1. Go ya ka 1 Petere 5:2, bagolwane ba dira tiro efe ya botlhokwa?

 JEHOFA o neile bagolwane maikarabelo a gore ba tlhokomele dinku tsa gagwe. Ba itumelela tiro eno ya botlhokwa ya go tlhokomela bakaulengwe le bokgaitsadi ba bone, e bile ba dira ka natla go nna “badisa ba ba . . . disang sentle.” (Jer. 23:4; bala 1 Petere 5:2.) Re itumelela gore re na le banna ba ba ntseng jalo mo diphuthegong tsa rona.

2. Bagolwane bangwe ba ka lebana le dikgwetlho dife?

² Bagolwane ba lebana le dikgwetlho tse dintsi fa ba ntse ba dira maikarabelo a bone. Ka sekai, go na le dilo tse dintsi tse ba tshwanetseng go di dira gore ba tlhokomele phuthego. Mogolwane mongwe wa kwa United States yo o bidiwang Tony, o ne a tshwanelwa ke go ithuta gore a ka se kgone go dira sengwe le sengwe. A re: “Fa bolwetse jwa COVID-19 bo simologa, ke ne ke dira tiro e ntsi ya go rulaganya dipokano le tshimo. Le fa ke ne ke dira ka natla, tiro eo e ne e sa fele. Ke ne ka feleletsa ke se na nako e e lekaneng ya go bala Baebele, go ithuta ke le nosi le ya go rapela.” Mogolwane mongwe wa kwa Kosovo, yo o bidiwang Ilir ene o ne a lebana le kgwetlho e e farologaneng le ya ga Tony. Fa go ne go na le ntwa kwa lefelong la bone, go ne go le thata gore a ikobele ditaelo tse a neng a di newa ke phuthego ya ga Jehofa. A re: “Go ne go le thata tota gore ke nne pelokgale fa ofisi ya lekala e ne e nkopa gore ke thuse bakaulengwe le bokgaitsadi ba ba neng ba nna kwa lefelong le go neng go le kotsi thata kwa go lone. Ke ne ke tshogile e bile se go neng go twe ke se dire se ne se lebega se sa utlwale.” Morongwa mongwe wa kwa Asia yo o bidiwang Tim, o ne a sa kgone go dira dilo tsotlhe tse a neng a tshwanetse go di dira. A re: “Ka dinako dingwe, ke ne ke lapa thata mo ke neng ke sa kgone go tlhokomela bakaulengwe le bokgaitsadi.” Bagolwane ba ba lebanang le dikgwetlho tse di tshwanang le tseno ba ka thusiwa ke eng?

3. Re ka ithuta eng mo go Moatlhodi Gidione?

 ³ Bagolwane ba ka ithuta go le gontsi mo go Moatlhodi Gidione. (Baheb. 6:12; 11:32) O ne a kaela batho ba Modimo e bile a ba sireletsa. (Baatlh. 2:16; 1 Ditir. 17:6) Fela jaaka Gidione, bagolwane le bone ba tlhophilwe gore ba tlhokomele batho ba Modimo mo nakong ya mathata. (Dit. 20:28; 2 Tim. 3:1) Rotlhe fela re ka ithuta go nna boingotlo, go nna boikokobetso le go ikobela ditaelo fela jaaka Gidione. O ile a lebana le dikgwetlho di le dintsi, mme go ne go se motlhofo gore a di itshokele. Setlhogo seno se tla re thusa gore re lebogele tiro e bagolwane ba e dirang le fa re ka tswa re se bagolwane. Gape se tla re thusa gore re eme nôkeng bakaulengwe bano ba ba dirang ka natla mo phuthegong.—Baheb. 13:17.

4. Gidione o ile a bontsha jang gore o boingotlo le gore o boikokobetso?

⁴ Gidione o ne a le boingotlo e bile a ikokobeditse. b Fa moengele a ne a mmolelela gore Jehofa o mo tlhophile gore a golole Baiseraele mo setšhabeng sa Bamidiana, o ne a re: “Kgotla ya me ke yone e potlana mo go tsa ga Manase e bile ke nna yo o seng botlhokwa thata mo ntlong ya ga rre.” (Baatlh. 6:15) Gidione o ne a akanya gore a ka se kgone go dira kabelo eo, mme Jehofa ene o ne a itse gore a ka kgona. Tota e bile, o ile a mo thusa gore a kgone go e dira.

