1. Go ya ka Malaki 3:16 Jehofa o ntse a kwala buka efe, mme e na le eng?

 JEHOFA o na le dingwaga di le dintsi a kwala buka nngwe e e kgethegileng. Buka eno e na le maina a le mantsi thata, go simolola ka leina la mosupi wa ntlha yo o ikanyegang e bong Abele. b (Luke 11:50, 51) Fa e sa le go tloga ka nako eo, Jehofa o ntse a tsenya maina mo bukeng eo, mme gone jaanong go setse go na le maina a batho ba le dimilione. Mo Baebeleng, buka eno e bidiwa “buka ya kgakologelo,” ‘buka ya botshelo’ le ‘momeno wa botshelo.’ Mo setlhogong seno, re tla e bitsa ‘buka ya botshelo.’—Bala Malaki 3:16; Tshen. 3:5; 17:8.

2. Go kwadilwe maina a bomang mo bukeng ya botshelo, mme re ka dira eng gore maina a rona a kwalwe mo bukeng eo?

² Buka eno e e kgethegileng, e na le maina a batho botlhe ba ba obamelang Jehofa ka tlotlo e e boteng e bile ba rata leina la gagwe. Ba tla nna le tshono ya go tshela botshelo jo bo sa khutleng. Le rona maina a rona a ka kwalwa mo bukeng eo fa re ka nna ditsala tsa ga Jehofa ka gonne re dumela mo setlhabelong sa Morwawe e bong Jesu Keresete. (Joh. 3:16, 36) Le fa re ka tswa re na le tsholofelo ya go tshela kwa legodimong kgotsa mo lefatsheng, rotlhe re batla gore maina a rona a kwalwe mo bukeng eo.

3-4. (a) A fa maina a rona a kwadilwe mo bukeng ya botshelo gone jaanong, go raya gore re tla tshelela ruri? Tlhalosa. (b) Re tlile go tlotla ka eng mo setlhogong seno le mo go se se latelang?

³ A seno se raya gore botlhe ba maina a bone a kwadilweng mo bukeng ya botshelo ba tla bona botshelo jo bo sa khutleng?  Re bona karabo ya potso eno mo mafokong a Jehofa a neng a a bolelela Moshe a a mo go Ekesodo 32:33. Jehofa o ne a re: “Ope fela yo o nteofetseng, ke tla mo phimola mo bukeng ya me.” Ka jalo, maina a a setseng a kwadilwe mo bukeng eo a ka phimolwa, jaaka e kete Jehofa o ne a a kwadile ka pensele. (Tshen. 3:5) Re tshwanetse go netefatsa gore maina a rona a nna a le mo bukeng eo a sa phimolwe, jaaka e kete a kwadilwe ka pene.

⁴ Seo se ka dira gore re ipotse dipotso dingwe. Ka sekai, Baebele e a reng ka batho ba maina a bone a kwadilweng mo bukeng ya botshelo le ka ba maina a bone a sa kwalwang mo go yone? Batho ba maina a bone a leng mo bukeng ya botshelo, ba tlile go bona leng botshelo jo bo sa khutleng? Go tla direga eng ka batho ba ba suleng ba ise ba nne le tshono ya go itse Jehofa? A go a kgonega gore maina a bone a kwalwe mo bukeng eo? Dipotso tseo di tla arabiwa mo setlhogong seno le se se latelang.

KE BOMANG BA MAINA A BONE A KWADILWENG MO BUKENG YA BOTSHELO?

5-6. (a) Jaaka go tlhalositswe mo go Bafilipi 4:3, ke bomang ba maina a bone a kwadilweng mo bukeng ya botshelo? (b) Maina a bone a tla nnela ruri leng mo bukeng ya botshelo?

⁵ Ke maina a bomang a a kwadilweng mo bukeng ya botshelo? Go araba potso eo, re tlile go tlotla ka ditlhopha di le tlhano tsa batho. Mo ditlhopheng tseno tse tlhano, go na le dingwe tse maina a tsone a kwadilweng mo bukeng eno, mme tse dingwe ga di a kwalwa.

