Maatla a Thapelo

Letsatsi le a phirima mo motseng wa Nahore kwa Botlhabagare. Monna mongwe wa Mosiria yo o bidiwang Eliesere o fitlha fa sedibeng sengwe kafa ntle ga motse oo ka mokoloko wa dikamela di le lesome. Le mororo a tshwanetse a bo a lapile e bile a nyorilwe, Eliesere o amegile thata ka dilo tse batho ba bangwe ba di tlhokang. O tswa kwa nageng e sele go tla go batlela morwa mong wa gagwe mosadi. Mo godimo ga moo, o tshwanetse go batla mosadi yono mo gare ga ba losika lwa mong wa gagwe. O tla dira jang tiro e e boima eno?

ELIESERE o ikanya maatla a thapelo thata. Ka tumelo e e gakgamatsang e e tshwanang le ya ngwana, o lopa jaana ka boikokobetso: “Jehofa, Modimo wa ga mongwake Aberahame, ke a go rapela, o ntlisetse letlhogonolo gompieno, o bo o supetse mongwake Aberahame pelonomi. Bona, ke eme fa motsweding wa metsi, bomorwadia banna ba motse ba tla go ga metsi. A go dira[g]ale gore morweetsana yo ke tlaa mo rayang ke re: ‘Ke a go rapela, a ko o sekege nkgwana ya gago gore ke nwe,’ mme fa a tlaa re: ‘Nwa, le dikamela tsa gago ke tlaa di nosa,’ ene yoo, e nne ene yo o mo laoletseng motlhanka wa gago Isake; ke tlaa bo ke itse ka mo fa o supeditse mongwake pelonomi.”—Genesise 24:12-14.

Go ikanya maatla a thapelo ga ga Eliesere ga e nne ga lefela. Ebu, mosadi wa ntlhantlha yo o tlang fa sedibeng ke setlogolo sa ga morwarraagwe Aborahame! Leina la gagwe ke Rebeka mme ga a nyalwa, o phepa mo boitsholong e bile o montle. Se se gakgamatsang ke gore, ga a nose Eliesere fela metsi mme gape ka bopelontle o ithaopela go timola lenyora la dikamela tsa gagwe tsotlhe. Moragonyana, morago ga therisano ya lelapa, Rebeka o dumela ka moya otlhe go boela le Eliesere kwa nageng e e kgakala gore a ye go nna mosadi wa morwa Aborahame e bong Isake. A bo e ne e le karabo e e gakgamatsang le e e tlhamaletseng jang ne ya thapelo ya ga Eliesere bogologolo koo ka nako ya fa Modimo gangwe le gape a ne a tsaya kgato ka tsela ya kgakgamatso mo ditiragalong!

Re ka ithuta mo gontsi mo thapelong ya ga Eliesere. E ne e supa tumelo e e nonofileng e a nang nayo, boikokobetso jwa gagwe le kafa a neng a amega ka teng ka dilo tse batho ba bangwe ba di tlhokang. Thapelo ya ga Eliesere gape e supa kafa a neng a ineetse ka teng mo tseleng e Jehofa a dirisanang le batho ka yone. Ga go na pelaelo gore o ne a itse ka kamano e e kgethegileng e Modimo a neng a na le yone le Aborahame le tsholofetso ya Gagwe ya gore mo isagweng batho botlhe ba tla segofala ka Aborahame. (Genesise 12:3) Ka gone, Eliesere o ne a simolola thapelo ya gagwe ka mafoko ano: “Jehofa, Modimo wa ga mongwake Aberahame.”

Jesu Keresete e ne e le lotsalo lwa ga Aborahame lo batho botlhe ba ba kutlo ba neng ba tla segofala ka lone. (Genesise 22:18) Fa e le gore re batla gore dithapelo tsa rona di arabiwe mo motlheng o re tshelang mo go one, re tshwanetse ka boikokobetso re amogele tsela e Modimo a dirisanang le batho  ka yone ka Morwawe. Jesu Keresete o ne a re: “Fa lo nnela ruri seoposengwe le nna mme mafoko a me a nnela ruri mo go lona, kopang lefa e le eng se lo se eletsang mme se tla lo diragalela.”—Johane 15:7.

Molatedi mongwe wa ga Keresete yo o neng a bona boammaaruri jwa mafoko ano a ga Jesu e ne e le moaposetoloi Paulo. Ruri go dumela ga gagwe mo maatleng a thapelo ga go a ka ga nna ga lefela. O ne a kgothaletsa Bakeresetekaene gore ba ise ditlhobaelo tsa bone tsotlhe go Modimo ka thapelo mme a tlhomamisa jaana: “Mo dilong tsotlhe ke na le nonofo ka ntlha ya yo o nnayang maatla.” (Bafilipi 4:6, 7, 13) A seno se raya gore ditopo tsotlhe tsa ga Paulo tse a neng a di kopa Modimo ka thapelo di ile tsa arabiwa? Mma re bone.

