlhogo se se reng, “Jehofa ga a Tshwanela go Pegiwa Molato,” le se se reng, “Direla Jehofa ka Boikanyego,” tse di mo makasineng wa Tora ya Tebelo ya November 15, 1992.

¹² Fa nako e ntse e ya, Jim o ne a nna mogolwane gape. Fa e sa le ka nako eo, o ile a thusa bakaulengwe ba bangwe ba ba nang le bothata jo bo tshwanang mme a nonotsha tumelo ya bone. A re o ne a akanya gore o ne a atamalane thata le Jehofa mme a lemoga gore tota go ne go sa nna jalo! O ikwatlhaela go bo a ile a letla boikgogomoso bo mo dira gore a tlhome mogopolo mo diphosong tsa ba bangwe go na le mo dilong tse di botlhokwa thata.—1 Bakorintha 10:12.

13. Bodiredi jwa tshimo bo re thusa go nna le dinonofo dife, mme go nna le diphelelo dife?

¹³ Jehofa o dirisa bodiredi jwa tshimo go re bopa le go re thusa go nna batho ba ba botoka. O dira seo jang? Fa re rera dikgang tse di molemo, re tshwanetse go nna le dinonofo tse di jaaka boikokobetso mmogo le dikarolo tse di farologaneng tsa leungo la moya wa Modimo. (Bagalatia 5:22, 23) Akanya ka dinonofo tse di molemo tse bodiredi jwa tshimo bo go thusitseng go nna le tsone. Fa re etsa sekao sa ga Keresete, batho ba kgatlhegela molaetsa wa rona e bile ba ka nna ba fetola tsela e ba re lebang ka yone. Ka sekai, Basupi ba babedi ba kwa Australia ba ne ba leka go rerela mosadi mongwe kwa ntlong ya gagwe mme mosadi yoo o ne a galefile thata e bile a le tala. Le fa go ntse jalo, Basupi ba ne ba mo reetsa ka tlotlo. Moragonyana, mosadi yoo o ne a ikwatlhaela boitshwaro jwa gagwe mme a kwalela ofisi ya lekala. O ne a kopa maitshwarelo. O ne a re: “Ke sematla tota go bo ke ile ka leleka batho ba babedi ba ba neng ba tsamaisa Lefoko la Modimo.” Maitemogelo ano a re ruta botlhokwa jwa go nna bonolo fa re le mo bodireding. Boammaaruri ke gore, bodiredi jwa rona bo thusa batho ba bangwe e bile bo re thusa go tokafatsa botho jwa rona.

14. Batsadi ba tshwanetse go dira eng fa ba batla go atlega mo go bopeng bana ba bone?

¹⁴ Bana ba le bantsi ba boikokobetso e bile ba batla go ithuta dilo tse disha. (Mathaio 18:1-4) Ka jalo, go botlhokwa gore batsadi ba thuse bana ba bone go ithuta boammaaruri jo bo mo Baebeleng le go bo rata ba sa ntse ba le bannye. (2 Timotheo 3:14, 15) Gore batsadi ba kgone go dira jalo, ba tshwanetse go rata boammaaruri joo  bone ka bobone le go bo dirisa mo matshelong a bone. Fa batsadi ba dira jalo, go nna motlhofo gore bana ba bone ba rate boammaaruri. Mo godimo ga moo, bana ba tla lemoga gore fa batsadi ba bone ba ba kgalemela, seo se bontsha gore ba a ba rata le gore Jehofa le ene o a ba rata.

15, 16. Batsadi ba ka bontsha jang gore ba ikanya Modimo fa ngwana wa bone a kgaotswe?

¹⁵ Tota le fa batsadi ba ruta bana boammaaruri, bangwe ba bana bano ba tlogela Jehofa kgotsa ba a kgaolwa. Fa seo se direga, lelapa le utlwa botlhoko thata. Kgaitsadi mongwe wa mo Afrika Borwa a re: “Fa nkgonne a ne a kgaolwa, go ne go ntse jaaka e kete o tlhokafetse. Go ne go utlwisa botlhoko thata!” Mme ene le batsadi ba gagwe ba ne ba dira eng? Ba ne ba latela kgakololo ya Baebele. (Bala 1 Bakorintha 5:11, 13.) Batsadi ba ne ba itse gore go ikobela kgakololo ya Modimo go ne go tla solegela lelapa lotlhe molemo. Mme ba ne ba itse gore go kgaolwa go bontsha gore Jehofa o rata motho. Ka jalo, ba ne ba ikgolaganya le morwaabone fa fela go ne go na le kgang ya lelapa e e neng e tlhoka gore ba dire jalo.

¹⁶ Morwaabone o ne a ikutlwa jang? Moragonyana o ne a re: “Ke ne ke itse gore ba lelapa la gaetsho ba ne ba sa ntlhoa, go na le moo ba ne ba ikobela Jehofa le phuthego ya gagwe.” Gape o ne a re: “Fa o patelesega go kopa Jehofa gore a go thuse le go go itshwarela, o lemoga gore o mo tlhoka fela thata.” Akanya fela kafa lelapa leno le neng la ikutlwa ka gone fa lekawana leno le boela kwa go Jehofa! Re tla itumela le go atlega fa fela re ikobela Modimo ka dinako tsotlhe.—Diane 3:5, 6; 28:26.

17. Ke eng fa re tshwanetse go ikobela Jehofa ka dinako tsotlhe, mme go dira jalo go tla re solegela molemo jang?

¹⁷ Moporofeti Isaia o ne a bolelela pele gore Bajuda ba kwa Babelona ba ne ba tla ikwatlhaya le go bua ba re: “Wena Jehofa, o Rraarona. Re letsopa, wena o Mmopi wa rona wa Letsopa; mme rotlhe re tiro ya seatla sa gago.” Gape ba ne ba kopa Jehofa ba re: “O se ka wa gakologelwa tlolo ya rona ka bosaengkae. Jaanong, bona, tsweetswee: rotlhe re batho ba gago.” (Isaia 64:8, 9) Fa re ikokobeditse e bile re ikobela Jehofa ka dinako tsotlhe, fela jaaka Daniele, le rona re nna batho ba botlhokwa mo go ene. Jehofa o tla tswelela pele go re bopa a dirisa Lefoko, moya le phuthego ya gagwe gore mo isagweng re nne “bana ba Modimo” ba ba itekanetseng.—Baroma 8:21.