Tshwetso e o Tshwanetseng go e Dira
Tsela e re tlhophang go tshela ka yone, e ka dira gore re itumele kgotsa re se ka ra itumela. Jehofa Modimo o itse seo. Leno ke lone lebaka la go bo a batla gore re tshele ka melao ya gagwe.
Jehofa o batla gore re itumele mo botshelong le gore re nne le kagiso.
“Nna Jehofa, ke Modimo wa gago, Ene yo o go rutang gore o tshele ka tsela e e tla go tswelang mosola, Ene yo o go kaelang tsela e o tshwanetseng go tsamaya mo go yone. Fa fela o ka tlhwaela ditaelo tsa me tsebe, kagiso ya gago e ne e tla nna fela jaaka noka, le tshiamo ya gago e ne e tla nna jaaka makhubu a lewatle.”—Isaia 48:17, 18.
E re ka Modimo e le Mmopi wa rona, o itse tsela e e molemo e re tshwanetseng go tshela ka yone. O batla gore re dirise kgakololo ya gagwe ka gonne e tla re tswela mosola. Fa re ikobela ditaelo tsa Modimo, ga re kitla re nnela go ipotsa gore a ditshwetso tse re di dirang di tla nna le diphelelo tse di molemo. Ka metlha re tla dira ditshwetso tse di siameng, tse di tla re tlisetsang boitumelo le kagiso.
Jehofa ga a re kope gore re dire dilo tse re ka se kgoneng go di dira.
“Taelo eno e ke go e laelang gompieno ga e thata mo go wena e bile ga e kwa o ka se kang wa kgona go e fitlhelela.”—Duteronome 30:11.
Go tshela ka melao ya Modimo go ka tlhoka gore re fetole tsela e re akanyang ka yone le e re dirang dilo ka yone. Le fa go ntse jalo, Jehofa ga a re kope gore re dire dilo tse re ka se kgoneng go di dira. Tota e bile, e re ka e le Mmopi wa rona, o itse se re kgonang go se dira. Mme fa kitso ya rona ka Jehofa e ntse e gola, re tla lemoga gore “ditaelo tsa gagwe ga di imele.”—1 Johane 5:3.
Jehofa a re o tla thusa batho ba ba tlhophang go tshela ka melao ya gagwe.
“Nna Jehofa, Modimo wa gago, ke tshwara seatla sa gago sa moja, Nna yo ke go rayang ke re, ‘O se ka wa boifa. Ke tla go thusa.’”—Isaia 41:13.
Re ka kgona go tshela ka melao ya Modimo ka gonne o tla re thusa. A ka re thusa a dirisa Lefoko la gagwe e leng Baebele, le le re kgothatsang e bile le re naya tsholofelo.
Batho ba le dimilione mo lefatsheng lotlhe ba lemogile gore go tshela ka melao ya Baebele go tokafaditse matshelo a bone. Goreng o sa iphe nako ya go ithuta mo go oketsegileng ka kgakololo e Baebele e re nayang yone? O ka simolola ka go ithuta boroutšhara jo bo theilweng mo Baebeleng jwa setlhogo se se reng, Itumelele go Tshelela Ruri! mme o ka bo itseela mahala mo jw.org. Bo na le ditlhogo tse di latelang:
-
Baebele e ka Tokafatsa Botshelo Jwa Gago Jang?
-
Baebele e re Naya Tsholofelo
-
A o Ka Dumela se Baebele e se Buang?
Fa o ntse o ithuta Lefoko la Modimo, Baebele, o tla lemoga gore ga e a felelwa ke nako; “ka metlha [e] ka ikanngwa, gone jaanong le ka bosakhutleng.” (Pesalema 111:8) Go ikobela melao e e mo Baebeleng, ke tsela e e molemo go gaisa tsotlhe e re ka tshelang ka yone. Le fa go tse jalo, Modimo ga a kitla a re pateletsa go dira jalo. (Duteronome 30:19, 20; Joshua 24:15) Ke tshwetso e mongwe le mongwe wa rona a tshwanetseng go itirela yone.
