1-2. Tsela e Jehofa a re bopileng ka yone e re tswela mosola jang?

 FA Jehofa a ne a bopa batho, o ne a dira gore ba itumele fa ba abela ba bangwe go feta fa e le bone ba abelwang. (Dit. 20:35) A mme seno se raya gore ga re itumele fa re newa mpho? Nnyaa, rotlhe re a itumela fa re newa mpho. Mme gone, re itumela le go feta fa e le rona re abelang ba bangwe. Tsela eno e Jehofa a re bopileng ka yone e re tswela mosola. Goreng re rialo?

² E re ka Jehofa a re bopile ka tsela eno, re ka kgona go itumela le go feta. Re ka dira jalo ka go batla ditsela tsa go abela ba bangwe. Ruri re bopilwe ka tsela e e kgatlhang!​—Pes. 139:14.

3. Goreng Baebele e re Jehofa ke “Modimo yo o itumetseng”?

³ Baebele e a re fa re abela ba bangwe re tla itumela. Seno ga se gakgamatse ka gonne e tlhalosa gore Jehofa ke “Modimo yo o itumetseng.” (1 Tim. 1:11) Ke ene wa ntlha go abela ba bangwe e bile ga go na ope yo o abang go mo gaisa. E re ka Jehofa a re neile “botshelo, re a tshikhinyega e bile re gone.” (Dit. 17:28) Ga go pelaelo gore “mpho nngwe le nngwe e e molemo le neo nngwe le nngwe e e itekanetseng” e tswa kwa go Jehofa.​—Jak. 1:17.

4. Ke eng se se tla re thusang gore re itumele le go feta?

⁴ Ga go pelaelo gore rotlhe re batla go abela ba bangwe gore re itumele. Re ka dira jalo ka go etsa sekao sa ga Jehofa sa go aba ka bopelotshweu. (Baef. 5:1) Mo setlhogong seno, re tlile go bona tsela e Jehofa a abelang ba bangwe ka yone le gore re ka dira eng fa go lebega e kete batho ba bangwe ga ba lebogele  dilo tse re ba direlang tsone. Go ithuta ka dilo tseno, go tla re thusa gore re tswelele re abela ba bangwe mme re itumele.

ETSA JEHOFA KA GO ABELA BA BANGWE

5. Ke dilo dife tse re di tlhokang tse Jehofa a re nayang tsone?

⁵ Jehofa o bontsha jang gore o pelotshweu? A re tlotleng ka dikai di le mmalwa. O re naya dilo tse re di tlhokang. Gone Jehofa ga a re neye sengwe le sengwe se re se batlang, mme o re naya dilo tse re di tlhokang. Ka sekai, o netefatsa gore re nna le dijo, diaparo le kwa re ka latsang tlhogo gone. (Pes. 4:8; Math. 6:31-33; 1 Tim. 6:6-8) Jehofa ga a re neye dilo tseno fela ka gonne a patelesega go dira jalo. Goreng re rialo?

6. Re ithuta eng mo go Mathaio 6:25 le 26?

⁶ Jehofa o re naya dilo tse re di tlhokang ka gonne a re rata. Ela tlhoko se Jesu a ileng a se bua mo go Mathaio 6:25, 26. (E bale.) Mo ditemaneng tseno, Jesu o dira sekai ka dilo tse Jehofa a di bopileng. O ile a bua jaana ka dinonyane: “Ga di jale, ga di robe e bile ga di phuthele mo mabolokelong.” Le fa go ntse jalo, ela tlhoko se a ileng a se bua morago ga moo. O ile a re: “Rraalona yo o kwa legodimong o a di fepa.” Go tswa foo, o ile a botsa go re: “A ga lo botlhokwa go di feta?” Re ithuta eng mo go se Jesu a ileng a se bua? Batlhanka botlhe ba ga Jehofa ba botlhokwa mo go ene go feta diphologolo. Ka jalo, fa e le gore Jehofa o tlhokomela diphologolo, seno se raya gore le rona a ka kgona go re tlhokomela! Fela jaaka rre a tlhokomela lelapa la gagwe, Jehofa le ene o a re tlhokomela ka gonne a re rata.​—Pes. 145:16; Math. 6:32.

