1. Ke ditiragalo dife tse re tla di itumelelang ka nako ya Puso ya Dingwaga Tse di Sekete?

 FA BASWI ba simolola go tsosiwa ka nako ya Puso ya ga Keresete ya Dingwaga Tse di Sekete, ruri leo e tla bo e le letsatsi le le itumedisang tota mo lefatsheng! Botlhe ba ba tlhokafaletsweng ke batho ba ba ba ratang ba tlhologeletswe go ba bona gape. Jehofa le ene o ba tlhologeletswe. (Jobe 14:15) Akanya fela gore batho ba tla bo ba itumetse jang fa ba kopana le batho ba ba ba ratang ba ba tla bong ba tsositswe. Jaaka re ithutile mo setlhogong se se fetileng, “ba ba siameng” ba maina a bone a kwadilweng mo bukeng ya botshelo, ba tla “tsosediwa gore ba amogele botshelo jo bo sa khutleng.” (Dit. 24:15; Joh. 5:29) Gongwe bontsi jwa batho ba re ba ratang ba tla tsosiwa morago fela ga Aramagedona. b Mo godimo ga moo “ba ba sa siamang,” e leng ba ba ileng ba se ka ba nna le tshono ya go ithuta ka Jehofa kgotsa ya go mo direla pele ga ba swa, ba tlile go “tsosediwa gore ba atlholwe.”

2-3. (a) Ke tiro efe ya go ruta e e tlhalosiwang mo go Isaia 11:9 le 10, e e sa tshwaneng le epe e e kileng ya dirwa mo lefatsheng? (b) Re tlile go tlotla ka eng mo setlhogong seno?

² Botlhe ba ba tla bong ba tsositswe ba tla tshwanelwa ke go rutiwa. (Isa. 26:9; 61:11) Ka jalo, go tla nna le tiro ya go ruta e e sa tshwaneng le epe e e kileng ya dirwa mo lefatsheng. (Bala Isaia 11:9, 10.) Goreng re rialo? Ka gonne batho ba ba sa siamang ba ba tla bong ba tsositswe ba tla tshwanelwa ke go  ithuta ka Jesu Keresete, Bogosi Jwa Modimo, setlhabelo sa ga Jesu sa thekololo, botlhokwa jwa leina la ga Jehofa le gore goreng re tshwanetse go busiwa ke ene fela. Tota le batho ba ba siameng ba tla tshwanelwa ke go rutiwa se Jehofa a ntseng a se ruta batho ba gagwe ka se a se ikaeletseng ka lefatshe. Batho bangwe ba ba ikanyegang ba tlhokafetse pele ga Baebele e wediwa. Ka jalo, batho ba ba siameng le ba ba sa siamang, ba tla tshwanelwa ke go ithuta dilo di le dintsi tota.

³ Mo setlhogong seno, re tlile go sekaseka dipotso tse di latelang: Tiro e kgolo ya go ruta e tlile go dirwa jang? Tsela e batho ba tsibogelang thuto eo ka yone e tla ama jang kgang ya gore a maina a bone a tla kwalwa mo bukeng ya botshelo kgotsa nnyaa? Go botlhokwa thata gore re itse dikarabo tsa dipotso tseno. Jaaka re tla bona, boporofeti bongwe jo bo kgatlhang jo go buiwang ka jone mo bukeng ya Daniele le ya Tshenolo bo tla re thusa go tokafatsa tsela e re tlhaloganyang dilo ka yone malebana le se se tla diregang fa batho ba ba tlhokafetseng ba tsosiwa. Sa ntlha, a re sekasekeng ditiragalo tse di kgatlhang tse di boleletsweng pele mo boporofeting jo bo mo go Daniele 12:1 le 2.

4-5. Daniele 12:1 e a reng ka motlha wa bokhutlo?

⁴ Bala Daniele 12:1. Buka ya Daniele e tlhalosa tsela e ditiragalo tse di kgatlhang di tla diregang ka yone ka tatelano ka motlha wa bokhutlo. Ka sekai, Daniele 12:1 e re bolelela gore Mikaele, e bong Jesu Keresete, o ‘emela batho’ ba Modimo. Karolo nngwe ya boporofeti joo e ne ya diragadiwa ka 1914 fa Jesu a ne a tlhomiwa go nna Kgosi ya Bogosi Jwa Modimo jo bo kwa legodimong.

