Dira Gore Botswelelopele Jwa Gago bo Bonatshege
Dira Gore Botswelelopele Jwa Gago bo Bonatshege
“Tlhatlhanya ka dilo tseno; nwelelela mo go tsone, gore botswelelopele jwa gago bo bonatshege mo bathong botlhe.”—1 TIMOTHEO 4:15.
1. O lemoga ka eng gore leungo le budule e bile le siametse go jewa?
AKANYA leungo le o le ratang thata—perekisi, pere, menku kana lengwe le sele. A o kgona go lemoga fa le budule e bile le siametse go jewa? Ee ruri. Monko wa lone, mmala wa lone, le kafa le utlwalang ka teng fa o le tshwara di go bolelela gore o tlile go utlwa monate o o tswang ka ditsebe. Ka nako ya fa o le ngatha, o ka nna wa bo wa borabora ka ntlha ya kgotsofalo. A matute ruri! Botshe tota! Le monate tota e bile le a go kgotsofatsa.
2. Go gola ga motho sentle go lemogiwa jang, mme go ama jang kamano ya gagwe le batho ba bangwe?
2 Tiragalo eno e e seng ya sepe mme e itumedisa e tshwana le dilo dingwe mo botshelong. Ka sekai, fela jaaka go butswa ga leungo, go gola ga motho semoyeng le gone go lemotshega ka ditsela tse di farologaneng. Re lemoga gore motho o godile sentle fa re bona a na le temogo, kitso, botlhale, jalo le jalo. (Jobe 32:7-9) Go itumedisa tota go kopanela le go dira le batho ba ba bontshang dinonofo tse di ntseng jalo mo maikutlong a bone le mo ditirong tsa bone.—Diane 13:20.
3. Tsela e Jesu a ileng a tlhalosa batho ba motlha wa gagwe ka yone e senola eng ka go gola sentle?
3 Kafa letlhakoreng le lengwe, motho a ka tswa a godile mo mmeleng, mme tsela ya gagwe ya go bua le e a itshwarang ka yone e ka senola gore ga a gola mo maikutlong le semoyeng. Ka sekai, fa Jesu Keresete a ne a bua ka kokomana e e boikepo ya motlha wa gagwe, o ne a re: “Johane o ne a tla a sa je le fa e le go nwa, le fa go ntse jalo batho ba re, ‘O na le ledimona’; Morwa motho ruri o ne a tla a ja e bile a nwa, le fa go ntse jalo batho ba re, ‘Bonang! Monna yo o jang bobe le yo o lemaletseng go nwa beine, tsala ya bakgethisi le baleofi.’” Le fa batho bano ba ne ba godile mo mmeleng, Jesu o ne a re ba itshwara jaaka “bana ba babotlana”—ba ne ba sa gola le e seng. Ka gone, o ile a oketsa jaana: “Le fa go ntse jalo, botlhale bo supiwa bo siame ke ditiro tsa jone.”—Mathaio 11:16-19.
4. Botswelelopele le go gola sentle go bonatshega ka ditsela dife?
4 Go tswa mo mafokong ano a ga Jesu, re kgona go bona gore fa motho a na le botlhale jwa boammaaruri—jo e leng letshwao le legolo la gore o godile sentle—go bonala ka ditiro tse a di dirang le matswela a tsone. Ela tlhoko kgakololo e moaposetoloi Paulo a neng a e neela Timotheo mo kgannyeng eno. Fa Paulo a sena go umaka dilo tse Timotheo a tshwanetseng go di gagamalela, o ne a re: “Tlhatlhanya ka dilo tseno; nwelelela mo go tsone, gore botswelelopele jwa gago bo bonatshege mo bathong botlhe.” (1 Timotheo 4:15) Ee, botswelelopele jwa Mokeresete mo go goleng sentle bo a ‘bonatshega,’ kana bo lemotshega sentle. Go gola sentle ga Mokeresete go tshwana le lesedi le le phatsimang, ga se selo se se sa bonaleng kana se se fitlhegileng. (Mathaio 5:14-16) Ka gone, re tla sekaseka ditsela tse pedi tsa konokono tse botswelelopele le go gola sentle ga motho go ka bonatshegang ka tsone: (1) go gola mo kitsong, mo tlhaloganyong le mo botlhaleng; (2) go bontsha maungo a moya.
