Fa re batla go itumedisa Jehofa, re tshwanetse go nna le tumelo. Mme gone, Baebele e a re “tumelo ga se selo se batho botlhe ba nang le sone.” (2 Bathes. 3:2) Mo temaneng eno, moaposetoloi Paulo o ne a bua ka ‘batho ba ba bosula thata’ ba ba neng ba mmogisa. Le fa go ntse jalo, se a neng a se bua ka tumelo se ka ama le batho ba bangwe. Ka sekai, batho bangwe ba itlhokomolosa bosupi jwa gore Modimo o bopile dilo tsotlhe. (Bar. 1:20) Ba bangwe bone ba re ba dumela gore go na le mongwe yo o nang le maatla a a fetang a batho. Mme gone, tumelo e e ntseng jalo ga e itumedise Jehofa.

Re tshwanetse go tlhatswega pelo gore Jehofa o teng le gore o duela ba ba nang le tumelo e e nonofileng. (Baheb. 11:6) Gore re kgone go nna le tumelo e e ntseng jalo, re tshwanetse go kopa Jehofa gore a re neye moya o o boitshepo. (Luke 11:9, 10, 13) Sengwe gape se se ka re thusang go nna le moya o o boitshepo, ke go bala Baebele. Ka jalo, fa re akanya ka se re se balang re bo re se dirisa, moya wa ga Jehofa o tla re thusa gore re tshele ka tsela e e tla bontshang gore re na le tumelo e e itumedisang Jehofa.