⁵ Gape Daniele o ne a bolelelwa gore Jesu o ne a tla “ema” ka “nako ya matshwenyego e e iseng e tsamaye e nne teng fa e sa le go nna le setšhaba go fitlha ka nako eo.” “Nako [eo] ya matshwenyego” ke “pitlagano e kgolo” e go buiwang ka yone mo go Mathaio 24:21. Jesu o tla ema gore a sireletse batho ba Modimo kwa bofelong jwa nako eo ya matshwenyego, e leng ka Aramagedona. Buka ya Tshenolo e ba bitsa boidiidi jo bogolo jwa batho “ba ba tswang mo pitlaganong e kgolo.”—Tshen. 7:9, 14.

6. Go tla direga eng fa boidiidi jo bogolo bo sena go falola pitlagano e kgolo? Tlhalosa. (Bona le setlhogo sa “Dipotso Tse di Tswang Kwa Babading” se se mo makasineng ono, se se buang ka ba ba tlileng go tsosediwa go tshela mo lefatsheng.)

⁶ Bala Daniele 12:2. Go tla direga eng fa boidiidi jo bogolo bo sena go falola nako eno ya matshwenyego? Mo nakong e e fetileng, re ne re akanya gore Daniele 12:2 e bua ka tsogo ya batho ba ba tla yang go tshela kwa legodimong kgotsa ka tiro ya go rera e e neng ya oketsega fa baganetsi ba sena go leka go e emisa ka 1918. c Le fa go ntse jalo, gone jaanong re tlhaloganya gore go buiwa ka tsogo ya baswi e e tla diregang mo lefatsheng le lesha. Goreng re rialo? Ka gonne polelwana e e reng “mo loroleng,” e gape e dirisitsweng mo go Jobe 17:16, e kaya “Lebitla.” Ntlha eno e re bontsha gore Daniele 12:2 e bua ka tsogo ya mmatota e e tla diregang fa malatsi a bofelo a sena go khutla, morago ga ntwa ya Aramagedona.

7. (a) Bangwe ba tlile go tsogela gore ba “tshelele ruri” ka tsela efe? (b) Goreng eno e le “tsogo e e botoka”?

⁷ Daniele 12:2 e kaya eng fa e re bangwe ba tla tsogela gore ba “tshelele ruri”? E kaya gore batho ba ba tla bong ba tsositswe ba bo ba  simolola go itse Jehofa le Jesu kgotsa ba tswelela ba ithuta ka bone e bile ba ba ikobela ka nako ya dingwaga tse 1 000, ba tla bona botshelo jo bo sa khutleng. (Joh. 17:3) Eno ke “tsogo e e botoka” go na le e e diregileng mo nakong e e fetileng fa go ne go tsosiwa batho bangwe. (Baheb. 11:35) Goreng re rialo? Ka gonne batho bao ba ba nang le boleo ba ile ba tlhokafala gape.

8. Bangwe ba tlile go tsosediwa “gore ba kgobiwe le gore ba tlhabisiwe ditlhong ka bosakhutleng” ka tsela efe?

⁸ Le fa go ntse jalo, ga se botlhe ba ba tsositsweng ba ba tla amogelang thuto ya ga Jehofa. Boporofeti jo bo mo bukeng ya Daniele bo tlhalosa gore bangwe ba tlile go tsosediwa “gore ba kgobiwe le gore ba tlhabisiwe ditlhong ka bosakhutleng.” E re ka ba tla bo ba bontshitse gore ga ba batle go reetsa Modimo, maina a bone ga a kitla a kwalwa mo bukeng ya botshelo e bile ga ba kitla ba bona botshelo jo bo sa khutleng. Go na le moo, ba tlile go ‘tlhabisiwa ditlhong ka bosakhutleng’ kgotsa ba tlile go senngwa. Ka jalo, Daniele 12:2 e bua ka se se tla diragalelang batho botlhe ba ba tla bong ba tsositswe go ikaegile ka se ba tla se dirang fa ba sena go tsosiwa. d (Tshen. 20:12) Bangwe ba tla bona botshelo jo bo sa khutleng, mme ba bangwe ga ba kitla ba bo bona.

9-10. Go tlile go direga eng gape morago ga pitlagano e kgolo, mme ke bomang ba ba ‘tla phatsimang thata jaaka loapi’?