7. Re ka abela ba bangwe jang jaaka Jehofa? (Bona le setshwantsho.)

⁷ Fela jaaka Jehofa, le rona re ka naya batho dilo tse ba di tlhokang ka gonne re ba rata. Ka sekai, a o itse mokaulengwe kgotsa kgaitsadi mongwe yo o tlhokang dijo kgotsa diaparo? Jehofa a ka go dirisa go mo thusa. Batho ba ga Jehofa ba bonako tota go thusa ba bangwe fa ba tlhagetswe ke masetlapelo. Ka sekai, ka nako ya bolwetse jwa COVID-19, bakaulengwe le bokgaitsadi ba ne ba abela ba bangwe dijo, diaparo le dilo tse dingwe tse ba neng ba di tlhoka. Ba bangwe ba ne ba ntsha meneelo go tshegetsa tiro e e dirwang mo lefatsheng lotlhe. Meneelo eo, e ile ya thusa bakaulengwe le bokgaitsadi ba ba neng ba amilwe ke masetlapelo mo lefatsheng lotlhe. Bakaulengwe le bokgaitsadi bao ba ba pelotshweu ba  ne ba dira se se tlhalosiwang mo go Bahebera 13:16. E a re: “Lo se ka lwa lebala go dira se se molemo le go abela ba bangwe dilo tse lo nang le tsone, ka gonne go dira jalo go tshwana le go ntsha ditlhabelo mme seo se itumedisa Modimo.”

8. Jehofa o re thusa jang? (Bafilipi 2:13)

⁸ Jehofa o re naya maatla. Jehofa o na le maatla a a seng kana ka sepe e bile o itumelela go a naya batlhanka ba gagwe ba ba ikanyegang. (Bala Bafilipi 2:13.) A o kile wa kopa Jehofa gore a go neye maatla gore o se ka wa raelesega kgotsa gore a go thuse go itshokela teko nngwe e e boima? Gape o ka tswa o ile wa kopa Jehofa gore a go neye maatla gore o kgone go dira tiro nngwe e o neng o tshwanetse go e dira mo letsatsing leo. Fa e le gore dithapelo tsa gago di ile tsa arabiwa, o ka dumalana le se moaposetoloi Paulo a ileng a se bua. O ne a re: “Ke kgona go dira dilo tsotlhe ka ntlha ya yo o nnayang maatla.”​—Bafil. 4:13.

9. Re ka etsa Jehofa jang ka go dirisa maatla a rona? (Bona le setshwantsho.)

⁹ Ke boammaaruri gore ga re na maatla a a sa feleng jaaka Jehofa, e bile ga re kgone go naya batho ba bangwe maatla. Mme gone, re ka etsa Jehofa ka go dirisa maatla a rona go thusa ba bangwe. Ka sekai, re ka thusa bakaulengwe le bokgaitsadi ba ba godileng le ba ba lwalang ka go ba phepafaletsa matlo a bone le go ba ela dishopong. Fa maemo a rona a re letla, re ka ithaopa fa go phepafadiwa Holo ya Bogosi le fa e baakanngwa. Go dira jalo go tla tswela ba bangwe mosola.

10. Re ka kgothatsa ba bangwe jang ka se re se buang?

¹⁰ Sengwe gape se re sa tshwanelang go se lebala ke gore se re se buang se ka thusa ba bangwe. Ka sekai, o ka kgothatsa mongwe ka go mo akgolela sengwe se a se dirileng kgotsa wa mo gomotsa. Mo tlhomamisetse gore o a mo kgathalela. Gongwe o ka mo etela, wa mo founela kgotsa wa mo kwalela karata, e-mail kgotsa molaetsa. O se ka wa tshwenyega thata ka gore o tla mo raya o reng. Gakologelwa gore le fa o ka tswa o buile mafoko a se kae fela, a ka thusa mokaulengwe kgotsa kgaitsadi gore a tswelele a ikanyega mo go Jehofa le gore a nne le tsholofelo.​—Diane 12:25; Baef. 4:29.

11. Jehofa o re naya botlhale jang?

¹¹ Jehofa o re naya botlhale. Jakobe o ne a kwala jaana: “Fa mongwe wa lona a tlhoka botlhale, a a nne a bo kope mo Modimong . . . ka gonne Modimo o bo naya botlhe ba ba bo kopang mme o dira jalo ka bopelotshweu e bile a sa ba tshwaye phoso.” (Jak. 1:5; ntlh.) Mafoko ano a re bontsha gore Jehofa ga a re fitlhele botlhale jwa gagwe, go na le moo o re naya jone. Gape ela tlhoko gore Jakobe o ne  a re fa Jehofa a re naya botlhale, o dira jalo ‘a sa re kgobe’ kgotsa ‘a sa re tshwaye phoso.’ Ga a dire gore re ikutlwe molato fa re mo kopa gore a re thuse. Tota e bile, o batla gore re dire jalo.​—Diane 2:1-6.

