Dipotso Tse di Tswang Kwa Babading

Daniele o ne a le kae fa Bahebera ba bararo ba ne ba lekwa fa pele ga setshwantsho se segolo se Nebukadenesare a neng a se tlhomile mo lebaleng la Dura?

Baebele ga e bolele, ka gone ga go na motho ope gompieno yo o ka tlhomamisang gore Daniele o ne a le kae ka nako ya teko eo.

Bangwe ba akantsha gore maemo kana tshiamelo e Daniele a neng a e filwe ke Nebukadenesare e ne e feta ya ga Shaderake, Meshake le Abedenego mme ka jalo Daniele o ne a sa patelesege go ya kwa lebaleng la Dura. Daniele 2:49 e bontsha gore o ne a fetsa nako a na le maemo a a fetang a ditsala tsa gagwe tse tharo. Mme ga re na bosupi jwa gore seno se ne sa dira gore a se ka a akarediwa mo kgannyeng ya go phuthega le ba bangwe fa pele ga setshwantsho.

Fa batho bangwe ba leka go tlhalosa lebaka la go bo Daniele a ne a seyo, ba ile ba bolela gore o ka tswa a ne a seyo ka ntlha ya tiro nngwe ya puso kana o ne a lwala mme ka gone a sa kgone go nna gone. Le fa go ntse jalo, Baebele ga e bolele jalo. Le gale, lebaka la go bo Daniele a ne a seyo le tshwanetse la bo e se le le belaetsang, ka gonne fa go ka bo go ntse jalo, ga go na pelaelo gore badiredibagolo ba ba lefufa ba Babelona ba ka bo ba dirisitse lone lebaka leo go mo latofatsa. (Daniele 3:8) Pele ga tiragalo eno le morago ga yone, Daniele o ne a itshupa e le mmoloka bothokgami, a ikanyega mo Modimong go sa kgathalesege gore o lebane le kgwetlho efe. (Daniele 1:8; 5:17; 6:4, 10, 11) Ka jalo, le fa gone Baebele e sa re bolelele gore ke eng fa Daniele a ne a seyo kwa lebaleng la Dura, re ka tlhomamisega gore o ile a nna a ikanyega mo go Jehofa Modimo.—Esekiele 14:14; Bahebera 11:33.