1. Re tshwanetse go dira eng gore re falole letsatsi la ga Jehofa?

 FA BAEBELE e bua ka “letsatsi la ga Jehofa,” e bua ka nako ya fa Jehofa a tla bo a fedisa batho ba ba bosula, a bo a sireletsa batho ba gagwe. Mo nakong e e fetileng, Jehofa o ile a otlhaya ditšhaba dingwe. (Isa. 13:1, 6; Esek. 13:5; Sefa. 1:8) “Letsatsi la ga Jehofa” la mo motlheng ono le tla simolola fa dipuso tsa lefatshe di tlhasela Babelona yo Mogolo, mme le tla felela ka ntwa ya Aramagedona. Re tshwanetse go ipaakanya gone jaanong gore re kgone go falola “letsatsi” leo. Fa Jesu a ne a bua ka pitlagano e kgolo, o ne a re re ‘nne re ipaakantse.’ Seno se bontsha gore ke sengwe se re tshwanetseng go tswelela re se dira.—Math. 24:21; Luke 12:40.

2. Lekwalo la 1 Bathesalonika le ka re thusa jang?

² Mo lekwalong la ntlha le moaposetoloi Paulo a ileng a le kwalela Bathesalonika, o ile a dira dikai di le mmalwa go thusa Bakeresete gore ba nne ba ipaakanyeditse letsatsi la ga Jehofa. Paulo o ne a itse gore letsatsi la ga Jehofa le ka se tle ka yone nako eo. (2 Bathes. 2:1-3) Le fa go ntse jalo, o ile a rotloetsa Bakeresetemmogo le ene gore ba le ipaakanyetse jaaka e kete le tla kamoso, mme le rona re tshwanetse go dira fela jalo. Mma re bone gore Paulo o ile a tlhalosa jang gore (1) letsatsi la ga Jehofa le tla tla jang, (2) ke bomang ba ba se kitlang ba falola letsatsi leo le gore (3) re ka le ipaakanyetsa jang.

3. Letsatsi la ga Jehofa le tla tla jang jaaka legodu bosigo? (Bona le setshwantsho.)

³ “Jaaka legodu bosigo.” (1 Bathes. 5:2) Paulo o ile a dirisa dikai di le tharo go tlhalosa gore letsatsi la ga Jehofa le tla tla jang, mme o ile a simolola ka sekai sa legodu. Go le gantsi magodu a  berekela mo nakong e bile a utswa go le bosigo batho ba sa ntse ba itebetse. Letsatsi la ga Jehofa le lone le tla tla ka bonako batho ba le bantsi ba sa ntse ba itebetse. Tota le Bakeresete ba boammaaruri ba ka nna ba gakgamadiwa ke tsela e dilo di tlileng go direga ka bonako ka yone. Mme gone, Jehofa ga a kitla a re nyeletsa le batho ba ba bosula.

4. Goreng re ka tshwantsha letsatsi la ga Jehofa le ditlhabi tsa pelegi?

⁴ “Jaaka fa mosadi wa moimana a tlelwa ke ditlhabi ka tshoganyetso.” (1 Bathes. 5:3) Fa mosadi a imile, ga a itse gore ditlhabi tsa pelegi di tla tla leng, mme gone o a itse gore di tla tla. Go le gantsi ditlhabi tsa pelegi di tla ka tshoganyetso, di botlhoko e bile motho ga a kgone go di fedisa. Ka tsela e e tshwanang, ga re itse gore letsatsi la ga Jehofa le tla tla leng. Mme gone, re a itse gore le tla tla. Gape re a itse gore Jehofa o tlile go fedisa batho ba ba bosula, e bile ga ba kitla ba falola.

5. Goreng re ka tshwantsha letsatsi la ga Jehofa le letsatsi fa le tlhaba?

⁵ Jaaka letsatsi fa le tlhaba. Mo sekaing sa boraro, Paulo o boa a umaka magodu a a utswang go le bosigo. Mme mo lekgetlong leno, go lebega a tshwantsha letsatsi la ga Jehofa le letsatsi fa le tlhaba. (1 Bathes. 5:4) Ka dinako tse dingwe fa batho ba utswa go le bosigo ba a itebala, mo ba sa lemogeng gore letsatsi le a tlhaba. Letsatsi le ka nna la tlhaba ba sa ntse ba itebetse le bo le ba senola. Ka tsela e e tshwanang, pitlagano e kgolo e tlile go senola batho ba ba mo lefifing, ba ba tswelelang ba dira dilo tse Modimo a di tlhoileng. Rona re ka ipaakanyetsa letsatsi la ga Jehofa ka go tsamaela kgakala le dilo tse a di tlhoileng le ka go ‘dira se se siameng le go tsamaya mo tseleng e e siameng.’ (Baef. 5:8-12) Gape Paulo o ile a dirisa dikai tse pedi tse di batlileng di tshwana go tlhalosa batho ba ba se kitlang ba falola letsatsi la ga Jehofa.

