“Lo se ka le ka motlha lwa tlhobaela kaga letsatsi le le latelang, gonne letsatsi le le latelang le tla nna le ditlhobaelo tsa lone.”—MATHAIO 6:34.

Seno se raya gore: Go tlwaelegile gore motho a tlhobaele. Mme gone, ga o a tshwanela go tlhobaela ka dilo tse di iseng di direge.

• Seterese se ka dira gore o tlhobaele. Sa ntlha, gopola gore ga go motlhofo gore o nne fela o sa tshwenyege. Go tlhobaela ka dilo tse o sa kgoneng go di fetola go ka dira gore o tshwenyege thata. Sa bobedi, gopola gore dilo ga di ke di direga ka tsela e re akanyang ka yone.

“Botlhale jo bo tswang kwa godimo . . . bo tekatekano.”—JAKOBE 3:17.

Seno se raya gore: O se ka wa lebelela gore o ka se dire diphoso le gore ba bangwe ga ba kitla ba go direla diphoso.

• Ipeele mekgele e o kgonang go e fitlhelela mme gopola gore ga go na ope yo o kgonang go dira dilo tsotlhe. Fa o dira jalo, ga o na go tshwenyega thata mme o tla thusa ba bangwe gore le bone ba se ka ba tshwenyega thata mme lotlhe lo tla kgona go fitlhelela mekgele ya lona. Fa o na le mathata, go na le gore o tshwenyege, bogolo o ka nna wa tshega ka one ka gonne seno se tla go thusa gore o se ka wa ikutlwa o imetswe thata e bile o tla itumelela letsatsi la gago.

“Motho yo o nang le temogo o na le moya o o ritibetseng.”—DIANE 17:27.

Seno se raya gore: Fa o akanya thata ka dilo tse di sa itumediseng, ga o kitla o kgona go akanya sentle, ka jalo, leka go ritibala.

• Batla gore ke eng se se dirang gore o nne le seterese mme o ele tlhoko gore o itshwara jang fa seo se direga. Ka sekai, fa o na le seterese, kwala gore o akanya eng, o ikutlwa jang le gore ke eng se o se dirang. Fa o kgona go lemoga gore ke eng se o se dirang fa o na le seterese, o ka kgona go laola tsela e o ikutlwang ka yone. Gape, akanya gore o ka dira eng gore o fokotse dilo tse di dirang gore o nne le seterese. Fa e le gore ga o kgone go fokotsa dilo tseo, batla ditsela tsa go dira gore di se ka tsa dira gore o tshwenyege thata. Ka sekai, rulaganya dilo tsa gago sentle o bo o rulaganya gore o tla di dira ka nako efe.

• Leka go fetola tsela e o lebang dilo ka yone. Gongwe motho yo mongwe o na le mathata a a tshwanang le a o nang le one mme ga a mo tshwenye go le kalo. Go ya ka gore o leba dilo jang. Ela tlhoko dikakantsho tse tharo tse o ka di dirisang:

  1. O se ka wa itlhaganelela go akanya gore batho ba dira dilo ka gonne ba na le mekgwa e e sa siamang. Motho a ka go tsenelela mo laeneng, fa o ka akanya gore motho yoo o go direla makgakga, seo se ka dira gore o utlwe botlhoko. Go na le gore o akanye jalo, goreng o sa akanye gore go na le lebaka le le utlwalang la go bo motho yoo a dira selo seo?

  2. Fetola tsela e o lebang dilo ka yone. Fa o letetse ngaka, go ka nna motlhofo gore o lete o le pelotelele fa o dirisa nako eo go bala kgotsa go dira sengwe sa botlhokwa.

  3. O se ka wa ikopisa tlhogo ka dilo tse di diragalang gompieno. Ipotse jaana, ‘A kgang eno e tla bo e sa ntse e ntshwenya go le kalo kamoso kgotsa mo dibekeng tse di tlang?’ Leka go bona gore a mathata a o nang le one ke a a sa reng sepe kgotsa ke a masisi.

“A dilo tsotlhe di diragale ka mokgwa o montle le ka thulaganyo.”—1 BAKORINTHA 14:40.

Seno se raya gore: Ka metlha o leke go dira dilo ka thulaganyo.

• Rotlhe re batla gore go nne le thulaganyo mo botshelong jwa rona. Selo sengwe se se ka dirang gore botshelo jwa rona bo tlhakatlhakane e bile re nne le seterese kgotsa re tshwenyege thata ke go beela dilo nako e e tlang. Mme seno se ka dira gore go nne le ditiro dingwe tse di salelang kwa morago. Goreng o sa dirise dikakantsho tse pedi tse di tlhagelelang fano?

  1. Itirele thulaganyo ya gore o tla dira dilo jang le gore leng mme o e latele.

  2. Batla gore ke eng se se dirang gore o feleletse o beela dilo nako e e tlang.

“Boikhutso jo bo tletseng seatla bo botoka go na le tiro ya bonatla e e tletseng seatla gabedi le go kgaratlhela phefo.”—MORERI 4:6.

Seno se raya gore: Batho ba ba nnang fela ba bereka ba sa ikhutse ga ba kgone go itumelela se ba se bereketseng. Ga ba nne le nako le maatla a go itumelela tiro ya diatla tsa bone.

• Nna tekatekano mo tseleng e o lebang tiro le madi ka yone. Fa o na le madi a mantsi ga go reye gore o tla itumela kgotsa ga o kitla o nna le seterese. Tota e bile, Baebele mo go Moreri 5:12 ya re: “Letlotlo la yo o humileng ga le mo letle go robala.” Ka jalo, tila go itsenya mo dikolotong.