5. Go ka nna thata gore mogolwane a nne boingotlo a bo a nne boikokobetso mo maemong afe?

⁵ Bagolwane ba leka ka natla go nna boingotlo le go nna boikokobetso. (Mik. 6:8; Dit. 20:18, 19) Ga ba ikgantshe ka se ba kgonang go se dira kgotsa ka se ba se dirileng, e bile fa ba dirile diphoso ga ba akanye gore ga se batho ba sepe. Mme ka dinako dingwe ga go motlhofo gore mogolwane a nne boingotlo le gore a ikokobetse. Ka sekai, a ka nna a dumela go dira dikabelo tse dintsi, mme go bo go nna thata gore a di dire. Kgotsa go ka nna thata gore a nne boingotlo le gore a nne boikokobetso fa a akgolelwa kabelo nngwe e a e dirileng a bo a tshwaiwa diphoso mo go e nngwe. Bagolwane ba ka ithuta eng mo go Gidione se se ka ba thusang fa ba lebana le maemo a a ntseng jalo?

6. Bagolwane ba ka ithuta eng mo go Gidione? (Bona le setshwantsho.)

⁶ Kopa thuso. Motho yo o boingotlo o a itse  gore go na le dilo tse a ka se kgoneng go di dira. Gidione o ile a bontsha gore o boingotlo ka gonne o ile a kopa batho ba bangwe gore ba mo thuse. (Baatlh. 6:27, 35; 7:24) Bagolwane le bone ba dira jalo. Tony yo re buileng ka ene mo dirapeng tse di fetileng a re: “Fa ke tla ke gola, ke ne ke rutiwa go dira ka natla. Ka jalo, fa ke setse ke godile, ke ne ke amogela tiro e ntsi le fa ke ne ke itse gore e tla nkimela. Mo kobamelong ya lelapa, re ile ra tlotla ka go nna boingotlo e bile ke ile ka botsa mosadi wa me gore a o akanya gore ke na le nonofo eno. Gape ke ile ka leba bidio ya setlhogo se se reng, Thapisa ba Bangwe, ba Ikanye, O bo O ba Abele Maikarabelo Fela Jaaka Jesu a Dira e e mo jw.org.” Tony o ile a simolola go kopa ba bangwe gore ba mo thuse ka tiro ya gagwe. A seo se ile sa thusa? A re: “Bakaulengwe ba ile ba nthusa go dira ditiro dingwe mo phuthegong, mme seo se ile sa dira gore ke nne le nako ya go nonotsha botsala jwa me le Jehofa.”

7. Bagolwane ba ka etsa Gidione jang fa ba bangwe ba ba tshwayatshwaya diphoso? (Jakobe 3:13)

⁷ O se ka wa galefa fa batho ba go tshwayatshwaya diphoso. Go ka nna thata gore bagolwane ba nne boingotlo le gore ba nne boikokobetso fa ba bangwe ba ba tshwayatshwaya diphoso. Le mo kgannyeng eno, ba ka ithuta sengwe mo go Gidione. O ne a itse gore o dira diphoso, ka jalo ga a ka a galefa fa Baeferaime ba mo tshwaya diphoso. (Baatlh. 8:1-3) O ile a bontsha gore o boikokobetso ka gonne o ile a ba reetsa a bo a ba araba a le bonolo, mme seo se ile sa ba reba bogale. Bagolwane ba ka etsa Gidione ka go reetsa fa ba bangwe ba ba tshwaya diphoso ba bo ba ba araba ba le bonolo. (Bala Jakobe 3:13.) Fa ba dira jalo, go nna le kagiso mo phuthegong.