⁶ Setlhopha sa ntlha ke sa batho ba ba tlhophilweng gore ba ye go busa le Jesu kwa legodimong. A maina a bone a kwadilwe mo bukeng ya botshelo? Ee. Go ya ka se moaposetoloi Paulo a neng a se bolelela “badirimmogo” le ene ba kwa Filipi, maina a batho ba ba tloditsweng e bile ba laleditswe gore ba  ye go busa le Jesu, a kwadilwe mo bukeng ya botshelo. (Bala Bafilipi 4:3.) Le fa go ntse jalo, gore maina a bone a tswelele a le mo bukeng eno, ba tshwanetse go nna ba ikanyega. Fa ba sena go tshwaiwa la bofelo, maina a bone a tswelela a le mo bukeng eo a sa phimolwe, seo se direga pele ba swa kgotsa pele pitlagano e kgolo e simologa.—Tshen. 7:3.

7. Go ya ka Tshenolo 7:16 le 17, maina a ba boidiidi jo bogolo jwa dinku tse dingwe a tlile go nnela ruri leng mo bukeng ya botshelo?

⁷ Setlhopha sa bobedi ke sa boidiidi jo bogolo jwa dinku tse dingwe. A maina a bone a kwadilwe mo bukeng ya botshelo? Ee. A maina a bone a tla bo a sa ntse a le mo bukeng ya botshelo fa ba sena go falola Aramagedona? Ee. (Tshen. 7:14) Jesu o ne a re batho bano ba ba tshwanang le dinku ba tla bona “botshelo jo bo sa khutleng.” (Math. 25:46) Mme batho ba ba tla bong ba falotse Aramagedona, ga ba kitla ba bona botshelo jo bo sa khutleng ka yone nako eo. Maina a bone a tla bo a sa ntse a kwadilwe ka pensele. Ka nako ya Puso ya Dingwaga Tse di Sekete, Jesu o “tla ba isa kwa metsweding ya metsi a a nayang botshelo.” Ba ba ikobelang kaelo ya ga Keresete e bile Jehofa a ba tsaya ba ikanyega mo go ene, maina a bone a tla nnela ruri mo bukeng ya botshelo.—Bala Tshenolo 7:16, 17.

8. Ke maina a bomang a a sa kwalwang mo bukeng ya botshelo, mme go tlile go direga eng ka bone?

⁸ Setlhopha sa boraro ke sa dipodi, e leng batho ba ba tlileng go senngwa ka Aramagedona. Maina a bone ga a kwalwa mo bukeng ya botshelo. Jesu o ne a re ba “tla fedisiwa.” (Math. 25:46) Moya wa Modimo o ne wa kaela Paulo gore a re bolelele gore “Morena o tla ba atlhola. Ba tla nyelediwa ka bosakhutleng.” (2 Bathes. 1:9; 2 Pet. 2:9) Seno se tla diragalela le ba ba leofetseng moya o o boitshepo ka boomo fa dingwaga di ntse di tsamaya. Le bone ba tla fedisiwa, ga ba kitla ba bona botshelo jo bo sa khutleng. Ka jalo, ga ba kitla ba tsosiwa. (Math. 12:32; Mar. 3:28, 29; Baheb. 6:4-6) A jaanong re tlotleng ka ditlhopha tse pedi tsa batho ba ba tlileng go tsosiwa gore ba tshele mo lefatsheng.

BA BA TLILENG GO TSOSIWA

9. Jaaka go tlhalosiwa mo go Ditiro 24:15, ke ditlhopha dife tse pedi tsa batho tse di tlileng go tsosediwa mo lefatsheng, mme di farologana ka eng?

⁹ Baebele e bua ka ditlhopha di le pedi tsa batho ba ba tlileng go tsosiwa mo baswing ba ba nang le tsholofelo ya go tshelela ruri mo lefatsheng, e leng “ba ba siameng” le “ba ba sa siamang.” (Bala Ditiro 24:15.) “Ba ba siameng” ke ba ba ileng ba direla Jehofa ka boikanyegi fa ba sa ntse ba tshela. Mme “ba ba sa siamang” bone ke ba ba neng ba sa direle Jehofa fa ba sa ntse ba tshela. Seno se raya gore tsela e ba neng ba tshela ka yone e ne e sa siama. E re ka ditlhopha tseno tse pedi di tlile go tsosiwa, a seno se raya gore maina a bone a kwadilwe mo bukeng ya botshelo? Gore re bone karabo ya potso eno, a re tlhatlhobeng setlhopha sengwe le sengwe.

