A o Tshelela Boineelo Jwa Gago?

“Le fa e le eng se lo se dirang, se direng ka moya otlhe jaaka lo se direla Jehofa mme e seng batho.”—BAKOLOSA 3:23.

1. Go ya ka tsela ya selefatshe, lefoko “boineelo” le kaya eng?

BATSHAMEKI ba thusiwa ke eng go ntsha ga tshwene? Mo theneseng, kgwele ya dinao, bolotloa, go thuba lebelo, kolofo, kana motshameko ope fela, ditswerere di kgona go ntsha ga tshwene fa fela di na le boineelo jo bo sa reketleng. Go itekanela sentle mo mmeleng le mo mogopolong ke tsone dilo tse di tlhokegang thata. Seno se dumalana sentle le nngwe ya ditlhaloso tsa lefoko “boineelo,” e leng “go dira selo ka pelo yotlhe.”

2. Mo Baebeleng “boineelo” bo kaya eng? Tshwantsha.

² Le fa go ntse jalo, “boineelo” bo kaya eng go ya ka Baebele? Lereo “go ineela” le ranola lediri la Sehebera le le kayang “go ikgaoganya; go kgaoganngwa; go boela morago.” * Kwa Iseraeleng wa bogologolo, Arone Moperesiti yo Mogolo o ne a apara sethathelela tlhogo se e neng e le “letshwao le le boitshepo la boineelo,” se se neng se dirilwe ka papetlana e e phatsimang ya gouta e e itshekileng e mo go yone go neng go gabilwe mafoko a Sehebera a a reng “Boitshepo ke jwa ga Jehofa.” Se ne se gopotsa moperesiti yo mogolo gore o tshwanetse go tila go dira sepe fela se se neng se tla leswafatsa lefelo le le boitshepo “ka gonne letshwao la boineelo, leokwane le le tlotsang la Modimo wa gagwe, le [ne le le] mo go ene.”—Ekesodo 29:6; 39:30; Lefitiko 21:12.

3. Boineelo bo tshwanetse go ama jang boitsholo jwa rona?

³ Re kgona go bona go tswa mo ditemaneng tse di dikologileng ntlha eno gore boineelo ke selo se se masisi. Bo kaya go ithaopela go itshwaya o le motlhanka wa Modimo, mme go tlhoka gore motho a nne le boitsholo jo bo phepa. Ka gone, re kgona go tlhaloganya gore ke eng fa moaposetoloi Petere a ile a nopola Jehofa fa a re: “Lo nne boitshepo, ka gonne nna ke boitshepo.” (1 Petere 1:15, 16) Rona Bakeresete ba ba ineetseng re na le boikarabelo jo bo masisi jwa go tshela ka tsela e e dumalanang le boineelo jwa rona, re ikanyega go ya bokhutlong. Mme gone boineelo jwa Bokeresete bo akaretsa eng?—Lefitiko 19:2; Mathaio 24:13.

4. Re tsaya kgato efe fa re ineela, mme re ka e tshwantsha le eng?

⁴ Fa re sena go nna le kitso e e boammaaruri kaga Jehofa Modimo le maikaelelo a gagwe le kaga Jesu Keresete le seabe sa gagwe mo maikaelelong ao, re ile ra dira tshwetso ka borona ya go direla Modimo ka pelo yotlhe, mogopolo le ka nonofo yotlhe. (Mareko 8:34; 12:30; Johane 17:3) Tota e bile seo se ka tsewa e le maikano a motho a a dirileng ka namana, gore o ineela ka bojotlhe mo Modimong. Ga re a ka ra dira boineelo joo ka ntlha ya go tseega maikutlo. Re bo dirile morago ga go akanya ka kelotlhoko le go rapela, re dirisa maatla a go akanya. Ka gone, e ne e se tshwetso ya nakwana. Re ka se tshwane le motho yo o simololang go lema tshimo mme morago a e tlogele fa gare ka gonne e le tiro e e bokete thata kana ka gonne nako ya thobo e lebega e le kgakala thata kana ka go bo a sa tlhomamisege ka yone. Akanya ka dikai tsa batho bangwe ba ba ileng ba ‘baya diatla tsa bone mo mogomeng’ wa tiro ya puso ya Modimo mo maemong a a thata.—Luke 9:62; Baroma 12:1, 2.

