Pego ya Baboledi ba Bogosi

Go Nosetsa Dipeo Tsa Boammaaruri Kwa Chile

KWA sekakeng se se kafa ntlheng ya bokone jwa Chile, go a tle go fete dingwaga di le dintsi pula e sa ne. Mme motlhang e nang, mmu o o omeletseng o o tletseng mafika o fetoga boalo jwa dithunya tsa mebalabala. Bontlentle jono bo gogela bajanala go tswa dikarolong tsotlhe tsa naga.

Le fa go ntse jalo, go na le sengwe se se kgatlhang le go feta se se diragalang mo bathong ba Chile. Metsi a boammaaruri jwa Baebele a elela gongwe le gongwe mo nageng eno mme batho ba le bantsi ba ba dipelo di phepa ba “thunya” jaaka ditšheshe ba nna barutwa ba ga Jesu Keresete. Tsela e nngwe e e dirisiwang go anamisa metsi ano a boammaaruri ke ka thelefouno. Maitemogelo a a latelang a bontsha matswela a a itumedisang a a nnang teng fa go dirisiwa tsela eno ya go neela bosupi.

• Moreri mongwe wa nako e e tletseng yo o bidiwang Karina o ne a kopiwa gore a bontshe mo thulaganyong ya kopano ya potologo gore a ka neela jang bosupi ka thelefouno. Le fa go ntse jalo, Karina o ne a ise a ko a dirise tsela eo mo tirong ya go neela bosupi. Mogolwane mongwe le mosadi wa gagwe ba ne ba kgothatsa Karina gore a nne le seabe mo thulaganyong eno ya kopano ka go boeletsa le ene dintlha tsa kafa a ka neelang bosupi ka thelefouno ka gone. Ba bile ba mo kgothaletsa gore a rapelele kaelo ya ga Jehofa mo kgannyeng eno. O ile a dira jalo mme kgabagare o ne a swetsa go leka go founa.

Karina o ne a tlhopha nomoro ya thelefouno ya mo motseng o o gaufi. Go ne ga araba modiredi wa dithelefouno mme Karina a mo tlhalosetsa lebaka la go founa ga gagwe. Modiredi wa dithelefouno o ne a arabela sentle mme go ne ga dirwa dithulaganyo tsa go buisana gape mo letsatsing la boraro. Loeto lwa go boela lwa thelefouno lo ile lwa felela ka thuto ya Baebele, go dirisiwa boroutšhara jwa Modimo o Batla Gore re Direng? Fa e sa le ka nako eo, ba ile ba nna le dithuto tse di monate le tse di matlhagatlhaga mme Karina o ile a romelela mosadi yoo dikgatiso go arabela dipotso tsa gagwe.

• Bernarda o ne a simolola go rerela monna mongwe yo ka phoso a ileng a founela nomoro ya gagwe. Go na le gore Bernarda a tenege, o ne a bolela gore ke mongwe wa Basupi ba ga Jehofa mme a ithaopela go mo thusa. Go ile ga simololwa motlotlo mme monna yoo o ne a reetsa fa a ntse a tlhalosa kafa Bogosi jwa Modimo bo tla tlogang bo fedisa tshiamololo ka teng. Monna yono o ne a naya Bernarda nomoro ya gagwe ya thelefouno mme ene o ile a dira maeto a go boela ka thelefouno. Mo go mongwe wa metlotlo ya bone, o ne a balela monna yono karolo nngwe go tswa mo bukeng ya Kitso E E Isang Botshelong Jo bo Sa Khutleng. O ne a botsa gore a ka bona jang khopi ya yone mme Bernarda o ne a mo romelela khopi mmogo le Baebele. Go ile ga dirwa dithulaganyo tsa gore a etelwe ke mokaulengwe mongwe yo o mo lefelong la bone, yo gone jaanong a ntseng a tswelela go “nosetsa” “semela” seno se se ntseng se gola sentle.

Ebu, mo mmung wa semoya o o omeletseng wa lefatshe leno, go na le dipeo tse di fitlhegileng tse di letetseng go tlhoga fa di fitlhelelwa ka metsi a boammaaruri a a nayang botshelo. Diketekete tsa batho ba ba nyorilweng ba ntse ba tswelela ba “tlhoga” le go “thunya” jaaka ditšheshe go nna batlhanka ba ba ikanyegang ba ga Jehofa Modimo.—Isaia 44:3, 4.