Kafa Setlhopha se se Laolang se Farologanang ka Teng le Lekgotla la Semolao

DIPOKANO tsa ngwaga le ngwaga tsa Watch Tower Bible and Tract Society of Pennsylvania di ntse di tshwarwa fa e sa le go simolola ka January 1885. Fa go ne go sa ntse go phuthwa Bakeresete ba ba tloditsweng kwa bofelong jwa lekgolo la bo19 la dingwaga, batsamaisi le baokamedi ba lekgotla leno ba ne ba na le tsholofelo ya kwa legodimong. Tota e bile, seno e sa le se ntse se le jalo.

Go ne ga dirwa dilo ka tsela e e farologaneng mo lekgetlhong le le lengwe fela. Ka 1940, Hayden C. Covington—yo ka nako eo e neng e le mogakolodi wa Mokgatlho mo go tsa semolao e bile e le mongwe wa “dinku di sele,” a na le tsholofelo ya mo lefatsheng—o ne a tlhophiwa go nna motsamaisi wa Mokgatlho. (Johane 10:16) O ne a nna mothusa poresidente wa Mokgatlho go simolola ka 1942 go ya go 1945. Ka nako eo, Mokaulengwe Covington o ne a tlogela tiro ya go nna motsamaisi go dumalana le se se neng se lebega e le thato ya ga Jehofa ka nako eo—gore batsamaisi botlhe le baokamedi ba lekgotla la Pennsylvania e tshwanetse go bo e le Bakeresete ba ba tloditsweng. Lyman A. Swingle o ne a tsaya maemo a ga Hayden C. Covington mo setlhopheng sa batsamaisi, mme Frederick W. Franz o ne a tlhophiwa go nna mothusa poresidente.

Ke ka ntlha yang fa batlhanka ba ga Jehofa ba ne ba dumela gore batsamaisi botlhe le baokamedi ba Watch Tower Bible and Tract Society of Pennsylvania ba tshwanetse go bo e le Bakeresete ba ba tloditsweng? Ka gonne mo metlheng eo, setlhopha sa batsamaisi le baokamedi ba lekgotla la Pennsylvania se ne se amanngwa thata le Setlhopha se se Laolang sa Basupi ba ga Jehofa, se ka metlha se ntseng se dirwa fela ke banna ba ba tloditsweng ka moya.

Pokano ya Ngwaga le Ngwaga e e Botlhokwa Thata

Kwa pokanong ya ngwaga le ngwaga e e neng e tshwerwe ka October 2, 1944 kwa Pittsburgh, maloko a lekgotla la Pennsylvania a ne a amogela maitlamo a le marataro a a neng a baakanya molaotheo wa lone. Molaotheo oo, o ne o tlhalosa gore batho ba ba ntshetsang tiro ya Mokgatlho meneelo ba newe diabe tsa go tlhopa, mme fa o ne o baakanngwa laboraro seno se ne sa fedisiwa. Pego ya pokano eo ya ngwaga le ngwaga e ne ya bolela jaana: “Maloko a Mokgatlho ga a tshwanela go feta 500 . . . Mongwe le mongwe yo o tlhophilweng o tshwanetse gore e bo e le motlhanka wa nako e e tletseng wa Mokgatlho kgotsa motlhanka yo e seng wa nako yotlhe wa [phuthego] ya basupi ba ga Jehofa mme o tshwanetse go bontsha moya wa Morena.”

Morago ga foo, batsamaisi ba Mokgatlho ba ne ba tlhophelwa maemo a bone ke batho ba ba neng ba ineetse ka botlalo mo go Jehofa, go sa kgathalesege gore ba ne ba ntsha moneelo wa madi a a kana kang gore tiro ya Bogosi e tswelele pele. Seno se ne se dumalana le go itshekisiwa kgato ka kgato go go boleletsweng pele mo go Isaia 60:17, mo re balang jaana teng: “Mo boemong jwa kgotlho ke tla tlisa gouta, mme mo boemong jwa tshipi ke tla tlisa selefera, mme mo boemong jwa logong, kgotlho, mme mo boemong jwa maje, tshipi; ke tla tlhoma kagiso go nna balebedi ba gago le tshiamo go nna baabi ba gago ba tiro.” Boporofeti jono fa bo bua ka “balebedi” le ka “baabi ba tiro,” bo ne bo tlhalosa tsela e dilo di tla tokafadiwang ka yone mo mokgweng o phuthego e tsamaisiwang ka teng mo bathong ba ga Jehofa.

Kgato eno ya botlhokwa ya go dumalanya phuthego le tsela ya puso ya Modimo e ne ya direga kwa bofelong jwa “maitseboa le meso e le dikete di le pedi le makgolo a mararo” e e umakiwang mo go Daniele 8:14. Ka nako eo, “lefelo le le boitshepo” le ne la “tlisiwa mo boemong jwa lone jo bo tshwanetseng.”