Ga ba Itatola Boineelo Jwa Bone

5. Jeremia o ne a nna sekao se se molemo jang sa motlhanka yo o ineetseng wa Modimo?

⁵ Bodiredi jwa ga Jeremia jwa boporofeti kwa Jerusalema bo ile jwa tsaya dingwaga tse di fetang  40 (647-607 B.C.E.), mme e ne e se kabelo e e motlhofo. O ne a itse sentle dilo tse a neng a tlhaela mo go tsone. (Jeremia 1:2-6) O ne a tlhoka bopelokgale le boitshoko gore a lebane le batho ba Juda ba ba tlhogoethata letsatsi le letsatsi. (Jeremia 18:18; 38:4-6) Le fa go ntse jalo, Jeremia o ne a ikanya Jehofa Modimo, yo o neng a mo nonotsha mo a neng a itshupa e le motlhanka yo o ineetseng tota wa Modimo.—Jeremia 1:18, 19.

6. Moaposetoloi Johane o ile a re tlhomela sekao sefe?

⁶ Go tweng ka moaposetoloi Johane yo o ikanyegang, yo o neng a isiwa botshwarong a setse a tsofetse mo maemong a a makgwakgwa kwa setlhaketlhakeng sa Patamose “ka ntlha ya go bua ka Modimo le go naya bosupi ka Jesu”? (Tshenolo 1:9) O ne a itshoka mme a tshela go dumalana le boineelo jwa gagwe jwa go nna Mokeresete ka dingwaga di le 60. O ne a falola go senngwa ga Jerusalema ke masole a Roma. O ne a nna le tshiamelo ya go kwala Efangele e le nngwe, makwalo a mararo a a tlhotlheleditsweng le buka ya Tshenolo e mo go yone a neng a bonela pele ntwa ya Haramagedona. A o ne a tlogela fa a ne a utlwa gore Haramagedona ga e kitla e tla mo motlheng wa gagwe? A o ile a ineelela go se kgatlhege? Nnyaa, Johane o ile a tswelela a ikanyega go fitlha a swa, a itse gore le mororo ‘nako e e tlhomilweng e ne e le gaufi,’ ponatshegelo ya gagwe e ne e tla diragadiwa moragonyana.—Tshenolo 1:3; Daniele 12:4.

Dikai Tsa Segompieno Tsa Boineelo

7. Mokaulengwe mongwe o ne a tlhoma sekao se se molemo jang sa boineelo jwa Bokeresete?

⁷ Mo metlheng ya segompieno diketekete tsa Bakeresete ba ba ikanyegang di ile tsa kgomarela boineelo jwa bone ka tlhoafalo lefa ba se kitla ba tshela go fitlha ba bona Haramagedona. Mongwe wa batho ba ba ntseng jalo e ne e le Ernest E. Beavor wa kwa Engelane. O ile a nna Mosupi ka 1939, fa Ntwa ya Lefatshe II e ne e simolola mme a tlogela kgwebo ya gagwe e e neng e atlegile thata ya ditshwantsho tsa phasalatso e le gore a tsenele bodiredi jwa nako e e tletseng. O ne a ya kgolegelong dingwaga di le pedi ka ntlha ya boitlhaodi jwa gagwe jwa Bokeresete. Lelapa la gagwe le ne la mo ema nokeng, mme ka 1950 bana ba gagwe ba bararo ba ne ba ya Sekolong sa Baebele sa Watchtower sa Gileate go thapisediwa tiro ya borongwa kwa New York. Mokaulengwe Beavor o ne a tlhagafetse jaana mo tirong ya go rera mo e bileng ditsala di ne di mmitsa Ernie wa Haramagedona. O ne a tshelela boineelo jwa gagwe ka boikanyegi go fitlha a swa ka 1986, a itsise batho gore ntwa ya Modimo ya Haramagedona e atametse. O ne a sa tseye boineelo jwa gagwe mo Modimong e le kgolagano ya nakwana fela! *—1 Bakorintha 15:58.