Bongwefela mo Tumelong le mo Kitsong
5. Go gola sentle go ka tlhalosiwa jang?
5 Bontsi jwa dithanodi di tlhalosa go gola sentle e le go nonofa sentle, o godile ka botlalo, e bile o setse o fitlheletse kgato ya bofelo kana selekanyo se se batlegang. Jaaka fa go umakilwe pelenyana, leungo le tsewa le budule fa le setse le weditse modikologo wa tlholego wa kgolo ya lone mme tebego ya lone, mmala, monko le tatso ya lone e setse e fitlheletse tekanyetso e e batlegang. Ka gone go gola sentle go tsamaelana le go dira dilo ka maatlametlo, ka botlalo tota le ka tsela e e feletseng.—Isaia 18:5; Mathaio 5:45-48; Jakobe 1:4.
6, 7. (a) Ke eng se se bontshang gore Jehofa o kgatlhegela thata gore baobamedi botlhe ba gagwe ba gatele pele mo go goleng semoyeng? (b) Go gola semoyeng go amana thata le eng?
6 Jehofa Modimo o kgatlhegela thata gore baobamedi ba gagwe botlhe ba gatele pele mo kgolong ya bone ya semoya. O tlhomile dithulaganyo tse di molemo mo phuthegong ya Bokeresete tse di ka ba thusang mo go seno. Moaposetoloi Paulo o ile a kwalela Bakeresete ba Efeso jaana: “O ne a aba bangwe go nna baaposetoloi, bangwe go nna baporofeti, bangwe go nna baefangedi, bangwe go nna badisa le barutisi, ka boikaelelo jwa go lolamisiwa ga baitshepi, go dira tiro ya bodiredi, go agiwa ga mmele wa ga Keresete, go fitlha rotlhe re fitlhelela bongwefela mo tumelong le mo kitsong e e boammaaruri ka ga Morwa Modimo, go ya monneng yo o godileng ka botlalo, go ya selekanyong sa bogolo jo e leng jwa botlalo jwa ga Keresete; e le gore re tle re se ka ra tlhola re nna masea, re heheutlelwa kwa le kwa jaaka e kete re heheutlwa ke makhubu e bile re akgaakgelwa kwa le kwa ke phefo nngwe le nngwe ya thuto ka tsietso ya batho, ka boferefere ka go loga leano le le tsietsang.”—Baefeso 4:11-14.
7 Mo ditemaneng tseno, Paulo o tlhalositse gore mangwe a mabaka a go bo Modimo a dirile dithulaganyo tseo tse di lekaneng tsa semoya mo phuthegong ke gore mongwe le mongwe a tle a ‘fitlhelele bongwefela mo tumelong le mo kitsong e e boammaaruri,’ a nne ‘monna yo o godileng ka botlalo,’ le gore a nne le ‘selekanyo sa bogolo jwa ga Keresete.’ Ke ka go dira jalo fela re ka sireletsegang gore re se ka ra heheutlelwa kwa le kwa ke megopolo le dithuto tsa maaka jaaka batho ba e leng masea semoyeng. Ka gone, re kgona go bona kafa go gatela pele ga Mokeresete mo go goleng sentle go amanang thata ka teng le go fitlhelela “bongwefela mo tumelong le mo kitsong e e boammaaruri ka ga Morwa Modimo.” Go na le dilo di le mmalwa mo kgakololong ya ga Paulo tse go ka nnang molemo gore re di tseye tsia.
