Go Batla Jehofa ka Pelo e e Iketleeditseng

MOPERESITI wa Moiseraele e bong Esera e ne e le mmatlisisi, mokanoki, mokwalolodi le morutisi yo o tlhomologileng wa Molao. Ke sekao se se molemo sa motho yo o dirang ka pelo yotlhe le mo Bakereseteng gompieno. Jang? Ka gonne o ne a nna a ntse a boifa Modimo le fa tota a ne a tshela kwa Babelona, motse o o neng o tletse ka medimo ya maaka le kobamelo ya badimona.

Mme poifomodimo ya ga Esera ga ya ka ya itlela fela. O ne a e tlhagolela. Ebu, o re bolelela gore “o ne a etleeditse pelo ya gagwe go lopa kgakololo mo molaong wa ga Jehofa le go o dira.”—Esera 7:10, NW.

Jaaka Esera, batho ba ga Jehofa gompieno ba batla go dira dilo tsotlhe tse Jehofa a di kopang mo go bone fa ba sa ntse ba tshela mo lefatsheng le le sa batleng kobamelo ya boammaaruri. Ka gone a re sekasekeng ditsela tse ka tsone le rona re ka etleetsang dipelo tsa rona, motho yo o kafa teng—go akaretsa dikakanyo tsa rona, maikutlo, dikeletso le dilo tse di re tlhotlheletsang—go “lopa kgakololo mo molaong wa ga Jehofa le go o dira.”

Go Etleetsa Dipelo Tsa Rona

“Go etleetsa” go raya “go baakanyetsa sengwe se se rileng go sa le gale: go se baakanyetsa tiro e e rileng, boikaelelo jo bo rileng kana boemo jo bo rileng.” Gone mme, fa e le gore o na le kitso e e tlhomameng ka Lefoko la Modimo mme o ineetse mo go Jehofa, ruri pelo ya gago e itshupile e le e e iketleeditseng mme e ka tshwantshanngwa le ‘mmu o o molemomogolo’ o Jesu a neng a bua ka one mo setshwantshong sa gagwe sa mojadi.—Mathaio 13:18-23.

Le fa go ntse jalo, dipelo tsa rona di tlhoka go tlhokomelwa le go tlhabololwa ka metlha. Ka ntlha yang? Ka ntlha ya mabaka a le mabedi. Sa ntlha, ka go bo go motlhofo gore mekgwa e e utlwisang botlhoko, e e ntseng jaaka mofero mo tshimong, e simolole go itsetsepela, segolobogolo mo ‘malatsing ano a bofelo’ mo “moya” wa tsamaiso ya ga Satane o tletseng ka dipeo tse di utlwisang botlhoko tsa go akanya ka tsela ya nama. (2 Timotheo 3:1-5; Baefeso 2:2) Lebaka la bobedi le amana le mmu ka boone. Fa mmu o sa tlhokomelwe, go ise go ye kae o a omelela o bo o sa ungwe. Kana go ka nna le batho ba bantsi thata ba ba gatakang tshimo fela, ka go dira jalo ba gatakela mmu gore o nne letlapa le le thata. Mmu wa tshwantshetso wa dipelo tsa rona le one o ntse jalo. O ka nna wa se ungwe fa o tlhokomologiwa kana fa o gatakelwa ke batho ba ba sa amegeng ka bomoya jwa rona.

A bo go le botlhokwa jang he, gore rotlhe re dirise kgakololo eno ya Baebele: “Dibela pelo ya gago ka tlhoafalo yotlhe: gonne matso a botshelo a tswa mo go yone.”—Diane 4:23.

Dilo Tse di Nonotshang “Mmu” wa Dipelo Tsa Rona

A re sekasekeng dilo kana dinonofo dingwe tse di tla nonotshang “mmu” wa dipelo tsa rona gore o tle o kgone go ungwa sentle. Gone mme, go na le dilo tse dintsi tse di tla tokafatsang dipelo tsa rona, mme fano re tla sekaseka di le thataro: go lemoga dilo tse re di tlhokang tsa semoya, boikokobetso, go ikanyega, poifomodimo, tumelo le lorato.