⁹ Bala Daniele 12:3. Ke eng gape se se tla diregang morago ga “nako ya matshwenyego”? Mo godimo ga se se buiwang mo go Daniele 12:2, temana 3 e bua ka sengwe se se tla diregang morago ga pitlagano e kgolo.

¹⁰ Ke bomang ba ba ‘tla phatsimang thata jaaka loapi’? Re bona karabo mo mafokong a ga Jesu a a mo go Mathaio 13:43 a a reng: “Ka nako eo, basiami ba tla phatsima thata jaaka letsatsi mo Bogosing jwa ga Rraabone.” Mo kgaolong eno, Jesu o ne a bua ka “bana ba Bogosi,” e leng bomorwarraagwe ba ba tloditsweng ba ba tla busang le ene mo Bogosing jwa kwa legodimong. (Math. 13:38) Ka jalo, Daniele 12:3 e tshwanetse e a bo e bua ka batlodiwa le ka tiro e ba tla bong ba e dira mo nakong ya Puso ya Dingwaga Tse di Sekete.

11-12. Ke tiro efe e ba ba 144 000 ba tla e dirang ka dingwaga tse 1 000?

¹¹ Ba ba tloditsweng ba tla thusa jang “ba le bantsi go dira se se siameng”? Batlodiwa ba tla bo ba dirisana le Jesu Keresete go kaela tiro ya go ruta e e tla bong e dirwa mo lefatsheng ka dingwaga tse 1 000. Ba ba 144 000 ba tlile go busa e le dikgosi e bile ba tlile go nna baperesiti. (Tshen. 1:6; 5:10; 20:6) Ka jalo, ba tlile go thusa go “fodisa ditšhaba,” e leng go tlosa boleo mo bathong ka bonya ka bonya. (Tshen. 22:1, 2; Esek. 47:12) Ruri seo se tlile go itumedisa batlodiwa!

¹² Ke bomang ba ba tla nnang karolo ya “ba le bantsi” ba ba tla thusiwang go dira se se siameng? Ba akaretsa ba ba tla bong ba tsositswe, ba ba falotseng Aramagedona mmogo le bana ba ba tla tsholwang kwa lefatsheng le lesha. Kwa bofelong jwa dingwaga tse 1 000, botlhe ba ba tla bong ba le mo lefatsheng, ba tla bo ba se na boleo. Mme gone, maina a bone a tlile go kwalwa leng ka pene mo bukeng ya botshelo mme e seng ka pensele?

13-14. Ke eng se batho botlhe ba ba tla bong ba le mo lefatsheng ba tla tshwanelwang ke go se dira pele ba ka tshelela ruri?

¹³ Re tshwanetse go gopola gore fa motho a se na boleo, seo ga se reye gore o tla tshelela ruri. Akanya ka Adame le Efa. Ba ne ba se na boleo, le fa go ntse jalo ba ne ba tshwanetse go bontsha Jehofa Modimo gore ba a mo ikobela, pele a dira gore ba tshelele ruri. Ka maswabi, ga ba a ka ba mo ikobela.—Bar. 5:12.

¹⁴ Go tla direga eng ka batho ba ba tla bong ba le mo lefatsheng kwa bofelong jwa dingwaga tse 1 000? Botlhe ba tla bo ba se na boleo. A batho botlhe ba tla ikobela bolaodi jwa ga Jehofa go ya go ile? Kgotsa a bangwe ba bone ba tla dira jaaka Adame le Efa ba ba neng ba se ka ba ikanyega le fa gone ba ne ba se na boleo? Re tlhoka go bona dikarabo tsa dipotso tseno.

15-16. (a) Batho botlhe ba tla newa leng tshono ya go bontsha gore ba ikanyega mo go Jehofa? (b) Teko ya bofelo e tla felela ka eng?

¹⁵ Satane o tla golegwa ka dingwaga tse 1 000. Mo nakong eo, ga a kitla a kgona go tsietsa ope. Le fa go ntse jalo morago ga dingwaga tse 1 000, Satane o tla gololwa. Go tswa foo, o tla leka go tsietsa batho bano ba ba se nang boleo. Mo nakong eo, batho botlhe ba ba se nang boleo ba tla nna le tshono ya go bontsha gore ba tlotla leina la Modimo le gore ba ikobela bolaodi jwa gagwe. (Tshen. 20:7-10) Se ba tla se dirang ka nako  eo, se tla bontsha gore a maina a bone a tla nnela ruri mo bukeng ya botshelo kgotsa nnyaa.