8, 9. (a) Bontsi jwa makawana a kwa Spain bo ile jwa tlhoma sekao sefe mo motlheng wa puso ya ga Franco? (b) Ke dipotso dife tse di tshwanelang?

⁸ Sekao se sengwe sa motho yo o neng a na le tlhoafalo e kgolo ke sa kwa Spain. Mo motlheng wa puso ya ga Franco (1939-75), makgolokgolo a basha ba ba ineetseng ba Basupi ba ne ba boloka boitlhaodi jwa Bokeresete. Bontsi jwa bone ba ne ba fetsa dingwaga di le lesome kana go feta  mo dikgolegelong tsa sesole. Mosupi mongwe e bong Jesús Martín, o ile a ba a atlholelwa dingwaga tse di ka tshwarang 22 fa di kopanngwa. O ile a kgwathisiwa setlhogo ka nako ya fa a ne a le mo kgolegelong ya sesole kwa Afrika Bokone. Ga go sepe sa dilo tseno se se neng se le motlhofo, le fa go ntse jalo o ile a se ka a ineela.

⁹ Gantsi makawana ano a ne a sa itse gore a tla gololwa leng, fa e le gore gone a ne a tlile go gololwa, ka gonne ba ne ba atlholelwa dikatlholo tse dintsintsi. Le fa go ntse jalo, ba ile ba nna ba ikanyega le go tswelela pele ba tlhagafetse mo bodireding ba ntse ba le mo kgolegelong. Fa kgabagare maemo a ne a simolola go tokafala ka 1973, bontsi jwa Basupi bano, ba ka nako eo ba neng ba le mo dingwageng tse di simololang tsa bo30, ba ne ba gololwa mo kgolegelong mme ba tsenela bodiredi jwa nako e e tletseng, bangwe ba bone ba nna babulatsela ba ba kgethegileng le balebedi ba ba etang. Ba ne ba tshelela boineelo jwa bone fa ba le kwa kgolegelong, mme bontsi jwa bone ba ile ba tswelela pele jalo fa e sa le ba gololwa. * Go tweng ka rona gompieno? A re tshelela boineelo jwa rona fela jaaka batho bano ba ba ikanyegang?—Bahebera 10:32-34; 13:3.

Pono e e Siameng ka Boineelo Jwa Rona

10. (a) Re tshwanetse go leba jang boineelo jwa rona? (b) Jehofa o leba jang tirelo e re mo direlang yone?

¹⁰ Re leba jang boineelo jwa rona mo Modimong jwa gore re tla dira thato ya gagwe? A ke selo se se tlang pele mo botshelong jwa rona? Le fa maemo a rona e ka tswa e le afe, e ka ne re basha kana re godile, re nyetse kana ga re a nyala, re a lwala kana ga re lwale, re tshwanetse go kgaratlhela go tshela tumalanong le boineelo jwa rona go ya kafa maemo a rona a leng ka teng. Motho mongwe maemo a gagwe a ka mo letla go tsenela bodiredi jwa nako e e tletseng e le mmulatsela, e le modiri wa moithaopi kwa ofising ya lekala ya Mokgatlho wa Watch Tower, e le morongwa, kana modiredi yo o etang. Kafa letlhakoreng le lengwe, batsadi bangwe ba ka tswa ba tshwaregile thata ba tlhokomela dilo tsa nama le tsa semoya tsa malapa a bone. A Jehofa o tlhaetsa matlho diura di se kae tse ba di fetsang ba le mo bodireding kgwedi le kgwedi fa di bapisiwa le diura tse dintsi tse di dirwang ke badiredi ba nako e e tletseng? Nnyaa. Modimo le ka motlha ga a re batle dilo tse re se nang tsone. Moaposetoloi Paulo o ile a bolela molaomotheo ono: “Fa go iketleetsa go le teng, go amogelesega segolobogolo go ya ka se motho o nang le sone, e seng go ya ka se motho a se nang sone.”—2 Bakorintha 8:12.