12. Re ka abela ba bangwe botlhale jang jaaka Jehofa?

¹² Mme go tweng ka rona? A re ka kgona go etsa Jehofa ka go abela ba bangwe botlhale jo re nang le jone? (Pes. 32:8) Batlhanka ba ga Jehofa ba na le ditshono tse dintsi tsa go abela ba bangwe dilo tse ba di ithutileng. Ka sekai, re ka katisa baboledi ba basha mo bodireding. Bagolwane ba ka thusa batlhanka ba bodiredi kgotsa bakaulengwe ba ba sa tswang go kolobediwa gore ba ka dira dikabelo tsa bone jang mo phuthegong. Bakaulengwe le bokgaitsadi ba ba nang le bokgoni jwa go aga le go baakanya dikago, ba ka katisa ba bangwe gore ba kgone go thusa mo dikagong tse di dirisiwang mo kobamelong ya ga Jehofa.

13. Re ka etsa Jehofa jang fa re katisa ba bangwe?

¹³ Dira sotlhe se o ka se kgonang go etsa Jehofa fa o katisa ba bangwe. O se ka wa lebala gore Jehofa o abela ba bangwe botlhale ka bopelotshweu. Ka tsela e e tshwanang, le rona re pelotshweu fa re katisa ba bangwe. Ga re a tshwanela go akanya gore batho bao ba tlile go re tseela dikabelo tse re nang le tsone, re bo re tshaba go ba katisa. Gape ga re a tshwanela go ipolelela gore batho ba bangwe ba tshwanetse go iphataphatela, ka gonne le rona ga re a katisiwa ke ope. Go na le moo, re batla go ruta ba bangwe se re se itseng e bile re batla ‘go ntsha botshelo jwa rona gore re ba thuse.’ (1 Bathes. 2:8) Re dira jalo re na le tsholofelo ya gore ‘le bone ba tla tshwanelega ka botlalo go ruta ba bangwe.’ (2 Tim. 2:1, 2) Fa re abela ba bangwe botlhale jo re nang le jone, rotlhe re tla itumela e bile re tla nna botlhale le go feta.

FA GO LEBEGA E KETE GA BA LEBOGE

14. Bangwe ba dira eng go bontsha gore ba lebogela se re ba diretseng sone?

¹⁴ Fa re thusa ba bangwe, segolobogolo bakaulengwe le bokgaitsadi, ba a re leboga. Ba ka nna ba re kwalela molaetsa kgotsa ba dira sengwe go bontsha gore ba lebogela se re ba diretseng sone. (Bakol. 3:15) Re itumelela go bo re ile ra dira sengwe go ba thusa.

15. Ke eng se re tshwanetseng go nna re se gopotse fa ba bangwe ba sa lebogele se re ba diretseng sone?

¹⁵ Ka dinako dingwe, batho ga ba leboge fa re ba diretse sengwe. Gongwe o ka tswa o ile wa dirisa nako ya gago, maatla kgotsa dilo tse o nang le tsone go thusa mongwe mme go bo go lebega e kete ga a na sepe le se o mo diretseng sone. Fa seo se direga, ke eng se o ka se dirang gore o se ka wa kgobega marapo? Nna o gopotse mafoko a a mo go Ditiro 20:35. Boitumelo jwa rona ga bo a ikaega ka gore a batho ba a re leboga kgotsa ga ba re leboge. Ke rona re itlhophelang gore a re tla tswelela re itumelela go abela ba bangwe le fa gone ba sa re leboge. Re ka dira seo jang? A re boneng.

16. Ke eng se se ka re thusang go abela ba bangwe?

¹⁶ Nna o gopotse gore fa o abela ba bangwe o etsa Jehofa. O abela batho botlhe, tota le ba ba sa mo lebogeng. (Math. 5:43-48) Jehofa o re solofetsa gore fa le rona re abela ba bangwe mme re “sa solofele go boelwa ke sepe,” ‘tuelo ya rona e tla nna kgolo.’ (Luke 6:35) Mo temaneng eno, go sa boelwe ke “sepe” go ka akaretsa go lebogiwa ke batho ba bangwe. Le fa batho ba ka tswa ba re leboga kgotsa ba sa re leboge, Jehofa o tla re segofatsa fa re tswelela re ba ‘abela re itumetse.’​—Diane 19:17; 2 Bakor. 9:7.

17. Fa re aba, re tshwanetse go dira eng? (Luke 14:12-14)

¹⁷ Fa re aba, re ka etsa Jehofa ka go dira se Jesu a ileng a se bua mo go Luke 14:12- 14. (E bale.) Gone ga go phoso go laletsa mongwe gore a tle go ja dijo le rona kgotsa go mo direla sengwe se re itseng gore le ene a ka re direla sone. Mme go tweng fa re lemoga gore re ntse re abela ba bangwe ka gonne re solofetse gore le bone ba dire se se tshwanang? Fa e le gore go ntse jalo, re tshwanetse go dira se Jesu a reng re se dire. Gongwe re ka laletsa mongwe yo re itseng gore ga a ka ke a kgona go re direla sepe. Re tla itumela fa re dira jalo ka gonne re etsa Jehofa. Fa re sa solofele go newa sengwe fa re sena go thusa mongwe kgotsa go mo direla sengwe, re tla itumelela go abela ba bangwe, tota le fa ba sa re lebogele dilo tse re ba diretseng tsone.

