1-2. Ke eng se se dirang gore batlhanka ba Modimo ba itumele? (Jakobe 1:22-25)

 JEHOFA le Jesu ba batla gore re itumele. Mokwadi wa Pesalema 119:2 o ile a re: “Go itumela ba ba ikobelang dikgakololo tsa gagwe, ba ba mmatlang ka dipelo tsa bone tsotlhe.” Jesu le ene o ile a re: “Go itumela ba ba utlwang lefoko la Modimo e bile ba le ikobela!”​—Luke 11:28.

² Batlhanka ba ga Jehofa ke batho ba ba itumetseng. Goreng re rialo? Go na le mabaka a le mantsi a a dirang gore re itumele. Lebaka la botlhokwa ke gore re bala Lefoko la Modimo e bile re dira sotlhe se re ka se kgonang go dirisa se re se ithutang.​—Bala Jakobe 1:22-25.

3. Go dirisa se re se ithutang mo Lefokong la Modimo go re tswela mosola jang?

³ Go ‘dira se lefoko la Modimo le se buang’ go re tswela mosola ka ditsela tse di farologaneng. Ka sekai, fa re dirisa se re se ithutang mo Lefokong la Modimo, re itumedisa Jehofa, e bile le rona re a itumela. (Mor. 12:13) Gape fa re dirisa kgakololo e e mo Baebeleng, re atamalana le ba malapa a rona le bakaulengwe le bokgaitsadi. Gongwe o ile wa lemoga seo. Mo godimo ga moo, ga re nne le mathata a le mantsi a batho ba ba sa ikobeleng Jehofa ba nang le one. Re dumalana le se Kgosi Dafide a ileng a se bua. Mo pineng nngwe ya gagwe, o ile a bua ka melao le dikatlholo tsa ga Jehofa. Kwa bofelong jwa pina eo, o ile a re: “Go di boloka go na le maduo a magolo.”​—Pes. 19:7-11.

4. Goreng ka dinako tse dingwe go se motlhofo go bala le go dirisa se re se ithutang mo Baebeleng?

 ⁴ Ke boammaaruri gore ga se ka dinako tsotlhe go leng motlhofo go bala Lefoko la Modimo le go dirisa se re se ithutang. Mme gone, re tshwanetse go ipha nako ya go bala le go ithuta Baebele gore re tlhaloganye se Jehofa a batlang gore re se dire. Ka jalo, a re tlotleng ka dikakantsho dingwe tse di tla re thusang gore re kgone go bala Lefoko la Modimo ka metlha. Gape re tla bona gore ke eng se se ka re thusang go akanyetsa kwa teng ka se re se balang le gore re ka se dirisa jang mo botshelong.

IPHE NAKO YA GO BALA BAEBELE

5. Ke dilo dife tse re tshwanetseng go di dira tse di tlhokang nako?

⁵ Go na le dilo di le dintsi tse Baebele e reng batlhanka ba ga Jehofa ba tshwanetse go di dira, mme dilo tseo di tlhoka nako. Ka sekai, bontsi jwa rona re a bereka gore re tlhokomele ba malapa a rona. (1 Tim. 5:8) Bakeresete ba le bantsi ba tlhokomela ba masika a bone ba ba lwalang kgotsa ba ba godileng. Gape rotlhe fela re tshwanetse go tlhokomela botsogo jwa rona. Mo godimo ga moo, go na le dilo dingwe tse re tshwanetseng go di dira mo phuthegong. Tiro ya botlhokwa e re tshwanetseng go e dira ke go rera dikgang tse di molemo. Le fa gone re na le maikarabelo ano, re ka dira eng gore re nne le nako ya go bala Baebele ka metlha, go akanyetsa kwa teng ka se re se balang le go se dirisa?

6. Ke eng se se ka go thusang go bala Baebele ka metlha? (Bona le setshwantsho.)

⁶ Go bala Baebele ke sengwe sa “dilo tse di botlhokwa thata” tse Bakeresete ba tshwanetseng go di dira. Ka jalo, re tshwanetse go tlhomamisa gore re a e bala. (Bafil. 1:10) Mo go Pesalema 1:1 le 2, mokwadi wa pesalema eno a re motho yo o itumetseng, “o itumedisiwa ke molao wa ga Jehofa, e bile o balela molao wa Gagwe kwa tlase motshegare le bosigo.” Ka jalo, seno se raya gore re tshwanetse go ipha nako ya go bala Baebele. Re  tshwanetse go bala Baebele leng? Mongwe le mongwe wa rona a ka itlhophela gore ke nako efe e e mo siametseng. Mme gone, e tshwanetse go nna nako e e tla dirang gore a kgone go bala Baebele ka metlha. Mokaulengwe mongwe yo o bidiwang Victor a re: “Ke rata go bala Baebele mo mosong. Le fa gone ke sa rate go tsoga phakela, ke lemogile gore eo ke nako e e ntshiametseng ka gonne ga go na dilo tse dintsi tse di nkgoreletsang, e bile ke kgona go tlhoma mogopolo mo go se ke se balang.” A le wena o ikutlwa jalo? Ipotse go re: “Ke nako efe e e ntshiametseng ya gore ke bale Baebele?”