8. Bagolwane ba tshwanetse go dira eng fa ba tlotlomadiwa? Naya sekai.

⁸ Dira gore Jehofa a tlotlomadiwe, e seng wena. Fa batho ba ne ba tlotlomatsa Gidione ka gonne a fentse Bamidiana, o ne a re Jehofa ke ene a tshwanetseng go tlotlomadiwa. (Baatlh. 8:22, 23) Bagolwane ba ka etsa Gidione jang? Fa ba kgona go dira dilo dingwe, ba ka dira gore Jehofa e nne ene a tlotlomadiwang. (1 Bakor. 4:6, 7) Ka sekai, fa mogolwane a akgolwa ka gonne a ruta monate, a ka nna a re Lefoko la Modimo ke lone le le re rutang kgotsa phuthego ya ga Jehofa ke yone e e re katisang. Bagolwane ba tshwanetse go ipotsa gore a tsela e ba rutang ka yone e tlotlomatsa Jehofa kgotsa e tlotlomatsa bone. Akanya ka mogolwane mongwe yo o bidiwang Timothy. Fa a sena go nna mogolwane, o ne a rata go neela dipuo tsa phatlalatsa. A re: “Ke ne ke dirisa matseno le dikai tse di raraaneng e bile di le ditelele. Batho ba ne ba tlhola ba nkakgola thata ka ntlha ya tsone. Mme seo se ne se dira gore ba bue thata ka tsela e ke rutang ka yone go na le go bua ka se ba se ithutileng mo Baebeleng kgotsa ka Jehofa.” Fa nako e ntse e tsamaya, Timothy o ile a lemoga gore o tshwanetse go fetola tsela e a rutang ka yone. (Diane 27:21) A seo se ile sa thusa? A re: “Gone jaanong bakaulengwe le bokgaitsadi ba re dipuo tsa me di ba thusa go rarabolola mathata, go itshokela diteko kgotsa go atamalana le Jehofa. Ke a itumela fa ba mpolelela gore dipuo tsa me di ba thusa jang, go na le fa ba ntlotlomatsa ka ntlha ya tsela e ke rutang ka yone.”

9. Ke eng fa go ne go se motlhofo gore Gidione a ikobele Jehofa le gore a nne pelokgale? (Bona le setshwantsho.)

⁹ Fa Gidione a sena go laelwa gore a etelele Baiseraele pele, o ne a tshwanetse go ikobela ditaelo le go nna pelokgale. O ne a laelwa gore a senye sebeso sa ga Baale se rraagwe a neng a se dirile, mme seo se ne se ka tsenya botshelo jwa gagwe mo kotsing. (Baatlh. 6:25, 26) Moragonyana fa Gidione a sena go phutha batho ba a  neng a tla ya ntweng le bone, Jehofa o ne a mo laela ka makgetlo a le mabedi gore a ba fokotse. (Baatlh. 7:2-7) Go tswa foo, Jehofa o ile a mo laela gore a ye go tlhasela Bamidiana go le bosigo.—Baatlh. 7:9-11.

10. Ke eng se se ka dirang gore go se ka ga nna motlhofo gore mogolwane a ikobele ditaelo?

¹⁰ Bagolwane ba tshwanetse go ‘ikemisetsa go ikobela’ ditaelo. (Jak. 3:17) Mogolwane yo o boikobo o dira se Baebele e reng a se dire e bile o ikobela kaelo e e tswang mo phuthegong ya ga Jehofa. Fa a dira jalo, o tlhomela ba bangwe sekao se ba ka se etsang. Le fa go ntse jalo, ka dinako dingwe go ka nna thata gore a ikobele ditaelo. Ka sekai, a ka nna a newa ditaelo tse dintsi, kgotsa ditaelo tse a di newang di ka nna tsa fetoga nako le nako, go bo go sa nne motlhofo gore a di ikobele. Mo maemong a mangwe a ka nna a ipotsa gore a ditaelo tse a di newang di a utlwala. Kgotsa a ka nna a newa kabelo e e ka dirang gore a tsenngwe mo kgolegelong. Bagolwane ba ka etsa Gidione jang mo maemong ao?

11. Ke eng se se ka thusang bagolwane gore ba ikobele ditaelo?

¹¹ Reetsa ka kelotlhoko fa o neelwa ditaelo. Modimo o ne a bolelela Gidione gore o tshwanetse go senya sebeso se rraagwe a neng a se dirile, gore o tshwanetse go aga kae sebeso se sesha le gore o tshwanetse go ntsha setlhabelo ka phologolo efe. Gidione ga a ka a nnela go tlhoma Modimo dipotso, go na le moo o ile a dira se a neng a re a se dire. Phuthego ya ga Jehofa e dirisa makwalo le dikitsiso go naya bagolwane ditaelo tse di re thusang go nna re sireletsegile e bile re atamalane le Jehofa. Re rata bagolwane ka gonne ba ikobela ditaelo tse ba di newang mo phuthegong. Mme seo se tswela phuthego yotlhe mosola.—Pes. 119:112.

