1-2. Go ya ka Ditiro 8:27-31, 35-38, ke eng se se ileng sa tlhotlheletsa moopafadiwa wa Moethiopia gore a kolobediwe?

A O BATLA go kolobediwa? Batho ba le bantsi ba ile ba kolobediwa ka gonne ba rata Jehofa e bile ba lebogela dilo tse a ba direlang tsone. Akanya ka monna mongwe yo e neng e le modiredi wa kgosigadi ya kwa Ethiopia.

² Fa monna yoo a ntse a ithuta Dikwalo, o ile a lemoga gore balatedi botlhe ba ga Jesu ba tshwanetse go kolobediwa mme o ile a dira fela jalo. (Bala Ditiro 8:27-31, 35-38.) Ke eng se se ileng sa mo tlhotlheletsa gore a kolobediwe? Go bonala a ne a rata Lefoko la Modimo. Re itse jang? Ka gonne fa a ne a le mo kareng a boela Ethiopia o ne a bala buka ya Isaia. Mo godimo ga moo, e rile Filipo a mo tlhalosetsa Dikwalo, seo se ile sa dira gore monna yoo a simolole go lebogela dilo tsotlhe tse Jesu a mo diretseng tsone. Mme gone, o ne a ile go dira eng kwa Jerusalema? O ne a ile go obamela Jehofa ka gonne o ne a mo rata. Go bonala monna yono a ile a tlogela bodumedi jo a goletseng mo go jone mme a simolola go obamela Modimo wa boammaaruri. E re ka a ne a rata Jehofa, o ile a dira sengwe se se botlhokwa thata. O ile a kolobediwa a bo a nna morutwa wa ga Jesu.—Math. 28:19.

3. Ke eng se se ka dirang gore motho a okaoke go kolobediwa? (Bona lebokose le le reng, “ Ke Eng Se se Mo Pelong ya Gago?”)

³ Go rata Jehofa go tla go tlhotlheletsa gore o kolobediwe. Mme gone fa o rata batho bangwe kgotsa dilo dingwe thata, seo se ka dira gore o okaoke go kolobediwa. Re raya jang? Akanya ka dikai dingwe. O ka tswa o rata ditsala tsa  gago le ba lelapa la gago fela thata mme o tshaba gore fa o ka kolobediwa, ba tla go tlhanogela. (Math. 10:37) Gongwe go na le dilo dingwe tse o di ratang tse Jehofa a di tlhoileng mme go thata gore o di tlogele. (Pes. 97:10) Kgotsa o ka tswa o godile o keteka meletlo mengwe e e amanang le bodumedi jwa maaka mme o rata meletlo eo ka gonne go ne go le monate go e keteka. Ka jalo, go ka nna thata gore o e tlogele. (1 Bakor. 10:20, 21) Mme gone, potso ya botlhokwa e o tshwanetseng go ipotsa yone ke gore: “Ke eng kgotsa ke mang yo ke mo ratang thata?”

4. Ke eng se se ka dirang gore o kolobediwe?

⁴ Go na le dilo di le dintsi tse o di ratang. Ka sekai, gongwe le pele o simolola go ithuta le Basupi ba ga Jehofa, o ka tswa o ne o rata Baebele. Gape o ka tswa o ne o rata Jesu. Mme e re ka gone jaanong o ithuta le Basupi ba ga Jehofa, o ka tswa o ba rata. Mme gone, seno ga se reye gore dilo tseno di ka dira gore o ineele mo go Jehofa o bo o kolobediwa. Selo se se tla go tlhotlheletsang gore o kolobediwe ke go rata Jehofa. Fa o rata Jehofa go feta sengwe le sengwe, ga o kitla o letla ope kgotsa sepe se go thibela gore o kolobediwe. Go rata Jehofa go tla go tlhotlheletsa gore o kolobediwe e bile gape go tla go thusa gore o tswelele o ikanyega mo go ene fa o sena go kolobediwa.

