Ke tshotswe ka May 19, 1940, kwa torotswaneng ya Amioûn, kwa Lebanon. Dingwaga di le mmalwa moragonyana, lelapa la gaetsho le ne la fudugela kwa toropong ya Tripoli. Ke goletse mo lelapeng le le lorato, le le itumetseng, le le itseng Jehofa Modimo e bile le mo rata. Re bana ba batlhano kwa lapeng, basetsana ba bararo le basimane ba babedi mme nna ke monnye mo go bone. Go nna le madi e ne e se selo sa botlhokwa mo batsading ba me. Re ne re tlhomile mogopolo mo go ithuteng Baebele, go ya dipokanong le go thusa batho ba bangwe go itse Modimo.

Kwa phuthegong ya rona, go ne go na le Bakeresete ba le mmalwa ba ba tloditsweng. Mongwe wa bone e ne e le Michel Aboud, yo a neng a tshwara thuto ya buka jaaka e ne e bidiwa ka nako eo. Mo masimologong a bo1920, o ne a ruta batho ba kwa Lebanon boammaaruri jo a neng a bo ithutile kwa New York. Ke sa ntse ke gopola tsela e a neng a tlotla basha ba babedi ba ba neng ba alogile kwa Gileade e bong Anne le Gwen Beavor le tsela e a neng a ba thusa ka yone. Ba ne ba nna ditsala tsa rona. Dingwaga di le dintsi moragonyana, ke ne ka itumela fa ke kopana le Anne kwa United States. Nakwana morago ga moo ke ne ka kopana le Gwen, yo a neng a nyetswe ke Wilfred Gooch mme ba ne ba direla kwa Bethele e leng ofising ya lekala e e kwa London, kwa Engelane.

Fa ke sa ntse ke le mosha, go ne go na le Basupi ba le mmalwa fela kwa Lebanon. Mme re ne re dira sotlhe se re ka se kgonang go bolelela batho ba bangwe se re neng re se ithutile mo Baebeleng. Re ne re dira jalo tota le fa bangwe ba baeteledipele ba bodumedi ba ne ba re ganetsa. Ke sa ntse ke gopola sentle dilo dingwe tse di neng tsa direga.

Letsatsi lengwe, nna le kgaitsadiake e bong Sana re ne re rera mo difoleteng. Moruti mongwe o ne a tla mo letlhatlaganyaneng le re neng re rera mo go lone. Mongwe o tshwanetse a bo a ile a mmitsa. Moruti yoo o ne a simolola go tlhapatsa kgaitsadiake. O ne a tla ka dikgoka a bo a kgorometsa Sana gore a kgokologele kwa tlase mo ditepising, mme o ne a gobala. Mongwe o ne a founela mapodise. A ne a tla a bo a tlhomamisa gore Sana o bona thuso. Ba ne ba isa moruti yoo kwa seteisheneng sa mapodise mme fa ba le koo ba ne ba lemoga gore o tshwere tlhobolo. Mookamedi wa mapodise o ne a mmotsa jaana: “Tota o eng? A o moeteledipele wa bodumedi kgotsa o moeteledipele wa segongwana?”

Tiragalo e nngwe e ke sa ntseng ke e gopola sentle ke fa phuthego ya rona e ne e hirile bese gore re ye go rera kwa torotswaneng e e kwa kgakala. Go ne go le monate mme dilo di ne tsa senyega fa moruti wa mo lefelong leo a utlwela gore re ne re tlile go dira eng a bo a kokoanya batho ba le bantsi gore ba tle go re tlhasela. Ba ne ba re tlhasela, ba re kolopa ka matlapa e bile Papa o ne a gobala. Ke gopola ke bona sefatlhego sa gagwe se tletse madi. Papa le Mama ba ne ba ya kwa beseng mme rona rotlhe re ne ra ba sala morago re tshwenyegile. Mme gone, ga nkitla ke lebala se Mama a neng a se bua fa a ne a phimola Papa madi. O ne a re: “Jehofa, tsweetswee ba itshwarele. Ga ba itse se ba se dirang.”

