Go fetofetoga ga maemo a bosa go kotsi mo dimeleng tsa mo lewatleng, mo ditlhaping tse di bidiwang di-shellfish le mo ditsheding tse dingwe tsa lewatle. Baitsesaense ba fopholetsa gore mo e ka nnang dimela tsotlhe tsa mo lewatleng, di tla bo di sa tlhole di le gone mo dingwageng tse 30 tse di tlang. Dimela tseno di tlamela bontsi jwa ditshedi tsa lewatle.

Babatlisisi ba fopholetsa gore diperesente di ka nna 90 tsa dinonyane tse di jang ditshedi tsa lewatle, di ka tswa di jele dipolasetiki, mme go akanngwa gore dipolasetiki tse di mo lewatleng di bolaya diphologolo tsa lewatle di le dimilione ngwaga le ngwaga.

 Ka 2022, Motsamaisimogolo wa UN e bong António Guterres o ne a re: “Ga re tlhokomele mawatle mme gone jaanong re lebane le se nka se bitsang ‘Maemo a Lewatle a a Tlhokang go Potlakelwa.’”

Mawatle le ditshedi tse di mo go one di bopilwe ka tsela ya gore di kgone go iphepafatsa fa di sa kgotlelwe ke batho. Buka ya setlhogo se se reng, Regeneration: Ending the Climate Crisis in One Generation e tlhalosa gore fa batho ba sa kgotlele mawatle, “a kgona go nna a iphepafatsa.” Ela tlhoko dikai tse di latelang:

• Dimela tse dinnye thata tse di bidiwang di-phytoplankton di monya khabonetaeokosaete di bo di e boloka. Go dumelwa gore gase eno e gotetsa moya o o mo loaping. Di-phytoplankton di le nosi fela, di kgona go boloka khabonetaeokosaete e e batlang e lekana le e e bolokiwang ke ditlhare, bojang le dimela tse dingwe tse di mo lefatsheng fa di kopantswe.

• Dibaketeria di ja matlalo le marapo a ditlhapi tse di suleng, e leng dilo tse di ka kgotlelang lewatle. Go tswa foo, dibaketeria tseno di jewa ke ditshedi tse dingwe tsa lewatle. Websaete ya Smithsonian Institution Ocean Portal e tlhalosa gore tirisanommogo eno e dira gore “lewatle le nne le le phepa.”

• Thulaganyo ya mmele ya go sila dijo ya ditlhapi di le dintsi, e fokotsa selekanyo sa asiti mo metsing, e leng asiti e bolayang dimela tsa mo lewatleng, di-shellfish le ditshedi tse dingwe tsa lewatle.

Fa batho ba sa latlhele matlakala mo lewatleng, le ka se tlhoke gore le phepafadiwe. Ka jalo, babatlisisi ba kgothaletsa batho go dirisa dikgetsana, dithulusu le dilwana tse dingwe tse di kgonang go dirisiwa makgetlo a le mantsi go na le go dirisa dipolasetiki gangwe fela ba bo ba di latlha.

Mme gone go tlhokega mo gontsi. Bosheng jaana, mo ngwageng o le mongwe fela, mokgatlho mongwe o o tlhokomelang tikologo o ne wa phutha matlakala a a lekanang le ditone di le 9 200, a a neng a latlhetswe mo lotshitshing lwa lewatle mo dinageng di le 112. Mme seo ke selekanyo se sennye thata sa leswe le le latlhelwang mo lewatleng ngwaga le ngwaga.

National Geographic e ne ya bega gore “asiti e e setseng e le [mo malwatleng] go tla go fitlha jaanong, go ka direga gore e se ka ya kgona go tlosiwa gotlhelele.” Batho ba fisa ditukisi tse di jaaka magala le oli di le dintsi thata mo e leng gore ditshedi tsa lewatle ga di tlhole di kgona go phepafatsa lewatle ka tsela e di neng di bopetswe gore di le phepafatse ka yone.

“Lefatshe le tletse dilo tse o di dirileng. Go na le lewatle, le legolo e bile le atlhame, le le tletseng ditshedi tse dintsintsi tse di se nang palo, tse dinnye le tse dikgolo.”​—Pesalema 104:24, 25.

Mmopi wa rona o dirile mawatle a na le bokgoni jwa go iphepafatsa. Akanya ka seno: E re ka Mmopi a dirile lewatle le ditshedi tsotlhe tse di mo go lone, go a utlwala go dumela gore o tla baakanya tshenyo e e bakilweng ke batho mo mawatleng. Bona setlhogo se se reng, “Modimo a re Lefatshe le Tla Nnela Ruri,” se se mo tsebe 15.