O ka Bona Kae Kgakololo e e Molemo?

“Intaseteri ya dikgakololo” e setse e le kgwebo e e dirang dimilionemilione tsa diranta ka ngwaga. Batho ba batla thuso. Moitse mongwe wa boitekanelo jwa tlhaloganyo e bong Heinz Lehmann o bolela jaana: “[Mo setšhabeng sa gompieno] go na le ditlhaelo tsa thuto le tsa leago. Dilo tse di botlhokwa mo bodumeding ga di tlhole di ntse jaaka di ne di ntse pele. Malapa ga a tlhomama . . . , mme ka ntlha ya seo batho ba dira diphoso.” Mokwadi Eric Maisel o bolela jaana: “Batho ba pele ba neng ba ya kwa go shaman wa bone wa setso, moruti kana ngaka ya lelapa gore e ba thuse ka mathata a bone a tsa tlhaloganyo, tsa semoya le a mmele, gone jaanong ba ikanya dibuka tse di neelang kgakololo gore e nne tsone tse di ba nayang dikarabo.”

MOKGATLHO wa Thutotlhaloganyo wa Amerika o ile wa rulaganya setlhopha se se neng se tla tlhotlhomisa ka intaseteri eno e e golang ka bonako. Setlhopha seno se ne sa bolela gore le fa gone “go ka direga thata gore go thusiwe batho gore ba itlhaloganye le go tlhaloganya ba bangwe . . . , gantsi dithulaganyo le ditlhogo tse go bolelwang gore di ka dira jalo di feteletsa dilo thata e bile di dira gore batho ba tseege maikutlo.” Mokwadi mongwe wa Toronto Star o bolela jaana: “Ela tlhoko dilo tsa semoya tsa bodumedi tse e seng tsa mmatota. . . . Ela tlhoko segolobogolo dibuka tsotlhe tse di nayang batho dikgakololo, ditheipi kana diseminara tse di gakololang batho ka dilo tse dintsintsi, mo nakong e khutshwane thata, di sa tlhoke motho matsapa a a kalo kana go nna le boikgapo.” Gone mme, go na le batho ba bantsintsi ba tota ba batlang go thusa batho ba ba tlhokang thuso. Le fa go ntse jalo, ka maswabi go na le batho ba le bantsi ba ba sa ikanyegeng ba ba dirisang lebaka la go bo batho ba le bodutu e bile ba boga go nna tshono ya gore ba ba neye thuso kana tharabololo e e tsietsang.

Ka ntlha ya mabaka ano, ke motswedi ofe wa konokono o o ka re neelang thuso e re ka e ikanyang? Re ka bona kae kgakololo e e molemo e e ka thusang ka dinako tsotlhe?

Motswedi wa Kaelo E e Sa Tlhaeleng

Moreri mongwe wa kwa Amerika wa lekgolo la bo19 la dingwaga e bong Henry Ward Beecher o ne a bolela jaana: “Baebele ke mmapa wa Modimo o motho a tshwanetseng go tsamaya ka one, gore o mo thuse gore a se ka a nwela le go mo kaela kwa boemakepeng, le go mo thusa go fitlha kwa go jone a sa thule mafika kana matlapa.” Monna yo mongwe o ne a bolela jaana ka Baebele: “Ga go ope yo o ka golang go fitlha a sa tlhole a tlhoka go ithuta Dikwalo; buka eno e nna e ntse e gola le dingwaga tsa gago.” Ke eng fa o tshwanetse go akanya ka masisi ka motswedi ono?

Baebele e ipuelela jaana: “Lokwalo lotlhe lo tlhotlheleditswe ke Modimo e bile lo tswela mosola mo go ruteng, mo go kgalemeleng, mo go tlhamalatseng dilo, mo go sugeng ka tshiamo, gore motho wa Modimo a tshwanelege ka botlalo, a tlhomeleletse tiro nngwe le nngwe e e molemo mo go feletseng.” (2 Timotheo 3:16, 17) Dilo tse di kwadilweng mo Baebeleng di tswa go ene yo e leng Motswedi wa botshelo e bong Jehofa Modimo. (Pesalema 36:9) Ka gone, o itse popego ya rona  sentle, jaaka Pesalema 103:14 e re gakolola: “Gonne o itse popego ya rona, o gakologetswe fa re le lorole fela.” Ka jalo, re ka tshepa ka botlalo gore Baebele e na le mosola.

