BOAMMAARURI

Go tlhobaela go akaretsa maikutlo a go sa nnisege, go sa ritibale kgotsa go tshwenyega. E re ka re tshela mo lefatsheng le le sa iketlang, go tlhobaela thata go ka diragalela mongwe le mongwe wa rona.

SE BAEBELE E SE BUANG

Kgosi Dafide o ne a kwala jaana: “Ke tla kgaratlha mo moyeng wa me ka lobaka lo lo kae, khutsafalo mo pelong ya me motshegare?” (Pesalema 13:2) Ke eng se se thusitseng Dafide go itshoka? O ne a bolelela Modimo sotlhe se se mo pelong ya gagwe, a solofetse ka botlalo mo loratong lo lo ikanyegang lwa Modimo. (Pesalema 13:5; 62:8) Tota e bile, Modimo o batla go re imolola. Petere wa ntlha 5:7 ya re: ‘Latlhelang tlhobaelo yotlhe ya lona mo go ene, ka gonne o a lo kgathalela.’

Le fa go ntse jalo, go na le dilo tse re ka di dirang go laola tsela e re tlhobaelang ka yone. Ka sekai, fa mokwadi mongwe wa Baebele yo o bidiwang Paulo a ne a “tlhobaela ka diphuthego tsotlhe,” o ne a gomotsa le go kgothatsa ba a neng a tshwenyegile ka bone. (2 Bakorintha 11:28) Ka jalo, go tlhobaela jalo go ne go siame ka gonne go ne go mo tlhotlheletsa go thusa batho mo go oketsegileng. Go ka nna jalo le ka rona. Go nna le boikutlo jo bo sa siamang ka ba bangwe—go ba ganetsa kgotsa go nna kgatlhanong le bone—go ka bontsha gore ga re ba rate.—Diane 17:17.

“Lo tlhokomela, e seng go kgatlhegela dilo tse di amang lona fela, mme gape go kgatlhegela le dilo tse di amang ba bangwe.”—Bafilipi 2:4.

BOAMMAARURI

Batho ba ka tshwenyega ka dilo tse di bosula tse ba kileng ba di dira, ka isagwe kgotsa ka madi. *

SE BAEBELE E SE BUANG

Go tshwenyega ka dilo tse di maswe tse o kileng wa di dira: Pele batho bangwe ba ba neng ba tshela ka lekgolo la ntlha la dingwaga e nna Bakeresete, e ne e le matagwa, ba ba tsayang ka dikgoka, ba na le boitsholo jo bo sa siamang jwa tlhakanelodikobo e bile e le magodu. (1 Bakorintha 6:9-11) Go na le go nnela go akanya ka dilo tse di fetileng, ba ne ba fetola ditsela tsa bone mme ba ikanya kutlwelobotlhoko ya Modimo, e a e bontshang ka lorato. Pesalema 130:4 ya re: “Gonne [wena Modimo] o na le boitshwarelo jwa boammaaruri, gore o tle o boifiwe.”

Go tlhobaela ka isagwe: Jesu Keresete o ne a re: “Lo se ka le ka motlha lwa tlhobaela kaga letsatsi le le latelang, gonne letsatsi le le latelang le tla nna le ditlhobaelo tsa lone.” (Mathaio 6:25, 34) O ne a raya jang? Lebana le ditlhobaelo tsa gompieno fela. O se ka wa dira gore go nne thata go lebana le ditlhobaelo tsa gompieno ka go akanya ka tsa letsatsi le le latelang, e leng se se ka dirang gore maemo a lebege a le maswe le go feta le go dira gore o dire ditshwetso ka lepotlapotla. Gape nna o gakologetswe gore moragonyana o ka lemoga gore ditlhobaelo tse dintsi di ne di se botlhokwa.

Go tlhobaela ka madi: Monna mongwe yo o botlhale o kile a rapela jaana: “O se ka wa nnaya lehuma le fa e le dikhumo.” (Diane 30:8) Go na le moo, o ne a batla go kgotsofala, e leng boikutlo jo Modimo a bo amogelang. Re bala jaana mo go Bahebera 13:5: “A mokgwa wa lona wa botshelo e se ka ya nna wa go rata madi, lo ntse lo kgotsofetse ka dilo tsa jaanong. Gonne [Modimo] o rile: ‘Ruri ga ke na ke go tlogela ka gope le fa e le go go latlha ka gope.’” Go farologana le madi a a felang, Modimo ene ga a kitla swabisa ba ba solofetseng mo go ene le ba ba tshelang botshelo jo bo motlhofo.

“Ga ke ise ke bone ope yo o siameng a tlogetswe gotlhelele, le fa e le bana ba gagwe ba batla senkgwe.”—Pesalema 37:25.

SE BATHO BA SE BUANG

Mmegadikgang mongwe e bong Harriet Green o ne a kwala jaana mo lokwalodikgannyeng lwa 2008 lwa The Guardian: “Re tsena mo motlheng o batho ba tlhobaelang thata ka one.” Mo lokwalodikgannyeng lwa 2014 lwa The Wall Street Journal, Patrick O’Connor o ne a re “Ba-Amerika ba tlhobaela go feta le fa e le leng pele.”

SE BAEBELE E SE BUANG

“Go tshwenyega ka tlhobaelo mo pelong ya motho ke gone go tla e obang, mme lefoko le le molemo le a e ipedisa.” (Diane 12:25) “Lefoko le le molemo” le ka bonwa mo dikgannyeng tse di molemo tsa Bogosi Jwa Modimo. (Mathaio 24:14) Mo nakong e e sa fediseng pelo, Bogosi joo, e leng puso ya Modimo, bo tla dira se re ka se kgoneng go se dira—go fedisa go tlhobaela ka go tlosa dilo tsotlhe tse di go bakang, go akaretsa bolwetse le loso! “[Modimo] o tla phimola dikeledi tsotlhe mo matlhong a [rona], mme loso lo tla bo lo seyo, le fa e le khutsafalo le fa e le selelo le fa e le botlhoko di tla bo di sa tlhole di le gone.”—Tshenolo 21:4.

“E kete Modimo yo o nayang tsholofelo a ka lo tlatsa ka boipelo jotlhe le kagiso ka go dumela ga lona.”—Baroma 15:13.