11. Go bona poloko ga rona go ikaegile ka eng?

¹¹ Mme gone, go bona poloko ga rona go ikaegile ka bopelonomi jo bo sa re tshwanelang jwa ga Jehofa ka Keresete Jesu Morena wa rona, e seng ka sepe fela se re ka nnang ra mo direla sone. Paulo o ile a tlhalosa sentle jaana: “Botlhe ba leofile e bile ba tlhaela kgalalelo ya Modimo, mme go ntse jaaka e kete ke mpho ya mahala go bo ba bolelwa e le ba ba siameng ka bopelonomi jo bo sa re tshwanelang jwa gagwe ka go gololwa ka thekololo e e neng ya duelwa ke Keresete Jesu.” Le fa go ntse jalo, ditiro tsa rona ke bosupi jwa gore re na le tumelo e e nonofileng mo ditsholofetsong tsa Modimo.—Baroma 3:23, 24; Jakobe 2:17, 18, 24.

12. Ke eng fa re sa tshwanela go ipapisa le ba bangwe?

 ¹² Ga go tlhokege gore re ipapise le ba bangwe malebana le nako e re e fetsang re le mo tirelong ya Modimo, dibuka tsa Baebele tse re di tsamaisang, kana palo ya dithuto tsa Baebele tse re di tshwarang. (Bagalatia 6:3, 4) Le fa re ka tswa re atlega go le kana kang mo bodireding jwa Bokeresete, rotlhe re tshwanetse go gakologelwa mafoko ano a ga Jesu a a re kokobetsang: “Jalo, le lona, fa lo dirile dilo tsotlhe tse lo di abetsweng, lo re, ‘Re batlhanka ba ba se nang molemo wa sepe. Se re se dirileng ke se re tshwanetseng go bo re ne re se dirile.’” (Luke 17:10) Tota ke gantsi go le kae re ka reng re ‘dirile dilo tsotlhe tse re di abetsweng’? Ka gone re ka ipotsa gore, Tirelo e re e direlang Modimo e tshwanetse go nna ya boleng jo bo kana kang?—2 Bakorintha 10:17, 18.

Go Dira Gore Letsatsi Lengwe le Lengwe le Nne Botlhokwa

13. Re tshwanetse go nna le boikutlo bofe fa re ntse re diragatsa boineelo jwa rona?

¹³ Paulo o kwala jaana fa a sena go gakolola basadi, banna, bana, batsadi le batlhanka: “Le fa e le eng se lo se dirang, se direng ka moya otlhe jaaka lo se direla Jehofa mme e seng batho, gonne lo a itse gore lo tla amogela maduo a a tshwanetseng a boswa a a tswang kwa go Jehofa. Nnang batlhanka ba Mong wa rona, e bong Keresete.” (Bakolosa 3:23, 24) Ga re dire tiro ya ga Jehofa ka boikaelelo jwa go kgatlha batho. Re leka go direla Modimo ka go etsa sekao sa ga Jesu Keresete. O ne a dira bodiredi jwa gagwe jo bo tsereng nako e khutshwane a bo leba e le jo bo potlakileng.—1 Petere 2:21.

14. Petere o ile a ntsha tlhagiso efe malebana le malatsi a bofelo?

¹⁴ Moaposetoloi Petere le ene o ile a bontsha go tlhagafala. Mo lekwalong la gagwe la bobedi, o ile a tlhagisa gore mo malatsing a bofelo go ne go tla nna le basotli—batlhanogi le babelaedi—ba go ya ka dikeletso tsa bone ba neng ba tla belaela go nna gone ga ga Keresete. Le fa go ntse jalo, Petere o ile a re: “Jehofa ga a bonya mabapi le tsholofetso ya gagwe, jaaka batho bangwe ba tsaya gore ke bonya, mme o pelotelele le lona ka gonne  ga a eletse gore ope a senngwe mme o eletsa gore botlhe ba fitlhe mo boikwatlhaong. Le fa go ntse jalo letsatsi la ga Jehofa le tla tla jaaka legodu.” Ee, ruri letsatsi la ga Jehofa le tla tla. Ka gone, letsatsi le letsatsi re tshwanetse go bontsha kafa tumelo ya rona e tlhomameng thata ka teng mo ditsholofetsong tsa Modimo.—2 Petere 3:3, 4, 9, 10.