6. Batho ba le bantsi ba tshwana jang le batho ba ba robetseng? (1 Bathesalonika 5:6, 7)

⁶ “Ba ba robalang.” (Bala 1 Bathesalonika 5:6, 7.) Paulo o ile a tshwantsha batho ba ba se kitlang ba falola letsatsi la ga Jehofa le batho ba ba robetseng. Fa motho a robetse, ga a bone se se diregang e bile ga a lemoge le gore nako e a tsamaya. Ka jalo fa go direga sengwe sa botlhokwa, ga a kgone go bona e bile ga a kgone go dira sepe. Batho ba le bantsi gompieno ba tshwana le batho ba ba robetseng. (Bar. 11:8) Ga ba dumele dilo tse di bontshang gore re tshela mo “malatsing a bofelo” le gore pitlagano e kgolo e gaufi. Fa go direga diphetogo tse dikgolo tse di amang batho ba le bantsi mo lefatsheng, bangwe ba bone ba simolola go kgatlhegela molaetsa wa Bogosi, mme morago ga nako, kgatlhego eo e a fela. Tota le batho ba ba dumelang gore Modimo o tlile go fedisa batho ba ba bosula, ba akanya gore o tlile go dira jalo morago ga lobaka. (2 Pet. 3:3, 4) Rona re a itse gore letsatsi leo le gaufi thata, ka jalo go botlhokwa gore re nne re ipaakantse.

7. Batho ba ba tlileng go senngwa ba tshwana jang le matagwa?

⁷ “Ba ba tagwang.” Paulo o ile a tshwantsha batho ba Modimo a tlileng go ba fedisa le matagwa. Fa motho a tagilwe, ga a kgone go tsiboga ka bonako fa go direga sengwe, e bile o dira ditshwetso tse di sa siamang. Ka tsela e e tshwanang, batho ba ba bosula ga ba tsiboge fa Modimo a ba tlhagisa. Ba tlhopha go tshela ka tsela e e tla dirang gore ba fedisiwe. Bakeresete bone ba rotloediwa gore ba dirise ditlhaloganyo tsa bone. (1 Bathes. 5:6) Moithuti mongwe wa Baebele a re “motho yo o dirisang tlhaloganyo ga a tseege maikutlo e bile ga a itetle go tsenwa ke tsebetsebe. O akanyetsa dilo sentle mme seno se mo thusa go dira ditshwetso tse di siameng.” Go sa tseege maikutlo le go akanyetsa dilo sentle go tla re thusa gore re se ka ra tsaya letlhakore mo dikgannyeng tsa dipolotiki, le gore re se ka ra leka go lwela gore go dirwe diphetogo. Fa letsatsi la ga Jehofa le ntse le atamela, batho ba tla nna ba leka go re pateletsa gore re tseye letlhakore mo dikgannyeng tseno. Mme gone, ga re tlhoke go tlhobaela ka gore re tlile go dira eng ka nako eo. Moya wa Modimo o tla re thusa gore re se ka ra tseega maikutlo, re akanyetse dilo sentle e bile re dire ditshwetso tse di siameng.—Luke 12:11, 12.

8. 1 Bathesalonika 5:8 e tshwantsha dinonofo tse di tla re thusang go nna re tsogile le eng? (Bona le setshwantsho.)

⁸ “[Apara] seiphemelo sa sehuba . . . le tlhoro ya phemelo.” Paulo o re tshwantsha le masole a a nnang a apere diaparo tsa tlhabano e bile a ipaakanyeditse go ya ntweng. (Bala 1 Bathesalonika 5:8.) Fa go na le ntwa, lesole le tshwanetse go nna le ipaakanyeditse go ya go tlhabana. Go ntse jalo le ka rona. Re nna re ipaakanyeditse letsatsi la ga Jehofa ka go nna le tumelo le lorato tse re ka di tshwantshang le seiphemelo sa sehuba, le ka go nna le tsholofelo, e re ka e tshwantshang le tlhoro ya phemelo. Go nna le dinonofo tseno go tla re thusa gore re nne re tsogile.