8. Go nna le “bongwefela” mo tumelong le mo kitsong e e boammaaruri go re tlhoka eng?
8 Sa ntlha, e re ka go tshwanetse ga bolokwa “bongwefela,” Mokeresete yo o godileng sentle o tshwanetse go nna seoposengwe le go dirisana ka kutlwano le badumedikaene malebana le tumelo le kitso. Ga a buelele megopolo ya gagwe ka namana kgotsa go e tatalalela kana go nna le tsela ya gagwe ya go akanya malebana le go tlhaloganya Baebele. Go na le moo, o tshepa boammaaruri ka botlalo go ya kafa bo senolwang ka teng ke Jehofa Modimo ka Morwawe, Jesu Keresete le “motlhanka yo o boikanyego le yo o botlhale.” Ka go nna re ikotla ka metlha ka dijo tsa semoya tse di abiwang ka “nako e e tshwanetseng”—ka dikgatiso tsa Bokeresete, dipokano, dikopano tse dinnye le tse dikgolo—re ka tlhomamisa gore re boloka “bongwefela” le Bakeresetekarona mo tumelong le mo kitsong.—Mathaio 24:45.
9. Tlhalosa bokao jwa lefoko “tumelo” go ya kafa Paulo a le dirisitseng ka teng mo lekwalong la gagwe go Baefeso.
9 Sa bobedi, lefoko “tumelo” ga le bolele go tlhatswega pelo go Mokeresete mongwe le mongwe a nang le gone, go na le moo, le kaya kakaretso ya sotlhe se re se dumelang, “bophara le boleele le bogodimo le boteng” jwa sone. (Baefeso 3:18; 4:5; Bakolosa 1:23; 2:7) Tota e bile, Mokeresete a ka nna jang le bongwefela le badumedikaene fa e le gore o dumela fela karolo nngwe ya “tumelo”? Seno se bolela gore re se ka ra kgotsofalela go itse fela dithuto tsa motheo tsa Baebele kana go nna fela le kitso e e letobo ka boammaaruri. Go na le moo, re tshwanetse go batla go dirisa ka botlalo dithulaganyo tsotlhe tse Jehofa a re tlamelang ka tsone ka phuthego ya gagwe go dira dipatlisiso tse di tseneletseng ka Lefoko la gagwe. Re tshwanetse go lwela go tlhaloganya thato ya Modimo le boikaelelo jwa gagwe ka tlhomamo le ka botlalo kafa re ka kgonang ka teng. Seno se akaretsa go ipha nako ya go bala le go ithuta Baebele le dikgatiso tsa Baebele, go rapela Modimo gore a re thuse le go re kaela, go nna gone ka metlha mo dipokanong tsa Bokeresete le go nna le seabe ka botlalo mo tirong ya go rera ka Bogosi le go dira barutwa.—Diane 2:1-5.
10. Mafoko a a reng “go fitlha rotlhe re fitlhelela,” a a mo go Baefeso 4:13 a kaya eng?
10 Sa boraro, fa Paulo a tlhalosa mokgele ono o o dikarolo di tharo o ne a simolola pele ka mafoko a a reng “go fitlha rotlhe re fitlhelela.” Malebana le lefoko “rotlhe,” buka nngwe e e tlhalosang mafoko a Baebele e tlhalosa gore lefoko leo ga le bolele “rotlhe, bongwe ka bongwe, mongwe le mongwe kwa thoko, go na le moo, le bolela rotlhe ka nako e le nngwe.” Ka mafoko a mangwe, mongwe le mongwe wa rona o tshwanetse go leka ka mo a ka kgonang ka teng go gagamalela mokgele wa go nna Mokeresete yo o godileng sentle a dira jalo mmogo le bakaulengwe botlhe. The Interpreter’s Bible e akgela jaana: “Motho ga a fitlhelele katlego ya semoya ka botlalo ka go ikgogona mo go ba bangwe, fela jaaka karolo nngwe ya mmele e ka se ka ya gola sentle e le yosi fa e sa gole mmogo le mmele otlhe.” Paulo o ile a gakolola Bakeresete ba Efeso gore ba ne ba tshwanetse go lwela go tshwara ka botlalo ka mogopolo bogolo jotlhe jwa tumelo ba dira jalo “mmogo le baitshepi botlhe.”—Baefeso 3:18a.