5. Re tla tlotla ka dipotso dife?

⁵ Jesu o ile a re re tshwanetse go rata Jehofa ka pelo yotlhe, moya otlhe, mogopolo otlhe le ka nonofo yotlhe ya rona. (Mar. 12:30) Ke eng se se ka go thusang gore o rate Jehofa thata jalo? Fa o ipha nako go akanya ka tsela e Jehofa a go ratang ka yone, seo se tla go thusa gore le wena o mo rate. (1 Joh. 4:19) Go rata Jehofa jalo go tla go tlhotlheletsa gore o direng? *

6. Go ya ka Baroma 1:20, ke eng se se ka go thusang gore o itse Jehofa?

⁶ Ithute ka Jehofa mo dilong tse a di bopileng. (Bala Baroma 1:20; Tshen. 4:11) Akanya ka dimela le diphologolo tse Jehofa a di dirileng. Go dira jalo go tla go thusa go lemoga gore Jehofa o botlhale. Ithute tsela e mmele wa motho o dirilweng ka yone. (Pes. 139:14) Gape akanya fela gore letsatsi le na le maatla a a kana kang mme o se ka wa lebala gore letsatsi ke nngwe ya dinaledi tse dintsintsi tse Jehofa a di bopileng. * (Isa. 40:26) Fa o ipha nako go akanya ka dilo tse Jehofa a di bopileng, o tla mo rata le go feta. Gone ke boammaaruri gore go botlhokwa go itse gore Jehofa o botlhale e bile o na le maatla. Mme gone, fa o batla go atamalana le ene o tshwanetse go mo itse sentle.

7. Ke eng se se tla go thusang gore o rate Jehofa?

⁷ O tshwanetse go tlhatswega pelo gore Jehofa o a go rata. A go thata gore o dumele gore Mmopi wa legodimo le lefatshe o a go itse e bile o a go rata? Fa go le jalo, gopola gore Jehofa ga a “kgakala thata le mongwe le mongwe wa rona.” (Dit. 17:26-28) Baebele ya re Jehofa o “hukutsa dipelo tsotlhe,” gape ya re “fa o mmatla, o tla dira gore o mmone.” (1 Ditir. 28:9) Tota e bile, gone jaanong o ithuta Baebele ka gonne Jehofa o go gogetse kwa go ene. (Jer. 31:3) Fa o simolola go tlhaloganya dilo  tsotlhe tse Jehofa a go diretseng tsone, o tla mo rata le go feta.

8. O ka bontsha jang gore o lebogela lorato lwa ga Jehofa?

⁸ O ka bontsha gore o lebogela lorato lwa ga Jehofa ka go bua le ene ka metlha. Fa o nna o mmolelela dilo tse di go tshwenyang e bile o mo lebogela dilo tsotlhe tse a go direlang tsone, o tla mo rata le go feta. Gape o tla atamalana thata le ene fa o bona a araba dithapelo tsa gago. (Pes. 116:1) O tla lemoga gore Jehofa o a go itse. Mme gone, o tshwanetse go itse gore ke eng fa Jehofa a rata dilo dingwe, a tlhoile dilo dingwe e bile a dira dilo dingwe ka tsela e e rileng. Gape o tshwanetse go itse gore Jehofa o batla gore o direng. O ka kgona go itse dilo tseno fa fela o ithuta Baebele.

9. O ka bontsha jang gore o rata Baebele?

⁹ Rata Lefoko la Modimo. Baebele ke yone fela e re rutang boammaaruri ka Jehofa le ka se a ikaeletseng go se dira. O bontsha gore o rata Baebele fa o e bala letsatsi le letsatsi, fa o baakanyetsa thuto ya gago ya Baebele le fa o dirisa se o se ithutang. (Pes. 119:97, 99; Joh. 17:17) A o na le thulaganyo ya go bala Baebele? A o a e bala letsatsi le letsatsi?