12. Bagolwane ba ka dirisa Bahebera 13:17 jang fa ba laelwa gore ba fetole tsela e ba neng ba dira dilo ka yone?

¹² Ikemisetse go amogela diphetogo. Gopola gore Jehofa o ile a laela Gidione gore a fokotse bontsi jwa batho ba a neng a tlile go ya ntweng le bone. (Baatlh. 7:8) A ka tswa a ile a ipotsa go re: ‘A tota go a tlhokega? A re tla kgona go fenya?’ Mme gone, Gidione o ile a dira se Jehofa a neng a mo laetse gore a se dire. Bagolwane ba etsa Gidione ka gonne fa phuthego ya Modimo e ba laela gore ba fetole tsela e ba dirang dilo ka yone, ba dira fela jalo. (Bala Bahebera 13:17.) Ka sekai, ka 2014 Setlhopha se se Laolang se ile sa fetola tsela e Diholo Tsa Bogosi le Diholo Tsa Kopano di duelwang ka yone. (2 Bakor. 8:12-14) Mo nakong e e fetileng, diphuthego di ne di adimiwa madi gore di kgone go aga, mme moragonyana di bo di a busa. Gone jaanong go dirisiwa meneelo e e ntshiwang ke diphuthego tse di mo lefatsheng lotlhe gore go agiwe Diholo Tsa Bogosi le Diholo Tsa Kopano kwa di tlhokegang gone, tota le fa e le gore diphuthego dingwe di kgona go ntsha moneelo o monnye fela. Fa José a utlwa ka phetogo eo, o ne a sa akanye gore e tla atlega. O ne a re: “Re ka se tsoge re agile Diholo Tsa Bogosi, tota le fa e le nngwe fela. Dilo ga di dirwe jalo mo nageng ya rona.” Ke eng se se mo thusitseng? A re: “Diane 3:5 le  6 e nkgopoditse gore ke tshwanetse go tshepa Jehofa. Tshwetso eo e ile ya atlega. Gone jaanong re aga Diholo Tsa Bogosi di le dintsi e bile ba ba nang le mo gontsi ba kgona go thusa ba ba tlhokang.”

13. (a) Gidione o ne a tlhatswegile pelo ka eng? (b) Bagolwane ba ka mo etsa jang? (Bona le setshwantsho.)

¹³ Dira thato ya ga Jehofa o le pelokgale. Gidione o ne a ikobela Jehofa le fa a ne a boifa e bile a itse gore se a neng a kopiwa gore a se dire, se ne se ka tsenya botshelo jwa gagwe mo kotsing. (Baatlh. 9:17) Fa Jehofa a sena go mo kgothatsa, Gidione o ne a tlhatswegile pelo gore Jehofa o tla mo thusa go sireletsa batho ba gagwe. Bagolwane ba ba nnang mo mafelong a tiro ya rona e thibetsweng mo go one ba etsa Gidione. Ba bontsha gore ba pelokgale ka gonne le fa ba tshosediwa ka gore ba tla tsenngwa mo kgolegelong, ba tla botsolodiwa, ba tla latlhegelwa ke ditiro e bile ba tla itewa, ga ba ineele. Ba rulaganya dipokano e bile ba thusa bakaulengwe le bokgaitsadi gore ba tswelele ba rera. c Ka nako ya pitlagano e kgolo, bagolwane ba tla tlhoka go nna pelokgale gore ba ikobele ditaelo tse ba di newang tota le fa go dira jalo go ka tsenya matshelo a bone mo kotsing. Ka sekai, ba ka newa ditaelo tsa gore re rere molaetsa wa katlholo jang le gore re tshwanetse go dira eng gore re falole fa Gogo wa Magogo a re tlhasela.—Esek. 38:18; Tshen. 16:21.

