Go Batla ka Lobaka lo Loleele go a Duelwa

“JEHOFA? Jehofa ke mang?” Silvia wa dingwaga tse robedi o ne a bona leina leno mo Baebeleng ya Se-Armenia, letlotlo la lelapa lengwe le a neng a le bontshiwa ke mosetsanyana yo mongwe. O ne a tsamaya a botsa, mme go se na ope kwa Yerevan, Armenia, koo a neng a nna gone, yo o neng a ka mmolelela gore Jehofa ke mang—le ne le sa itsiwe ke batsadi ba gagwe, barutabana ba gagwe, tota le baruti ba kereke e e mo lefelong la gagabo.

Silvia o ne a gola, a fetsa sekolo, a bo a bona tiro, mme o ne a ntse a sa itse gore Jehofa ke mang. Fa e setse e le mosha yo o godileng, o ne a tshwanelwa ke go tshaba kwa Armenia, mme morago ga nako o ne a felela a le kwa Poland, a nna mo kamoreng nngwe e nnye le batshabi ba bangwe. Mongwe wa batho ba a neng a nna le bone o ne a tlhola a etelwa ke baeng. “Baeng ba gago ke bomang?” Silvia o ne a botsa jalo. “Ke Basupi ba ga Jehofa, ba tlile go nthuta Baebele,” o ne a mo araba jalo.

Silvia o ne a tlola pelo ka boipelo fa a utlwa leina Jehofa. Kgabagare, o ne a simolola go ithuta gore Jehofa ke mang le gore ke Modimo yo o lorato. Le fa go ntse jalo, o ne a tla tloga a tswa kwa Poland. O ne a tshabela kwa Denmark, e e ka kwa ga Lewatle la Baltic. O ne a tshotse dithoto di sekae fela, mme mo go tsone go ne go na le dibuka tsa Baebele tse di gatisitsweng ke Basupi ba ga Jehofa. Silvia o ne a bona lenaane la diaterese tsa diofisi tsa makala a Mokgatlho wa Watch Tower mo tsebeng ya bofelo ya kgatiso nngwe. E ne e le nngwe ya dithoto tse a neng a di rata thata—e ne e mo atametsa kwa go Jehofa!

Kwa Denmark, Silvia o ne a isiwa kwa kampeng ya batshabi, mme ka bonako fela o ne a simolola go batla Basupi ba ga Jehofa. Mo lenaaneng la gagwe la diaterese, o ne a lemoga gore ofisi ya lekala la Mokgatlho wa Watch Tower kwa Denmark e kwa toropong ya Holbæk. Mme e ne e le kae koo? Silvia o ne a isiwa kwa kampeng e nngwe ka terena, mme fa a le mo tseleng ya go ya koo, terena e ne ya feta kwa Holbæk! Gape, o ne a tlola pelo ka boipelo.

Ka bonako fela morago ga moo, mo letsatsing le le mogote, Silvia o ne a palama terena a boela kwa Holbæk mme a tsamaya ka maoto go tswa kwa seteisheneng go ya kwa ofising ya lekala. O gakologelwa jaana: “Fa ke tsena mo tshingwaneng, ke ne ka nna mo setulong mme ka ithaya mo pelong ka re, ‘E ke paradaise!’” O ne a amogelwa sentle kwa lekaleng leno mme kgabagare o ne a kgona go ithuta Baebele ka namana.

Mme morago ga moo o ne a fudusediwa kwa mafelong a le mantsinyana. Silvia o ne a tsamaya a batla Basupi ba ga Jehofa fa a fitlha mo mafelong a a farologaneng a batshabi mme a simolole go ithuta Baebele sesha. Le fa go ntse jalo, morago ga dingwaga tse pedi, o ne a setse a ithutile mo go lekaneng go ka neela Jehofa botshelo jwa gagwe. O ne a kolobediwa mme go ise go ye kae a tsenela bodiredi jwa nako e e tletseng. Ka 1998, balaodi ba Denmark ba ne ba mo naya ditlankana tsa botshabi.

Gone jaanong Silvia o na le dingwaga di le 26 mme o direla kwa lefelong le le neng le mo gopotsa paradaise, ofisi ya lekala ya Basupi ba ga Jehofa kwa Denmark. Jaanong o akgela jaana: “Tota nka reng? Ga ke bolo go nna ke batla Jehofa go tloga ke le monnye. Jaanong ke mmone. Ke ne ke eletsa go dirisa botshelo jwa me mo tirelong ya gagwe, mme jaanong ke mo Bethele. Ke rapelela gore e tswelele e le legae la me mo dingwageng tse di tlang!”