1 A Modimo ke Ene a Dirang Gore Batho ba Boge?

TSHAMEKA

Goreng go le Botlhokwa go Itse Karabo ya Potso Eno?

Batho ba le bantsi ga ba rate Modimo ka gonne ba akanya gore ke ene a dirang gore ba boge.

Se o Ka Akanyang ka Sone

Baeteledipele ba madumedi a le mantsi, ba ntse ba ruta batho gore Modimo ke ene a re bakelang mathata. Ka sekai, bangwe ba re:

Masetlapelo a tlholego ke kotlhao e e tswang kwa Modimong.
Bana ba swa ka gonne Modimo o batla ba ye go nna baengele kwa legodimong.
Mo ntweng, go na le batho ba Modimo a ba sireletsang.

A se baeteledipele ba madumedi ba se rutang ka Modimo ke maaka? Fa Modimo a sa rate se ba se rutang, a rona re ka ba dumela?

ITHUTE MO GO OKETSEGILENG

Leba bidio e e reng Ke eng fa o Tshwanetse go Ithuta Baebele? mo jw.org

Se Baebele e se Rutang

Modimo ga e se ene a dirang gore batho ba boge.

Fa e le gore Modimo ke ene a dirang gore re boge seno ga se dumalane le se Baebele e se rutang ka ene. Ka sekai:

“Ditsela tsotlhe tsa [Modimo] di tshiamiso. . . . O siame e bile o thokgame.”—DUTERONOME 32:4.

“A go nne kgakala le Modimo wa boammaaruri go dira ka boikepo, le Mothatayotlhe go dira ka tshiamololo!”—JOBE 34:10.

“Mothatayotlhe ka boene ga a sokamise katlholo.”—JOBE 34:12.

Modimo o tlhoile madumedi a a buang maaka ka ene.

Mme madumedi ano ke a reng Modimo ke ene a dirang gore batho ba boge, le madumedi a a ikopanyang le dintwa.

“Baporofeti ba porofeta maaka mo leineng la me [Modimo]. Ga ke a ba roma, le fa e le go ba laela kgotsa go bua le bone. Ba bua ba porofeta ponatshegelo ya maaka . . . le tsietso ya pelo ya bone mo go lona.”—JEREMIA 14:14.

Jesu o ne a tlhoile madumedi a maaka.

“Ga se mongwe le mongwe yo o nthayang a re, ‘Morena, Morena,’ yo o tla tsenang mo bogosing jwa magodimo, mme yo o dirang thato ya ga Rre yo o kwa magodimong o tla tsena. Ba le bantsi ba tla nthaya mo letsatsing leo ba re, ‘Morena, Morena, a re ne ra se ka ra porofeta ka leina la gago, ra ba ra leleka madimona ka leina la gago, ra ba ra dira ditiro di le dintsi tse di maatla ka leina la gago?’ Mme le fa go ntse jalo foo ke tla ba bolelela ke re: ‘Ga ke ise nke ke lo itse! Tlogang fa go nna, lona ba lo dirang ka go tlhoka molao!’” —MATHAIO 7:21-23.