“Matsadi a a Bakwang ke Tsala”

MOAPOSETOLOI PAULO o ne a bona go tlhokega gore a kgalemele Bakeresete ba lekgolo la ntlha la dingwaga ba kwa Galatia. Gongwe e le gore a tile go dira gore ba kgopisege ka tsela nngwe, o ne a botsa jaana: “Mme jaanong, a ke fetogile mmaba wa lona ka gonne ke lo bolelela boammaaruri?”—Bagalatia 4:16.

Fa Paulo a ne a ‘bolela boammaaruri’ o ne a sa nne mmaba wa bone. Tota, o ne a dira tumalanong le molaomotheo ono wa Baebele: “Matsadi a a bakwang ke tsala a ikanyega.” (Diane 27:6, King James Version) O ne a itse gore go itseela kwa godimo ga ba ba dirileng phoso go ne go tla dira gore ba kgopisege. Le fa go ntse jalo, o ne a lemoga gore fa a tlogela moleofi a sa mo kgalemele tota e tla bo e le go mo tima lorato lwa ga Jehofa Modimo. (Bahebera 12:5-7) Ka jalo, e re ka Paulo e ne e le tsala e e ikanyegang e e sa bolong go amega thata ka phuthego eno, ga a ka a ikgogona mo go e neeleng kgakololo e e thusang.

Gompieno, Basupi ba ga Jehofa ba diragatsa thomo ya bone ya go ‘dira batho ba ditšhaba tsotlhe barutwa, . . . ba ba ruta go boloka dilo tsotlhe tse Jesu Keresete a di laetseng.’ Ka go dira jalo, Bakeresete bano ba ba tlhoafetseng ga ba tshele metsi boammaaruri jwa Baebele jo bo senolang le go kgala diphoso tsa dithuto le boitshwaro jo e seng jwa Bokeresete. (Mathaio 15:9; 23:9; 28:19, 20; 1 Bakorintha 6:9, 10) Ga ba dire jalo ka go bo ba batla go itira baba ba ba sa batlegeng, go na le moo ba supa fa e le ditsala tsa boammaaruri tse di amegang ka batho.

Ka temogo e e tlhotlheleditsweng ke Modimo, mopesalema o ne a kwala jaana: “Fa mosiami a ka ntitaya, e tla bo e le bopelonomi jwa lorato; mme fa a ka nkgalemela, e tla bo e le leokwane mo tlhogong, le tlhogo ya me e ka se kang ya batla go le gana.”—Pesalema 141:5.