Jesu o ne a re: “Go itumela ba ba utlwang go tlhoka ga bone ga semoya.” (Mathaio 5:3) Fela jaaka tlala ya sebele e re gakolola gore re tlhoka go ja, go lemoga gore re tlhoka dilo tsa semoya go dira gore re nne re utlwa re tshwerwe ke tlala ya dijo tsa semoya. Ka tlholego fela, batho ba eletsa dijo tse di ntseng jalo ka gonne di dira gore botshelo bo nne le bokao le boikaelelo. Dikgatelelo tsa tsamaiso ya  dilo ya ga Satane kana go nna botswa fela go ithuta go ka nna ga fedisa temogo ya rona ya selo seno se re se tlhokang. Le fa go ntse jalo, Jesu o ne a re: “Motho o tshwanetse go tshela, e seng ka senkgwe se le sosi, fa e se ka lefoko lengwe le lengwe le le tswang ka molomo wa ga Jehofa.”—Mathaio 4:4.

Ka tsela ya mmatota, dijo tse di jewang ka metlha, tse di tekatekano le tse di siameng di thusa gore mmele o itekanele, mme gape di dira gore mmele o nne le keletso ya dijo tse dingwe fa nako ya tsone e tla. Go ntse jalo le ka tsela ya semoya. O ka tswa o sa tseye gore o motho yo o ratang go ithuta, mme fa o go dira mokgwa go bala Lefoko la Modimo letsatsi le letsatsi o bo o ithuta dikgatiso tse di theilweng mo Baebeleng ka metlha, o tla bona keletso ya gago e gola. Tota e bile, o tla tlhoafalela dinako tsa gago tsa go ithuta Baebele. Ka jalo o se ka wa itlhoboga ka bonako; dira ka natla go nna le keletso e e siameng ya dijo tsa semoya.

Boikokobetso bo Nolofatsa Pelo

Boikokobetso bo botlhokwa thata fa o batla go nna le pelo e e iketleeditseng ka gonne bo dira gore re nne batho ba ba ka rutiwang e bile bo re thusa gore re rate go amogela kgakololo le kgalemelo e e lorato. Akanya ka sekao se se molemo sa ga Kgosi Josia. Ka nako ya puso ya gagwe go ne ga bonwa lokwalo lo lo nang le Molao wa Modimo o a neng a o fetisitse ka Moshe. Fa Josia a utlwa mafoko a Molao mme a lemoga gore borraagwemogolo ba ne ba fapogile go le kana kang mo kobamelong e e itshekileng, o ne a ikgagola diaparo mme a lela fa pele ga Jehofa. Ke eng fa Lefoko la Modimo le ile la ama pelo ya kgosi eno thata jaana? Pego e bolela gore pelo ya gagwe e ne le “bonolo,” mo a neng a ikokobetsa ka ntlha ya go utlwa mafoko a ga Jehofa. Jehofa o ne a bona pelo e e boikokobetso, e e utlwang ya ga Josia mme a mo segofatsa ka ntlha ya seo.—2 Dikgosi 22:11, 18-20, NW.

Boikokobetso bo ile jwa dira gore barutwa ba ga Jesu “ba ba sa rutegang e bile e le batho fela” ba tlhaloganye le go dirisa boammaaruri jwa semoya jo bo sa lemogiwang ke ba ba neng ba le “botlhale le ba ba dikgeleke” mme e le ka “tsela ya senama” fela. (Ditiro 4:13; Luke 10:21; 1 Bakorintha 1:26) Batho ba ba botlhale ba ba dikgeleke bano ba ne ba sa ikaelela go amogela lefoko la ga Jehofa ka gonne dipelo tsa bone di ne di thatafaditswe ke boikgogomoso. A go a gakgamatsa go bo Jehofa a ila boikgogomoso?—Diane 8:13; Daniele 5:20.