10. Goreng “ba ba siameng” ba tlile go tsosiwa, mme ke tshiamelo efe e bangwe ba tlileng go e itumelela? (Bona le setlhogo sa “Dipotso Tse di Tswang Kwa Babading” se se mo makasineng ono, se se buang ka ba ba tlileng go tsosediwa go tshela mo lefatsheng.)

¹⁰ Setlhopha sa bonê ke sa “ba ba siameng.” Pele ga ba swa, maina a bone a ne a kwadilwe mo bukeng ya botshelo. A maina a bone a ne a phimolwa mo bukeng eo fa ba ne ba swa? Nnyaa, ka gonne ba sa ntse ba “tshela” mo mogopolong wa ga Jehofa. Jehofa “ga se Modimo wa baswi mme ke wa batshedi.” (Luke 20:38) Seo se raya gore fa ba ba siameng  ba tsosediwa mo lefatsheng, kwa tshimologong go nna jaaka e kete maina a bone a kwadilwe ka pensele mo bukeng ya botshelo. (Luke 14:14) Ga go pelaelo gore bangwe ba ba tla bong ba tsositswe, ba tlile go nna le tshiamelo ya go nna “dikgosana mo lefatsheng lotlhe.”—Pes. 45:16.

11. Pele maina a batho “ba ba sa siamang” a kwalwa mo bukeng ya botshelo ba tla tshwanelwa ke go ithuta eng?

¹¹ Setlhopha sa bofelo e leng sa botlhano ke sa “ba ba sa siamang.” Gongwe ba ne ba sa tshele ka melao ya ga Jehofa e e siameng pele ga ba swa ka gonne ba ne ba sa e itse. Ka jalo, maina a bone ga a ka a kwalwa mo bukeng ya botshelo. Le fa go ntse jalo, Jehofa o tla ba tsosa gore ba nne le tshono ya gore maina a bone a kwalwe mo bukeng eo. Batho bano “ba ba sa siamang” ba tlile go tlhoka thuso. Fa ba ne ba sa ntse ba tshela, bangwe ba bone ba ile ba dira dilo tse di maswe fela thata. Ka jalo, ba tla tshwanelwa ke go rutiwa gore ba tshele ka melao ya ga Jehofa e e siameng. Gore seo se kgonege, Bogosi Jwa Modimo bo tla dira thulaganyo ya go ruta e e iseng e ko e dirwe mo lefatsheng.

12. (a) Batho ba ba sa siamang ba tlile go rutiwa ke bomang? (b) Batho ba ba tla ganang go dirisa se ba se ithutileng ba tlile go diragalelwa ke eng?

¹² Batho ba ba sa siamang ba tlile go rutiwa ke bomang? Ke ba boidiidi jo bogolo le ba ba siameng ba ba tla bong ba tsositswe. E le gore maina a ba ba sa siamang a kgone go kwalwa mo bukeng ya botshelo, ba tshwanetse go nna ditsala tsa ga Jehofa le go ineela mo go ene. Jesu Keresete le ba ba tloditsweng ba tla bo ba ba etse tlhoko ba le kwa legodimong go bona gore ba dira eng ka se ba se rutiwang. (Tshen. 20:4) Mongwe le mongwe yo o ganang go dirisa se a se rutiwang ga a kitla a letlelelwa go tshela, tota le fa a ka tswa a na le dingwaga di le 100. (Isa. 65:20) Jehofa le Jesu ba kgona go bona se se mo pelong, ka jalo ba tla netefatsa gore ga go na ope yo o senyang lefatshe.—Isa. 11:9; 60:18; 65:25; Joh. 2:25.