AKANYETSA KWA TENG KA SE O SE BALANG

7-8. Ke eng se se ka dirang gore se re se balang se se ka sa re tswela mosola? Naya sekai.

⁷ Fa e le gore o ipeetse nako e o balang Baebele ka yone, go na le sengwe gape se o tshwanetseng go se ela tlhoko. A o kile wa bala sengwe mme morago ga moo o bo o sa gopole se o se badileng? Ga go pelaelo gore seo se kile sa go diragalela. Ka maswabi, seno se ka direga fa o bala Baebele. Gongwe o ipeetse mokgele wa go bala dikgaolo di le mmalwa tsa Baebele letsatsi le letsatsi. Seo ke selo se sentle! Re tshwanetse go ipeela mekgele re bo re dira ka natla go e fitlhelela. (1 Bakor. 9:26) Mme gone, fa e le gore o batla gore go bala Baebele go go tswele mosola, ga o a tshwanela go e bala fela.

⁸ Ka sekai, dijalo di tlhoka metsi gore di gole. Ke boammaaruri gore fa pula e na thata e bile e na ka bonako, mmu o tla koloba. Mme gone, metsi ga a kitla a nwelelela mo mmung e bile dijalo ga di kitla di gola. Go botoka fa pula e na ka iketlo ka gonne metsi a ka kgona go nwelelela mo mmung, e bile dijalo di ka kgona go gola. Ka tsela e e tshwanang, fa re bala Baebele ga re a tshwanela go e bala re le mo lobelong mo re sa kgoneng go nna le nako ya go akanya, go gopola le go dirisa se re se badileng.​—Jak. 1:24.

9. Re tshwanetse go dira eng fa re lemoga gore re bala Baebele re le mo lobelong?

⁹ A ka dinako dingwe o bala Baebele o le  mo lobelong? Fa e le gore go ntse jalo, fokotsa lobelo. Iphe nako ya go akanya ka se o se balang kgotsa se o se badileng. Eno ga e a tshwanela go nna namane e tona ya tiro. O ka oketsa nako e o balang ka yone gore o kgone go nna le nako e e lekaneng ya go akanyetsa ka teng. Kgotsa o ka bala ditemana di le mmalwa gore nako e e setseng o e dirisetse go akanya ka se o se badileng. Victor yo re buileng ka ene mo dirapeng tse di fetileng a re: “Ga ke bale go le gontsi, ke bala kgaolo e le nngwe fela. Go bala mo mosong go nthusa gore ke akanye ka se ke se badileng letsatsi lotlhe.” O ka itlhophela gore o batla go bala dikgaolo di le kae. Mme gone, sa botlhokwa ke gore o bale ka tsela e e tla go thusang gore o kgone go akanyetsa kwa teng ka se o se badileng.​—Pes. 119:97; Bona le lebokoso le le reng “ Dipotso Tse O ka Di Ipotsang.”

10. O ka dirisa jang se o se ithutileng? Naya sekai. (1 Bathesalonika 5:17, 18)

¹⁰ Fa o bala Baebele, akanya gore o ka dirisa jang se o se badileng. Ipotse go re: “Nka dirisa jang se ke se ithutileng, gone jaanong le mo nakong e e tlang?” Ka sekai, a re re o bala 1 Bathesalonika 5:17, 18. (E bale.) Fa o sena go bala ditemana tseno, ema go sekae mme o ipotse gore o rapela gakae le gore a o akanyetsa kwa teng pele o rapela. Gape o ka akanya ka dilo tse dintle tse Jehofa a go diretse tsone. Gongwe fa o rapela, o ka lebogela tse tharo. Tota le fa o dirisa metsotso e le mmalwa go akanya ka se o se badileng, o ka kgona go tlhaloganya Baebele le go dira se e reng o se dire. Fa o dirisa mokgwa ono letsatsi le letsatsi fa o ithuta Baebele, fa nako e ntse e tsamaya o tla gatela pele. Mme gone, o ka dira eng fa o lemoga gore go na le dilo tse dintsi tse o tlhokang go di tokafatsa?