18. Ke eng se re sa tshwanelang go se dira, mme ka ntlha ya eng?

¹⁸ Ga re a tshwanela go akanya gore ba bangwe ga ba leboge. (1 Bakor. 13:7) Fa re diretse mongwe sengwe a bo a sa re leboge, re ka ipotsa go re: “A mme tota ga a lebogele se ke mo diretseng sone, kgotsa gongwe o lebetse go leboga?” Go ka tswa go na le mabaka mangwe a a dirileng gore a se ka a re leboga. Gongwe o lebogela se re mo diretseng sone mme go ka tswa go le thata gore a re bolelele. Kgotsa gongwe o tlhabiwa ke ditlhong ka gonne mo nakong e e fetileng ke ene a neng a thusa batho ba bangwe mme jaanong ga a kgone. Fa re rata bakaulengwe le bokgaitsadi, ga re kitla re akanya dilo tse di sa siamang ka bone. Go na le moo, re tla tswelela re ba abela re itumetse.​—Baef. 4:2.

19-20. Ke eng gape se se ka re thusang gore re abele ba bangwe re itumetse? (Bona le setshwantsho.)

¹⁹ Nna pelotelele. Kgosi Solomone o ne a kwala jaana: “Latlhela senkgwe sa gago mo metsing, ka gonne o tla se bona gape morago ga malatsi a le mantsi.” (Mor. 11:1) Mafoko ano a re ruta gore fa re diretse mongwe sengwe, gongwe a ka re leboga “morago ga malatsi a le mantsi.” Ela tlhoko se se ileng sa diragalela kgaitsadi mongwe.

²⁰ Dingwaga di le dintsi tse di fetileng, mosadi wa molebedi wa potologo o ne a kwalela kgaitsadi mongwe yo o neng a sa tswa go kolobediwa  molaetsa mo karateng. O ile a mo kgothaletsa gore a tswelele a ikanyega mo go Jehofa. Dingwaga di le robedi morago ga moo, kgaitsadi yoo o ne a mo kwalela lekwalo. O ne a re: “Molaetsa wa gago o nthusitse thata mo dingwageng tse di fetileng. Mme ke ratile thata temana e o nkwaletseng yone, e ile ya nkama pelo e bile ga nkitla ke tsamaya ke e lebala.” a Fa kgaitsadi yoo a sena go tlhalosa dikgwetlho tse a ileng a lebana le tsone, o ne a tswelela ka go re: “Ka dinako dingwe, ke ne ke ikutlwa e kete nka ineela le go tlogela go direla Jehofa, mme mo dingwageng di le robedi tse di fetileng, molaetsa wa gago le temana e o nkwaletseng yone di ile tsa nthusa gore ke tswelele ke ikanyega.” Akanya fela gore mosadi wa molebedi wa potologo o ile a ikutlwa jang fa a amogela lekwalo le kgaitsading yoo a mo kwaletseng lone morago ga nako e telele! Le rona seno se ka re diragalela, bakaulengwe le bokgaitsadi ba re ba thusitseng ba ka re leboga “morago ga malatsi a le mantsi.”

21. Goreng re ikemiseditse go etsa Jehofa ka go abela ba bangwe ka bopelotshweu?

²¹ Jaaka re bone, Jehofa o re bopile ka tsela e e kgatlhang. Le fa re itumela fa batho ba bangwe ba re abela, re itumela thata fa e le rona re ba abelang. Re a itumela fa re kgona go thusa badumedimmogo le rona e bile ba lebogela se re ba diretseng sone. Mme le fa ba ka tswa ba leboga kgotsa ba sa leboge, re itumelela gore re dirile se se siameng. Nna o gopotse gore fa o abela ba bangwe, “Jehofa o na le bokgoni jwa go go naya mo gontsi thata go feta seo.” (2 Ditir. 25:9) Ga go na ope yo o kgonang go abela batho ba bangwe jaaka Jehofa! Re a itse gore ga go na masego ape a a lekanang le a Jehofa a tlileng go re naya one. Ka jalo, a re direng sotlhe se re ka se kgonang go tswelela re etsa Rraarona yo o kwa legodimong e bong Jehofa yo o abang ka bopelotshweu.