A Bodumedi bo Tla Tlisa Kagiso ya Lefatshe?

GO TLOGA ka August 28 go ya go August 31, 2000, baemedi ba feta 500 go tswa kwa dinageng di le 73 ba ne ba phuthegela kwa New York City. Ba ne ba kopana kwa dikagong tsa lekgotla la Ditšhaba Tse di Kopaneng kwa “Kokoanong ya Mileniamo ya Kagiso ya Lefatshe ya Baeteledipele ba Bodumedi le ba Semoya.” Baeteledipele bano—ba bontsi jwa bone ba neng ba apere dihapatlhogo, dipurapura tsa mmala wa namune, dihapatlhogo tsa diphofa, kana dipurapura tse dileele tse dintsho—ba ne ba emela ditumelo tse dintsintsi. Gareng ga bone go ne go na le ba bodumedi jwa Baha’i, Bobuda, Bohindu, Bojaini, Bojuda, Boshinto, Bo-Tao, Bosiki, Bo-Zoroaster, Iselamo le ditumelo tsa Labokeresete.

Batlakokoanong ba ne ba kopana kwa lekgotleng la Ditšhaba Tse di Kopaneng ka malatsi a ntlha a le mabedi mo go a manè a konferense eno. Le fa go ntse jalo, konferense eno e ne e sa rulaganngwa kana go etleediwa ka madi ke lekgotla la Ditšhaba Tse di Kopaneng go na le moo seno se ne se dirilwe ke mekgatlho mengwe e e farologaneng. Le fa go ntse jalo, lekgotla la Ditšhaba Tse di Kopaneng mmogo le baeteledipele ba bodumedi ba ne ba bua ka botlhokwa jwa go dirisana mmogo go fedisa lehuma, bomorafe, mathata a tikologo, ntwa le dibetsa tse di kgonang go ganyaola matshwititshwiti a batho.

Batlakokoanong ba ne ba saena lekwalo lengwe le le nang le setlhogo se se reng “Maitlamo a go Nna le Kagiso ya Lefatshe Lotlhe.” Le fa lekwalo leno le ne le dumela gore thubakanyo le ntwa ke dilo tse “ka dinako tse dingwe di dirwang mo leineng la bodumedi,” le ne la bolela gore baemedi bano ba ba saenileng ba ne ba tlile go “dirisana mmogo le lekgotla la Ditšhaba Tse di Kopaneng . . . go batla kagiso.” Le fa go ntse jalo, ga go a ka ga dirwa maitlamo ape a a kgethegileng a a bontshang gore seno se ka dirwa jang.

Mo letsatsing la bobedi, mokwaledikakaretso wa kokoano eno e bong Bawa Jain, o ne a konela mafoko a gagwe a a bulang ka go tlhalosa gore dingwaga di le mmalwa pelenyana ga moo o ne a bona setshwantsho sengwe se se takilweng kwa dikagong tsa lekgotla la Ditšhaba Tse di Kopaneng. Setshwantsho seno e ne e le sa monna mongwe yo moleele go feta kago ya Bokwaledi ya lekgotla la Ditšhaba Tse di Kopaneng. O ne a kokota mo kagong eno jaaka e kete o kokota mo mojakong. Mo tlase ga setshwantsho seno go ne go na le mokwalo o o reng: “Kgosana ya Kagiso.” Rre Jain o ne a bolela jaana: “[Setshwantsho seno] se ne sa nkama thata ka nako ya fa ke ne ke se bona. Ke ne ka botsa batho ba ba farologaneng gore [se] bolelang. Ke akanya gore gompieno ke bone karabo. Go kokoana ga lona lotlhe fano, baeteledipele ba semoya le ba bodumedi ba lefatshe lotlhe, go mpontsha gore [seno] ke kgosana ya kagiso e e kokotang mo mojakong wa lekgotla la Ditšhaba Tse di Kopaneng.”

Baebele e bolela se se farologaneng le seno. E bontsha gore Kgosana ya Kagiso ke Jesu Keresete. O tla tlisa kagiso ya lefatshe lotlhe, e seng ka maiteko a baeteledipele ba lefatshe leno ba dipolotiki kana ba bodumedi, mme ka Bogosi jwa Modimo. Bogosi jono—puso ya Modimo ya selegodimo—ke jone jo bo tla kopanyang batho ba ba kutlo ka katlego le go dira gore thato ya Modimo e dirwe mo lefatsheng.—Isaia 9:6; Mathaio 6:9, 10.