11. (a) Go dira botswelelopele semoyeng ga go kaye eng? (b) Re tshwanetse go dira eng gore re dire botswelelopele?
11 Go bonala sentle go tswa mo mafokong ano a ga Paulo gore go dira botswelelopele semoyeng ga go bolele fela go tlatsa mogopolo wa rona ka kitso le go nna le thutego e kgolo. Mokeresete yo o godileng sentle ga a ipelafaletse ba bangwe ka bokgoni jwa gagwe. Go na le moo, Baebele ya re: “Tselana ya basiami e tshwana le lesedi le le phatsimang le ntse le phatsimela pele go fitlha motshegareng o mogolo.” (Diane 4:18) Ee, “tselana,” ke yone e e ‘phatsimelang pele,’ e seng motho yoo ka boene. Fa re nna re leka ka natla go tsamaisana le tshedimosetso e e ntseng e phatsimela pele ya Lefoko la Modimo e Jehofa a e abelang batho ba gagwe, re tla bo re dira botswelelopele semoyeng. Mo kgannyeng eno, go tsamaisana le yone go bolela go gatela pele, mme ke selo se rotlhe re ka se dirang.—Pesalema 97:11; 119:105.
Go Bontsha “Maungo a Moya”
12. Ke eng fa go bontsha maungo a moya go le botlhokwa fa re ntse re lwela go dira botswelelopele semoyeng?
12 Fa re ntse re fitlhelela “bongwefela mo tumelong le mo kitsong e e boammaaruri” go botlhokwa thata gore gape re bontshe le maungo a moya wa Modimo mo karolong nngwe le nngwe ya botshelo jwa rona. Ka ntlha yang? Ka gonne jaaka fa re bone, go gola sentle ga se selo se se sa bonaleng kgotsa se se fitlhegileng, go na le moo go lemotshega ka mekgwa e e bonalang sentle e e ka solegelang ba bangwe molemo le go ba aga. Ke boammaaruri gore, go batla ga rona go dira botswelelopele semoyeng ga se kgang fela ya go leka go dira gore re lebege re na le mekgwa mengwe. Go na le moo, fa re ntse re gola semoyeng, re latela kaelo ya moya wa Modimo, maikutlo a rona le ditiro tsa rona di tla fetoga gotlhelele ka tsela e e molemo. Moaposetoloi Paulo o ile a re: “Nnang lo tsamaye ka moya mme ga lo na go diragatsa keletso epe ya senama ka gope.”—Bagalatia 5:16.
13. Ke phetogo efe e e leng sesupo se se bonalang sentle sa go gatela pele?
13 Paulo o ne a tswelela pele ka go umaka “ditiro tsa nama,” tse di leng dintsi e bile di “bonala.” Pele motho a simolola go tlhaloganya dilo tse Modimo a di batlang, o tshela botshelo jwa gagwe go ya ka ditsela tsa lefatshe e bile bo ka tswa bo tletse ka dingwe tsa dilo tseno tse Paulo a di umakileng: “kgokafalo, boitshekologo, boitshwaro jo bo repileng, kobamelo ya medingwana, tlwaelo ya go dirisana le meya, bobaba, kgogakgogano, lefufa, go phatloga ka bogale, manganga, dikgaogano, makoko, go fufega, mediro ya botagwa, mediro ya ditlhapelo, le dilo tse di tshwanang le tseno.” (Bagalatia 5:19-21) Mme fa motho a ntse a gatela pele semoyeng, o kgona go fenya “ditiro tseno tsa nama” tse di sa batlegeng ka bonya ka bonya mme mo boemong jwa tsone a bo a nna le “maungo a moya.” Phetogo eno e e bonalang sentle e bontsha gore motho yoo o gatela pele go nna Mokeresete yo o godileng sentle.—Bagalatia 5:22.