14. Goreng go ne go se motlhofo gore Gidione a itshoke?

¹⁴ Tiro e Gidione a neng a e neilwe e ne e le bokete. Fa Bamidiana ba ne ba tshaba go le bosigo, Gidione o ne a ba lelekisa go tswa kwa Mokgatšheng wa Jesereele go ya kwa Nokeng ya Joredane, mme go ka direga gore ba ne ba tshwanelwa ke go feta mo sekgweng se se kitlaneng. (Baatlh. 7:22) A Gidione o ne a ema fa a fitlha kwa Joredane? Nnyaa. Tota le fa ene le banna ba le 300 ba a neng a na le bone ba ne ba lapile, ba ne ba tswelela ba lelekisa Bamidiana mme ba ile ba ba tshwara ba bo ba tlhabana le bone.—Baatlh. 8:4-12.

15. Goreng ka dinako dingwe go se motlhofo gore mogolwane a itshoke?

¹⁵ Ka dinako tse dingwe, maikarabelo a mogolwane a nang le one mo phuthegong le mo lelapeng,  a ka dira gore a lape thata. Mo maemong ao, bagolwane ba ka etsa Gidione jang?

16-17. Ke eng se se thusitseng Gidione gore a kgone go itshoka, mme bagolwane ba ka tlhatswega pelo ka eng? (Isaia 40:28-31) (Bona le setshwantsho.)

¹⁶ Itse gore Jehofa o tla go naya maatla. Gidione o ne a itse gore Jehofa o tla mo naya maatla, mme ga a ka a mo swabisa. (Baatlh. 6:14, 34) Nako nngwe Gidione le banna ba a neng a na le bone ba ne ba lelekisa dikgosi tse pedi tsa Bamidiana ba tsamaya ka maoto mme dikgosi tseo tsone di palame dikamela. (Baatlh. 8:12, 21) Le fa go ntse jalo, Modimo o ile a ba thusa gore ba ba tshware ba bo ba ba fenye. Bagolwane le bone ba ka ikaega ka Jehofa ka gonne “ga a ke a lapa kgotsa a felelwa ke nonofo.” Fa ba lapile, o tla ba naya maatla.—Bala Isaia 40:28-31.

¹⁷ Mokaulengwe mongwe yo o bidiwang Matthew, o mo Komiting ya Puisano le Dikokelo. Ke eng se se mo thusang go itshoka? Matthew a re: “Jehofa o ile a nnaya maatla fela jaaka go tlhalosiwa mo go Bafilipi 4:13. Gantsi fa ke lapile thata, ke ne ke rapela Jehofa ka tlhoafalo ke mo kopa gore a mphe maatla a gore ke thuse bakaulengwe le bokgaitsadi. Jehofa o ne a dirisa moya wa gagwe o o boitshepo go nnaya maatla a gore ke kgone go itshoka.” Fela jaaka Gidione, bagolwane ba dira ka natla go tlhokomela batho ba ga Jehofa le fa ka dinako tse dingwe go se motlhofo. Mme gone, ba tshwanetse go nna boingotlo mme ba lemoge gore ba ka se kgone go dira sengwe le sengwe. Le fa go ntse jalo, ba ka tlhatswega pelo gore Jehofa o tla ba utlwa e bile o tla ba naya maatla a go itshoka.—Pes. 116:1; Bafil. 2:13.

18. Bagolwane ba ka etsa Gidione jang?

¹⁸ Bagolwane ba ka ithuta go le gontsi mo go Gidione. Ba tshwanetse go nna boingotlo le go nna boikokobetso ka go amogela gore ba ka se kgone go dira sengwe le sengwe. Gape ba tshwanetse go dira jalo fa ba bangwe ba ba tlotlomatsa kgotsa ba ba tshwaya diphoso. Ba tshwanetse go ikobela ditaelo le go nna pelokgale, segolobogolo fa bokhutlo bo ntse bo atamela. E bile ba tshwanetse go itse gore Modimo o tla ba naya maatla fa ba lebana le diteko. Re leboga go bo re na le bakaulengwe bano ba ba dirang ka natla, e bile re tshwanetse go ba bontsha gore ‘re a ba rata.’—Bafil. 2:29.