10. Ke eng se se kgatlhang thata ka Baebele?

¹⁰ Sengwe se se kgatlhang thata ka Baebele ke gore e na le dipego tse di kwadilweng ke batho ba ba ileng ba tshela le Jesu. Ke yone fela buka e e ikanyegang e e re tlhalosetsang se Jesu a re diretseng sone. Fa o ntse o ithuta ka dilo tse Jesu a ileng a di bua le tse a ileng a di dira, ga go pelaelo gore o tla batla go nna tsala ya gagwe.

11. Ke eng se se ka go thusang gore o rate Jehofa?

¹¹ Fa o rata Jesu, o tla rata le Jehofa. Ka ntlha yang? Ka gonne Jesu o na le botho jo bo tshwanang le jwa ga Jehofa. (Joh. 14:9) Ka jalo fa o ithuta ka Jesu, o tla itse Jehofa e bile o tla mo rata le go feta. Akanya ka tsela e Jesu a neng a tshwara batho ka yone. Ka sekai, batho ba ba humanegileng, ba ba lwalang le ba ba bokoa ba ne  ba tseelwa kwa tlase mme Jesu ene o ne a ba utlwela botlhoko. Gape akanya ka kgakololo ya ga Jesu le kafa go e dirisa go go tswelang mosola ka gone.—Math. 5:1-11; 7:24-27.

12. Fa o ntse o ithuta ka Jesu, o tla tlhotlheletsega go dira eng?

¹² Fa o ipha nako go akanya ka se Jesu a ileng a se dira gore re itshwarelwe maleo, o tla mo rata le go feta. (Math. 20:28) Fa o simolola go tlhaloganya gore Jesu o ne a iketleeleditse go go swela, seno se tla go tlhotlheletsa gore o kope Jehofa gore a go itshwarele. (Dit. 3:19, 20; 1 Joh. 1:9) Mo godimo ga moo, fa o rata Jehofa le Jesu, o tla rata batho ba ba ba ratang.

13. Jehofa o go neile eng?

¹³ Rata batho ba ba ratang Jehofa. Ditsala tsa gago le ba lelapa la gago ba e seng Basupi ba ka tswa ba sa tlhaloganye gore ke eng fa o batla go ineela mo go Jehofa. Tota e bile, ba ka nna ba go thatafaletsa botshelo. Mme gone, Jehofa o tla go naya lelapa le lesha la bakaulengwe le bokgaitsadi. Fa o tswelela o atamalane le bone, ba tla go rata e bile ba tla go ema nokeng. (Mar. 10:29, 30; Baheb. 10:24, 25) Gongwe fa nako e ntse e ile, ba lelapa la gago le bone ba ka nna ba simolola go tshela ka melao ya ga Jehofa le go mo direla.—1 Pet. 2:12.

14. Go ya ka 1 Johane 5:3, ke eng se o se lemogileng ka melao ya ga Jehofa?

¹⁴ Rata melao ya ga Jehofa mme o e dirise mo botshelong jwa gago. Pele o ithuta ka Jehofa gongwe ke wena o neng o itlhophela gore ke eng se se siameng le se se sa siamang. Mme gone jaanong o a lemoga gore melao ya ga Jehofa ke yone e siameng. (Pes. 1:1-3; bala 1 Johane 5:3.) Ka sekai, akanya ka kgakololo e Jehofa a e nayang banna, basadi, batsadi le bana. (Baef. 5:22–6:4) A go dirisa kgakololo ya ga Jehofa go ile ga dira gore botlhe mo lelapeng la lona ba itumele? A go ikobela kgakololo ya ga Jehofa ya gore o tlhophe ditsala tse di siameng go ile ga go thusa? A go ikobela melao ya ga Jehofa go dira gore o itumele? (Dia. 13:20; 1 Bakor. 15:33) Ga go pelaelo gore karabo ya dipotso tseo tsotlhe ke ee.