14. Tlhalosa mareo ano a mabedi e leng “ditiro tsa nama” le “maungo a moya.”
14 Re tshwanetse go ela tlhoko mareo ano a mabedi “ditiro tsa nama” le “maungo a moya.” “Ditiro” ke ditlamorago tsa se motho a se dirang. Ka mafoko a mangwe, dilo tse Paulo a di umakileng a re ke ditiro tsa nama e ka tswa e le ditlamorago tsa se motho a se dirang ka boomo kana se a se dirang a tlhotlhelediwa ke go sa itekanelang. (Baroma 1:24, 28; 7:21-25) Ka fa letlhakoreng le lengwe, lereo “maungo a moya” le kaya gore dinonofo tse di umakilweng, ga se ditlamorago tsa se go tweng ke go leka go nna le botho jo bo molemo kana go nonotsha botho, go na le moo, ke ditlamorago tsa go dira ga moya wa Modimo mo mothong. Fela jaaka fa setlhare se tlhagisa maungo fa se tlhokomelwa sentle, motho le ene o tla bontsha maungo a moya fa moya o o boitshepo o dira ka kgololesego mo botshelong jwa gagwe.—Pesalema 1:1-3.
15. Ke eng fa go le botlhokwa go ela tlhoko dikarolo tsotlhe tsa “maungo a moya”?
15 Selo se sengwe se re tshwanetseng go se sekaseka ke tsela e Paulo a dirisitseng lefoko “maungo” ka yone go akaretsa dinonofo tsotlhe tse di molemo tse a di umakileng. Moya ga o tlhagise maungo a a farologaneng a mo go one re ka itlhophelang a re a ratang. Dinonofo tsotlhe tse Paulo a di umakileng—lorato, boipelo, kagiso, bopelotelele, bopelonomi, molemo, tumelo, bonolo le boikgapo—di botlhokwa ka go lekana mme fa di le tsotlhe di dira gore motho a kgone go nna le botho jo bosha jwa Bokeresete. (Baefeso 4:24; Bakolosa 3:10) Ka gone, le fa re ka fitlhela gore re kgona go bontsha dingwe tsa dinonofo tseno go feta tse dingwe mo botshelong jwa rona ka ntlha ya botho jwa rona le tshekamelo ya rona, go botlhokwa gore re ele tlhoko dikarolo tsotlhe tse Paulo a di umakileng. Fa re dira jalo re tla bontsha go nna le botho jo bo tshwanang le jwa ga Keresete ka botlalo mo botshelong jwa rona.—1 Petere 2:12, 21.
16. Boikaelelo jwa rona ke eng fa re ntse re leka go nna Bakeresete ba ba godileng, mme bo ka fitlhelelwa jang?
16 Thuto e e botlhokwa e re ka ithutang yone mo tlhalosong ya ga Paulo ke gore fa re batla go nna Bakeresete ba ba godileng sentle, boikaelelo jwa rona ga se go batla go nna le kitso le thutego e kgolo kana go lwela fela go nna le botho jo bo botoka. Ke gore moya wa Modimo o dire ka kgololesego mo botshelong jwa rona. Go nna batho ba ba godileng sentle semoyeng go ikaegile ka gore tsela ya rona ya go akanya le ditiro tsa rona di tsibogela kaelo ya moya wa Modimo go le kana kang. Re ka kgona go fitlhelela boikaelelo joo jang? Re tshwanetse go bula dipelo le megopolo ya rona gore di tlhotlhelediwe ke moya wa Modimo. Seno se akaretsa gore re nne gone mo dipokanong tsa Bokeresete le go nna le seabe mo go tsone ka metlha. Gape re tshwanetse go ithuta le go tlhatlhanya ka metlha ka Lefoko la Modimo, re letla gore melaometheo ya lone e kaele tsela e re dirisanang le batho ba bangwe ka yone le dilo tse re di tlhophang le ditshwetso tse re di dirang. Ga go pelaelo gore botswelelopele jwa rona bo tla bonala sentle.
