Pego ya Baboledi ba Bogosi

“Lo Itse Baebele Thata”

FA Jesu wa dingwaga tse 12 a ne a bua ka bopelokgale le baeteledipele ba bodumedi kwa Jerusalema, “botlhe ba ba mo reeditseng ba ne ba makaletse ruri ba makadiwa ke tlhaloganyo ya gagwe le dikarabo tsa gagwe.” (Luke 2:47) Gompieno le gone, batlhanka ba bantsi ba basha ba ga Jehofa ba ititaya sehuba go bua le barutabana le ba ba tsenang sekolo le bone ka Modimo le ka Baebele mme le bone gantsi ba nna le matswela a a itumedisang.

Tiffany, wa dingwaga tse 14, o ne a le mo tlelaseng e thuto nngwe e neng e remeletse mo boporofeting jwa Baebele jwa dibeke tse 70 tsa dingwaga, jo go buiwang ka jone mo go Daniele 9:24-27. Morutabana o ne a tlhalosa dintlha di sekae tse di amanang le ditemana tseo mme a feta ka bonako mo kgannyeng eo.

La ntlha, Tiffany o ne a etsaetsega go tsholetsa letsogo. O bolela jaana: “Mme go ne go na le sengwe se se neng se dira gore ke ikutlwe ke tshwenyega, go ne go sa njese di welang go bo ditemana tseo di sa tlhalosiwa ka botlalo. Mme ke sa akanye le go akanya ka gone, ke fa ke emisitse letsogo.” Morutabana o ne a gakgametse gore go na le mongwe yo o nang le se a ka se buang ka kgang eno, ka gonne go ne go le thata gore baithuti ba le bantsi ba e tlhaloganye.

Fa Tiffany a fiwa tshono ya gore a tlhalose boporofeti jono, o ne a ema mme a bua fela ka tlhogo. Fa a fetsa, go ne go didimetse go rile tuu mo tlelaseng. Tiffany o ne a batla a tshogile. Morago ga foo tlelase e ne ya thuba tidimalo eo ka go opa diatla e sa kgaotse.

Morutabana o ne a nna a ntse a boeletsa a re: “O dirile sentle thata Tiffany, o dirile sentle ruri.” O ne a dumela gore o ne a itse gore ditemana tseo di tshwanetse tsa bo di tshotse mo go oketsegileng, mme Tiffany e ne e le motho wa ntlha yo o kileng a di mo tlhalosetsa ka tsela e e utlwalang jalo. Morago ga thuto eo, o ne a botsa Tiffany gore go tlile jang gore a itse thata jaana ka Baebele.

Tiffany o ne a araba jaana: “Ke ka go bo ke le mongwe wa Basupi ba ga Jehofa. Batsadi ba me ba ne ba tshwanelwa ke gore ba ntlhalosetse boporofeti joo ka makgetlo a mantsinyana pele ga ke ka bo tlhaloganya.”

Baithutimmogo le ene le bone ba ne ba kgatlhilwe ke go bo a itse Baebele jaana. Mongwe wa baithuti o ne a raya Tiffany a re: “Ke a itse jaanong gore ke eng fa lona Basupi ba ga Jehofa lo tsamaya ka ntlo le ntlo; ke ka go bo lo itse Baebele thata.” Ba bangwe ba ile ba solofetsa gore ba ka se tlhole ba mo rumola gape ka dilo tse a di dumelang.

Fa Tiffany a ne a bolelela batsadi ba gagwe ka maitemogelo a gagwe, ba ne ba akantsha gore a tsamaisetse morutabana wa gagwe buka ya Kitso E E Isang Botshelong Jo bo Sa Khutleng. O ne a dira jalo mme a bontsha morutabana wa gagwe karolo e e tlhalosang boporofeti jwa ga Daniele, mme morutabana o ne a e amogela kwantle ga go etsaetsega mme a mo leboga.

Ga go na pelaelo gore, fa basha ba Bakeresete ba bua ka bopelokgale ka dilo tse batsadi ba bone ba di ba rutileng ka Modimo le ka Baebele, ba baka le go tlotla Jehofa e bile ba itlisetsa masego.—Mathaio 21:15, 16.