9. Go nna le tumelo go re sireletsa jang?

⁹ Seiphemelo sa sehuba se sireletsa pelo ya lesole. Tumelo le lorato di sireletsa pelo ya rona ya tshwantshetso. Di re thusa gore re tswelele re direla Jehofa, re le balatedi ba ga Jesu. Go nna le tumelo go re thusa gore re tlhatswege pelo gore Jehofa o tla re duela ka gonne re mo direla ka pelo yotlhe. (Baheb. 11:6) Gape go re thusa gore re nne re ikanyega mo go Jesu le fa re na le mathata. Go bala ka maitemogelo a Bakeresete ba ba ileng ba tswelela ba ikanyega le fa ba bogisiwa kgotsa ba na le mathata a ikonomi,  go tla nonotsha tumelo ya rona mme seno se tla re thusa gore re se ka ra ineela fa re na le mathata. Mo godimo ga moo, go etsa sekao sa batho ba ba ileng ba dira diphetogo gore ba kgone go direla Jehofa mo go oketsegileng, go tla re thusa gore re se ka ra wela mo seraing sa go rata madi le dikhumo. b

10. Go rata Modimo le batho go re thusa jang gore re tswelele re rera?

¹⁰ Go nna le lorato go re thusa gore re nne re tsogile e bile re akanya sentle. (Math. 22:37-39) Fa re rata Modimo, re tla tswelela re rera le fa go dira jalo go ka re bakela mathata. (2 Tim. 1:7, 8) Gape re rata batho ba ba sa direleng Jehofa. Ka jalo, re tswelela re rera ka ntlo le ntlo, mme ka dinako tse dingwe re rera ka founu le ka makwalo. Ga re tlhoboge batho ba re ba rerelang, go na le moo, re nna re solofela gore letsatsi lengwe ba tla fetoga ba bo ba dira se se siameng.—Esek. 18:27, 28.

11. Go rata bakaulengwe le bokgaitsadi go re thusa jang? (1 Bathesalonika 5:11)

¹¹ Gape re rata bakaulengwe le bokgaitsadi. Re bontsha gore re a ratana ka go ‘kgothatsana le go agana.’ (Bala 1 Bathesalonika 5:11.) Fa masole a le kwa ntweng a a kgothatsana, mme le rona re dira fela jalo. Ka dinako tse dingwe fa ntwa e fagile, lesole le ka nna la gobatsa lesolemmogo le lone ka phoso, mme ga le ka ke la dira jalo ka boomo. Ka tsela e e tshwanang, le rona ga re ka ke ra utlwisa bakaulengwe le bokgaitsadi botlhoko ka boomo kgotsa ra ipusolosetsa fa ba re utlwisitse botlhoko. (1 Bathes. 5:13, 15) Gape re bontsha gore re na le lorato fa re tlotla bakaulengwe ba ba eteletseng pele mo phuthegong. (1 Bathes. 5:12) Fa Paulo a ne a kwala lekwalo leno, go ne go ise go fete ngwaga phuthego ya kwa Thesalonika e tlhomilwe. Ka jalo, banna ba ba neng ba tlhomilwe gore ba etelele phuthego pele, ba ka tswa ba ne ba se na maitemogelo e bile ba dira diphoso. Le fa go ntse jalo, bakaulengwe le bokgaitsadi ba phuthego eo ba ne ba tshwanetse go ba tlotla. Fa pitlagano e kgolo e ntse e atamela, re ka nna ra tshwanelwa ke go dirisa kaelo ya bagolwane ba phuthego e re leng mo go yone go feta ka fa re dirang ka gone gone jaanong. Go ka nna ga direga gore re se ka ra tlhola re kgona go amogela  kaelo e e tswang kwa ntlokgolo kgotsa kwa ofising ya lekala. Ka jalo, go botlhokwa gore re ithute go rata bagolwane gone jaanong le go ba tlotla. Go akanya sentle go tla re thusa gore re se ka ra tlhoma mogopolo mo diphosong tse bagolwane ba di dirang, le gore re nne re gopotse gore Jehofa o dirisa Keresete go kaela banna bano ba ba ikanyegang.

12. Tsholofelo e re nang le yone e sireletsa megopolo ya rona jang?

¹² Fela jaaka tlhoro ya phemelo e sireletsa tlhogo ya lesole, tsholofelo e re nang le yone e sireletsa megopolo ya rona e bile e re thusa go akanya dilo tse di siameng. E re thusa go lemoga gore dilo tse batho ba lefatshe leno ba re solofetsang tsone, ga di na mosola. (Bafil. 3:8) Mo godimo ga moo, go nna le tsholofelo go re thusa gore re nne re ritibetse e bile re akanyetsa dilo sentle. Seno ke se se ileng sa diragalela Wallace le Laurinda, ba ba direlang kwa Africa. Mo dibekeng di le tharo, mongwe le mongwe wa bone o ile a tlhokafalelwa ke motsadi. Ga ba a ka ba kgona go ya gae ka ntlha ya bolwetse jwa COVID-19. Wallace a re: “E re ka ke itse gore ba tlile go tsosiwa, ga ke akanye ka gore ba ne ba ntse jang pele ba tlhokafala, ke akanya ka gore ba tla bo ba ntse jang kwa paradaiseng. Seno se a nkgomotsa fa ke utlwile botlhoko thata.”