Le fa go ntse jalo, morago ga pokano eo e e botlhokwa ka 1944, go ne ga sala potso ya botlhokwa. E re ka ka nako eo Setlhopha se se Laolang se ne se itsege e le batsamaisi ba le supa ba lekgotla la Pennsylvania, a seno se ne se raya gore go ne go  ka se direge gore Setlhopha se se Laolang se dirwe ka Bakeresete ba ba tloditsweng ba ba fetang ba le supa? Mo godimo ga moo, ka gonne batsamaisi ba ne ba tlhophiwa ke maloko a lekgotla, a maloko a lekgotla a ne a tlhopha maloko a Setlhopha se se Laolang kwa pokanong ya ngwaga le ngwaga ka ngwaga mongwe le mongwe? A batsamaisi ba Watch Tower Bible and Tract Society of Pennsylvania le maloko a Setlhopha se se Laolang ke selo se le sengwe fela kgotsa go na le pharologano mo gare ga bone?

Pokano e Nngwe E e Sa Lebalesegeng ya Ngwaga le Ngwaga

Dipotso tseno di ne tsa arabiwa kwa pokanong ya ngwaga le ngwaga e e neng e tshwerwe ka October 1, 1971. Ka nako eo, sengwe sa dibui se ne sa tlhalosa gore setlhopha se se laolang sa “motlhanka yo o boikanyego le yo o botlhale” se nnile teng dingwaga di le makgolokgolo pele ga Watch Tower Bible and Tract Society of Pennsylvania e nna teng. (Mathaio 24:45-47) Setlhopha se se laolang se ne sa tlhamiwa ka Pentekosete ya 33 C.E., makgolo a dingwaga a feta 18 pele ga lekgotla la Pennsylvania le nna teng. Pele, setlhopha se se laolang se ne se dirwa ke baaposetoloi ba le 12, e seng banna ba le 7. Go bonala palo ya bone e ne ya okediwa moragonyana, ka gonne ‘baaposetoloi le banna ba bagolwane ba Jerusalema’ ba ne ba eteletse pele.—Ditiro 15:2.

Ka 1971 sone sebui seo se ne sa tlhalosa gore maloko a Mokgatlho wa Watch Tower a ne a ka se tlhophe maloko a a tloditsweng a Setlhopha se se Laolang. Ka ntlha yang? O ne a re: “Ka gonne setlhopha se se laolang sa setlhopha sa ‘motlhanka’ ga se tlhomiwe ke motho ope. Se tlhomiwa ke . . . Jesu Keresete e bong Tlhogo ya phuthego ya boammaaruri ya Bokeresete le Morena le Mong wa setlhopha ‘sa mothanka yo o boikanyego le yo o botlhale.’” Jaanong go phepafetse gore maloko a Setlhopha se se Laolang a ka se ka a tlhophiwa ke maloko a lekgotla lepe la semolao gore a tsene mo maemong ao.

Sebui se ne sa tswelela ka go bua mafoko ano a a botlhokwa: “Setlhopha se se laolang ga se na baokamedi jaaka Setlhopha sa Batsamaisi ba Mokgatlho, e leng, poresidente, mothusa poresidente, mokwaledi wa motshwaramatlotlo le mothusa mokwaledi wa motshwaramatlotlo. Se na le modulasetulo fela.” Go fetile dingwaga tse dintsi poresidente ya lekgotla la Pennsylvania e le leloko le le okametseng la Setlhopha se se Laolang. Ga go tlhole go tla nna jalo. Le fa gone maloko a Setlhopha se se Laolang a sa lekane ka maitemogelo kgotsa ka bokgoni, a tla lekana ka maikarabelo. Sebui se ne sa oketsa jaana: “Leloko lengwe le lengwe la setlhopha se se laolang le ka nna modulasetulo go sa tlhokege gore ka nako e e tshwanang e bo e le poresidente ya . . . Mokgatlho . . . Go tla ikaega fela ka thulaganyo ya setlhopha se se laolang ya go refosanela bodulasetulo.”

Kwa pokanong eo ya ngwaga le ngwaga e e sa lebalesegeng ka 1971, go ne ga dirwa pharologanyo e e bonalang sentle gareng ga maloko a a tloditsweng ka moya a Setlhopha se se Laolang le batsamisi ba lekgotla la Pennsylvania. Mme maloko a Setlhopha se se Laolang a ne a tswelela a direla e le batsamaisi le baokamedi ba Mokgatlho. Le fa go ntse jalo, gompieno go tsoga potso eno: A go na le lebaka lepe la Dikwalo la go bo batsamaisi ba Watch Tower Bible and Tract Society of Pennsylvania ba tshwanetse go bo e le maloko a Setlhopha se se Laolang?

