1-2. Motho o tshwanetse go dira eng pele a kolobediwa?

 MO DINGWAGENG di le tlhano tse di fetileng, batho ba feta 1 000 000 ba ile ba kolobediwa ba bo ba nna Basupi ba ga Jehofa. Bontsi jwa bone ba ile ba rutiwa boammaaruri e ‘le masea’ fela jaaka Timotheo. (2 Tim. 3:14, 15) Ba bangwe ba ithutile ka Jehofa ba setse ba godile, mme ba bangwe bone ba setse ba tsofetse. Tota e bile, mosadi mongwe yo a neng a ithuta Baebele le Basupi o ile a kolobediwa a na le dingwaga di le 97.

² Fa e le gore o ithuta Baebele le Basupi kgotsa batsadi ba gago ke Basupi, a o akanyetsa go kolobediwa? Fa go le jalo, o ipeetse mokgele o montle tota. Mme gone, pele ga o kolobediwa, o tshwanetse go ineela mo go Jehofa. Setlhogo seno se tla tlhalosa gore go ineela mo go Jehofa go kaya eng, e bile se tla go thusa go bona gore ga o tlhoke go okaoka go ineela mo go Jehofa le go kolobediwa fa o setse o siametse go dira jalo.

GO INEELA MO GO JEHOFA GO KAYA ENG?

3. Naya dikai tsa batho ba go buiwang ka bone mo Baebeleng ba ba neng ba ineetse mo go Jehofa.

³ Mo Baebeleng, motho yo o neng a ineetse mo go Jehofa o ne a tlhophilwe go dira tiro nngwe e e kgethegileng. Baiseraele e ne e le setšhaba se se ineetseng mo go Jehofa. Le fa go  ntse jalo, go ne go na le batho bangwe mo setšhabeng seo ba ba neng ba ineetse mo go Jehofa ka tsela e e kgethegileng. Ka sekai, Arone o ne a rwala tuku e e kgethegileng e e neng e na le mokgabisa o o phatsimang wa gauta. Mokgabisa oo e ne e le “letshwao le le boitshepo la boineelo,” e bile o ne o bontsha gore o tlhophilwe go direla Jehofa e le moperesiti yo mogolo. (Lefi. 8:9) Banasirite le bone ba ne ba ineetse mo go Jehofa ka tsela e e kgethegileng. Lefoko “Monasirite” le tswa mo lefokong la Sehebera le le kayang “Yo o Tlhaotsweng” kgotsa “Yo o Ineetseng.” Banasirite ba ne ba ikobela melao e ba neng ba e kwaletswe mo Molaong wa ga Moshe.​—Dipa. 6:2-8.

4. (a) Fa o ineela mo go Jehofa, ke eng se se nnang botlhokwa thata mo go wena? (b) ‘Go iitatola’ go kaya eng? (Bona le setshwantsho.)

⁴ Fa o ineela mo go Jehofa, o nna morutwa wa ga Jesu e bile go dira thato ya Modimo e nna selo se se botlhokwa thata mo go wena. Ke eng gape se o tshwanetseng go se dira? Jesu o ne a re: “Fa mongwe a batla go ntshala morago, a a iitatole.” (Math. 16:24) Mafoko a Segerika a a ranotsweng go twe “a a iitatole” gape a ka ranolwa go twe “ga a tlhole a itshelela.” Ka jalo fa o sena go ineela mo go Jehofa, o tshwanetse go tsamaela kgakala le dilo tse a di tlhoileng, go akaretsa le “ditiro tsa mmele o o nang le boleo” tse di jaaka boitsholo jo bo sa siamang jwa tlhakanelodikobo. (2 Bakor. 5:14, 15; Bagal. 5:19-21; 1 Bakor. 6:18) Fa o rata Jehofa e bile o tlhatswegile pelo gore sengwe le sengwe se a reng re se dire se re tswela mosola, ga o kitla o tsaya gore melao ya gagwe ke mokgweleo. (Pes. 119:97; Isa. 48:17, 18) Mokaulengwe mongwe yo o bidiwang Nicholas a re: “O ka tsaya melao ya ga Jehofa e le ditshipi tsa kgolegelo tse di go thibelang go dira se o se batlang, kgotsa o ka e tsaya e le ditshipi tse di thibelang ditau gore di se ka tsa go tlhasela.”