Boikanyegi le Poifomodimo

Moporofeti Jeremia o ne a re “pelo e boferefere go dilo tsotlhe, e botlhoko thata; emang yo o ka e itseng?” (Jeremia 17:9) Boferefere jono bo iponatsha ka ditsela tse di farologaneng, tse di jaaka go dira diipato fa re dirile phoso. Bo bonala gape fa re itlhokomolosa diphoso tse di masisi tsa botho. Le fa go ntse jalo, boikanyegi bo tla re thusa go fenya pelo e e boferefere ka go re thusa go bona se tota re leng sone gore re tle re tokafatse. Mopesalema o ne a bontsha boikanyegi jo bo ntseng jalo fa a ne a rapela jaana: “Nkeleka, Jehofa o mphukutse; leka diphilo tsa me, le pelo ya me.” Kwantle ga pelaelo, mopesalema o ne a baakanyeditse pelo ya gagwe go dumela go kelekiwa le go lekiwa ke Jehofa, tota le fa seo se ka tswa se ne se raya gore a dumele gore o na le mekgwa e e tshwanang le malele gore a tle a e fenye.—Pesalema 17:3; 26:2.

Poifomodimo, e e akaretsang “go ila bosula” ke selo se se maatla se se ka thusang mo kgannyeng eno ya go baakanya. (Diane 8:13) Le fa motho a itse gore Jehofa o na le bopelonomi jo bo lorato e bile o molemo, motho yo o boifang Jehofa tota o itse sentle gore Jehofa o na le maatla a go otlhaya, tota le e leng go bolaya, batho ba ba sa mo utlweng. Jehofa o ne a bontsha gore batho ba ba mmoifang ba tla mo utlwa fa a ne a bolela jaana kaga Iseraele: “A bo pelo e e ntseng jalo e ka bo ne ne e le mo go bone, gore ba mpoife, ba tshegetse ditaolo tsa me tsotlhe ka metlha yotlhe, gore go tle go nne sentle nabo, le bana ba bone ka bosakhutleng!”—Duteronome 5:29.

Kwantle ga pelaelo, boikaelelo jwa poifomodimo, ga se go dira gore re ineele ka go bo re boifa, mme ke go re tlhotlheletsa gore re utlwe Rraarona yo o lorato yo re itseng gore o amega tota ka rona. Tota e bile, poifomodimo e e ntseng jalo e a ipedisa e bile e dira gore motho a itumele, jaaka Jesu Keresete ka boene a ile a supa.—Isaia 11:3; Luke 12:5.

Pelo e e Iketleeditseng e Nonofile mo Tumelong

Pelo e e nonofileng mo tumelong e itse gore sengwe le sengwe se Jehofa a se batlang kana a se re kaelang ka Lefoko la gagwe se siame ka metlha e bile se tla re solegela molemo. (Isaia 48:17, 18) Motho  yo o nang le pelo e e ntseng jalo o kgotsofala tota ka ntlha ya go dirisa kgothatso e e mo go Diane 3:5, 6, e e reng: “O ikanye Jehofa ka pelo yotlhe ya gago, o se ka wa ikaega tlhaloganyo ya gago fela. Mo ditseleng tsotlhe tsa gago o ipolele ene, mme o tlaa siamisa ditselana tsa gago.” Le fa go ntse jalo, pelo e e se nang tumelo, e ka se rate go ikanya Jehofa, segolobogolo fa go dira jalo go tlhoka gore motho a ithontshe dilo dingwe, tse di jaaka go tshela botshelo jo bo motlhofo gore a tle a tlhome mogopolo mo dilong tse di direlwang Bogosi. (Mathaio 6:33) Ke ka lebaka le le utlwalang he, go bo Jehofa a tsaya pelo e e se nang tumelo e le e e “boikepo.”—Bahebera 3:12, NW.

