1-2. Go ya ka Pesalema 25:14, re tshwanetse go dira eng fa re batla go nna ditsala tsa ga Jehofa?

 O AKANYA gore batho ba tshwanetse go dira eng gore e tswelele e le ditsala tse di atamalaneng? Gongwe o ka re ba tshwanetse go ratana le go emana nôkeng. A o akanya gore fa batho ba tshabana e ka nna ditsala tse di molemo? Nnyaa. Le fa go ntse jalo, temana ya setlhogo seno e a re batho ba ba batlang go nna ditsala tsa ga Jehofa ba tshwanetse go ‘mmoifa.’—Bala Pesalema 25:14.

² Le fa re ka tswa re na le lobaka lo lo kae re direla Jehofa, re tshwanetse go mmoifa. Mme gone, go boifa Modimo go kaya eng? Ke eng se se ka re thusang gore re boife Jehofa? Mme re ka ithuta eng mo go Obadia, Moperesiti yo Mogolo Jehoiada le Kgosi Jehoashe?

3. Tlhalosa gore go boifa go ka re sireletsa jang.

³ Re ka nna ra tshaba go dira sengwe fa re itse gore se ka re utlwisa botlhoko, mme seno se ka re thusa gore re dire ditshwetso tse di siameng. Ka sekai, fa e le gore o tshaba go wa, o tla nna kelotlhoko tota fa o palama thaba. Fa e le gore o tshaba go gobala, o tla tsamaela kgakala le dilo tse o itseng gore di ka go gobatsa. Fa e le gore o na le tsala nngwe e o e ratang, o tla leka gore o se ka wa bua kgotsa wa dira sengwe se se ka mo utlwisang botlhoko.

4. Satane o batla gore re boife Jehofa jang?

 ⁴ Satane o batla gore batho ba boife Jehofa lebaibai. O batla gore re dumele gore Jehofa o bogale e bile o batla go re otlhaya. Gape o batla gore re dumele gore ga re ka ke ra kgona go itumedisa Jehofa. (Jobe 4:18, 19) O batla gore re boife Jehofa thata mme re tlogele go mo direla. Mme gone, ga re a tshwanela go boifa Jehofa thata. Go na le moo, re tshwanetse go mo tlotla le go tshaba go dira dilo tse di ka mo utlwisang botlhoko.

5. Go boifa Modimo go kaya eng?

⁵ Motho yo o boifang Modimo o a mo rata e bile ga a batle go dira sepe se se ka senyang botsala jwa gagwe le ene. Jesu o ne a “boifa Modimo” ka tsela eo. (Baheb. 5:7) O ne a sa tshabe Jehofa lebaibai. (Isa. 11:2, 3) Go na le moo, o ne a mo rata thata e bile a batla go mo ikobela. (Joh. 14:21, 31) Fela jaaka Jesu, le rona re tlotla Jehofa ka gonne o lorato, o botlhale, o tshiamiso e bile o na le maatla. Gape re a itse gore Jehofa o re rata fela thata le gore tsela e re itshwarang ka yone fa a re ruta, e ka dira gore a itumele kgotsa a utlwe botlhoko.—Pes. 78:41; Diane 27:11.

6. Ke eng se se ka re thusang gore re boife Modimo? (Pesalema 34:11)

⁶ Ga go itiragalele fela gore re boife Jehofa. Ke eng se se ka re thusang gore re mmoife? (Bala Pesalema 34:11.) Sengwe se se ka re thusang ke go leba dilo tse a di bopileng. Dilo tseno di re thusa go lemoga gore o botlhale, o na le maatla le gore o a re rata. Mme seo se dira gore re mo tlotle le gore re mo rate. (Bar. 1:20) Kgaitsadi mongwe yo o bidiwang Adrienne a re: “Dilo tsotlhe tse Jehofa a di dirileng di bontsha gore o botlhale. Mme seno se nthusa go lemoga gore o itse se se ntshiametseng.” E re ka a nna a akanyetsa kwa teng ka dilo tse Jehofa a di dirileng, a re: “Ga ke batle go dira sepe se se ka senyang botsala jwa me le Jehofa ka gonne o nneile botshelo.” A o ka ipha nako mo bekeng eno go akanyetsa kwa teng ka sengwe se Jehofa a se bopileng? Go dira jalo go tla go thusa gore o rate Jehofa le gore o mo tlotle le go feta.—Pes. 111:2, 3.