5. (a) O ineela jang mo go Jehofa? (b) Go ineela mo go Jehofa le go kolobediwa go farologana jang? (Bona le setshwantsho.)

 ⁵ O ineela mo go Jehofa fa o rapela, o mo solofetsa gore o tla obamela ene fela le gore go dira thato ya gagwe e tla nna selo se se botlhokwa thata mo go wena. Tota re ka re, fa o ineela mo go Jehofa, o mo solofetsa gore o tla tswelela o mo rata “ka pelo yotlhe ya gago le ka moya otlhe wa gago le ka mogopolo otlhe wa gago le ka nonofo yotlhe ya gago.” (Mar. 12:30) Fa o ineela mo go Jehofa, o bua le ene lo le babedi fela. Mme fa o kolobediwa, o bontsha batho ba bangwe gore o ineetse mo go Jehofa. Go ineela mo go Jehofa ga se maikano fela a a sa reng sepe, o tshwanetse go dira ka natla gore o a diragatse, e bile ke se Jehofa a lebeletseng gore o se dire.​—Mor. 5:4, 5.

GORENG O TSHWANETSE GO INEELA MO GO JEHOFA?

6. Ke eng se se rotloetsang motho gore a ineele mo go Jehofa?

⁶ Lebaka la botlhokwa la go bo o ineela mo go Jehofa ke gore o a mo rata. Go nna le ‘kitso e e boammaaruri’ ka Jehofa le ka boikaelelo jwa gagwe go ile ga go thusa gore o mo rate le go feta. (Bakol. 1:9) Gape go ithuta Baebele go ile ga go tlhatswa pelo gore (1) Jehofa o teng, (2) ke ene a dirileng gore Baebele e kwale le gore (3) o dirisa phuthego ya gagwe go dira se a se ikaeletseng.

7. Motho o tshwanetse go dira eng pele a ineela mo go Jehofa?

⁷ Batho ba ba ineelang mo go Jehofa ba tshwanetse go itse dithuto tsa motheo tse di mo Baebeleng e bile ba tshwanetse go ikobela melao ya gagwe. Ba bolelela batho ba bangwe  dilo tse ba di ithutang mo Baebeleng. (Math. 28:19, 20) E re ka ba rata Jehofa, ba batla go obamela ene fela. Fa o rata Jehofa ka pelo yotlhe, ga o kitla o ineela mo go ene o bo o kolobediwa fela ka gonne o batla go itumedisa batsadi ba gago kgotsa motho yo o ithutang Baebele le ene. E bile ga o kitla o dira jalo ka gonne o etsa ditsala tsa gago.

8. Ke eng se se ka go rotloetsang gore o ineele mo go Jehofa? (Pesalema 116:12-14)

⁸ Go akanya ka dilo tsotlhe tse Jehofa a go diretseng tsone go tla dira gore o mo leboge, mme seo se tla go rotloetsa gore o ineele mo go ene. (Bala Pesalema 116:12-14.) Baebele e a re “mpho nngwe le nngwe e e molemo le neo nngwe le nngwe e e itekanetseng e tswa kwa” go Jehofa. (Jak. 1:17) Mpho e e di gaisang tsotlhe e Jehofa a re neileng yone ke setlhabelo sa thekololo sa ga Morwawe. Mpho eno e di gaisa tsotlhe ka gonne e dira gore re kgone go atamalana le Jehofa, le gore re nne le tsholofelo ya go tshelela ruri. (1 Joh. 4:9, 10, 19) O ka bontsha gore o lebogela mpho eno le dilo tse dingwe tse Jehofa a go direlang tsone ka go ineela mo go ene. (Dute. 16:17; 2 Bakor. 5:15) Ntlha eno e gatelelwa mo bukeng ya Itumelele go Tshelela Ruri! mo thuto 46, ntlha 4 e e nang le bidio ya metsotso e le meraro ya setlhogo se se reng, Go Isetsa Modimo Dimpho.