Tota e bile, Baebele e na le melaometheo e mentsi le dikaelo tse o ka di dirisang ka tsela e e molemo mo maemong le fa e le afe a o ka iphitlhelang o le mo go one. Ka yone Modimo o re bolelela jaana: “Tsela ke e, tsamayang mo go yone.” (Isaia 30:21) A tota Baebele e ka kgona go thusa batho ka dilo tse ba di tlhokang gompieno? A re bone.

Baebele e re Thusa ka Dilo Tse re di Tlhokang . . . 

Go Lepalepana le Ditlhobaelo. Baebele e re bolelela jaana: “Lo se ka lwa tlhobaela ka sepe, mme mo go sengwe le sengwe ka thapelo le mokokotlelo mmogo le go ntshiwa ga ditebogo a ditōpō tsa lona di itsisiwe Modimo; mme kagiso ya Modimo e e gaisang kakanyo yotlhe e tla disa dipelo tsa lona le maatla a lona a mogopolo ka Keresete Jesu.” (Bafilipi 4:6, 7) A thapelo e itshupile e le selo se se thusang go lepalepana le ditlhobaelo tsa maikutlo tse di amanang le mathata a ikonomi, go sotlwa ka tlhakanelodikobo le ka mafoko, kana go swelwa ke mongwe yo o mo ratang? Akanya ka tiragalo e e latelang.

Fa Jackie a sena go utlwa gore morwadie o ne a sotlilwe ka tlhakanelodikobo, o ne a dumela jaana: “Ga ke kgone go tlhalosa boikutlo jwa go ikutlwa molato jo motho a nnang najo fa a sa kgone go sireletsa ngwana wa gagwe. Ke ne ka tshwanela gore ke lwe le boikutlo jwa kutlobotlhoko, jwa letlhoo le kgalefo. Maikutlo ano a ne a setse a simolola go senya botshelo jwa me. Ke ne ke tlhoka Jehofa thata gore a dibele pelo ya me.” Fa a sena go bala le go boeletsa Bafilipi 4:6, 7, o ne a dira ka natla gore a dirise kgakololo ya yone. Jackie o tlhalosa jaana: “Ke rapela letsatsi le letsatsi, ke nna ke kopa gangwe le gape gore ke se ka ka ipolaya ka maikutlo a a sa siamang mme Jehofa o ile a nthusa gore ke nne le pelo e e ritibetseng le e e itumetseng. Ke ikutlwa ke na le kagiso mo teng ga me.”

Le wena o ka iphitlhela o le mo boemong jo o sa kgoneng go bo laola kana go bo rarabolola mme bo dira gore o tlhobaele mo maikutlong. Fa o latela kgakololo ya Baebele ya go rapela, o ka kgona go lepalepana le gone sentle. Mopesalema o re kgothatsa ka mafoko ano: “Pitikela tsela ya gago mo go Jehofa; o bo o mo ikanye mme, o tlaa go dirafatsa.”—Pesalema 37:5.

Go Bona Kgothatso. Mopesalema o ne a tlhalosa kanaanelo ya gagwe jaana: “Jehofa, ke rata boago jwa ntlo ya gago le felo fa kgalalelo ya gago, e agileng gone. Lonao lwa me lo eme fa go papannweng; ke tlaa baka Jehofa mo diphuthegong.” (Pesalema 26:8, 12) Re kgothadiwa mo Baebeleng gore re kopane mmogo ka metlha go obamela Jehofa. Bokopano jono bo ka go thusa jang ka dilo tse o di tlhokang? Ba bangwe ba ile ba lemoga eng?

Becky o tlhalosa jaana: “Batsadi ba me ga ba direle Jehofa, ka gone ba a nkganetsa fa ke leka go dira sepe fela se se amanang le go direla Modimo. Mo go nna ke matsapa tota go nna teng kwa dipokanong.” Becky o akanya gore o nna le masego a mantsi ka gore o ile a iteka thata gore a nne teng kwa dipokanong tsa Bokeresete ka metlha. “Dipokano di nonotsha tumelo ya me, gore ke tle ke kgone go emelana le mathata a letsatsi le letsatsi jaaka moithuti, morwadi le motlhanka wa ga Jehofa. Batho kwa Holong ya Bogosi ba farologane thata le baithuti kwa sekolong! Ba amega ka batho ba bangwe, ba rata go thusa e bile motlotlo wa rona ke o o kgothatsang ka metlha. Ke ditsala tsa mmatota.”