 GO TSOSEDIWA GO AMOGELA BOTSHELO LE GO TSOSEDIWA GO ATLHOLWA

13-14. (a) Mo nakong e e fetileng, re ne re tlhaloganya jang mafoko a ga Jesu a a mo go Johane 5:29? (b) Ke eng se re tshwanetseng go se ela tlhoko ka mafoko ao?

¹³ Gape Jesu o ne a bua ka ba ba neng ba tla tsosediwa mo lefatsheng. O ne a re: “Nako e etla e batho botlhe ba ba mo mabitleng ba tla utlwang lentswe la gagwe ka yone mme ba tla tsoga, ba ba dirileng dilo tse di molemo ba tla tsosediwa gore ba amogele botshelo jo bo sa khutleng, mme ba ba dirileng dilo tse di bosula ba tla tsosediwa gore ba atlholwe.” (Joh. 5:28, 29) Jesu o ne a kaya eng?

¹⁴ Mo nakong e e fetileng, re ne re tlhaloganya gore mafoko a ga Jesu a ne a kaya ditiro tse batho ba ba tla bong ba tsositswe mo baswing, ba tla di dirang fa ba sena go tsosiwa; seo se ne se raya gore bangwe ba ne ba tlile go dira dilo tse di siameng fa ba sena go tsosiwa, mme ba bangwe ba ne ba tlile go dira dilo tse di bosula fa ba sena go tsosiwa. Le fa go ntse jalo, ela tlhoko gore Jesu ga a re batho ba ba tla bong ba tsositswe ba tla dira dilo tse di siameng kgotsa ba tla dira dilo tse di bosula. O dirisa mafoko a a bontshang paka e e fetileng, ka gonne o bua ka ba ba “dirileng dilo tse di molemo” le ba ba “dirileng dilo tse di bosula.” Seno se raya gore ba dirile dilo tseno pele ga ba swa. Ntlha eno e a utlwala ka gonne ga go na ope yo o tla letlelelwang go dira dilo tse di bosula mo lefatsheng le lesha. Batho ba ba sa siamang ba tshwanetse ba bo ba dirile dilo tse di bosula pele ga ba swa. Ka jalo, mafoko a ga Jesu a a buang ka ‘go tsosediwa go amogela botshelo’ le ‘go tsosediwa go atlholwa’ a kaya eng?

15. Ke bomang ba ba tla ‘tsosediwang gore ba amogele botshelo jo bo sa khutleng,’ mme goreng?

¹⁵ Batho ba ba siameng, e leng ba ba dirileng dilo tse di siameng pele ga ba swa, ba tla “tsosediwa gore ba amogele botshelo jo bo sa khutleng” ka gonne maina a bone a tla bo a setse a kwadilwe mo bukeng ya botshelo. Seno se raya gore tsogo ya “ba ba dirileng dilo tse di molemo” e go buiwang ka yone mo go Johane 5:29 e tshwana le tsogo ya “ba ba siameng” ba go buiwang ka bone mo go Ditiro 24:15. Seno se tsamaisana sentle le ntlha e e tlhagang mo go Baroma 6:7 e e reng: “Yo o suleng o itshwaretswe boleo jwa gagwe.” Ka jalo, fa batho ba ba siameng ba ne ba swa, Jehofa o ne a itshwarela maleo a bone, mme o tla gakologelwa dilo tse di molemo tse ba neng ba di dira pele ga ba swa. (Baheb. 6:10) Mme gone, batho bano ba ba siameng ba ba tla bong ba tsositswe, ba tla tshwanelwa ke gore ba nne ba ikanyega gore maina a bone a nnele ruri mo bukeng ya botshelo.

