Baebele ga e re bolelele lebaka. Mme e re bolelela dintlha dingwe tse di ka tswang di dirile gore ba se ka ba boela kwa Nasaretha fa Jesu a sena go tsholwa.

Moengele o ile a bolelela Marea gore o tla ima a bo a tshola ngwana wa mosimane. Ka nako eo, Marea le Josefa ba ne ba nna kwa motseng wa Galalea o o bidiwang Nasaretha. (Luke 1:26-31; 2:4) Moragonyana fa ba ne ba tswa kwa Egepeto, ba ne ba boela kwa Nasaretha. Jesu o ne a golela teng, ke gone ka moo a neng a bidiwa Monasaretha. (Math. 2:19-23) Ka jalo, fa go buiwa ka Nasaretha, batho ba ba tlang mo mogopolong ke Jesu, Josefa le Marea.

Marea o ne a na le mongwe wa losika kwa Juda yo o bidiwang Elisabetha. Elisabetha o ne a nyetswe ke moperesiti Sekarea, mme moragonyana o ne a nna mmaagwe Johane Mokolobetsi. (Luke 1:5, 9, 13, 36) Marea o ile a mo etela a bo a fetsa dikgwedi di le tharo le ene kwa Juda. Morago ga foo, o ile a boela kwa Nasaretha. (Luke 1:39, 40, 56) Ka jalo, Marea o ne a itse lefelo leo.

Fa nako e ntse e tsamaya, Josefa o ile a tswa kwa Nasaretha mme a ya kwa Bethelehema. O ne a dira jalo ka gonne Baroma ba ne ba laetse gore ‘mongwe le mongwe a ye kwa motseng o a tsholetsweng kwa go one gore a ye go kwadisiwa.’ Gape boporofeti bo ne bo tlhalositse gore Mesia o ne a tla tsholelwa kwa Bethelehema. (Luke 2:3, 4; 1 Sam. 17:15; 20:6; Mik. 5:2) Fa Marea a sena go tshola Jesu kwa Bethelehema, Josefa o ne a sa batle gore ba boele kwa Nasaretha ka gonne go ne go le kgakala. Ba ne ba tswelela ba nna kwa Bethelehema, e e neng e le dikilometara di ka nna robongwe go tswa kwa Jerusalema. Go ne go tla nna motlhofo gore ba ise ngwana kwa tempeleng ba bo ba ntshe setlhabelo.—Lefi. 12:2, 6-8; Luke 2:22-24.

Pelenyana ga foo, moengele o ne a boleletse Marea gore morwawe o ne a tla nna mo ‘setulong sa bogosi sa ga Dafide’ e bile o tla ‘busa e le Kgosi.’ Gongwe Josefa le Marea ba ne ba itse gore go botlhokwa go bo Jesu a tsholetswe mo motseng wa ga Dafide. (Luke 1:32, 33; 2:11, 17) Ba ka tswa ba ne ba akanya gore ba tshwanetse go nna koo go fitlha Modimo a ba bolelela gore ba dire eng.

Ga re itse gore ba ne ba na le lobaka lo lo kae ba le kwa Bethelehema fa balepadinaledi ba ya kwa go bone. Se re se itseng ke gore ba ne ba setse ba nna mo ntlong, e bile Baebele e a re morwaabone e ne e le “ngwana” e seng lesea. (Math. 2:11) Go lebega ba sa boela ka bonako kwa Nasaretha fa Jesu a sena go tsholwa, mme ba ile ba nna lobakanyana kwa Bethelehema.

Herode o ile a laela gore “basimane botlhe ba ba mo Bethelehema . . . ba bolawe, go simologa ka ba ba nang le dingwaga di le pedi go ya kwa tlase.” (Math. 2:16) Moengele o ile a bolelela Josefa ka kgang eo. Ka jalo, ba ile ba tshabela kwa Egepeto ba bo ba nna teng go fitlha Herode a swa. Moragonyana, ba ile ba boela kwa Nasaretha. Goreng ba sa boela kwa Bethelehema fa Herode a sena go swa? Ka gonne ka nako eo go ne go busa morwa Herode yo o bidiwang Arekelao, mme o ne a le setlhogo. Gape moengele o ne a bolelela Josefa gore a se ka a boela kwa Bethelehema ka gonne go ne go le kotsi. Ka jalo, ba ne ba ya kwa Nasaretha ba bo ba godisetsa Jesu teng.—Math. 2:19-22; 13:55; Luke 2:39, 52.

Go lebega Josefa a ile a tlhokafala pele Jesu a swa. Ka jalo, o tla tsosediwa mo lefatsheng, e seng kwa legodimong. Bontsi jwa rona re tla kgona go mmotsa gore goreng ene le Marea ba ile ba tswelela ba nna kwa Bethelehema fa Jesu a sena go tsholwa.