Ee, ka go latela kaelo ya Baebele ya gore re kopane mmogo ka metlha, re ka kgona go dira gore Jehofa a re thuse ka kgothatso e re e tlhokang. Ke mo re bonang boammaaruri jwa mafoko ano a ga mopesalema: “Modimo ke botshabelo jwa rona le thata, thuso e e gaufi thata mo tlalelong.”—Pesalema 46:1.

Mo Tirong e e Kgotsofatsang le e e Mosola. Baebele e gakolola jaana: “Nitamang, lo sa tshikhinyege, ka metlha lo na le mo gontsi go go dira mo tirong ya Morena, ka lo itse gore tiro ya lona ya bonatla ga se ya lefela malebang le Morena.” (1 Bakorintha 15:58) A tota ‘tiro ya Morena’ e a kgotsofatsa? A bodiredi jwa Bokeresete bo na le mosola?

Amelia o tlhalosa jaana malebana le kafa a ikutlwang  ka teng: “Ke ne ke ithuta Baebele le banyalani bangwe ba ba neng ba tla tloga ba kgaogana. Ke ile ka thusa le mosadi mongwe yo morwadie a ileng a bolawa setlhogo. Mosadi yono o ne a tshwenngwa thata ke kabakanyo e e leng teng kaga boemo jwa baswi. Mo dikgannyeng tseno tsoopedi, go dirisa melaometheo ya Baebele go ile ga dira gore ba nne le kagiso le tsholofelo mo matshelong a bone. Ke ikutlwa ke itumetse thata e bile ke kgotsofetse ka go bo ke ile ka nna le seabe mo go ba thuseng.” Scott o bolela jaana: “Fa o nna le boitemogelo jo bo monate mo bodireding jwa tshimo, o simolola thuto e ntšha ya Baebele, kana o atlega go neela bosupi jo e seng jwa ka tlwaelo, o tla bua ka gone ka dingwaga tse dintsi. O boa o nna le boikutlo le boitumelo jo bo tshwanang nako le nako fa o tlotla ka gone! Motho o bona boitumelo jo bogolo le jo bo nnelang ruri go tswa mo bodireding.”

Go phepafetse gore go dirisa kaelo ya Baebele malebana le go nna badiredi ba ba tlhoafetseng go ile ga thusa batho bano gore ba nne le tiro e e kgotsofatsang le e e mosola e ba neng ba e tlhoka. Le wena o lalediwa gore o dire tiro eno ya go ruta ba bangwe ka ditsela tsa Modimo le melaometheo ya gagwe o bo o solegelwe molemo.—Isaia 48:17; Mathaio 28:19, 20.

Go Solegelwa Molemo ke Lefoko la Modimo

Kwantle ga pelaelo, Baebele ke motswedi o o ikanyegang o o nang le dikaelo tse di thusang mo lefatsheng la gompieno. Gore e re solegele molemo, re tshwanetse gore re dire maiteko ka metlha. Re tshwanetse go e bala ka metlha, go e ithuta le go tlhatlhanya ka yone. Paulo o ile a kgothatsa jaana: “Tlhatlhanya ka dilo tseno; nwelelela mo go tsone, gore botswelelopele jwa gago bo bonatshege mo bathong botlhe.” (1 Timotheo 4:15; Duteronome 11:18-21) Modimo o re tlhomamisetsa gore fa re leka go dirisa kgakololo ya gagwe e e mo Baebeleng, re tla atlega. O solofetsa jaana: “O ikanye Jehofa . . . Mo ditseleng tsotlhe tsa gago o ipolele ene, mme o tlaa siamisa ditselana tsa gago.”—Diane 3:5, 6.

[Ditshwantsho mo go tsebe 31]

Go dirisa kgakololo ya Baebele go dira gore botshelo e nne jo bo kgotsofatsang le jo bo monate