Galaletsa Modimo ka go Dira Botswelelopele
17. Go dira botswelelopele go amana jang le go galaletsa Rraarona wa selegodimo?
17 Kwa bofelong, go dira gore botswelelopele jwa rona bo bonatshege ga go dire gore rona re galalediwe le go tlotlomadiwa, go na le moo, go dira gore go galalediwe Rraarona wa selegodimo, Jehofa, ene yo o dirang gore re kgone go gola semoyeng. Mo bosigong jwa pele ga Jesu a bolawa, o ne a raya barutwa ba gagwe a re: “Rre o galalediwa ke seno, gore lo nne lo ungwe maungo a mantsi lo bo lo itshupe lo le barutwa ba me.” (Johane 15:8) Barutwa ba ne ba galaletsa Jehofa ka maungo a moya le ka maungo a Bogosi a bodiredi jwa bone.—Ditiro 11:4, 18; 13:48.
18. (a) Ke thobo efe e e itumedisang e e dirwang gompieno? (b) Thobo eno e re leretse kgwetlho efe?
18 Gompieno, Jehofa o segofatsa batho ba gagwe fa ba ntse ba nna le seabe mo thobong ya semoya e e dirwang mo lefatsheng lotlhe. Jaanong go setse go fetile dingwaga di le dintsi batho ba basha ba ba ka tshwarang 300 000 ba ineela mo go Jehofa ngwaga le ngwaga mme ba bontsha boineelo jwa bone ka go kolobediwa mo metsing. Seno se a re itumedisa mme kwantle ga pelaelo se itumedisa le Jehofa. (Diane 27:11) Le fa go ntse jalo, gore seno se nne se itumedise Jehofa le go mo galaletsa, batho bano botlhe ba basha ba tshwanetse go ‘tswelela ba tsamaya ba le seoposengwe le [Keresete], ba namile medi e bile ba agiwa mo go ene gape ba tsepamisiwa mo tumelong.’ (Bakolosa 2:6, 7) Seno se dira gore batho ba Modimo ba lebane le kgwetlho e e dikarolo tse pedi. Mo letlhakoreng le lengwe, fa o sa tswa go kolobediwa, a o tla amogela kgwetlho ya gore o kgaratlhele gore “botswelelopele jwa gago bo bonatshege mo bathong botlhe”? Kafa letlhakoreng le lengwe, fa e le kgale o le mo boammaaruring a o tla amogela kgwetlho ya go sikara boikarabelo jwa go tlhokomela semoyeng batho ba ba sa ntseng ba le basha? Mo maemong ano ka bobedi, re kgona go bona sentle kafa go leng botlhokwa thata ka teng gore re kgaratlhele go gola sentle.—Bafilipi 3:16; Bahebera 6:1.
19. O ka nna le tshiamelo efe le masego afe fa o dira gore botswelelopele jwa gago bo bonatshege?
19 Batho botlhe ba ba dirang ka natla gore botswelelopele jwa bone bo bonatshege ba letetswe ke masego a magolo. Gopola mafoko ano a a kgothatsang a ga Paulo fa a sena go rotloetsa Timotheo gore a dire botswelelopele: “Nna o itlhokometse e bile o tlhokometse go ruta ga gago. Nna mo dilong tseno, gonne ka go dira seno o tla ipoloka o bo o boloka ba ba go reetsang.” (1 Timotheo 4:16) Fa ka tlhoafalo o dira gore botswelelopele jwa gago bo bonatshege, le wena o ka nna le tshiamelo ya go galaletsa leina la Modimo le go itumelela masego a gagwe.
A o A Gakologelwa?
• Go gola semoyeng go ka bontshiwa ka ditsela dife?
• Ke mofuta ofe wa kitso le tshedimosetso tse di bontshang go gola sentle?
• Go bontsha “maungo a moya” go bontsha jang gore o dira botswelelopele jwa semoya?
• Re tshwanetse go amogela kgwetlho efe fa re ntse re kgaratlhela go gola sentle?
[Dipotso Tsa Thuto]
[Setshwantsho mo go tsebe 13]
Go butswa kana go gola go lemotshega sentle
[Setshwantsho mo go tsebe 15]
Re dira botswelelopele jwa semoya fa re tsamaisana le boammaaruri jo bo senotsweng
[Setshwantsho mo go tsebe 17]
Thapelo e re thusa go tlhagisa “maungo a moya”