A O SIAMETSE GO INEELA MO GO JEHOFA LE GO KOLOBEDIWA?

9. Goreng motho a sa tshwanela go ikutlwa a patelesega go ineela mo go Jehofa le go kolobediwa?

⁹ O ka tswa o tsaya gore ga o ise o siamele go ineela mo go Jehofa le go kolobediwa. Gongwe o sa ntse o tlhoka go dira diphetogo dingwe, kgotsa o tlhoka go nonotsha tumelo ya gago. (Bakol. 2:6, 7) Boammaaruri ke gore batho ba ba ithutang Baebele ga ba dire diphetogo ka nako e e tshwanang, e bile basha ba ka siamela go ineela mo go Jehofa le go kolobediwa fa ba na le dingwaga tse di farologaneng. Ka jalo leka go bona gore o tlhoka go dira diphetogo dife o bo o di dira, mme gone o sa ipapise le ope.​—Bagal. 6:4, 5.

10. O tshwanetse go dira eng fa e le gore ga o ise o siamele go ineela mo go Jehofa le go kolobediwa? (Bona le lebokoso le le reng, “ Basha ba Batsadi ba Bone e Leng Basupi.”)

¹⁰ Fa o lemoga gore ga o ise o siamele go ineela mo go Jehofa, o se ka wa itlhoboga. Tswelela o kopa Jehofa gore a go thuse go dira diphetogo tse o tlhokang go di dira, mme o tla go thusa.​—Bafil. 2:13; 3:16; 1 Joh. 5:14.

GORENG BANGWE BA OKAOKA?

11. Jehofa o tla re thusa jang gore re tswelele re ikanyega mo go ene?

¹¹ Bangwe ba ba setseng ba siametse go ineela mo go Jehofa le go kolobediwa, ba okaoka go dira jalo. Gongwe ba tshaba gore fa ba sena go kolobediwa ba tla dira boleo jo bo masisi ba bo ba kgaolwa. Fa e le gore o ikutlwa jalo, itse gore Jehofa o tla go thusa gore ‘o tshele ka tsela e e mo itumedisang.’ (Bakol. 1:10) Jehofa ga a latlhelele batho ba gagwe matsogo. O ba thusa gore ba tswelele ba ikanyega mo go ene. (1 Bakor. 10:13) Ke gone ka moo go kgaolwang batho ba le mmalwa fela mo phuthegong.

12. Ke eng se se ka re thusang gore re se ka ra dira boleo jo bo masisi?

¹² Rotlhe fela re a tle re raelesege go dira dilo tse di sa siamang. (Jak. 1:14) Batho bangwe ba re ga re kgone go laola tsela e re ikutlwang ka yone le dilo tse re di dirang. Mme gone, seo ke maaka a matala. Rotlhe fela re kgona go itirela tshwetso ya gore a re tla dira se se siameng kgotsa se se sa siamang fa re raelesega. Go na le dilo dingwe tse di ka go thusang gore o se ka wa dira boleo. Ka sekai,  iphe nako ya go rapela le go bala Baebele letsatsi le letsatsi. Nna teng kwa dipokanong ka metlha, e bile o bolelele ba bangwe se o se ithutileng. Go dira dilo tseno go tla go thusa gore o tswelele o ikanyega mo go Jehofa, mme o nne o gopotse gore Jehofa o tla go thusa.​—Bagal. 5:16.

13. Josefa o ile a dira eng se le rona re tshwanetseng go se dira?

¹³ Go tla nna motlhofo gore o tswelele o ikanyega mo go Jehofa fa o itse se o tshwanetseng go se dira fa o raelesega go dira sengwe se se sa siamang. Go na le batho bangwe ba go buiwang ka bone mo Baebeleng ba ba ileng ba kgona go dira jalo. Ka sekai, mosadi wa ga Potifaro o ne a nna a leka go raela Josefa gore a tlhakanele dikobo le ene. Mme gone, Josefa o ne a itse gore o tshwanetse go dira eng. Baebele e a re o ne a “gana” a bo a re: “Nka dira jang bosula jo bogolo jono mme ka leofela Modimo?” (Gen. 39:8-10) Go a bonala gore Josefa o ne a itse se a tshwanetseng go se dira, tota le pele mosadi wa ga Potifaro a leka go mo raela. Ke gone ka moo a ileng a kgona go dira se se siameng.