• Iphe nako ya go ikhutsa. O ka fokotsa seterese ka go dira dilo tse o di ratang. Mme gone, fa o re o a ikhutsa o bo o lebelela TV o ka nna wa se ka wa lapologelwa.

• Dirisa dilo tsa thekenoloji sentle. Tila go nna o bala melaetsa kgotsa o tsena mo Internet. Tila go bala melaetsa ya tiro, ka nako e e seng ya tiro kwantle fela ga fa maemo a go pateletsa go dira jalo.

“Go thapisa mmele go tswela mosola.”—1 TIMOTHEO 4:8.

Seno se raya gore: Go ikatisa ka metlha go ka dira gore o nne le botsogo jo bo botoka.

• Dira dilo tse di ka go thusang gore o nne le botsogo jo bo botoka. Go ikatisa go ka dira gore o ikutlwe botoka e bile ga thusa mmele wa gago gore o kgone go lwantsha seterese. Ja dijo tse di nang le dikotla, o se ka wa tlodisa go ja dijo tsa mo mosong, tsa motshegare le tsa maitseboa. Robala mo go lekaneng.

• Tila go dira dilo tse batho ba bangwe ba di dirang fa ba re ba fokotsa seterese, jaaka, go goga motsoko, go dirisa diritibatsi le go nwa bojalwa ka tsela e e feteletseng. Kwa bofelong, dilo tseno di ka dira gore o lwale le go felelwa ke madi a o a bereketseng ka thata mme seno sa dira gore o nne le seterese le go feta.

• Fa o bona e kete o tshw enyega thata ya kwa ngakeng. Fa o batla thuso ya dingaka, ga go reye gore o paletswe.

“Lo tlhomamise dilo tse di botlhokwa thata.”—BAFILIPI 1:10.

Seno se raya gore: Akanya gore ke eng se se botlhokwa mo botshelong jwa gago.

• Kwala dilo tse o tlhokang go di dira ka go latelana mme o kwale tsa botlhokwa pele. Seno se tla go thusa gore o itse gore ke ditiro dife tse o tlhokang go di dira pele, tse o ka nnang wa di dira mo nako e e tlang, tse o ka abelang ba ba bangwe go go thusa ka tsone kgotsa tse o sa tlhokeng go di dira gotlhelele.

• Mo bekeng e le nngwe kwala gore o dirisitse jang nako ya gago. Go tswa foo, batla ditsela tsa gore o ka tokafatsa jang tsela e o dirisang nako ya gago ka yone. Fa e le wena o laolang nako ya gago le tsela e o dirang dilo ka yone, o tla ikutlwa o imologile e bile o o sena seterese.

• Iphe nako ya go ikhutsa. Go ikhutsa go se kae go ka dira gore o ikutlwe o lapologetswe e bile go ka go thusa gore o se ka wa tshwenyega thata.

“Go tshwenyega ka tlhobaelo mo pelong ya motho ke gone go tla e obang, mme lefoko le le molemo le a e ipedisa.”—DIANE 12:25.

Seno se raya gore: Dilo tse di molemo tse ba bangwe ba go bolelelang tsone di ka dira gore o ikutlwe botoka.

• Bua le motho yo o ka go reetsang a sa go tshwaye diphoso. Motho yo o mo tshepang a ka go thusa go leba dilo ka tsela e e siameng le go go thusa go bona gore ke jang o ka rarabololang bothata jwa gago. Go kopa ba bangwe gore ba go thuse ka mathata a gago go ka go thusa gore o ikutlwa botoka.

• Kopa thuso. A o ka abela ba bangwe gore ba go thuse ka tiro ya gago?

• Fa motho yo o berekang le ene a dira gore o tshwenyege, batla ditsela tsa go baakanya bothata joo. Ka sekai, a o ka bolelela motho yoo gore o dira gore o ikutlwe jang, mme o dira jalo o le bonolo e bile o dirisa temogo? (Diane 17:27) Fa ele gore motho yoo ga a fetole tsela e a go tshwarang ka yone, gongwe o ka fokotsa nako e o e fetsang o na le ene.

“Go itumela ba ba tshwenyegang ka se ba se tlhokang semoyeng.”—MATHAIO 5:3.

Seno se raya gore: Batho ga ba tlhoke matlo, diaparo le dijo fela. Ba tlhoka go itse Modimo. Gore re itumele mo botshelong re tlhoka go nna le kamano e e molemo le Modimo.

• Go rapela go ka re thusa. Modimo a re o ‘latlhele tlhobaelo yotlhe ya gago mo go ene, ka gonne o a go kgathalela.’ (1 Petere 5:7) Go rapela le go tlhatlhanya go ka go thusa gore o nne le kagiso ya mogopolo.—Bafilipi 4:6, 7.

• Bala dilo tse di ka go thusang gore o nne tsala ya Modimo. Melaometheo e go tlotlilweng ka yone mo makasineng ono e tswa mo Baebeleng, mme Baebele e kwaletswe go re thusa gore re nne le kamano e e molemo le Modimo. Gape Baebele e re thusa gore re nne le “botlhale . . . le bokgoni jwa go akanya.” (Diane 3:21) Goreng o sa ipeele mokgele wa go bala Baebele? Gongwe go ka nna molemo gore o simolole ka go bala buka ya Baebele ya Diane.