7. Go rapela go ka re thusa jang gore re boife Jehofa?

⁷ Sengwe gape se se ka re thusang gore re boife Modimo ke go rapela ka metlha. Nako le nako fa re rapela, seo se re thusa go itse Jehofa botoka. Fa re kopa Jehofa gore a re thuse go itshoka, seo se re gopotsa gore o na le maatla. Fa re mo leboga ka gonne a re ntsheditse Morwawe, seo se re gopotsa gore o re rata fela thata. Mme fa re kopa Jehofa ka tlhoafalo gore a re thuse go rarabolola bothata bongwe, seo se re gopotsa gore o botlhale thata. Dithapelo tseo di re thusa gore re tlotle Jehofa le go feta, e bile di re thusa go ititaya sehuba gore ga re kitla re dira sepe se se ka senyang botsala jwa rona le ene.

8. Re ka dira eng gore re tswelele re boifa Modimo?

⁸ Go ithuta ka batho ba ba neng ba dira dilo tse di siameng le tse di sa siamang ba go buiwang ka bone mo Baebeleng, go tla re thusa go boifa Modimo. A re tlotleng ka batlhanka ba ga Jehofa ba babedi ba ba ikanyegang. Re tla tlotla ka Obadia yo o neng a okametse ntlo ya segosi ya ga Kgosi Ahabe, le Moperesiti yo Mogolo Jehoiada. Go tswa foo, re tla bona gore re ka ithuta eng mo go Kgosi Jehoashe wa kwa Juda, yo o simolotseng a direla Jehofa mme moragonyana a bo a mo tlhanogela.

9. Go boifa Modimo go ne ga thusa Obadia jang? (1 Dikgosi 18:3, 12)

⁹ Lekgetlo la ntlha fa Baebele e bua ka Obadia b e a re: “Obadia o ne a boifa Jehofa thata.” (Bala 1 Dikgosi 18:3, 12.) Go boifa Modimo go ne ga thusa Obadia jang? Go ne ga mo thusa gore a ikanyege, ka jalo kgosi e ne ya mo tlhoma gore a okamele ntlo ya gagwe ya segosi. (Bapisa le Nehemia 7:2.) Gape go boifa Modimo go ne ga thusa Obadia gore a nne pelokgale, e leng sengwe se a neng a se tlhoka. O ne a tshela mo motlheng wa ga Kgosi Ahabe yo o bosula yo o neng ‘a dira se se bosula mo matlhong a ga Jehofa go gaisa dikgosi tsotlhe tse di nnileng teng pele ga gagwe.’ (1 Dikg. 16:30) Mo godimo ga moo, mosadi wa ga Ahabe yo o bidiwang Jesebele o ne a obamela Baale, ka jalo o ne a tlhoile Jehofa e bile o ne a leka go thibela Baiseraele ba bogosi jwa ditso tse di lesome gore ba se ka ba direla Jehofa. O ile a bolaya baporofeti ba ga Jehofa ba le bantsi. (1 Dikg. 18:4) Ruri Obadia o ne a direla Jehofa ka nako e e thata!

10. Obadia o ile a bontsha jang gore o pelokgale thata?

¹⁰ Obadia o ile a bontsha jang gore o pelokgale thata? Fa Jesebele a ne a batla go bolaya baporofeti ba Modimo, Obadia o ne a fitlha ba le 100 ‘ka ditlhopha tsa ba le 50 mo logageng mme a nna a ba tlamela ka senkgwe le metsi.’ (1 Dikg. 18:13, 14) Fa Jesebele a ne a ka itse se Obadia a neng a se dira, o ne a tla mmolaya. Ga go pelaelo gore Obadia o ne a tshogile e bile o ne a sa batle go swa. Le fa go ntse jalo, o ne a rata Jehofa le ba ba neng ba mo direla, mo e leng gore o ne a ikemiseditse go ba swela.

11. Batlhanka ba ga Jehofa ba motlha wa rona ba etsa jang sekao sa ga Obadia? (Bona le setshwantsho.)

¹¹ Batlhanka ba le bantsi ba ga Jehofa ba nna mo dinageng tse tiro ya rona e thibetsweng kwa go tsone. Bakaulengwe le bokgaitsadi bao ba tlotla balaodi, mme ba etsa sekao sa ga Obadia ka gonne ba tswelela ba direla Jehofa le fa ba thibetswe. (Math. 22:21) Ba bontsha gore ba boifa Modimo ka go  mo ikobela go na le go ikobela batho. (Dit. 5:29) Ba tswelela ba rera dikgang tse di molemo e bile ba tshwara dipokano mo sephiring. (Math. 10:16, 28) Ba netefatsa gore bakaulengwe le bokgaitsadi ba bone ba nna le dilo tse ba di tlhokang gore ba tswelele ba atamalane le Jehofa. Akanya ka Henri yo o nnang kwa nageng nngwe kwa Africa kwa tiro ya rona e neng e thibetswe gone. Ka nako eo, Henri o ne a ithaopela go isetsa bakaulengwe le bokgaitsadi dikgatiso. A re: “Ke motho yo o ditlhong. Ka jalo, ke a itse gore go boifa Jehofa ke gone go nthusitseng gore ke kgone go nna pelokgale.” A o akanya gore o ka kgona go nna pelokgale jaaka Henri? O ka kgona fa o boifa Modimo.