Nako nngwe re ne ra ya go etela ba masika kwa lefelong le ke tsholetsweng kwa go lone. Fa re goroga kwa ntlong ya ga rremogolo re ne ra fitlhela moeteledipele wa bodumedi yo o tumileng thata yo o itsegeng e le bishopo. Bishopo yono o ne a itse gore batsadi ba me ke Basupi ba ga Jehofa. Tota le fa ke ne ke na le dingwaga di le thataro fela o ne a mpotsa jaana: “Goreng o sa kolobediwa?” Ke ne ka mmolelela gore ke sa ntse ke le monnye e bile ke tshwanetse go ithuta Baebele mo go oketsegileng gore ke kgone go kolobediwa le gore ke nne le tumelo e e nonofileng. Ga a ka a itumelela karabo ya me mme o ne a bolelela rremogolo gore ga ke na maitseo.

Mme gone, ditiragalo tseno tse di sa itumediseng di ne di direga ka sewelo. Batho ba kwa Lebanon ba botsalano e bile ba amogela baeng. Ka jalo, re ne ra kgona go tlotla le batho ba le bantsi ka Baebele e bile re ne ra tshwara dithuto tse dintsi tsa Baebele.

Fa ke sa ntse ke tsena sekolo, mokaulengwe mongwe yo mosha yo o tswang kwa Venezuela o ne a etela Lebanon. O ne a tla dipokanong kwa phuthegong ya rona e bile o ne a simolola go ratana le kgaitsadiake e bong Wafa. Fa nako e ntse e tsamaya, ba ne ba nyalana ba bo ba ya go nna kwa Venezuela. Fa Wafa a ne a kwalela Papa makwalo, o ne a mo kgothaletsa gore a fudusetse lelapa lotlhe kwa Venezuela. O ne a dira jalo ka gonne o ne a re tlhologelelwa  thata. O ne a feleletsa a kgonne go dira gore re fuduge!

Fa re goroga kwa Venezuela ka 1953, re ne ra nna kwa Caracas, gaufi le ntlo ya poresidente. E re ka ke ne ke sa le mosimanyana, ke ne ke itumelela go bona poresidente a feta a kgweediwa ka koloi ya manobonobo. Mme batsadi ba me bone ba ne ba thatafalelwa ke go tlwaela naga e nngwe, puo e e buiwang koo, setso, dijo le maemo a bosa. Tota e bile, go ne ga direga sengwe se se utlwisang botlhoko fa ba ne ba leka go itlwaetsa dilo tseno.

Papa o ne a simolola go lwala. Go ne go sa tlwaelega ka gonne o ne a na le botsogo jo bo siameng. Ga re gopole re mmona a lwala. Papa o ne a bolelelwa gore o na le kankere ya lobete (pancreas) e bile o ne a ariwa. Ka maswabi, o ne a tlhokafala beke morago ga moo.

Go thata go tlhalosa gore re ne re utlwile botlhoko jang ka nako eo. Ke ne ke na le dingwaga di le 13. Re ne re sa solofela gore Papa o tla tlhokafala e bile re ne re akanya gore ga re kitla re kgona go itumela gape. Mama o tsere lobaka lo loleele a sa dumele gore monna wa gagwe ga a tlhole a tshela. Mme gone, re ne ra lemoga gore botshelo bo tshwanetse go tswelela. Ka jalo, Jehofa o ne a re thusa. Fa ke na le dingwaga di le 16, ke ne ka aloga kwa sekolong se segolwane kwa Caracas, mme ke ne ke batla go thusa lelapa la gaetsho.

Ka nako eo, kgaitsadiake e bong Sana o ne a nyalwa ke Rubén Araujo yo a neng a alogile kwa Sekolong sa Gileade mme a boetse mo Venezuela. Ba ne ba fudugela kwa New York. Lelapa la gaetsho le ne la swetsa ka gore ke ye yunibesithing, ka jalo ke ne ka ya kwa New York mme ka nna le kgaitsadiake le monna wa gagwe. Ba ne ba nthusa gore ke atamalane le Jehofa fa ke ntse ke nna le bone. Mo godimo ga moo, kwa phuthegong ya rona ya puo ya Se-Spain kwa Brooklyn, go ne go na le bakaulengwe ba bantsi ba ba atamalaneng le Jehofa. Bangwe ba bakaulengwe bao ba ke neng ka kopana le bone ke Mokaulengwe Milton Henschel le Mokaulengwe Frederick Franz, ba ba neng ba direla kwa Bethele ya Brooklyn.

