Ke Eng fa o Dumela Se o Se Dumelang?

Go dumela go ile ga tlhalosiwa e le go “amogela sengwe se le boammaaruri e le sa mmatota, kana sa sebele.” Universal Declaration of Human Rights ya lekgotla la Ditšhaba Tse di Kopaneng e sireletsa “tshwanelo ya mongwe le mongwe ya go nna le kgololesego ya go akanya, ya segakolodi le ya bodumedi.” Tshwanelo eno e akaretsa gore “motho a ka fetola bodumedi kana tumelo ya gagwe” fa a batla.

GONE mme, ke eng se se ka dirang gore motho a batle go fetola bodumedi kana tumelo ya gagwe? Gantsi boikutlo jo batho ba nang najo ke jwa gore “Ke na le dilo tse ke di dumelang mme ke kgotsofetse ka tsone.” Batho ba le bantsi ba akanya gore tota le ditumelo tse di phoso di ka se ka tsa gobatsa ope. Ka sekai, motho yo o dumelang gore lefatshe le sepapetla, a ka se ka a ikgobatsa kana a gobatsa motho ope o sele. Bangwe ba re: “Re tshwanetse ra dumela fela gore batho ga ba tshwane ka mogopolo.” A go botlhale go dira jalo ka metlha? A ngaka e ne e ka dumela gore ke fela gore ga e tshwane ka mogopolo le modirimmogo le ene fa modirimmogo yono a dumela gore a ka tlhamalalela fela kwa diphaposing tsa balwetse go ya go ba tlhatlhoba morago ga go nna a tshwara ditopo mo lefelong le go bewang ditopo mo go lone?

Fa go tla mo kgannyeng ya bodumedi, ditumelo tse di phoso di ile tsa baka kgobalo e kgolo thata go ralala ditiragalo. Akanya ka bosetlhogo jo bo neng jwa direga fa baeteledipele ba bodumedi ba “ne ba tlhotlheletsa batlhagafadi ba Bakeresete go nna le seabe mo thubakanyong e e setlhogo,” mo go se go neng go twe ke Botlhabanelatumelo jo bo Boitshepo jwa Metlha ya Bogare. Kana akanya ka masole a segompieno a “Bakeresete” mo ntweng ya bosheng ya selegae a “fela jaaka masole a metlha ya bogare a neng a kwadile maina a baitshepi mo matshwarong a ditšhaka tsa one, le bone ba kgomareditse setshwantsho sa Kgarebane kafa morago ga ditlhobolo tsa bone.” Batlhagafadi bano botlhe ba ne ba dumela gore ba dira se se siameng. Le fa go ntse jalo, ga go na pelaelo gore mo ditlhabanong le mo dintweng tseno le tse dingwe tsa bodumedi, go ne go na le sengwe se se sa siamang tota.

 Ke eng fa go na le tlhakatlhakano le kgotlhang e e kana kana? Karabo ya Baebele ke gore Satane Diabolo o “[tsietsa] lefatshe lotlhe le le nang le banni.” (Tshenolo 12:9; 2 Bakorintha 4:4; 11:3) Moaposetoloi Paulo o ne a tlhagisa gore ka maswabi, batho ba le bantsi ba bodumedi ba “tlile go nyelela” ka gonne ba tla tsiediwa ke Satane yo o tla “[dirang] ditshupo tsa maaka le dikgakgamatso.” Paulo a re batho ba ba ntseng jalo, ba tla gana go “amogela lorato lwa boammaaruri gore ba bolokwe” mme ka tsela eo ba tla “[foriwa] gore ba tle ba dumele maaka.” (2 Bathesalonika 2:9-12) O ka itlhokomolosa jang kotsi ya go dumela maaka? Gone mme, ke eng fa o dumela se o se dumelang?

A o Godisitswe o Dumela Jalo?

Gongwe o godisitswe o dumela dilo tse lelapa la gaeno le di dumelang. Seo e ka nna selo se se molemo. Modimo o batla gore batsadi ba rute bana ba bone. (Duteronome 6:4-9; 11:18-21) Ka sekai, lekawana Timotheo, o ne a solegelwa molemo thata ke go reetsa mmaagwe le mmaagwemogolo. (2 Timotheo 1:5; 3:14, 15) Dikwalo di re rotloetsa go tlotla dilo tse batsadi ba di dumelang. (Diane 1:8; Baefeso 6:1) A mme Mmopi wa gago o ne a raya gore o tshwanetse go dumela dilo fela ka go bo batsadi ba gago ba di dumela? Tota e bile, go kotsi go kgomarela dilo dingwe fela ka go bo kokomana e e fetileng e ne e di dumela le go di dira.—Pesalema 78:8; Amose 2:4.