¹⁶ Baebele e re bolelela gore bangwe ga ba kitla ba ikanyega fela jaaka Adame le Efa, e bile ba tla gana bolaodi jwa ga Jehofa. Go tla direga eng ka bone? Tshenolo 20:15 e a re: “Ope fela yo o neng a sa kwalwa mo bukeng ya botshelo o ne a latlhelwa mo letšheng leo la molelo.” Batho ba ba tla tlhanogelang Jehofa, ba tla fedisiwa. Le fa go ntse jalo, bontsi jwa batho ba ba se nang boleo ba tla falola teko eno ya bofelo. Maina a bone a tla nnela ruri mo bukeng ya botshelo.

17. Moengele o ne a bolelela Daniele gore go ne go tla direga eng mo motlheng wa rona? (Daniele 12:4, 8-10)

¹⁷ Go itumedisa tota go akanya ka ditiragalo tseno tse di tla diregang mo nakong e e tlang! Le fa go ntse jalo, moengele o ne a bolelela Daniele tshedimosetso nngwe ya botlhokwa e e buang ka motlha wa rona, e leng ‘motlha wa bokhutlo.’ (Bala Daniele 12:4, 8-10; 2 Tim. 3:1-5) Moengele o ne a bolelela Daniele a re: “Kitso ya boammaaruri e tla nna ntsi.” Batho ba Modimo ba ne ba tla tlhaloganya mafoko ao a boporofeti a a mo bukeng ya Daniele botoka. Gape moengele o ne a mmolelela gore mo nakong eo, ‘batho ba ba bosula ba ne ba  tla dira dilo tse di bosula e bile ga go na bape ba bone ba ba neng ba tla tlhaloganya mafoko ao.’

18. Go ise go ye kae, batho ba ba bosula ba tlile go diragalelwa ke eng?

¹⁸ Gompieno go ka lebega e kete ga go dirwe sepe ka batho ba ba dirang dilo tse di bosula. (Mal. 3:14, 15) Mme go ise go ye kae, Jesu o tla atlhola batho ba ba tshwanang le dipodi a bo a ba kgaoganya le ba ba tshwanang le dinku. (Math. 25:31-33) Batho bano ba ba bosula ga ba kitla ba falola pitlagano e kgolo e bile ga ba kitla ba tsosiwa gore ba tshele mo lefatsheng le lesha. Maina a bone ga a kitla a kwalwa mo ‘bukeng ya kgakologelo’ e go buiwang ka yone mo go Malaki 3:16.

19. Ke eng se re tshwanetseng go se dira gone jaanong, mme ka ntlha ya eng? (Malaki 3:16-18)

¹⁹ Gone jaanong ke nako ya go bontsha gore ga re bangwe ba batho ba ba bosula. (Bala Malaki 3:16-18.) Jehofa o ntse a kokoanya batho ba a ba tsayang e le “batho ba ba kgethegileng” kgotsa thuo e e tseelwang kwa godimo. Ga go pelaelo gore re batla go nna bangwe ba bone.

20. Ke tsholofetso efe ya bofelo e Daniele a ileng a e bolelelwa, mme ke eng fa o lebile pele go bona tsholofetso eo e diragadiwa?

²⁰ Ruri re tshela mo dinakong tse di itumedisang. Le fa go ntse jalo, go sa ntse go na le dilo tse di kgatlhang tse di tlileng go direga mo bogautshwaneng. Go ise go ye kae, re tlile go bona bosula jotlhe bo fedisiwa. Morago ga moo, re tlile go bona fa Jehofa a diragatsa tsholofetso eno e a neng a e bolelela Daniele: “O tla ema gore o amogele kabelo ya gago kwa bokhutlong jwa malatsi.” (Dan. 12:13) A o tlhologeletswe go bona letsatsi la fa Daniele mmogo le batho ba o ba ratang ba “ema” gape? Fa e le gore go ntse jalo, dira sotlhe se o ka se kgonang gore o nne o ikanyega. Mme fa o dira jalo, o ka tlhatswega pelo gore leina la gago le tla nnela ruri mo bukeng ya botshelo.