Fa ngwaga wa me wa ntlha kwa yunibesithing kwa New York o tloga o wela, ke ne ka simolola go ipotsa gore tota ke dira eng ka botshelo jwa me. Ke ne ka bala ka bo ka akanya thata ka ditlhogo tse di mo makasineng wa Tora ya Tebelo tse di neng di bua ka mekgele e Bakeresete ba tshwanetseng go ipeela yone. E bile ke ne ke bona kafa babulatsela le bakaulengwe ba ba direlang kwa Bethele ba ba mo phuthegong ya rona ba neng ba itumetse ka gone mme ke ne ke batla go tshwana le bone. Le fa go ntse jalo, ka nako eo ke ne ke ise ke kolobediwe. Go ise go ye kae, ke ne ka lemoga gore go botlhokwa gore ke ineele mo go Jehofa. Ke ne ka dira jalo mme ka kolobediwa ka March 30, 1957.

Fa ke sena go dira tshwetso eo ya botlhokwa, ke ne ka akanya ka kgato e nngwe gape e ke neng ke batla go e tsaya, e leng go tsenela tirelo ya nako e e tletseng. Ke ne ke batla go nna mmulatsela ka pelo ya me yotlhe, mme ke ne ke lemoga gore seo se ne se tlile go nna thata. Ke ne ke ipotsa gore a ke tla kgona go tswelela ka dithuto tsa yunibesithi ka fa ke le mmulatsela. Nna, Mama le bonkgonne re ne re nna re kwalelana makwalo ke ba tlhalosetsa ka tshwetso e ke  e dirileng ya gore ke tlogela yunibesithi mme ke boela kwa Venezuela gore ke nne mmulatsela.

Ka June 1957 ke ne ka boela kwa Caracas. Le fa go ntse jalo, ke ne ka lemoga gore maemo a kwa lapeng a ne a sa jese diwelang. Go ne go tlhokega lotseno lo lo oketsegileng. Ke ne ke tla thusa jang? Ke ne ka bona tiro kwa bankeng, mme gone ke ne ke sa ntse ke batla go nna mmulatsela. Tota leo ke lone lebaka la go bo ke ne ke boetse mo Venezuela. Ke ne ke ikemiseditse go bereka le go nna mmulatsela. Ke ne ka fetsa dingwaga di le dintsi ke bereka mo bankeng e bile ke le mmulatsela. Ke ne ke nna ke tshwaregile e bile ke itumetse tota.

Selo se sengwe gape se se neng sa dira gore ke itumele ke fa ke kopana le Sylvia e bong kgaitsadi yo montle wa Mojeremane yo a neng a rata Jehofa ke bo ke mo nyala. O ne a fudugetse mo Venezuela le batsadi ba gagwe. Re ne ra nna le bana ba babedi, morwaarona e bong Michel (Mike) le morwadiarona e bong Samira. Gape ke ne ka simolola go tlhokomela Mama. O ne a tla go nna le rona. Le fa gone ke ile ka tshwanelwa ke go emisa go nna mmulatsela wa nako e e tletseng ka ntlha ya maikarabelo a lelapa a ke neng ke na le one, ke ne ke sa ntse ke rata bobulatsela. Nna le Sylvia re ne re tle re nne babulatsela ba ba thusang ka malatsi a boikhutso.

Bana ba ne ba sa ntse ba tsena sekolo fa go ne go direga se ke se tlhalositseng kwa tshimologong ya setlhogo seno. Boammaaruri ke gore ke ne ke tshela botshelo jo bo monate, e bile batho ba ba neng ba bereka mo dibankeng tse di farologaneng ba ne ba ntlotla. Mme gone, ke ne ke batla gore batho ba ntseye ke le motlhanka wa ga Jehofa. Ke ile ka nna ke akanya ka dilo tse nka di dirang gore batho ba ntebe jalo. Ka jalo, nna le mosadi wa me re ne ra bua ka lotseno lwa rona. Fa ke ne nka tlogela go bereka kwa bankeng ke ne ke tla newa madi a go leboga tiro. Mme e re ka re ne re se na dikoloto, re ne ra lemoga gore fa re ka tlhofofatsa botshelo jwa rona re ne re tla nna le madi a a lekaneng ka lobaka lo loleele.