Tumelo ya rona mo go Jehofa e bonala mo dilong di le dintsi, go akaretsa le dilo tse re di dirang mo bonosing mo matlong a rona. Ka sekai, tsaya molaomotheo o o mo go Bagalatia 6:7: “Lo se ka lwa timediwa: Modimo ga se o o ka sotliwang. Gonne lefa e le eng se motho o se jalang, seno gape o tla se roba.” Tumelo ya rona mo molaomotheong ono e tla bonala mo dilong tse di jaaka dibaesekopo tse re di lebelelang, dibuka tse re di balang, gore re ithuta Baebele go le kana kang le mo dithapelong tsa rona. Ee, tumelo e e nonofileng e e re tlhotlheletsang go jala “malebang le moya” e thusa thata gore re nne le pelo e e iketleeditseng go amogela lefoko la ga Jehofa le go le utlwa.—Bagalatia 6:8.

Lorato—Nonofo e Kgolo go di Gaisa Tsotlhe

Lorato lo feta dinonofo tse dingwe tsotlhe ka go dira gore mmu wa dipelo tsa rona o tsibogele Lefoko la ga Jehofa. Ka jalo, fa moaposetoloi Paulo a ne a le bapisa le tumelo le tsholofelo o ne a tlhalosa lorato e le ‘se segolo mo dinonofong tseno.’ (1 Bakorintha 13:13) Pelo e e ratang Modimo thata e kgotsofalela le go itumela thata go mo utlwa; eleruri ga e tenegele dilo tse Modimo a di batlang. Moaposetoloi Johane o ne a bolela jaana: “Seno ke se lorato lwa Modimo lo se kayang, gore re boloke ditaolo tsa one; mme lefa go ntse jalo ditaolo tsa one ga di imele.” (1 Johane 5:3) Jesu o ne a bolela jaana ka tsela e e tshwanang: “Fa motho a nthata, o tla boloka lefoko la me, mme Rre o tla mo rata.” (Johane 14:23) Ela tlhoko gore lorato lo lo ntseng jalo lo a tshwaetsana. Ee, Jehofa o rata thata batho ba ba ikutlwang ba tlhotlheletsega go mo rata.

Jehofa o itse gore ga re a itekanela le gore ka metlha re a mo leofela. Le fa go ntse jalo, ga a ikgogone mo go rona. Se Jehofa a se batlang mo batlhankeng ba gagwe ke “pelo e e feletseng,” e e re tlhotlheletsang go mo direla ka go rata ka “moya o o itumetseng.” (1 Ditirafalo 28:9, NW) Gone mme, Jehofa o itse gore go tsaya nako le maiteko gore re tlhagolele dinonofo tse di siameng mo dipelong tsa rona gore re tle re ungwe maungo a moya. (Bagalatia 5:22, 23) Ka jalo, o pelotelele le rona “gonne o itse popego ya rona, o gakologetswe fa re le lorole fela.” (Pesalema 103:14) Jesu o ne a bontsha boikutlo jone joo ka gonne le ka motlha o ne a sa omanyetse barutwa ba gagwe diphoso tsa bone, go na le moo o ne a ba thusa le go ba kgothatsa ka bopelotelele. A lorato, kutlwelobotlhoko le bopelotelele jo bo ntseng jalo jwa ga Jehofa le Jesu ga bo go tlhotlheletse gore o ba rate le go feta?—Luke 7:47; 2 Petere 3:9.

Fa e le gore ka dinako tse dingwe go thata gore o kumole mekgwa e e jaaka mehero e e meletseng kwa teng kana o sa kgone go thuba makwete a a thata a ditlwaelo tse di tshwanang le letsopa, o se ka wa ngomoga pelo kana wa kgobega marapo. Go na le moo, nna o leke go tokafatsa fa o ntse o ‘tshwareletse mo thapelong’ le go nna o ntse o lopa moya wa ga Jehofa gangwe le gape. (Baroma 12:12) Ka thuso ya gagwe e e tswang pelong, o tla atlega go etsa Esera ka go nna le pelo e e iketleeditseng ka botlalo “go lopa kgakololo mo molaong wa ga Jehofa le go o dira.”

[Setshwantsho mo go tsebe 31]

Esera o ne a nna a ntse a boifa Modimo le fa a ne a le kwa Babelona

[Motswedi wa Setshwantsho mo go tsebe 29]

Garo Nalbandian