13. Re tshwanetse go dira eng gore Modimo a re neye moya o o boitshepo?

¹³ “Lo se ka lwa tima molelo wa moya wa Modimo.” (1 Bathes. 5:19) Paulo o ile a tshwantsha moya o o boitshepo le molelo. Fa re na le moya wa Modimo, re tlhoafalela go dira se se siameng, e bile re dira tiro ya gagwe re le matlhagatlhaga. (Bar. 12:11) Re tshwanetse go dira eng gore Modimo a re neye moya o o boitshepo? Re tshwanetse go o rapelela, go ithuta Baebele le go ya dipokanong. Go dira dilo tseno go tla re thusa gore re nne le “maungo a moya o o boitshepo.”—Bagal. 5:22, 23.

14. Re tshwanetse go dira eng gore Modimo a tswelele a re naya moya o o boitshepo? (Bona le setshwantsho.)

¹⁴ Fa Jehofa a sena go re naya moya wa gagwe, re tshwanetse go nna kelotlhoko gore re ‘se ka ra tima molelo wa moya wa Modimo.’ Modimo o tla re naya moya o o boitshepo fa fela re akanya  dilo tse di siameng e bile re itshwara sentle. Ga a kitla a re naya moya wa gagwe fa re tswelela re akanya dilo tse di sa siamang e bile re sa itshware sentle. (1 Bathes. 4:7, 8) Mo godimo ga moo, ga re a tshwanela go “nyatsa boporofeti.” (1 Bathes. 5:20) Mo temaneng eno fa go buiwa ka “boporofeti,” go tewa melaetsa e Jehofa a re nayang yone a dirisa moya o o boitshepo, go akaretsa melaetsa e e buang ka letsatsi la ga Jehofa, le e e tlhalosang gore re tshela mo malatsing a bofelo. Ga re ipolelele gore ntwa ya Aramagedona e tla tla re setse re sule. Go na le moo, re bontsha gore re a itse gore go gaufi gore e tle ka go dira ditiro tse di ‘bontshang gore re ineetse mo Modimong’ le ka go itshwara sentle.—2 Pet. 3:11, 12.

15. Ke eng se se ka re thusang gore re se ka ra tsiediwa ke tshedimosetso ya maaka e e tlhotlheleditsweng ke madimona? (1 Bathesalonika 5:21)

¹⁵ Go ise go ye kae, batho ba ba ganetsang Modimo ba tla re ba fitlheletse “kagiso le polokesego!” (1 Bathes. 5:3) Tshedimosetso ya maaka e e tlhotlheleditsweng ke madimona e tla nna ntsi mo lefatsheng mme e tla tsietsa ba le bantsi. (Tshen. 16:13, 14) Rona ga re kitla re tsiediwa fa re tsaya matsapa go “tlhomamisa” gore a se re se utlwang ke boammaaruri. (Bala 1 Bathesalonika 5:21.) Lefoko la Segerika le le ranotsweng e le go “tlhomamisa,” go le gantsi le ne le dirisiwa fa go tlhalosiwa tsela e batho ba neng ba tlhatlhoba gauta le selefera go bona gore a ke tsa mmatota. Ka jalo re tshwanetse go sekaseka dilo tse re di utlwang le tse re di balang, go tlhomamisa gore a di boammaaruri. Go ne go le botlhokwa gore Bakeresete ba kwa Thesalonika ba dire jalo, mme le rona go botlhokwa gore re dire jalo fa pitlagano e kgolo e ntse e atamela. Ga re a tshwanela go dumela sengwe le sengwe fela se re se utlwang kgotsa se re se balang. Go na le moo, re tshwanetse go se bapisa le se Baebele le se phuthego ya ga Jehofa e se buang. Fa re dira jalo, ga re kitla re tsiediwa ke tshedimosetso ya maaka e e tlhotlheleditsweng ke madimona.—Diane 14:15; 1 Tim. 4:1.

16. Re na le tsholofelo efe, mme o ikemiseditse go dira eng?

¹⁶ Re a itse gore batlhanka ba ga Jehofa ba tlile go falola pitlagano e kgolo. Mme gone, ga re itse gore mongwe le mongwe wa rona o tla diragalelwa ke eng kamoso. (Jak. 4:14) Le fa go ntse jalo, re tlhatswegile pelo gore le fa pitlagano e kgolo e ka tla re sa ntse re tshela kgotsa re sule, Jehofa o tlile go re naya botshelo jo bo sa khutleng fa re tswelela re ikanyega mo go ene. Bakeresete ba ba tloditsweng ba tla bo ba na le Jesu kwa legodimong, mme ba dinku tse dingwe ba tla bo ba nna mo lefatsheng la paradaise. A re tsweleleng re tlhomile mogopolo mo tsholofelong e re nang le yone e bile re nne re ipaakanyeditse letsatsi la ga Jehofa.