Karabo ke nnyaa. Lekgotla la Pennsylvania ga se lone fela lekgotla la semolao le le dirisiwang ke Basupi ba ga Jehofa. Go na le a mangwe. Lengwe la one ke Watchtower Bible and Tract Society of New York, Incorporated. Le tlhokometse tiro ya rona kwa United States. Ruri Jehofa o ntse a segofatsa lekgotla leo, le fa batsamaisi ba bantsi ba lone le baokamedi e le ba “dinku di sele.” Kwa Boritane go dirisiwa International Bible Students Association. Mo dinageng tse dingwe go dirisiwa makgotla a mangwe a semolao gore go tsweledisetswe pele dilo tse di direlwang Bogosi. Otlhe a a thusa e bile a na le seabe sa go dira gore dikgang tse di molemo di rerwe lefatshe ka bophara. Go sa kgathalesege gore a kwa kae kgotsa gore ke bomang ba e leng batsamaisi kgotsa baokamedi ba one, makgotla ano a semolao a kaelwa ke tsela ya puso ya Modimo mme a dirisiwa ke Setlhopha se se Laolang. Ke sone se makgotla ao a semolao a abelwang ditiro go tsweledisa pele dilo tse di direlwang Bogosi.

Go nna le makgotla a semolao go re solegela molemo. Ka one re kgona go dira dilo go ya ka melao ya mafelo a rona le ya naga, jaaka Lefoko la Modimo le laela. (Jeremia 32:11; Baroma 13:1) Makgotla a semolao a tlhokomela tiro ya rona ya  go anamisa molaetsa wa Bogosi ka go gatisa Dibaebele, dibuka, dimakasine, diboroutšhara le dikgatiso tse dingwe. Makgotla ao a semolao gape a direla e le didirisiwa tsa semolao tse di tlhokomelang dikgang tse di amanang le dithoto, dithuso tsa namolo le ditumalano tsa go dirisa mafelo a dikopano, jalo jalo. Re lebogela tiro e e dirwang ke makgotla ao a semolao.

Leina la ga Jehofa le Bewa Kwa Pele

Ka 1944, Setlhogo II sa molaotheo wa Watch Tower Bible and Tract Society of Pennsylvania se ne sa baakanngwa go gatelela maikaelelo a lekgotla leno. Go ya ka molaotheo oo, maikaelelo a Mokgatlho a akaretsa boikaelelo jono jo bo botlhokwa: “Go rera efangele ya bogosi jwa Modimo kafa tlase ga ga Keresete Jesu mo ditšhabeng tsotlhe go neela bosupi ka leina, lefoko le bogodimodimo jwa Modimo Mothatayotlhe JEHOFA.”

Fa e sa le go simolola ka 1926 ‘motlhanka yo o boikanyego’ o ntse a beile leina la ga Jehofa kwa pele. Ngwaga o o kgethegileng thata ke wa 1931 fa Baithuti ba Baebele ba ne ba simolola go dirisa leina Basupi ba ga Jehofa. (Isaia 43:10-12) Dikgatiso tsa Mokgatlho tse di ileng tsa gatelela leina la Modimo di akaretsa buka ya Jehovah (1934), “Let Your Name Be Sanctified” (1961), le ya “The Nations Shall Know That I Am Jehovah”—How? (1971).

Re tshwanetse go umaka ka go kgethega Thanolo ya Lefatshe le Lesha ya Dikwalo Tse di Boitshepo, e e gatisitsweng e feletse ka Seesemane ka 1960. Mo go yone, leina la ga Jehofa le tlhaga gongwe le gongwe mo go tlhagang ditlhaka tse nnè tsa leina la Modimo teng mo Dikwalong Tsa Sehebera. Thanolo eno gape e na le leina la Modimo mo mafelong a le 237 mo Dikwalong Tsa Bokeresete Tsa Segerika mme go kanoka go go dirilweng ka kelotlhoko go ile ga bontsha gore go ne go na le mabaka a a utlwalang a go dira jalo. A bo re leboga jang ne go bo Jehofa a ile a letlelela “motlhanka” le Setlhopha sa gagwe se se Laolang, gore ba dirise mafelo a bone a go gatisa le makgotla a semolao go dira gore leina la gagwe le itsiwe lefatshe ka bophara ka ditsela tse di farologaneng!

