‘Dinako Tsa go Tsosolosa’ di Atametse!

Pelenyana fela ga fa Jesu a tlhatlogela legodimong, bangwe ba barutwa ba gagwe ba ba ikanyegang ba ile ba mmotsa jaana: “Morena, a o busetsa bogosi mo Iseraele ka nako eno?” Karabo ya ga Jesu e ile ya supa gore go ne go tla feta nako pele ga Bogosi bo tla. Mo nakong eo, balatedi ba gagwe ba ne ba tla nna le tiro e kgolo e ba tshwanetseng go e dira. Ba ne ba tshwanetse go nna basupi ba ga Jesu “mo Jerusalema mmogo le mo Judea yotlhe le Samarea le go ya karolong e e kwa kgakalakgakala ya lefatshe.”—Ditiro 1:6-8.

TIRO eo e ne e se kitla e kgona go dirwa mo malatsing, dibekeng kana mo dikgweding di sekae. Le fa go ntse jalo, barutwa ba ile ba simolola ka bonako go rera. Mme ga ba a ka ba tlogela go kgatlhegela kgang ya go tsosolosiwa. Moaposetoloi Petere o ne a bua ka yone le boidiidi jo bogolo jo bo neng bo phuthegile kwa Jerusalema a re: “Ikotlhayeng, lo bo lo sokologe e le gore maleo a lona a tle a phimolwe, gore dipaka tse di lapolosang di tle di tswa mo go Jehofa le gore a tle a romele Keresete yo lo mo tlhometsweng, Jesu, yo legodimo, eleruri, le tshwanetseng go mo tshola mo teng ga lone go fitlha ka dinako tsa go tsosolosiwa ga dilo tsotlhe tse Modimo o neng wa bua ka tsone ka molomo wa baporofeti ba one ba ba boitshepo ba nako ya bogologolo.”—Ditiro 3:19-21.

‘Dinako tseno tsa go tsosolosa’ di ne di tshwanetse go tlisa “dipaka tse di lapolosang” tse di tswang kwa go Jehofa. Tsosoloso e go boleletsweng pele ka yone e ne e tshwanetse go tla ka dikgato tse pedi. Sa ntlha, go ne go tla nna le tsosoloso e e lapolosang ya semoya, e e ntseng e diragala gone jaanong. Sa bobedi, go ne go tla latela go tlhomiwa ga paradaise ya mmatota mo lefatsheng.

Nako ya go Tsosolosa e a Simologa

Fela jaaka moaposetoloi Petere a ne a bolelela boidiidi jole jwa kwa Jerusalema, legodimo le ne le ‘tshotse Jesu mo teng ga lone.’ Go ne go ntse jalo go fitlha ka 1914, fa Jesu a ne a amogela maatla a gagwe a bogosi mme a simolola go busa e le Kgosi e e tlhomilweng ya Modimo. Petere o ne a bolelela pele gore ka nako eo, Jehofa o ne a tla “romela” Morwawe ka tsela ya gore O ne a tla letlelela Jesu go diragatsa seabe sa gagwe e le motho yo o botlhokwa mo maikaelelong a Modimo. Baebele e tlhalosa tiragalo eno jaana ka puo ya tshwantshetso: “Mme [phuthego ya Modimo ya selegodimo ya] belega morwa, motho wa monna, [Bogosi jwa Modimo mo maatleng a ga Jesu Keresete] yo o tla disang merafe yotlhe ka thobane ya tshipi.”—Tshenolo 12:5.

Mme le fa go ntse jalo, ditšhaba di ne di sa ikaelela ka gope go ineela mo pusong ya ga Keresete. Ebu, ba ile ba kgala babusiwa ba gagwe ba ba ikanyegang ba ba mo lefatsheng, bao gompieno ba itsegeng e le Basupi ba ga Jehofa. Fela jaaka baaposetoloi pele ga bone, Basupi ba ile ba simolola “tiro ya go naya bosupi ka Jesu,” ka bonako. (Tshenolo 12:17) Kganetso kgatlhanong le tiro e Bakeresete ba ba tlhoafetseng bano ba neng ba e dira e ne ya tlhagoga mo dinageng tse di farologaneng ka go latelana. Ka 1918, maloko a a ikarabelang a badiredi ba ntlokgolo ya Mokgatlho wa Watch Tower kwa Brooklyn, kwa New York, a ile a isiwa kwa kgotlatshekelo ka ditatofatso tse di  itlhametsweng mme ba atlholelwa nako e telele mo kgolegelong go sa tshwanela. Ka nakwana go ne go lebega e kete tiro ya go neela bosupi ya motlha wa rona “go ya karolong e e kwa kgakalakgakala ya lefatshe” e tla palelwa.—Tshenolo 11:7-10.