Ga se Ditopo Tsotlhe Tse di Arabiwang

Mo bodireding jwa gagwe jo a neng a bo dira ka bopelotshweu, Paulo o ne a tshwenngwa ke se a neng a se tlhalosa e le “mutlwa mo nameng.” (2 Bakorintha 12:7) E ka tswa e ne e le tlalelo ya tlhaloganyo le maikutlo e e neng e bakwa ke baganetsi le “bakaulengwe ba maaka.” (2 Bakorintha 11:26; Bagalatia 2:4) Kana e ka tswa e ne e le botlhoko jwa mmele jwa leitlho le le neng le sa fole. (Bagalatia 4:15) Le fa e ka tswa e ne e le eng, ‘mutlwa ono mo nameng’ o ne o koafatsa Paulo. O ne a kwala jaana: “Ke ne ka rapela Morena makgetlo a le mararo kaga seno gore o tloge fa go nna.” Le fa go ntse jalo, kopo ya ga Paulo ga ya ka ya arabelwa. Paulo o ne a tlhalosediwa gore melemo ya semoya e a setseng a e amogetse mo Modimong, e e jaaka maatla a go itshokela diteko, e ne e lekane. Mo godimo ga moo, Modimo o ne a re: “Maatla a me a itekanedisiwa mo bokoeng.”—2 Bakorintha 12:8, 9.

Re ithuta eng mo dikaing tsa ga Eliesere le Paulo? Gore Jehofa Modimo eleruri o reetsa dithapelo tsa bao ka boikokobetso ba batlang go mo direla. Mme seno ga se reye gore ka metlha o ba naya dilo tse ba di kopang ka gonne Modimo o lebela dilo kwa pele. Ke ene a itseng botoka go re gaisa gore ke eng se se re tshwanelang. Se se botlhokwa le go feta, ka metlha o dira tumalanong le maikaelelo a gagwe a a kwadilweng mo Baebeleng.

Motlha wa Phodiso ya Semoya

Modimo o solofetsa go fodisa matlhoko otlhe a batho a mmele, a tlhaloganyo le a maikutlo ka nako ya Puso ya Dingwaga Tse di Sekete ya Morwawe mo lefatsheng. (Tshenolo 20:1-3; 21:3-5) Bakeresete ba ba peloephepa ba letile isagwe e e solofeditsweng eno ka tlhoafalo, ba dumela ka botlalo gore Modimo o na le maatla a go e diragatsa. Le fa gone ba sa solofele go fodisiwa ka tsela ya kgakgamatso gone jaanong, ba rapela Modimo gore a ba gomotse le go ba nonotsha gore ba itshokele diteko. (Pesalema 55:22) Fa ba lwala, ba ka nna gape ba rapelela kaelo ya Modimo gore ba bone kalafi e e molemo e ba ka kgonang go e duelela.

Ditumelo dingwe di kgothaletsa balwetse gore ba rapele gore ba fodisiwe gone jaanong, ba supa diphodiso tsa kgakgamatso tse Jesu le baaposetoloi ba gagwe ba neng ba di dira. Mme dikgakgamatso tse di ntseng jalo di ne di dirwa ka maikaelelo a a kgethegileng. E ne e le go supa gore Jesu Keresete e ne e le Mesia wa boammaaruri le go supa gore Modimo o tlositse kgatlhego ya gagwe mo setšhabeng sa Sejuda a e lebisa mo phuthegong e ntšha ya Bokeresete. Ka nako eo, dimpho tsa dikgakgamatso di ne di tlhokega go nonotsha tumelo ya phuthego e e sa tswang go tlhomiwa ya Bokeresete. Fa phuthego e ntšha eo e simolola go nonofa, e gola, dimpho tsa dikgakgamatso di ne tsa “nyelediwa.”—1 Bakorintha 13:8, 11.

Mo motlheng ono o o botlhokwa thata, Jehofa Modimo o kaela baobamedi ba gagwe mo tirong e e botlhokwa thata ya phodiso ya semoya. Fa batho ba sa ntse ba na le nako, ba tshwanetse gore ba tsibogele boikuelo jono ka bonako: “Batlang Jehofa a sa ntse a ka bonwa; mmitseng a sa ntse a le gaufi. A moikepi a latlhe tsela ya gagwe, le motho yo o sa siamang kgopolo tsa gagwe; a a boele kwa go Jehofa, mme o tlaa mo utlwela botlhoko; le kwa Modimong wa rona, gonne o tlaa itshwarela ka botlalo.”—Isaia 55:6, 7.

Phodiso eno ya semoya ya baleofi ba ba ikwatlhayang e fitlhelelwa ka tiro ya go rera dikgang tse di molemo tsa Bogosi jwa Modimo. (Mathaio 24:14) Ka go naya batlhanka ba gagwe maatla a go dira tiro eno e e bolokang botshelo, Jehofa Modimo o thusa dimilione tsa batho tse di tswang mo ditšhabeng tsotlhe gore ba ikwatlhaele maleo a bone mme ba nne le kamano e ntle le ene pele ga bokhutlo jwa tsamaiso e e boikepo eno. Eleruri dithapelo tsa batho botlhe ba ba rapelang ka tlhoafalo gore ba bone phodiso e e ntseng jalo ya semoya le botlhe ba ba rapelelang gore ba thusiwe go dira tiro eno ya go fodisa di a arabiwa.

[Motswedi wa Setshwantsho mo go tsebe 3]

Eliezer and Rebekah/The Doré Bible Illustrations/Dover Publications