12. Moperesiti yo Mogolo Jehoiada le mosadi wa gagwe ba ne ba bontsha jang gore ba ikanyega mo go Jehofa?

¹² E re ka Moperesiti yo Mogolo Jehoiada a ne a boifa Jehofa, o ne a ikanyega mo go ene e bile a rotloetsa ba bangwe gore ba mo obamele. Go ile ga bonala sentle gore o boifa Jehofa fa morwadia Jesebele yo o bidiwang Athalia a itseela bogosi ka dikgoka kwa Juda. Batho ba ne ba tshaba Athalia. O ne a le setlhogo thata mo a ileng a leka go bolaya ditlogolo tsa gagwe tsotlhe tsa basimane gore a kgone go busa. (2 Ditir. 22:10, 11) Ga a ka a kgona go bolaya mongwe wa bana bao yo o bidiwang Jehoashe ka gonne mosadi wa ga Jehoiada yo o bidiwang Jehoshabeathe o ne a mo sireletsa. Ene le monna wa gagwe ba ne ba fitlha ngwana yoo ba bo ba mo tlhokomela. Se ba ileng ba se dira, se ile sa sireletsa losika lwa ga Dafide lwa segosi. Jehoiada o ne a ikanyega mo go Jehofa e bile ga a ka a tlogela go dira se se siameng ka gonne a boifa Athalia.—Diane 29:25.

13. Fa Jehoashe a na le dingwaga di le supa, Jehoiada o ne a bontsha jang gape gore o ikanyega mo go Jehofa?

¹³ Fa Jehoashe a na le dingwaga di le supa, Jehoiada o ne a bontsha gape gore o ikanyega mo go Jehofa. O ne a loga leano. Fa le ne le ka atlega, Jehoashe o ne a tla nna kgosi. Mme fa le ne le ka se atlege, Jehoiada o ne a tlile go bolawa. Se se itumedisang ke gore Jehofa o ile a dira gore leano leo le atlege. Dikgosana le Balefi ba ne ba ema Jehoiada nôkeng. Ba ile ba dira Jehoashe kgosi ba bo ba bolaya Athalia. (2 Ditir. 23:1-5, 11, 12, 15; 24:1) Go tswa foo, “Jehoiada o ne a dira kgolagano le Jehofa le kgosi le batho, gore ba tla tswelela e le batho ba ga Jehofa.” (2 Dikg. 11:17) “Gape o ne a tlhoma balebedi ba dikgoro fa dikgorong tsa ntlo ya ga Jehofa, gore motho ope yo o itshekologileng ka tsela epe fela a se ka a tsena.”—2 Ditir. 23:19.

14. Jehofa o ile a tlotla Jehoiada ka ditsela dife?

¹⁴ Pele ga motlha wa ga Jehoiada, Jehofa o ile a re: “Ba ba ntlotlang ke tla ba tlotla.” Fela jaaka a ne a buile, o ne a tlotla Jehoiada. (1 Sam. 2:30) Ka sekai, o ne a dira gore se moperesiti yono a se dirileng, se kwalwe mo Baebeleng gore re ithute mo go sone. (Bar. 15:4) Mo godimo ga moo, fa Jehoiada a sena go swa, Jehofa o ile a mo tlotla thata ka gonne o ne a fitlhwa “mo Motseng wa ga Dafide mmogo le dikgosi, ka gonne o ne a dirile molemo mo Iseraele e bile o ne a o diretse Modimo wa boammaaruri le Ntlo ya Gagwe.”—2 Ditir. 24:15, 16.