15. Ke eng se se ka go thusang go dirisa melaometheo ya Baebele?

¹⁵ Ka dinako tse dingwe, go ka nna thata go itse gore o ka dirisa jang melaometheo ya Baebele e o e ithutang. Ke gone ka moo Jehofa a dirisang phuthego ya gagwe go re naya dikgatiso tse di theilweng mo Baebeleng. Dikgatiso tseo di go thusa lemoga se se siameng le se se sa siamang. (Baheb. 5:13, 14) Fa o bala dikgatiso tseno, di tla go thusa go lemoga gore melaometheo ya Baebele ga e potapote, le gore fa re e dirisa e re tswela mosola. Seno se tla go thusa gore o rate phuthego ya ga Jehofa.

16. Jehofa o rulagantse batho ba gagwe jang?

¹⁶ Rata phuthego ya ga Jehofa mme o e eme nokeng. Jehofa o rulagantse batho ba gagwe gore e nne diphuthego, mme Morwawe e bong Jesu ke tlhogo ya diphuthego tseo tsotlhe. (Baef. 1:22; 5:23) Jesu o ile a tlhoma setlhopha sa banna ba ba tloditsweng gore e nne bone ba etelelang pele mo tirong e a batlang barutwa ba gagwe ba e dira. Jesu o bitsa setlhopha seo sa banna a re ke “motlhanka yo o boikanyego le yo o botlhale,” mme o ba neile maikarabelo a gore ba go thuse go atamalana le Jehofa e bile ba go thuse gore o tswelele o atamalane le ene. Motlhanka yo o boikanyego le yo o botlhale o tsaya maikarabelo ao masisi fela thata.  (Math. 24:45-47) Tsela nngwe e motlhanka yo o boikanyego le yo o botlhale a go tlhokomelang ka yone ke ka go tlhoma bagolwane mo diphuthegong. Bagolwane ba a re kaela e bile ba a re sireletsa. (Isa. 32:1, 2; Baheb. 13:17; 1 Pet. 5:2, 3) Ba dira sotlhe se ba ka se kgonang go re gomotsa le go re thusa gore re tswelele re atamalane le Jehofa. Tsela e e botlhokwa thata e bagolwane ba go thusang ka yone ke go go thusa gore o rerele ba bangwe.—Baef. 4:11-13.

17. Go ya ka Baroma 10:10, 13 le 14, ke eng fa re ruta batho ka Jehofa?

¹⁷ Thusa ba bangwe gore ba rate Jehofa. Jesu o ile a laela barutwa ba gagwe gore ba rute batho ka Jehofa. (Math. 28:19, 20) Gone ke boammaaruri gore kwa tshimologong re ka nna ra dira jalo fela ka gonne re batla go ikobela taelo ya ga Jesu. Mme fa o ntse o rata Jehofa le go feta, o tla ikutlwa jaaka moaposetoloi Petere le Johane ba ba ileng ba re: “Ga re ka ke ra tlogela go bua ka dilo tse re di boneng le tse re di utlwileng.” (Dit. 4:20) Ga go na sepe se se itumedisang jaaka go thusa motho gore a rate Jehofa. Akanya fela gore Filipo o ne a itumetse jang fa a ne a thusa monna wa Moethiopia gore a itse Jehofa le gore a kolobediwe. Fa o ikobela taelo ya ga Jesu ya gore o rerele ba bangwe, o a bo o bontsha gore o batla go nna Mosupi wa ga Jehofa. (Bala Baroma 10:10, 13, 14.) Fa o ikobela taelo eno ya ga Jesu, ga go pelaelo gore o tlile go botsa potso eno e Moethiopia a ileng a e botsa: “Ke eng se se nthibelang go kolobediwa?”—Dit. 8:36.

18. Re tla tlotla ka eng mo setlhogong se se latelang?

¹⁸ Go kolobediwa ke tshwetso ya botlhokwa thata e o tlileng go e dira mo botshelong jwa gago. E re ka tshwetso eno e le botlhokwa thata, o tshwanetse go akanyetsa sentle gore go kolobediwa go kayang. O tshwanetse go itse eng ka go kolobediwa? O tshwanetse go dira eng pele o kolobediwa le fa o sena go kolobediwa? Re tla bona dikarabo mo setlhogong se se latelang.