IPEELE MEKGELE E O KA KGONANG GO E FITLHELELA

11. Goreng o ka ikutlwa e kete diphetogo tse o tshwanetseng go di dira di dintsi thata? Naya sekai.

¹¹ Ka dinako dingwe fa o bala Baebele, o ka kgobega marapo ka gonne o lemoga gore go na le dilo di le dintsi tse o tlhokang go di tokafatsa. Ka sekai, a re re gompieno o bala ditemana tse di go gakololang gore o se ka wa tseela batho kwa tlase. (Jak. 2:1-8) O lemoga gore o tshwanetse go tokafatsa tsela e o dirisanang le batho ka yone, ka jalo o ipolelela gore o tlile go dira diphetogo. Seo ke selo se sentle! Mo letsatsing le le latelang, o bala ditemana tse di go bontshang gore go botlhokwa go nna kelotlhoko ka se o se buang. (Jak. 3:1-12) O lemoga gore ka dinako dingwe o bua dilo tse di kgobang marapo. Ka jalo, o ikemisetsa go kgothatsa ba o buang le bone. Mo letsatsing la boraro, o  bala ditemana tse di buang ka kotsi ya go itsalanya le batho ba ba sa rateng Jehofa. (Jak. 4:4-12) O lemoga gore o tshwanetse go nna kelotlhoko ka se o se balang, se o se lebelelang le se o se reetsang. Mo letsatsing la bonê, o ka ikutlwa e kete diphetogo tse o tshwanetseng go di dira, di dintsi thata.

12. Goreng o sa tshwanela go kgobega marapo fa o lemoga gore go na le dilo tse o tshwanetseng go di tokafatsa? (Bona le ntlha e e kwa tlase.)

¹² O se ka wa kgobega marapo fa o lemoga gore go na le dilo tse o tshwanetseng go di tokafatsa. Tota e bile, fa o lemoga gore go na le dilo tse o tshwanetseng go di tokafatsa, seno se bontsha gore o boikokobetso le gore o batla go dira dilo tse di siameng. Fa motho yo o boikokobetso a bala Baebele, o tshwanetse go batla dilo tse a ka di tokafatsang. a Nna o gopotse gore re tshwanetse go nna re apara “botho jo bosha.” (Bakol. 3:10) Mme gone, ke eng se se ka go thusang gore o dirise se o se ithutang?

13. O ka dirisa jang se o se ithutang? (Bona le setshwantsho.)

¹³ Go na le go dira dilo tsotlhe tse o di ithutang ka nako e le nngwe, o ka ipeela mekgele. (Diane 11:2) Leka seno: Kwala dilo tsotlhe tse o batlang go di tokafatsa. Go tswa foo, tlhopha selo se le sengwe kgotsa di le pedi tse o ka simololang ka tsone, o bo o dira tse dingwe moragonyana. O ka dira seno jang?

14. O ka simolola ka mekgele efe?

¹⁴ Simolola ka mokgele o go leng motlhofo go o fitlhelela. Kgotsa o ka nna wa tlhopha sengwe se o tlhokang go se tokafatsa ka bonako. Fa o sena go dira tshwetso ya gore ke eng se o batlang go se tokafatsa, dira dipatlisiso  mo dikgatisong tsa rona tse di jaaka Watch Tower Publications Index kgotsa Kaedi ya go Dira Dipatlisiso ya Basupi ba ga Jehofa. Kopa Jehofa gore a go neye ‘keletso le maatla a gore o dire jalo.’ (Bafil. 2:13) Go tswa foo, leka go dirisa se o se ithutileng. Fa o lemoga gore o kgonne go dira phetogo nngwe kgotsa o kgonne go tokafatsa dinonofo tse Jehofa a batlang gore re nne le tsone, seo se tla go kgothaletsa gore o dire diphetogo tse dingwe. Gongwe e bile go tla nna motlhofo gore o di dire.

LETLA BAEBELE GORE E GO ‘THUSE’

15. Batho ba ga Jehofa ba farologana jang le batho ba le bantsi ba ba reng ba bala Baebele? (1 Bathesalonika 2:13)

¹⁵ Batho bangwe ba re ba badile Baebele ka makgetlo a le mantsi. A mme ba dumela se e se rutang? A ba ile ba leka go dirisa se Baebele e se rutang mo matshelong a bone? Nnyaa, batho ba le bantsi ga ba dirise kgakololo e e mo Baebeleng. Basupi ba ga Jehofa bone ga ba a nna jalo. Fela jaaka Bakeresete ba bogologolo, re amogela Baebele ‘jaaka e ntse, e le lefoko la Modimo.’ Mo godimo ga moo, re leka ka natla go dirisa kgakololo e e mo go yone.​—Bala 1 Bathesalonika 2:13.

16. Ke eng se se ka re thusang go dirisa se re se ithutileng?

¹⁶ Ka dinako tse dingwe, ga go motlhofo go bala Lefoko la Modimo le go dirisa se re se ithutileng. Re ka tswa re sa bone nako ya go bala kgotsa re bala ka lobelo mo re sa kgoneng go akanya ka se re se badileng. Kgotsa re ka tswa re kgobiwa marapo ke go lemoga gore go na le diphetogo tse dintsi tse re tshwanetseng go di dira. Jehofa a ka go thusa go fenya kgwetlho epe fela e o ka lebanang le yone. Ka jalo, a re ikemisetseng go amogela thuso e a re nayang yone, mme re se ka ra nna batho ba ba utlwang ba bo ba lebala, go na le moo re diragatse se re se utlwileng. Ga go pelaelo gore fa re ntse re bala Lefoko la Modimo le go dirisa se re se ithutileng, re tla itumela le go feta.​—Jak. 1:25.