15. Re ka ithuta eng mo pegong ya ga Jehoiada? (Bona le setshwantsho.)

¹⁵ Pego ya ga Jehoiada e ka re thusa gore re boife Modimo. Bagolwane ba ka etsa Jehoiada ka go dira sotlhe se ba ka se kgonang go sireletsa phuthego. (Dit. 20:28)  Bakeresete ba ba godileng ba ka ithuta gore fa ba boifa Jehofa e bile ba ikanyega jaaka Jehoiada, Jehofa a ka ba dirisa gore a diragatse maikaelelo a gagwe. Ga a kitla a ba latlha. Basha bone ba ka etsa Jehofa ka go tlotla bakaulengwe le bokgaitsadi ba ba godileng, segolobogolo ba ba diretseng Jehofa ka dingwaga di le dintsi. (Diane 16:31) Mme rona rotlhe, re ka etsa dikgosana le Balefi ka go ema nôkeng ba ba “etelelang pele” le go ba ikobela.—Baheb. 13:17.

16. Ke eng se se bontshang gore Kgosi Jehoashe e ne e se motho wa sepe?

¹⁶ Jehoiada o ne a thusa Jehoashe go dira se se siameng. (2 Dikg. 12:2) Ka jalo, fa Jehoashe a sa le monnye, o ne a itumedisa Jehofa. Le fa go ntse jalo, fa Jehoiada a sena go swa, Jehoashe o ne a reetsa dikgosana tse di neng di tlhanogetse Jehofa. Go ne ga felela jang? Ene le batho ba a neng a ba busa, ba ne “ba simolola go direla dikota tse di boitshepo le medingwana.” (2 Ditir. 24:4, 17, 18) Le fa se ba neng ba se dira se ne se utlwisa Jehofa botlhoko thata, “o ne a nna a romela baporofeti kwa go bone gore a ba busetse kwa go ene . . . , le fa go ntse jalo ba ne ba gana go reetsa.” Ba ne ba gana le go reetsa morwa Jehoiada yo o bidiwang Sekarea. Sekarea e ne e le moporofeti le moperesiti, mme gape e ne e le ntsalaa Jehoashe. Se se utlwisang botlhoko ke gore Kgosi Jehoashe o ne a laela gore Sekarea a bolawe le fa gone batsadi ba ga Sekarea ba ile ba mo sireletsa  mo nakong e e fetileng.—2 Ditir. 22:11; 24:19-22.

17. Jehoashe o ile a felela kae?

¹⁷ Jehoashe o ne a sa boife Jehofa. Ka jalo, dilo ga di a ka tsa mo tsamaela sentle. Jehofa o ile a re: “Ba ba nnyatsang ba tla nyadiwa.” (1 Sam. 2:30) Go ile ga nna fela jalo! Moragonyana masole a Siria a a neng a le mannye ka palo, a ne a fenya “mophato o mogolo wa masole” a ga Jehoashe e bile a ne a mo ‘gobatsa thata.’ Fa masole a Siria a sena go tsamaya, batlhanka ba ga Jehoashe ba ne ba mmolaya ka gonne a ile a bolaya Sekarea. Kgosi eno ga e a ka ya fitlhelwa “mo mabitleng a dikgosi di fitlhelwang mo go one” ka gonne o ne a le bosula thata.—2 Ditir. 24:23-25; Math. 23:35.

18. Go ya ka Jeremia 17:7 le 8, ke eng se se ka re thusang gore re se ka ra tshwana le Jehoashe?

¹⁸ Re ka ithuta eng mo go se se ileng sa diragalela Jehoashe? Fa Jehoiada yo a ileng a mo thusa go dira se se siameng a sena go tlhokafala, Jehoashe o ne a simolola go reetsa batho ba ba neng ba tlhanogetse Jehofa, mme le ene o ne a tlhanogela Jehofa. Seno se re bontsha gore ga re a tshwanela go ikobela Jehofa fela ka gonne ba malapa a rona kgotsa bangwe mo phuthegong ba mo ikobela. Gore re tswelele re atamalane le Jehofa, re tshwanetse go ithuta, go akanyetsa kwa teng le go rapela. Fa re dira jalo, re tla rata Jehofa e bile re tla mo tlotla.—Bala Jeremia 17:7, 8; Bakol. 2:6, 7.

19. Jehofa o kopa gore re dire eng?

¹⁹ Jehofa ga a kope gore re dire dilo tse dintsintsi. O re kopa fela gore re dire se se tlhalosiwang mo go Moreri 12:13 e e reng: “Boifa Modimo wa boammaaruri mme o boloke ditaelo tsa gagwe, ka gonne seno ke sotlhe se motho a tshwanetseng go se dira.” Fa re boifa Jehofa, re tla tswelela re ikanyega mo go ene le fa go ka direga eng, fela jaaka Obadia le Jehoiada. Ga go na sepe se se ka senyang botsala jwa rona le Jehofa.