15. Re tshwanetse go leba jang letsatsi lengwe le lengwe mo botshelong jwa rona?

¹⁵ Re tshwanetse go dirisa letsatsi lengwe le lengwe go baka Jehofa go supa fa re tshelela boineelo jwa rona ka kelotlhoko. Fa letsatsi lengwe le lengwe le phirima, a re ka leba kwa morago mme ra bona seabe se re nnileng le sone mo go direng gore leina la Modimo le itshepisiwe le mo go boleleng dikgang tse di molemo tsa Bogosi? Gongwe e ne e le ka boitshwaro jwa rona jo bo phepa, motlotlo o o agang, kana tsela e e molemo e re amegang ka malapa a rona le ditsala ka yone. A re ile ra dirisa ditshono tse di neng tsa tlhaga go bolelela batho ba bangwe ka tsholofelo ya rona ya Bokeresete? A re ile ra thusa mongwe go akanya ka masisi ka ditsholofetso tsa Modimo? Letsatsi le letsatsi, a re ikgobokanyetseng sengwe se se molemo ka tsela ya semoya, re ipolokela letlotlo mo bobolokelong jwa semoya jaaka fa re ka rialo.—Mathaio 6:20; 1 Petere 2:12; 3:15; Jakobe 3:13.

Se Letle Pono ya Gago e Nna Letobo

16. Satane o leka go koafatsa boineelo jwa rona mo Modimong ka ditsela dife?

¹⁶ Re tshela mo nakong e e ntseng e thatafalela Bakeresete go ya pele. Satane le baemedi ba gagwe ba leka go re foufatsa gore re se ka ra kgona go bona pharologanyo gareng ga se se siameng le se se phoso, se se phepa le se se seng phepa, boitsholo jo bo molemo le jo bo maswe, se se tshwanetseng le se se sa tshwanelang. (Baroma 1:24-28; 16:17-19) O dirile gore go nne motlhofo gore re leswafatse dipelo le megopolo ya rona ka dithulaganyo  tse re di tlhophang tsa thelebishene kana tsa khomputara. A ka dira gore pono ya rona ya semoya e nne letobo, kana ya thaakana, e le gore re se ka ra lemoga maano a gagwe a a boferefere. Fa re ka ineelela go tlhokomologa dilo tsa rona tsa semoya tse di botlhokwa, boikemisetso jwa rona jwa gore re tla tshelela boineelo jwa rona bo ka koafala mme ra tlosa seatla mo “mogomeng.”—Luke 9:62; Bafilipi 4:8.

17. Kgakololo ya ga Paulo e ka re thusa jang go nna re na le botsala le Modimo?

¹⁷ Ka gone, mafoko a Paulo a ileng a a bua le phuthego ya Bathesalonika a tshwanela tota: “Seno ke se Modimo o se ratang, go itshepisiwa ga lona, gore lo ithibe mo kgokafalong; gore mongwe le mongwe wa lona a itse kafa a ka tsholang sejana sa gagwe ka gone se le boitshepo e bile se tlotlega, e seng mo go eletseng tlhakanelodikobo ka bopelotshetlha mo go ntseng jaaka mo ditšhaba tse di sa itseng Modimo le tsone di nang le gone.” (1 Bathesalonika 4:3-5) Boitsholo jo bo maswe bo ile jwa dira gore batho bangwe, ba ba ileng ba tlhokomologa boineelo jwa bone mo Modimong, ba kgaolwe mo phuthegong ya Bokeresete. Ba ile ba letla gore botsala jwa bone le Modimo bo koafale mo ba neng ba sa tlhole ba mo tsaya a le botlhokwa mo botshelong jwa bone. Le fa go ntse jalo, Paulo o ile a re: “Modimo o ne a re bitsa, e seng gore a letlelele boitshekologo, mme e ne e le gore re itshepisiwe. Jalo he, motho yo o bontshang go itlhokomolosa ga a itlhokomolose motho, mme o itlhokomolosa Modimo, yo o tsenyang moya wa gagwe o o boitshepo mo go lona.”—1 Bathesalonika 4:7, 8.

