Go itseela kwa godimo go ka dira gore re feleletse re tlhaola ba bangwe. Motho yo o itseelang kwa godimo o batla gore go utlwiwe fela ka ene. O ipona a le kwa godimo ga batho ba bangwe botlhe. Maikutlo ano a ka re tlela rotlhe. Encyclopædia Britannica ya re: “Batho ba ditso di le dintsi ba akanya gore dijo tsa bone, moaparo, mekgwa le tumelo ya bone ke yone fela e botlhokwa mme ya ditso tse dingwe ga e botlhokwa.” Ke eng se se ka re thusang gore re se ka ra akanya jalo?

“Ka mogopolo o o ikokobeditseng lo tsaya ba bangwe ba le kwa godimo ga lona.”—BAFILIPI 2:3.

Lekwalo leno le re ruta eng? Gore re se ka ra itseela kwa godimo re tshwanetse go leka go nna boikokobetso. Fa re le boikokobetso re tla kgona go lemoga gore go na le dilo tse batho ba bangwe ba nang le bokgoni mo go tsone go re feta. Ga se gore rotlhe mo lefatsheng re na le bokgoni le kitso e e tshwanang.

Ela tlhoko sekao seno sa ga Stefan. A re: “Fa o tsaya batho ba bangwe ba le botlhokwa go go feta, seo se tla go thusa gore o se ka wa ba tlhaola. E re ka ke sa itse dilo dingwe, ke tlhoka go ithuta mo bathong ba bangwe.”

Itse gore le wena o dira diphoso fela jaaka mongwe le mongwe. Gopola gore batho ba bangwe ba ka tswa ba itse dilo tse wena o sa di itseng. O se ka wa akanya gore setlhopha sengwe sa batho ga se a siama.

Go na le gore o akanye gore motho yo o tswang mo setlhopheng sengwe se se rileng ga a siama, ipotse gore:

• ‘A mekgwa e ke sa e rateng ka motho yono ga e a siama, kgotsa ke fela gore ga e tshwane le ya me?’

• ‘A motho yono ene o mpona ke le motho yo o siameng?’

• ‘Ke bokgoni bofe jo ke senang jone mme motho yono ene a na le jone?’

Fa o ka araba dipotso tseno ka boikanyegi, ga o kitla o tlhaola motho yoo mme o tla simolola go bona dilo tse dintle tse a di dirang.