Pego ya Baboledi ba Bogosi

Latvia e Amogela Dikgang Tse di Molemo

BAEBELE e bontsha sentle gore thato ya Modimo ke gore “batho ba mefuta yotlhe ba bolokwe mme ba tle mo kitsong e e leng yone, ya boammaaruri.” (1 Timotheo 2:4) Batho ba ba ileng ba tingwa tshono ya go utlwa dikgang tse di molemo ka dingwaga di le dintsi, gone jaanong ba a di utlwa! Kwa Latvia, fela jaaka kwa dikarolong tse dingwe tsa lefatshe, batho ba dingwaga tsotlhe le ba ba godileng ka ditsela tse di farologaneng ba amogela molaetsa, jaaka fa ditiragalo tse di latelang di bontsha.

• Kwa Rēzekne, toropo nngwe kwa botlhaba jwa Latvia, mmè le morwadie wa dingwaga tsa bolesome ba ne ba kopa mosadi mongwe mo mmileng gore a ba kaele tsela. E re ka mosadi yono e ne e le mongwe wa Basupi ba ga Jehofa, fa a sena go ba neela tshedimosetso eo, o ne a ba laletsa gore ba tle dipokanong tsa Basupi.

Mmè le morwadie ba ne ba swetsa ka gore ba ye pokanong eo ka e ne e le batho ba ba ratang bodumedi boobabedi. Fa ba le mo tseleng ba ne ba dumalana gore fa ba ka fitlhela go na le sengwe se se sa tshwanelang koo, ba tla tswa kwantle ga go senya nako. Le fa go ntse jalo, pokano e ne e le monate jaana mo ba neng ba se ka ba tlelwa ke kakanyo ya go tswa. Ba ile ba dumela go tshwarelwa thuto ya Baebele, mme ba simolola go ya dipokanong ka metlha. Mo dikgweding di le tharo fela, ba ne ba bolela gore ba eletsa go tsena mo tirong ya go rera mme ba lebile pele kwa go kolobediweng.

• Kwa motseng mongwe kwa bophirima jwa Latvia, Mosupi o ne a kopana le Anna wa dingwaga tse 85, yo o neng a bontsha kgatlhego tota a ba a dumela go tshwarelwa thuto ya Baebele. Morwadie le ba bangwe ba lelapa la gagabo ba ne ba mo ganetsa thata. Mme Anna ga a ka a letla gore kganetso eo kgotsa go gola le botsogo jo bo sa iketlang di mo thibele go tswelela pele a ithuta Baebele.

Letsatsi lengwe Anna o ne a bolelela morwadie gore o ne a tlile go kolobediwa. Morwadia Anna o ne a re, “Fa o ka kolobediwa, ke tla go isa kwa legaeng la batsofe.” Le fa go ntse jalo, matshosetsi ano ga a ka a kgoba Anna marapo. E re ka a le bokoa, o ne a kolobelediwa mo legaeng la gagwe.

Morwadia Anna o ne a tsibogela seno jang? O ne a fetogile, mme o ne a apeela mmaagwe dijo tse di monate fa a sena go kolobediwa. Go tswa foo o ne a botsa mmaagwe a re, “O ikutlwa jang jaanong fa e le mo o kolobeditswe?” Anna o ne a araba jang? “Jaaka ngwana yo o sa tswang go tsholwa!”

• Ka December 1998, Basupi ba babedi ba ne ba kopana le motho yo e kileng ya bo e le motlhankedimogolo wa sesole sa Soviet Union. E re ka a ne a dumela gore Mmopi o teng, o ne a dumela go tshwarelwa thuto ya Baebele, mme mosadi wa gagwe o ne a kopanela mo go yone moragonyana. Ba ile ba gatela pele ka bofefo mme go ise go ye kae ba nna baboledi ba ba sa kolobediwang. Ka selemo se se latelang, motho yono yo e kileng ya bo e le motlhankedimogolo o ne a kolobediwa. Tsela e banyalani bano ba neng ba rata dilo tsa semoya thata ka yone e ne ya kgothatsa batho botlhe mo phuthegong. Mo godimo ga moo, ba ile ba dira ka natla fa go ne go tsosolosiwa ntlo nngwe ya bonno mo lefelong leo e dirwa Holo e ntle ya Bogosi.