‘Ba Bua ka ga Bomolemo le Lorato’

MO DINGWAGENG tsa bosheng jaana Basupi ba ga Jehofa kwa Fora ba ile ba tlhaselwa ka go senyakakwa leina. Baganetsi ba bone ba ile ba dirisa maaka le dipolelo tse di sokamisitsweng go ba senya mo bathong. Mo masimologong a 1999, Basupi ba ga Jehofa go ralala Fora ba ile ba tsamaisa dikhopi di le dimilione tse 12 tsa pampitshana e e nang le setlhogo se se reng People of France, You Are Being Deceived! Mo pampitshaneng eno, ba ne ba kgala dipolelo tse di senyang leina tse di kgatlhanong le bone.

Malatsi a sekae morago ga letsholo leno, Rre Jean Bonhomme, yo e leng ngaka e e alafang e bile e kile ya bo e le leloko la Palamente o ne a romelela lokwalodikgang lwa lefelo leo lekwalo le le ganetsang ditatofatso tsa bone le le neng le tla bonwa ke setšhaba. O ne a kwala jaana: “Gangwe le gape Basupi ba ga Jehofa ba tla kwa legaeng la me. Ba tla go bua le nna ka ga bomolemo le lorato mo lefatsheng lotlhe. . . . Ga ba pateletse ope. Ba itlhalosa ka boikokobetso mme ba reetsa dipelaelo tse ke nang natso ka bopelonomi.”

Fa Rre Bonhomme a tlhalosa tsela e Basupi ba ga Jehofa ba lebang dilo tsa semoya ka yone o ne a bolela jaana: “Go sa itse dilo tsa lefatshe ga bone go ka se ka ga senya sepe. Ka fa letlhakoreng le lengwe, go sa itse dilo ga boradipolotiki bangwe go tshosetsa kagiso le kutlwano ya baagi thata.”