Mosadi wa Mosamarea yo o neng a kopana le Jesu Keresete o ne a godisitswe a dumela mo bodumeding jwa gagwe jwa Bosamarea. (Johane 4:20) Jesu o ne a tlotla kgololesego ya gagwe ya go ka tlhopha se a neng a batla go se dumela, mme le fa go ntse jalo o ne a mmolelela jaana: “Lona lo obamela se lo sa se itseng.” Tota e bile, bontsi jwa dilo tsa bodumedi tse o neng a di dumela di ne di le phoso, mme Jesu o ne a mmolelela gore o tshwanetse a fetola dilo tse a di dumelang fa a batla go obamela Modimo ka tsela e a e amogelang—“ka moya le ka boammaaruri.” Go na le gore ene le ba bangwe ba ba tshwanang nae ba ngaparele ditumelo tse go se nang pelaelo gore ba ne ba di rata, fa nako e ntse e ya, ba ne ba tshwanetse go “utlwa tumelo” e e senotsweng ka Jesu Keresete.—Johane 4:21-24, 39-41; Ditiro 6:7.

A o Rutilwe go Dumela Se o Se Dumelang?

Barutisi le baitse ba dithutego tse di rileng ba tshwanelwa ke tlotlo e kgolo. Le fa go ntse jalo, hisitori e tletse ka dikai tsa barutisi ba bantsi ba go itsegeng gore ba ne ba le phoso tota. Ka sekai, mokwalahisitori Russell Bertrand o ne a bolela jaana malebana le dibuka tse pedi tse di buang ka dikgang tsa saense tse di kwadilweng ke rafilosofi wa Mogerika e bong Aristotle, “ga go na le fa e le polelwana e le nngwe mo dibukeng tseno tsoopedi e e ka tsewang e tsamaisana le saense ya motlha wa rona.” Tota le baitse ba gompieno gantsi ba dira diphoso tse dikgolo. Ka 1895 rasaense wa kwa Boritane e bong Lord Kelvin, o ne a bolela jaana a sa belaele: “Go ka se ka ga kgonega gore metšhine e e bokete thata e fofe.” Ka gone, motho yo o botlhale, ga a dumele fela gore selo se boammaaruri ka go bo morutisi mongwe yo o nang le taolo a bolela jalo.—Pesalema 146:3.

Re tlhoka go nna kelotlhoko fela jalo fa go tla mo thutong ya bodumedi. Moaposetoloi Paulo o ne a rutilwe sentle ke barutisi ba gagwe ba bodumedi mme o ne a “tlhoafetse mo gogolo thata mo dingwaong tsa [borraagwe].” Le fa go ntse jalo, tlhoafalo e a neng a na le yone ka ditumelo tsa dingwao tsa bagologolwane ba gagwe e ne ya mmakela mathata. E ne ya dira gore a ‘bogise phuthego ya Modimo a bo a e swafatse.’ (Bagalatia 1:13, 14; Johane 16:2, 3) Se se maswe le go feta, Paulo o ne a fetsa nako e telele a nna a “ragakaka ditlhabo,” a gana dilo tse di neng di tshwanetse go mo tlhotlheletsa gore a dumele mo go Jesu Keresete. Go ne go tlhokega gore Jesu ka boene a tseye kgato e kgolo go tlhotlheletsa Paulo gore a fetole dilo tse a di dumelang.—Ditiro 9:1-6; 26:14.

A o Tlhotlhelediwa ke Metswedi ya Tshedimosetso?

Gongwe o tlhotlheleditswe thata ke metswedi ya tshedimosetso go dumela se o se dumelang. Batho ba le bantsi ba itumelela go bo go na le kgololesego ya go bua mo motsweding wa tshedimosetso, ka go bo go ba thusa go bona tshedimosetso e e ka ba solegelang molemo. Le fa go ntse jalo, go na le maatla a magolo a gantsi a laolang motswedi wa tshedimosetso. Gantsi tshedimosetso ya teng ke e e gobelelang e e ka amang tsela e o akanyang ka yone ka tsela e e bofitlha.