O Ikaeletse go Dira Eng?

18. Re tshwanetse go ikaelela go dira eng?

¹⁸ Re tshwanetse go ikaelela go dira eng fa e le gore re tlhaloganya bomasisi jwa boineelo jwa rona mo go Jehofa Modimo? Re tshwanetse go ikaelela thata gore re nne le segakolodi se se molemo malebana le boitshwaro jwa rona le bodiredi jwa rona. Petere o ile a gakolola jaana: “Nnang le segakolodi se se siameng, e le gore mo go sone selo se lo kgalwang ka sone, ba ba buang boitshwaro jwa lona jo bo molemo malebana le Keresete ka go nyatsa, ba tlhabiwe ke ditlhong.” (1 Petere 3:16) Re ka nna ra tshwanelwa ke go boga le go sotlwa ke batho ka ntlha ya boitshwaro jwa rona jwa Bokeresete, mme gone le Keresete o ne a dirwa jalo ka ntlha ya tumelo ya gagwe le go ikanyega mo Modimong. Petere o ile a re: “Jalo e re ka Keresete a ne a boga mo nameng, le lona itlhomeleng ka yone tshekamelo eo ya mogopolo; ka gonne motho yo o bogileng mo nameng o baketse maleo.”—1 Petere 4:1.

19. Re batla gore go tweng ka rona?

¹⁹ Ee ruri, boikaelelo jwa rona jo bo tlhomameng jwa gore re tla tshelela boineelo jwa rona bo tla re sireletsa mo diraing tsa lefatshe la ga Satane le le lwalang semoyeng, mo boitsholong le mo nameng. Mme go feta seo, re tla nna le tshepo ya gore Modimo o tla re amogela, e leng selo se se botoka thata go feta sepe fela se Satane le baemedi ba gagwe ba ka re nayang sone. Ka gone, a le ka motlha go se ka ga tsamaya ga twe re tlogetse lorato lo re neng re na le lone fa re sena go itse boammaaruri. Go na le moo, a go buiwe jaana ka rona jaaka go kile ga buiwa ka phuthego ya lekgolo la ntlha la dingwaga ya Thiatira: “Ke itse ditiro tsa gago, le lorato lwa gago le tumelo le bodiredi le boitshoko, le gore ditiro tsa gago tsa morago di feta tsa pele.” (Tshenolo 2:4, 18, 19) Ee, a re se ka ra nna mololo malebana le boineelo jwa rona, go na le moo, a re ‘tukeng mo moyeng,’ re le tlhaga go fitlha kwa bofelong—bokhutlo bo atametse.—Baroma 12:11; Tshenolo 3:15, 16.

[Dintlha tse di kwa tlase]

A o A Gakologelwa?

• Boineelo bo akaretsa eng?

• Ke dikao dife tsa bogologolo le tsa segompieno tsa batlhanka ba Modimo ba ba ineetseng tse re ka di etsang?

• Re tshwanetse go leba jang tirelo ya rona go Modimo?

• Re tshwanetse go ikaelela go dira eng malebana le boineelo jwa rona mo Modimong?

[Dipotso Tsa Thuto]

[Setshwantsho mo go tsebe 15]

Jeremia o ne a nna a ikanyega le fa a ne a tshwarwa makgwakgwa

[Setshwantsho mo go tsebe 16]

Ernest Beavor o ile a tlhomela bana ba gagwe sekao sa go nna Mokeresete yo o tlhagafetseng

[Setshwantsho mo go tsebe 17]

Makgolokgolo a basha ba Basupi ba ile ba nna ba thokgame mo dikgolegelong tsa kwa Spain

[Ditshwantsho mo go tsebe 18]

A letsatsi le letsatsi re ikgobokanyetseng sengwe se se molemo ka tsela ya semoya