Le fa go ntse jalo, ka 1919, maloko a badiredi ba ntlokgolo a a neng a tsentswe mo kgolegelong a ne a gololwa mme moragonyana ditatofatso tsele tsotlhe tsa maaka di ile tsa phimolwa. Ba ne ba simolola tiro ya go tsosolosa semoyeng kwantle ga go senya nako. Fa e sa le ka nako eo, batho ba ga Jehofa ba ntse ba atlega semoyeng go feta le fa e le leng pele.

Go ile ga tswiwa letsholo le legolo go ruta batho ba ditšhaba tsotlhe gore ba boloke dilo tse Keresete a laetseng balatedi ba gagwe gore ba di dire. (Mathaio 28:20) A bo go ne go nonotsha jang ne go bona bangwe ba ba kileng ba bo ba na le dinonofo tsa sekaphologolo ba fetola pono ya bone! Ba ile ba apola botho jwa bogologolo, jo bo nang le ditlwaelo tse di jaaka “bogale,” “puo ya go kgoba” le “puo e e bifelesegang,” mme ba apara botho jo bosha “jo bo ntšhafadiwang ka kitso e e leng yone go ya ka setshwano sa [Modimo] yo o neng a bo tlhōla.” Ka tsela ya semoya, mafoko a ga moporofeti Isaia a diragadiwa le gone jaanong: “Phiri [motho yo pele a neng a na le mekgwa ya bophiri] e tlaa aga le kwanyana [motho yo o pelonomi], nkwe e tlaa botha le potsane; le namane le tawana di tlaa fula mmogo.”—Bakolosa 3:8-10; Isaia 11:6, 9.

Tsosoloso e e Oketsegileng e Atametse!

Mo godimo ga tsosoloso e e ileng ya dira gore go nne le paradaise ya semoya gompieno, nako e ntse e atamela ka bofefo gore polanete ya rona e nne paradaise ya mmatota. Karolo e nnye ya lefatshe leno e ne e le paradaise fa Jehofa a ne a baya bagologolwane ba rona e bong Adame le Efa mo tshimong ya Edena. (Genesise 1:29-31) Ke ka moo re ka kgonang go re Paradaise e a tsosolosiwa. Le fa go ntse jalo, pele ga seo se diragala, bodumedi jwa maaka jo bo sa tlotleng Modimo bo tshwanetse go tlosiwa mo lefatsheng. Tsamaiso ya sepolotiki ya lefatshe leno e tla diragatsa seno. (Tshenolo 17:15-18) Morago ga foo, tsamaiso ya bopolotiki le ya kgwebo le batshegetsi ba tsone, ba tla fedisiwa. Kgabagare, baganetsi ba bofelo ba Modimo—Satane Diabolo le badimona ba gagwe—ba tla tswalelwa ka dingwaga di le sekete—nako e tiro ya go tsosolosa e tla bong e dirwa ka yone. Ka nako eo, “e e leng naga fela e tlaa ipela le lefatshe la lokgere; le sekaka se tlaa itumela se nyakalala jaaka sešeše.” (Isaia 35:1) Lefatshe lotlhe le tla bo le iketlile. (Isaia 14:7) Tota le dimilione tse di ileng tsa swa di tla tsosediwa gape mo lefatsheng. Botlhe ba tla bona melemo ya setlhabelo sa thekololo ya tsosoloso. (Tshenolo 20:12-15; 22:1, 2) Ga go kitla go tlhola go nna le difofu, bosusu le batho ba ba golafetseng mo lefatsheng. “Monni wa gona ga a ketla a re: ‘Ke a bobola.’” (Isaia 33:24) Ka bonako fela fa Puso ya Dingwaga Tse di Sekete ya ga Keresete e sena go fela, Diabolo le badimona ba gagwe ba tla gololwa ka nakwana mme ba tla bona kafa maikaelelo a Modimo ka lefatshe a tla bong a setse a diragaditswe ka teng ka nako eo. Kgabagare ba tla fedisiwa ka bosakhutleng.—Tshenolo 20:1-3.

Fa lefatshe le fitlha mo bofelong jwa dingwaga tse di sekete tsa go tsosolosiwa, “sengwe le sengwe se se hemang,” se tla baka Jehofa mme di tla dira jalo ka bosakhutleng. (Pesalema 150:6, NW) A o tla bo o le mongwe wa tsone? O ka nna mongwe wa tsone.