 Mo godimo ga moo, metswedi ya tshedimosetso e na le go batla go ngoka kgatlhego ya batho ba bantsi ka go phasalatsa dilo tse di amang maikutlo kana tse di sa tlwaelegang. Dilo tse le ka motlha di neng di se kitla di buiwa kana di gatisiwa gore di utlwiwe ke batho ka kakaretso mo dingwageng di sekae tse di fetileng gone jaanong di tlwaelegile. Ka bonya ka bonya, boitshwaro jo bo tlhomameng bo a tlhaselwa le go senngwa. Tsela e batho ba akanyang ka yone e nna e sokama. Ba simolola go akanya gore “molemo ke bosula le bosula ke molemo.”—Isaia 5:20; 1 Bakorintha 6:9, 10.

Go Nna le Motheo o o Utlwalang wa go Dumela

Go thaya tumelo ya gago mo megopolong le mo difilosofing tsa batho go tshwana le go aga mo moshaweng. (Mathaio 7:26; 1 Bakorintha 1:19, 20) Ke kae he mo o ka thayang tumelo ya gago gone o tlhatswegile pelo? E re ka Modimo a go file botlhale jwa gore o kgone go sekaseka dilo tse di go dikologileng le go botsa dipotso tse di malebana le dilo tsa semoya, a ga go utlwale gore ke ene gape yo o ka kgonang go go bontsha tsela e e siameng ya go bona dikarabo tsa dipotso tsa gago? (1 Johane 5:20) Ee, o tla dira jalo tota! Mme o ka tlhomamisa jang gore ke eng se se leng boammaaruri kana sa mmatota mo dikgannyeng tsa kobamelo? Ga re etsaetsege go bolela gore Lefoko la Modimo e leng Baebele, ke yone fela motheo wa go dira seno.—Johane 17:17; 2 Timotheo 3:16, 17.

Mme mongwe a ka nna a re: “Iketle pele, a ga se bone batho ba ba tshotseng Baebele ba ba ileng ba baka dikgotlhang le tlhakatlhakano e ntsi mo dikgannyeng tsa lefatshe?” Gone ke boammaaruri gore baeteledipele ba bodumedi ba ba bolelang gore ba latela Baebele ba ile ba simolola megopolo e mentsi e e tlhakanyang tlhogo le e e ikganetsang. Tota mme, go ntse jalo ka gonne ga ba a thaya dilo tse ba di dumelang mo Baebeleng. Moaposetoloi Petere o ba tlhalosa e le “baporofeti ba maaka” ba ba tla tlhomang “makoko a a senyang.” Petere o bolela gore ka ntlha ya dilo tse ba di dirang, “tsela ya boammaaruri e tla buiwa ka go kgojwa.” (2 Petere 2:1, 2) Petere o tswelela pele ka go kwala jaana: “Re na le lefoko la boporofeti le tlhomamisitswe segolo; e bile lo dira sentle go le ela tlhoko jaaka lobone lo lo phatsimang mo lefelong le le lefifi.”—2 Petere 1:19; Pesalema 119:105.

Baebele e re kgothaletsa gore re sekaseke dilo tse re di dumelang go bona gore a di dumalana le se e se rutang. (1 Johane 4:1) Dimilione tsa babadi ba makasine ono ba ka kgona go supa gore go dira jalo go ile ga dira gore matshelo a bone a nne le bokao le gore a tlhomame. Ka gone, dira jaaka Baberea ba ba neng ba na le mogopolo o o bulegileng. ‘Tlhatlhoba Dikwalo ka kelotlhoko,’ pele o dira tshwetso ya gore o dumele eng. (Ditiro 17:11) Basupi ba ga Jehofa ba tla itumelela go go thusa go dira seno. Le gale, ke tshwetso ya gago gore o batla go dumela eng. Le fa go ntse jalo, go botlhale go tlhomamisa gore dilo tse o di dumelang ga di tlhotlhelediwe ke botlhale le dikeletso tsa motho, go na le moo, di tlhotlhelediwa ke Lefoko la Modimo la boammaaruri le le senotsweng.—1 Bathesalonika 2:13; 5:21.

[Ditshwantsho mo go tsebe 6]

O ka thaya dilo tse o di dumelang mo Baebeleng o tlhatswegile pelo