14. Ke eng se se ka go thusang gore o se ka wa ineela fa o raelesega go dira sengwe se se sa siamang?

¹⁴ Ke eng se se ka go thusang gore o tswelele o ikanyega mo go Jehofa fela jaaka Josefa fa o raelesega go dira sengwe se se sa siamang? O tshwanetse go dira tshwetso gone jaanong ya gore o tla dira eng fa o ka iphitlhela o le mo maemong ao. Tsamaela kgakala le dilo tse Jehofa a di tlhoileng, e bile o se ka wa itetla le go akanya ka tsone. (Pes. 97:10; 119:165) Seno se tla go thusa gore o se ka wa ineela fa o raelesega ka gonne o tla bo o setse o itse se o tshwanetseng go se dira.

15. Motho a ka bontsha jang gore o batla ‘go dira thato ya ga Jehofa ka tlhoafalo’? (Bahebera 11:6)

¹⁵ Gongwe o dumela gore dilo tse o di ithutang mo Baebeleng ke boammaaruri e bile o batla go direla Jehofa, mme o sa ntse o okaoka go ineela mo go ene le go kolobediwa. O ka thusiwa ke go dira se Kgosi Dafide a ileng a se dira. O ne a raya Jehofa a re: “Ntshekatsheke tlhe Modimo, mme o itse pelo ya me. Ntlhatlhobe, mme o itse dikakanyo tsa me tse di tlhobaetsang. Bona gore a ga go na sepe se se kotsi mo go nna, mme o nkgogele mo tseleng ya bosakhutleng.” (Pes. 139:23, 24) E re ka o dira sotlhe se o ka se kgonang gore o siamele  go ineela mo go Jehofa le go kolobediwa, o bontsha gore o batla “go dira thato ya gagwe ka tlhoafalo,” mme o tla go segofatsa.​—Bala Bahebera 11:6.

TSWELELA O ATAMALANA LE JEHOFA

16-17. Jehofa o gogela jang basha ba batsadi ba bone e leng Basupi kwa go ene? (Johane 6:44)

¹⁶ Jesu o ile a re Jehofa ke ene a gogelang batho kwa go ene. (Bala Johane 6:44.) Seno se raya gore Jehofa o ile a bona sengwe se sentle mo go wena a bo a go gogela kwa go ene. Baebele e a re mongwe le mongwe wa rona o ‘kgethegile’ kgotsa o “tlhwatlhwakgolo” mo go ene, mme go ntse fela jalo le ka wena.​—Dute. 7:6; ntlh.

¹⁷ Gongwe o mosha mme batsadi ba gago ke Basupi, ka jalo o ka tswa o tsaya gore Jehofa ga a go goga, go na le moo o mo direla ka gonne batsadi ba gago ba a mo direla. Mme gone, nna o gopotse gore Baebele e a re: “Atamelang Modimo, mme o tla lo atamela.” (Jak. 4:8; 1 Ditir. 28:9) Fa o tsaya matsapa go atamela Jehofa, le ene o a go atamela. Jehofa o gogela mongwe le mongwe kwa go ene, go akaretsa le basha ba batsadi ba bone e leng Basupi. Go ntse fela jaaka Jakobe 4:8 e bua, fa motho a tsaya matsapa go atamalana le Jehofa, Jehofa o a mo atamela.​—Bapisa le 2 Bathesalonika 2:13.

18. Re tla tlotla ka eng mo setlhogong se se latelang? (Pesalema 40:8)

¹⁸ Fa o ineela mo go Jehofa o bo o kolobediwa, o etsa Jesu. O ne a iketleeleditse go dira sengwe le sengwe fela se Rraagwe a neng a mo kopa gore a se dire. (Bala Pesalema 40:8; Baheb. 10:7) Mo setlhogong se se latelang, re tla bona gore ke eng se se tla go thusang gore o tswelele o direla Jehofa ka boikanyegi fa o sena go kolobediwa.