16. Go ‘tsosediwa go atlholwa’ go kaya eng?

¹⁶ Jaanong go tla direga eng ka ba ba neng ba dira dilo tse di bosula pele ga ba swa? Le fa gone ba ne ba itshwaretswe maleo fa ba ne ba swa, ba ne ba sa direle Jehofa fa ba sa ntse ba tshela. Maina a bone ga a kwalwa mo bukeng ya botshelo. Ke gone ka moo tsogo ya “ba ba dirileng dilo tse di bosula” e tshwanang le tsogo ya “ba ba sa siamang” e go buiwang ka yone mo go Ditiro 24:15. Ba tlile go “tsosediwa gore ba atlholwe.” c Seno se raya gore Jesu o tla tlhatlhoba le go sekaseka se batho bano ba ba sa siamang ba tla bong ba se dira. (Luke 22:30) Morago ga lobaka lo lo rileng, Jesu o tla ba atlhola gore a ba a tshwanelega gore maina a bone a kwalwe mo bukeng ya botshelo. Fa ba tlogela mekgwa ya bone e e  bosula ba bo ba ineela mo go Jehofa, o tla kwala maina a bone mo bukeng ya botshelo.

17-18. Batho ba ba tla bong ba tsoseditswe go tshela mo lefatsheng ba tla tshwanelwa ke go dira eng, mme “ditiro” tse go buiwang ka tsone mo go Tshenolo 20:12 le 13 ke dife?

¹⁷ Le fa batho ba ba tla bong ba tsositswe ba ka tswa ba ne ba siame kgotsa ba sa siama, ba tla tshwanelwa ke go ikobela melao e e mo memenong e mesha e e tla bulwang mo dingwageng tse 1 000. Moaposetoloi Johane o ne a tlhalosa se a se boneng mo ponatshegelong jaana: “Ke ne ka bona baswi, ba bagolo le ba bannye, ba eme fa pele ga setulo sa bogosi, mme go ne ga bulwa memeno. Go ne ga bulwa momeno o mongwe; ke momeno wa botshelo. Baswi ba ne ba atlholwa go ya ka ditiro tsa bone go dirisiwa dilo tse di kwadilweng mo memenong eo.”—Tshen. 20:12, 13.

¹⁸ Batho ba ba tla bong ba tsositswe ba tla atlholwa go ya ka “ditiro” dife? A ke ditiro tse ba tla bong ba di dirile pele ga ba swa? Nnyaa! Gakologelwa gore fa ba swa ba ne ba itshwarelwa maleo a ba neng ba a dirile. Ka jalo fa go buiwa ka “ditiro tsa bone,” ga go buiwe ka dilo tse ba di dirileng pele ga ba swa. Go na le moo, go buiwa ka dilo tse ba tla di dirang fa ba sena go rutiwa kwa lefatsheng le lesha. Tota le banna ba ba ikanyegang ba ba jaaka Noa, Samuele, Dafide le Daniele ba tla tshwanelwa ke go ithuta ka ga Jesu Keresete le go nna le tumelo mo setlhabelong sa gagwe. Fa e le gore banna bano ba tla tshwanelwa ke go ithuta dilo tseno, go raya gore ba ba sa siamang bone ba tla tshwanelwa ke go ithuta mo go oketsegileng.

19. Go tla direga eng ka batho ba ba ganang tshono eno e ntle e ba tla e newang?

¹⁹ Go tla direga eng ka batho ba ba ganang tshono eno e ntle e ba tla e newang? Tshenolo 20:15 e a re: “Ope fela yo o neng a sa kwalwa mo bukeng ya botshelo o ne a latlhelwa mo letšheng leo la molelo.” Seno se raya gore ba tlile go fedisiwa gotlhelele. Ka jalo, go botlhokwa gore re dire ka natla gore maina a rona a kwalwe mo bukeng ya botshelo mme a se ka a phimolwa.

20. Fa Puso ya Dingwaga Tse di Sekete e busa, go tla bo go dirwa tiro efe e e itumedisang? (Bona setshwantsho se se mo khabareng.)

²⁰ Go tla bo go itumedisa tota fa Puso ya Dingwaga Tse di Sekete e busa! Ka nako eo, batho ba Modimo ba tla bo ba dira tiro e e seng kana ka sepe ya go ruta batho mo lefatsheng. Gape e tla bo e le nako ya go tlhatlhoba boitsholo jwa ba ba siameng le ba ba sa siamang. (Isa. 26:9; Dit. 17:31) Tiro eno ya go ruta e tla dirwa jang? Setlhogo se se latelang se tla re thusa go tlhaloganya tshiamelo eno le go e itumelela.