Go ne go se motlhofo go dira tshwetso eo, mme mosadi wa me le Mama ba ne ba nkema nôkeng. Jaanong ke ne ke tlile go nna mmulatsela gape. Ke ne ke itumetse tota! Go ne go lebega dilo di tlile go tsamaya ka thelelo. Mme go ise go ye kae, re ne ra utlwa dikgang tse re neng re sa di solofela.

Letsatsi lengwe ngaka ya rona e ne ya re bolelela gore Sylvia ke moimana. Re ne re gakgametse mme gone re ne re itumetse. Le gale ke ne ke ipotsa gore go tlile go direga eng ka tshwetso ya me ya go nna mmulatsela. A go ne go tla kgonega? Ka bonakonyana fela, re ne ra baakanya maikutlo le megopolo ya  rona re bo re simolola go ipaakanyetsa go amogela ngwana yo mongwe mo lelapeng la rona. Mme go ne go tla direga eng ka ditshwetso tse ke neng ke setse ke di dirile?

Re ne ra tlotla ka mekgele ya rona gape mme ra swetsa ka gore ke tswelele ka bobulatsela. Morwaarona e bong Gabriel o ne a tsholwa ka April 1985. Ka jalo, ke ne ka tlogela go bereka kwa bankeng mme ka simolola go nna mmulatsela wa nako e e tletseng ka June 1985. Fa nako e ntse e tsamaya, ke ne ka nna le tshiamelo ya go nna leloko la Komiti ya Lekala. Le fa go ntse jalo, lekala le ne le se mo Caracas mo go rayang gore ke ne ke tla nna ke ya gone malatsi a le mabedi kgotsa a le mararo mo bekeng ke tsamaya sekgala sa dikilometara di le 80.

Ofisi ya lekala e ne e le kwa torotswaneng ya La Victoria, ka jalo re ne ra dira tshwetso ya gore re fudugele kwa La Victoria gaufi le Bethele. E ne e se kgetsi e potlana! Ke leboga lelapa la me e bile ke leboga thata tsela e ba thusitseng ka yone. Kgaitsadiake e bong Baha, o ne a ithaopela go tlhokomela Mama. Mike o ne a setse a nyetse, mme Samira le Gabriel ba ne ba sa ntse ba nna le rona. Ka jalo, fa re fudugela kwa La Victoria ba ne ba tlile go tlogela ditsala tsa bone mo Caracas. Sylvia ene o ne a tshwanelwa ke go itlwaetsa go nna mo torotswaneng e nnye, e re ka re ne re nna mo toropong e e neng e tlhanasela. E bile rotlhe re ne ra tshwanelwa ke go tlwaela go nna mo ntlong e nnye. Go fuduga mo Caracas gore re ye go nna kwa La Victoria go ne go se motlhofo.

Le fa go ntse jalo, dilo di ne tsa fetoga gape. Gabriel o ne a nyala mme Samira o ne a ya go nna a le nosi. Ka 2007, nna le Sylvia re ne ra kopiwa go tla go nna mo Bethele e leng tshiamelo e re sa ntseng re e itumelela le gompieno. Morwaarona yo mogolo e bong Mike ke mogolwane e bile ene le mosadi wa gagwe e bong Monica ke babulatsela. Gabriel le ene ke mogolwane e bile ene le mosadi wa gagwe e bong Ambra ba nna kwa Italy. Samira ke mmulatsela e bile o thusa ka ditiro dingwe tsa Bethele a le kwa gae.

Ke ile ka tshwanelwa ke go dira ditshwetso tse dintsi tsa botlhokwa mo botshelong. Mme gone, ga ke ikwatlhaye, ke sa ntse nka dira ditshwetso tse di tshwanang. Ke lebogela ditshiamelo tse dintsi tse ke nnileng le tsone fa ke ntse ke direla Jehofa. Fa dingwaga di ntse di feta, ke ne ka lemoga gore go botlhokwa thata gore ke nne ke atamalane le Jehofa. Go sa kgathalesege gore ditshwetso tse re di dirang di dinnye kgotsa di dikgolo, Jehofa o re naya kagiso “e e gaisang kakanyo yotlhe.” (Bafil. 4:6, 7) Nna le Sylvia re itumelela go direla mo Bethele e bile re a lemoga gore Jehofa o segofaditse ditshwetso tsotlhe tse re neng ra di dira ka gonne re ne re akanya ka ene fa re di dira.