Moya o o kgotletsweng o ka bolaya ditshedi tse di mo lefatsheng. Go ya ka World Health Organization, ke batho ba le mmalwa fela ba ba hemang moya o o phepa.

Moya o o kgotletsweng o ka baka malwetse a go hema, kankere ya makgwafo le malwetse a pelo. Gape o dira gore batho ba ka nna 7 000 000 ba swe ka bonako ngwaga le ngwaga.

Lefatshe le bopilwe ka tsela e e dirang gore le kgone go tlamela ditshedi tsotlhe ka moya o o phepa. Mme gone, le ka kgona go dira jalo fa fela batho ba ka se ka ba kgotlela tikologo. Ela tlhoko dikai tse di latelang.

• Batho ba le bantsi ba a itse gore dikgwa di kgona go monya khabonetaeokosaete go tswa mo moyeng. Mme gone mafelo a a emang metsi thata a a fa lotshitshing lwa lewatle, a ditlhare tsa mangrove di golang mo go one, a kgona go dira seo botoka thata. Ditlhare tsa mangrove di kgona go monya khabonetaeokosaete go tswa mo moyeng makgetlo a le matlhano go feta kafa dikgwa di dirang ka gone.

• Dipatlisiso tsa bosheng di bontsha gore dimela tsa mo lewatleng tse di jaaka kelp di kgona go monya khabonetaeokosaete go tswa mo moyeng. Dikarolo tsa semela sa kelp tse di tshwanang le matlhare di na le dikgetsinyana tse di tletseng moya, tse di di thusang gore di kgone go tsamaya di kokobetse mo metsing sekgala se seleele. Fa matlhare ano a setse a le mo gare ga lewatle kgakala le lotshitshi, dikgetsinyana tsele di a thubega mme matlhare ano a a tletseng khabonetaeokosaete a bo a nwela kwa tlase kwa boalong jwa lewatle. Mme a tla bo a nna teng koo dingwaga di le dintsi.

• Bokgoni jwa loapi jwa go iphepafatsa fa lo sena go kgotlelwa, bo ne jwa lemotshega sentle ka lockdown ya bolwetse jwa COVID-19. Ka 2020, fa difeketiri le dikoloi tse dintsi di ne di sa tlhole di kgotlela loapi, boleng jwa moya o re o hemang bo ne jwa tokafala ka bonako. Go ya ka “2020 World Air Quality Report,” bontsi jwa dinaga tse go ileng ga dirwa dipatlisiso mo go tsone, di ile tsa bega gore di ne tsa nna le moya o o phepa ka bonakonyana fela fa lockdown e sena go simologa.

Dipuso di tsweletse ka go laela bagwebi gore ba fokotse go kgotlela loapi. Mo godimo ga moo, baitsesaense ba ntse ba dira ditsela tse disha tsa go baakanya ditlamorago tsa go kgotlelwa ga loapi. Ka sekai, thulaganyo e nngwe e dirisa megare go fetola dilo tse di kgotlelang moya gore di se ka tsa nna kotsi. Gape babatlisisi ba kgothaletsa batho gore ba tsamaye ka dinao kgotsa ba dirise dibaesekele go na le go dirisa dikoloi le gore ba batle ditsela tsa go dirisa motlakase o monnye mo magaeng a bone.

Mme gone go tlhokega mo gontsi jaaka re bona mo pegong ya ngwaga wa 2022 e e neng ya kwalwa ke ditheo tse di farologaneng tsa lefatshe lotlhe, tse di akaretsang World Health Organization le World Bank.

Pego eo e tlhalosa gore ka 2020, mo e ka nnang motho a le mongwe mo go ba le bararo mo lefatsheng lotlhe, o ne a dirisa dilo tse di kgotlelang loapi fa a apaya. Mo mafelong a le mantsi, ke batho ba le mmalwa fela ba ba ka kgonang go reka ditofo kgotsa go dirisa ditukisi tse dingwe.

“Seno ke se Modimo wa boammaaruri, Jehofa, a se buang, Mmopi wa magodimo le . . . Ene yo o dirileng lefatshe le sengwe le sengwe se se mo go lone, Ene yo o nayang batho ba ba mo go lone mohemo.”​—Isaia 42:5.

Modimo o dirile moya o re o hemang le medikologo ya tlholego e e phepafatsang moya oo, mme o na le maatla a a sa feleng e bile o rata batho. Ka jalo, go a utlwala go dumela gore o tla tlosa dilo tsotlhe tse di kgotletseng moya. Bona setlhogo se se reng, “Modimo a re Lefatshe le Tla Nnela Ruri.”