Kgang ya Tsogo ya ga Jesu e mo Tshekong

“Nka lo bolelela ka tlhamalalo fela gore le mororo re ka tlhomamisega gore tota Jesu o kile a tshela  . . . , ga re ka ke ra bua re tlhomamisegile jalo gore re a itse gore Modimo o ne a Mo tsosa mo baswing.” Go ne ga rialo morutimogolo mongwe wa Kereke ya Engelane, e bong Mobishopomogolo wa Canterbury.

MOAPOSETOLOI wa Mokeresete e bong Paulo o ne a se na dipelaelo tse di ntseng jalo. Paulo o ne a kwala jaana mo go kgaolo 15 ya lekwalo la gagwe la ntlha le le tlhotlheleditsweng le a neng a le kwalela Bakeresetekaene ba kwa Korintha wa bogologolo: “Mo dilong tsa ntlha, ke ne ka fetisetsa mo go lona se le nna ke neng ka se amogela, gore Keresete o ne a swela maleo a rona go ya ka Dikwalo; le gore o ne a fitlhwa, ee, gore o tsositswe ka letsatsi la boraro go ya ka Dikwalo.”—1 Bakorintha 15:3, 4.

Go dumela mo tsogong ya ga Jesu Keresete ke gone go go neng ga tlhotlheletsa barutwa ba gagwe go bolela efangele mo lefatsheng lotlhe la Gerika le Roma—“mo popong yotlhe e e kafa tlase ga legodimo.” (Bakolosa 1:23) Tota e bile, tsogo ya ga Jesu ke motheo wa konokono wa tumelo ya Bokeresete.

Le fa go ntse jalo, go tloga fela kwa tshimologong batho ba le bantsi ba ne ba belaela tsogo ya ga Jesu e bile ba sa e dumele. Mo Bajudeng ka kakaretso, e ne e le go tlhapatsa fa balatedi ba ga Jesu ba bolela gore monna yono yo o bapotsweng e ne e le Mesia. Mme mo Bagerikeng ba le bantsi ba ba rutegileng, ba ba neng ba dumela gore moya ga o swe, kgopolo ya go tsosiwa ga baswi e ne e le selo se se ferosang sebete.—Ditiro 17:32-34.

Babelaedi ba Segompieno

Mo dingwageng tsa bosheng jaana, bakanoki bangwe ba ba ipolelang gore ke Bakeresete ba gatisitse dibuka le ditlhogo tse di belaelang tsogo ya ga Jesu tse di bolelang gore ke tlhamane fela, e bile ba ile ba tsosa kgang ya moruthutha ka seno. Fa ba ntse ba batlisisa ka “Jesu wa hisitori,” bakanoki ba ba farologaneng ba bolela gore dipego tsa Efangele tse di ka ga lebitla le le se nang sepe le go bonala ga ga Jesu morago ga go tsoga ga gagwe ke tlhamane fela e e feletseng, e e neng ya rulaganngwa bogologolo morago ga loso lwa gagwe gore e eme nokeng dipolelo tse di bontshang gore o ne a na le maatla a a tswang kwa legodimong.

Ka sekai, akanya ka se se neng se dumelwa ke mokanoki mongwe wa Mojeremane e bong Gerd Lüdemann, yo e leng porofesa wa Tesetamente E Ntšha e bile e le mokwadi wa buka ya What Really Happened to Jesus—A Historical Approach to the Resurrection. O bolela gore tsogo ya ga Jesu ke “kgang e e sa utlwaleng” e e sa tshwanelang go dumelwa ke mongwe le mongwe yo o “lebang dilo go ya ka saense.”

Porofesa Lüdemann o bolela gore Keresete yo o  tsositsweng yo a neng a bonala mo go moaposetoloi Petere e ne e le pono fela e Petere a neng a e bona ka ntlha ya gore o ne a utlwile botlhoko thata e bile a ikutlwa a le molato ka a ne a itatotse Jesu. Mme go ya ka Lüdemann, go bonala ga ga Jesu ka nako nngwe mo badumeding ba ba fetang 500 ka nako e le nngwe fela e ne e le “toro fela e kgolo e e gakgamatsang.” (1 Bakorintha 15:5, 6) Ka bokhutshwane fela, bakanoki ba le bantsi ba bolela gore dipego tsa Baebele tse di ka ga Jesu yo o tsositsweng ke motseletsele wa ditiragalo tse di ikakanyeditsweng fela tse di dirileng gore barutwa ba nne le boikutlo jo bo shafaditsweng jwa go itshepa mo semoyeng le go tlhoafala mo tirong ya borongwa.

Ke boammaaruri gore batho ba le bantsi ga ba kgatlhegele kganetsano eno ya barutegi. Le fa go ntse jalo, kgang ya tsogo ya ga Jesu e tshwanetse go re ama rotlhe. Ka ntlha yang? Ka gonne, fa e le gore ga a tsosiwa, Bokeresete bo theilwe mo thutong ya maaka. Ka fa letlhakoreng le lengwe, fa e le gore tsogo ya ga Jesu ke tiragalo ya mmatota ya hisitori, seno se bolela gore Bokeresete bo theilwe mo boammaaruring. Mme seno ga se tlotlomatse dilo tse Keresete a neng a di bua fela mme gape se tlotlomatsa le ditsholofetso tsa gagwe. Mo godimo ga moo, fa e le gore tsogo e teng, seno se bolela gore loso ga se mofenyi yo mogolo mme ke mmaba o o ka fenngwang.—1 Bakorintha 15:55.

[Motswedi wa Setshwantsho mo go tsebe 3]

From the Self-Pronouncing Edition of the Holy Bible, containing the King James and the Revised versions