Ela tlhoko gore Baebele e araba dipotso tseno jang.

Ditiro 24:15 e re bolelela gore Modimo o tlile “go tsosa batho ba ba siameng le ba ba sa siamang mo baswing.” Batho ba ba siameng ke ba ba ileng ba ikobela Modimo pele ga ba swa, ka jalo maina a bone a kwadilwe mo bukeng ya botshelo. (Mal. 3:16) Ba ba sa siamang ba akaretsa batho ba ba ileng ba se ka ba nna le tshono ya go ithuta ka Jehofa, ka jalo maina a bone ga a a kwalwa mo bukeng ya botshelo.

Johane 5:28, 29 e bua ka ditlhopha tseo tse pedi tse di umakiwang mo go Ditiro 24:15. Jesu a re “ba ba dirileng dilo tse di molemo” ba tla “tsosediwa gore ba amogele botshelo jo bo sa khutleng, mme ba ba dirileng dilo tse di bosula ba tla tsosediwa gore ba atlholwe.” Batho ba ba siameng ba dirile dilo tse di molemo pele ga ba swa. Ba tla tsosediwa gore ba amogele botshelo jo bo sa khutleng ka gonne maina a bone a tla bo a sa ntse a le mo bukeng ya botshelo. Mme ba ba sa siamang bone, ba dirile dilo tse di bosula pele ga ba swa. Ba tla tsosediwa gore ba atlholwe. Maina a bone ga a ise a kwalwe mo bukeng ya botshelo, mme ka nako eo ba tla bo ba atlholwa kgotsa ba sekasekiwa. Mo nakong eo, ba tla nna le tshono ya go ithuta ka Jehofa mme maina a bone a bo a kwalwa mo bukeng ya botshelo.

Tshenolo 20:12, 13 e tlhalosa gore batho botlhe ba ba tla bong ba tsositswe mo baswing ba tla tshwanelwa ke go ikobela “dilo tse di kwadilweng mo memenong,” e leng melao e mesha e Modimo a tla re e nayang kwa lefatsheng le lesha. Ba ba se kitlang ba ikobela melao eo ba tla senngwa.—Isa. 65:20.

Daniele 12:2 e bolelela pele gore bangwe ba batho ba ba tlhokafetseng ba tla tsogela “gore ba tshelele ruri mme ba bangwe ba tla tsogela gore ba kgobiwe le gore ba tlhabisiwe ditlhong ka bosakhutleng.” Temana eno e bua ka katlholo ya bofelo ya batho ba ba tla bong ba tsositswe mo baswing, e leng “go tshelela ruri” kgotsa “go tlhabisiwa ditlhong ka bosakhutleng.” Ka jalo, kwa bokhutlong jwa dingwaga tse 1 000, bangwe ba tla amogela botshelo jo bo sa khutleng, mme ba bangwe ba tla senngwa.—Tshen. 20:15; 21:3, 4.

Akanya ka sekai seno. Boemo jwa ditlhopha tseo tse pedi tsa batho ba ba tla bong ba tsositswe mo baswing, bo ka tshwantshiwa le jwa batswakwa ba ba batlang go nna mo nageng nngwe. Batho ba ba siameng ba tshwana le batho ba ba newang lekwalotetla la go bereka kgotsa la go nna mo nageng eo, le le ba letlang go dira dilo dingwe le go nna le kgololesego e e rileng. Ka fa letlhakoreng le lengwe, batho ba ba sa siamang ba tshwana le batswakwa ba ba newang lekwalotetla la nakwana la go nna mo nageng eo kgotsa le le newang batho ba ba etileng. Batswakwa ba ba ntseng jalo, ba tla tshwanelwa ke go itshupa gore a ba tshwanelega go nna mo nageng eo pele ga ba ka letlelelwa go tswelela ba nna moo. Ka tsela e e tshwanang, batho ba ba sa siamang ba ba tla bong ba tsositswe, ba tla tshwanelwa ke go ikobela melao ya ga Jehofa ba bo ba itshupe gore ba siame e le gore ba tswelele ba nna mo Paradaiseng. Go sa kgathalesege gore batswakwa bao ba ile ba newa lekwalotetla lefe fa ba ne ba tsena mo nageng, kwa bofelong bangwe ba bone ba ka nna ba letliwa go nna mo nageng eo, mme ba bangwe ba ka nna ba busediwa kwa dinageng tsa bone. Tshwetso eo ya bofelo, e ikaegile ka boikutlo jo motho a nang le jone le tsela e a itshwarang ka yone mo nageng eo. Ka tsela e e tshwanang, katlholo ya bofelo ya batho ba ba tla bong ba tsositswe mo baswing, e tla ikaega ka boikanyegi jwa bone le ka tsela e ba tla bong ba itshwara ka yone mo lefatsheng le lesha.

Jehofa ke Modimo yo o lorato, le fa go ntse jalo o rata tshiamiso. (Dute. 32:4; Pes. 33:5) O tla bontsha lorato lwa gagwe ka go tsosa batho ba ba siameng le ba ba sa siamang. Le fa go ntse jalo, o tla lebelela gore botlhe ba ikobele melao ya gagwe ya se se siameng le se se sa siamang. Batho ba ba tla bontshang gore ba a mo rata ba bo ba ikobela melao ya gagwe, ke bone fela ba ba tla letliwang go tswelela ba tshela mo lefatsheng le lesha.