Go Rotloetsa go Anamisiwa ga Lefoko la Modimo

Batho ba ga Jehofa ba ntse ba neela bosupi ka leina la gagwe ba tlhomame e bile ba ntse ba tlotlomatsa Lefoko la gagwe ka go gatisa le go anamisa dikgatiso tse di theilweng mo Baebeleng di le dimilionemilione mmogo le Baebele ka boyone. Kwa tshimologong ya bo1900, Mokgatlho wa Watch Tower o ne wa nna le ditshwanelo tsa go gatisa The Emphatic Diaglott, kgatiso ya mokwalo wa dipuo tse pedi wa Segerika le Seesemane ya ga Benjamin Wilson ya Dikwalo Tsa Bokeresete Tsa Segerika. Mokgatlho o ne wa gatisa King James Version ya Baithuti ba Baebele e e neng e na le mametlelelo ya ditsebe di le 500. Ka 1942 o ne wa gatisa King James Version e e nang le ditshupiso. Mme ka 1944 Mokgatlho o ne wa simolola go gatisa American Standard Version ya 1901, e e dirisang leina la Modimo. Leina la ga Jehofa gape le ne le tlhaga mo thanolong ya The Bible in Living English, ya ga Stephen T. Byington, e e neng ya gatisiwa ke Mokgatlho ka 1972.

Makgotla a semolao a a dirisiwang ke Basupi ba ga Jehofa a ile a thusa mo go gatiseng le go aba dithanolo tseno tsotlhe tsa Baebele. Le fa go ntse jalo, se se tlhomologileng thata ke gore go ntse go na le tirisanommogo e kgolo fa gare ga Mokgatlho wa Watch Tower le setlhopha sa Basupi ba ga Jehofa ba ba tloditsweng, se se bopang Komiti ya Thanolo ya Baebele ya Lefatshe le Lesha. Re itumelela gore go tla go fitlha gompieno, go gatisitswe dikhopi di feta 106 400 000 tsa thanolo eno ka dipuo di le 38, e feletse kgotsa bontlhanngwe jwa yone.

Watch Tower Bible and Tract Society of Pennsylvania ruri ke mokgatlho wa Baebele!

‘Motlhanka yo o boikanyego’ o ‘tlhomilwe gore a okamele dilo tsotlhe tsa mong wa gagwe.’ Dilo tseno di akaretsa dikago tsa ntlokgolo kwa New York State, U.S.A., le makala a le 110 a jaanong  a dirang lefatshe ka bophara. Maloko a setlhopha sa motlhanka a itse gore a tla ikarabelela ka tsela e a dirisitseng ka teng se a se neilweng gore a se tlhokomele. (Mathaio 25:14-30) Le fa go ntse jalo, seno ga se thibele ‘motlhanka’ gore a letle balebedi ba ba tshwanelegang ba “dinku tse dingwe” gore ba dire ditiro tsa semolao le tsa botsamaisi. Tota e bile, seno se naya maloko a Setlhopha se se Laolang sebaka sa gore ba kgone go dirisa nako e ntsi “mo thapelong le mo bodireding jwa lefoko.”—Ditiro 6:4.

Fa fela maemo a lefatshe leno a sa ntse a letla, Setlhopha se se Laolang, se se emelang “motlhanka yo o boikanyego le yo o botlhale,” se tla dirisa makgotla a semolao. Makgotla ano a a thusa mme ga se gore go ka se dirwe sepe kwantle ga one. Fa puso e ka laela gore lekgotla la semolao le fedisiwe, tiro ya go rera e tla nna e tswelela pele. Le gone jaana, mo dinageng tse go nang le dithibelo kwa go tsone mme go sa dirisiwe makgotla a semolao teng, molaetsa wa Bogosi o a bolelwa, go dirwa barutwa, mme go na le koketsego ya dilo tsa puso ya Modimo. Seno se direga ka gonne Basupi ba ga Jehofa ba a jala e bile ba a nosetsa, mme ‘Modimo o ntse a godisa.’—1 Bakorintha 3:6, 7.

Jaaka re lebile kwa isagweng, re na le tshepo ya gore Jehofa o tla tlhokomela dilo tsa semoya le tsa senama tse batho ba gagwe ba di tlhokang. Ene le Morwawe, Jesu Keresete, ba tla tswelela ba kaela dilo ka tsela ya selegodimo e bile ba ema nokeng tiro ya go rera ka Bogosi gore e wediwe. Ee, le fa e le eng se rona batlhanka ba Modimo re se dirang, jaaka re se dira ‘e seng ka mophato wa sesole, le fa e le ka maatla, mme ka moya wa ga Jehofa.’ (Sekarea 4:6) Ka jalo re rapelela thuso ya bomodimo, re itse gore re tla kgona go wetsa tiro e Jehofa a e re neileng gore re e dire mo motlheng ono wa bofelo, ka maatla a a re nayang one!